1. Kay ano nga iginpapasalamat mo an Biblia?

 IGINPAPASALAMAT ta gud kan Jehova nga Dios an Biblia! Pinaagi han Biblia, nagtatagana hiya hin maaramon nga sagdon nga makakabulig ha aton nga malamposan an aton mga problema yana. Naghahatag liwat hiya ha aton hin makalilipay nga paglaom ha tiarabot. Labaw ha ngatanan, ginagamit ni Jehova an Biblia basi isumat an iba-iba nga bahin han iya personalidad. Kon aton ginpapamalandong an iya mag-opay nga kalidad, nababantad gud an aton kasingkasing ngan karuyag ta magin duok nga sangkay han aton Dios.—Sal. 25:14.

2. Ha ano nga mga paagi nagpakilala hi Jehova ha mga tawo?

² Karuyag ni Jehova nga makilala hiya han mga tawo. Han naglabay, nagpakilala hiya pinaagi hin mga inop, mga bisyon, ngan mga anghel pa ngani. (Num. 12:6; Buh. 10:3, 4) Pero maaadman ba ini nga mga inop, bisyon, o mensahe tikang ha mga anghel kon diri ini igsusurat? Salit nagsugo hi Jehova hin kalalakin-an nga “isurat ha usa nga libro” an karuyag niya nga mahibaroan ta. (Jer. 30:2) Tungod kay “an dalan han tinuod nga Dios perpekto,” makakasiguro kita nga maopay gud ngan makakabulig ha aton ini nga paagi han pakigkomunikar.—Sal. 18:30.

3. Paonan-o ginsiguro ni Jehova nga mapreserbar an Biblia? (Isaias 40:8)

³ Basaha an Isaias 40:8. An Biblia yinukot ka tuig na nga naghahatag hin maopay nga giya ha matinumanon nga kalalakin-an ngan kababayin-an. Paonan-o ito nagin posible? Kon huhunahunaon, an Kasuratan maiha na nga ginrekord ha nadudunot nga mga materyales, salit waray na yana an bisan usa han orihinal nga mga dokumento. Pero ginsiguro ni Jehova nga magkaada mga kopya hiton sagrado nga mga sinurat. Bisan kon an mga parakopya diri perpekto, metikuloso gud hira. Pananglitan, ini an ginsurat han usa nga eskolar may kalabotan ha Hebreo nga Kasuratan:  “Baga hin masisiring gud nga waray na iba pa nga kadaan nga sinurat an naipasa hin husto gud.” Salit bisan kon maiha na nga iginsurat an Biblia ha nadudunot nga mga materyales, ngan diri perpekto an mga parakopya, makakasiguro kita nga an mga pulong nga aton nababasa ha aton Biblia yana nagsusumat la gihapon han panhunahuna han Awtor hito, hi Jehova.

4. Ano an aton hihisgotan hini nga artikulo?

⁴ Hi Jehova an gintitikangan han “tagsa nga maopay nga regalo ngan [han] tagsa nga perpekto nga hatag.” (San. 1:17) An Biblia usa han pinakamaopay nga mga regalo ni Jehova ha aton. An usa nga regalo may iginsusumat mahitungod ha naghatag hito—nga kilala gud kita niya ngan maaram hiya han aton mga panginahanglan. Sugad liwat hito an naghatag han Biblia. Kon aton gin-aadman ini nga regalo, damu an aton mahibabaroan parte kan Jehova. Mahibabaroan ta nga kilala gud kita niya ngan maaram hiya han aton panginahanglan. Hini nga artikulo, aton hihisgotan kon paonan-o iginpapakita han Biblia an tulo han mga kalidad ni Jehova: an iya kinaadman, hustisya, ngan gugma. Siyahan, hisgotan naton an mga paagi nga iginpapakita han Biblia an kinaadman han Dios.

5. Ano an usa nga paagi nga iginpapakita han Biblia an kinaadman han Dios?

⁵ Maaram hi Jehova nga kinahanglan ta an iya maaramon nga sagdon. Ngan an iya regalo, an Biblia, puno han iya kinaadman. An sagdon hito may positibo nga epekto ha mga tawo. An Biblia nakakagbag-o han kinabuhi. Han ginsurat an siyahan nga mga libro han Biblia, ginsidngan ni Moises an katawohan han Dios, an mga Israelita: “Diri ini waray pulos nga pulong para ha iyo, lugod nangangahulogan ito han iyo kinabuhi.” (Deut. 32:47) Adton nasugot ha Kasuratan mahimo magkaada malampuson ngan malipayon nga kinabuhi. (Sal. 1:2, 3) An gahum han Pulong han Dios ha pagpauswag ha kinabuhi han mga tawo waray mabag-o ha paglabay han panahon. Pananglitan, ha jw.org, ha serye nga “An Biblia Nakakagbag-o han Kinabuhi,” damu an imo mababasa nga mga eksperyensya nga nagpapakita nga an gahum han Biblia nagios yana ha mga natoo hito.—1 Tes. 2:13.

6. Kay ano nga makakasiring kita nga an Biblia waray kapariho nga libro?

⁶ Waray iba nga libro nga pariho ha Pulong han Dios. Kay ano? Kay an Awtor hito, hi Jehova nga Dios, makagarahum-ha-ngatanan, buhi ha kadayonan, ngan diri-matupngan an kinaadman. Damu nga libro an nagpapabilin bisan kon patay na an mga awtor hito, pero an sagdon hito nga mga libro agsob nga diri na napupulsan ha paglabay han panahon. Ha luyo nga bahin, an maaramon nga mga prinsipyo nga mababasa ha Biblia pirme epektibo; nakabulig ito ha mga tawo ha ngatanan nga henerasyon. Kon ginbabasa ta iton sagrado nga libro ngan ginpapamalandong an aton nahibabaroan, ginagamit han Awtor hito an iya gamhanan nga baraan nga espiritu basi buligan kita nga masabtan kon paonan-o maiaaplikar ha aton kinabuhi an sagdon han Biblia. (Sal. 119:27; Mal. 3:16; Heb. 4:12) Oo, karuyag ka gud buligan han buhi nga Awtor han Biblia. Dapat gud ini magpagios ha aton nga regular nga basahon an Biblia!

7. Paonan-o gin-urosa han Biblia an katawohan han Dios han naglabay?

⁷ Usa pa nga maopay gud nga paagi nga iginpapakita han Biblia an kinaadman han Dios amo an pagbulig hito ha katawohan han Dios nga magkaurosa. Han sinulod an mga Israelita ha Tuna nga Iginsaad, inukoy hira ha iba-iba nga lugar. May mga nagin parapangisda, an iba nag-ataman hin mga hayop, ngan an iba naman nagin parag-uma. An mga Israelita nga naukoy  ha usa nga lugar masayon la unta mawad-an hin interes ha kaopayan han mga igkasi-Israelita nga naukoy ha iba nga bahin han nasud. Pero ginsugo ni Jehova an mga Israelita nga magkatirok ha iba-iba nga okasyon basi pamatian an pagbasa ngan pagsaysay han iya sinurat nga Pulong. (Deut. 31:10-13; Neh. 8:2, 8, 18) Imadyina kon ano an inabat han usa nga matinumanon nga Israelita han inabot hiya ha Jerusalem ngan nakita an minilyon nga iya igkasi-magsiringba tikang ha tanan nga bahin han nasud! Hito nga paagi, ginbuligan ni Jehova an iya katawohan nga magpabilin nga nagkakaurosa. Ha urhi, han naestablisar an Kristiano nga kongregasyon, ginkompwesto ito hin kalalakin-an ngan kababayin-an nga iba-iba an linggwahe ngan estado han kinabuhi. Pero tungod han ira gugma ha Kasuratan, nagkakaurosa hira ha pagsingba ha tinuod nga Dios. An mga nagin tumuroo makakasabot la han Pulong han Dios ha bulig han ira mga igkasi-magsiringba ngan pinaagi ha pakigkatirok ha ira.—Buh. 2:42; 8:30, 31.

8. Paonan-o gin-uurosa han Biblia an katawohan ni Jehova yana?

⁸ Padayon nga gintututdoan ngan gin-uurosa han aton maaramon nga Dios an iya katawohan pinaagi han Biblia. Ito an gintitikangan han espirituwal nga pagkaon nga nai-enjoy ta gud. Regular kita nga nagtuturotarampo ha aton mga katirok, asembleya, ngan kombensyon basi pamatian an pagbasa, pagsaysay, ngan paghisgot han Kasuratan. Salit importante gud an Biblia kay ginagamit ito ni Jehova basi buligan an iya  katawohan nga “magsingba ha iya nga nagkakaurosa.”—Zep. 3:9.

9. Ano nga kalidad an ginkikinahanglan para masabtan an mensahe han Biblia? (Lucas 10:21)

⁹ Pansina an usa pa nga ebidensya han kinaadman ni Jehova. Damu nga bahin han Biblia an iya iginpasurat ha paagi nga masasabtan la han mapainubsanon nga mga magbarasa. (Basaha an Lucas 10:21.) An mga tawo ha bisan diin nagbabasa han Biblia. Usa nga eskolar an nagsiring nga mas damu an nagbabasa han Biblia, ngan ginbabasa nira ito hin mas maopay kompara ha iba nga libro. Pero an mga mapainubsanon la an nakakasabot gud ngan nag-aaplikar han ginsisiring hito.—2 Cor. 3:15, 16.

10. Ano an usa pa nga paagi nga iginpapakita han Biblia an kinaadman ni Jehova?

¹⁰ May usa pa nga paagi nga makikita naton ha Biblia an kinaadman ni Jehova. Gin-gagamit ni Jehova an Kasuratan diri la ha pagtutdo ha aton sugad nga grupo kondi ha pagtutdo ngan pagliaw liwat ha aton sugad nga indibiduwal. Naaabat naton ngatanan an interes ni Jehova ha tagsa ha aton kon ginbabasa naton an iya Pulong. (Isa. 30:21) Kon may problema ka, ano kaagsob ka nagbabasa han Kasuratan ngan may nakikita ka nga bersikulo nga baga hin ginsurat para gud la ha imo? Kon huhunahunaon, an Biblia naruruyagan han minilyon nga tawo. Kay ano man nga napapanahon an impormasyon dida hito ngan haom gud ha imo panginahanglan? Posible la ini kay an Awtor han Biblia amo an pinakamaaramon nga Persona ha uniberso.—2 Tim. 3:16, 17.

11. Paonan-o iginpakita han Dios nga waray hiya pinaurog han ginsusurat an Biblia?

¹¹ An usa pa nga kalidad ni Jehova amo an hustisya. (Deut. 32:4) Konektado gud ito ha pagin waray pinaurog, ngan hi Jehova waray ginpapaurog. (Buh. 10:34, 35; Roma 2:11) An iya pagin waray pinaurog makikita ha mga linggwahe nga gin-gamit ha pagsurat han Biblia. Kadam-an han siyahan nga 39 nga libro han Biblia an iginsurat ha Hebreo, nga masayon masabtan han katawohan han Dios hito nga panahon. Pero han siyahan nga siglo C.E., Griego an linggwahe han kadam-an, salit an kataposan nga 27 nga libro han Biblia iginsurat dida hito nga linggwahe. Waray ipasurat ni Jehova an iya Pulong ha usa la nga linggwahe. Yana, an haros walo ka bilyon nga mga tawo ha tuna nagyayakan hin damu nga linggwahe. Paonan-o an sugad kadamu nga tawo mahibabaro parte kan Jehova?

12. Ano an usa nga paagi nga natutuman an Daniel 12:4 hinin kataposan nga mga adlaw?

¹² Pinaagi kan propeta Daniel, hi Jehova nagsaad nga ha panahon han kataposan, “magigin hura an tinuod nga kahibaro” nga mababasa ha Biblia. Damu an makakasabot hito. (Basaha an Daniel 12:4.) Usa nga paagi nga nagin hura an sugad nga kahibaro amo an paghubad, pagpublikar, ngan pagpanaltag hin mga Biblia ngan mga literatura nga nakabase ha Biblia. An Biblia an libro nga may pinakadamu nga hubad ngan naipanaltag ha pinakadamu nga tawo ha kalibotan. An mga hubad han Biblia nga iginpublikar han komersyal nga mga kompanya usahay mahal hinduro. Naihubad na han katawohan ni Jehova an bug-os nga Pulong han Dios o an bahin hito ha sobra 240 nga linggwahe, ngan bisan hin-o puydi magkaada kopya nga waray bayad. Salit an mga tawo ha ngatanan nga nasud nahibabaro han “maopay nga sumat han Ginhadian” antes umabot an kataposan. (Mat. 24:14) An aton Dios nga may hustisya naruruyag nga tagan an pinakadamu nga tawo tubtob nga posible hin oportunidad nga makilala hiya pinaagi ha pagbasa han iya Pulong. Tungod ito kay nahigugma gud hiya ha aton ngatanan.

13. Kay ano nga makakasiring kita nga iginpapakita han Biblia an gugma ni Jehova? (Juan 21:25)

¹³ An Biblia naghahatag hin ebidensya han nangunguna nga kalidad han Awtor hito—gugma. (1 Juan 4:8) Pansina kon ano an igin-api ngan waray ig-api ni Jehova ha Biblia. Igintagana niya kon ano gud an aton kinahanglan basi magkaada maopay nga relasyon ha iya, magkaada malipayon nga kinabuhi yana, ngan makarawat an kinabuhi nga waray kataposan. Pero tungod kay hinigugma kita ni Jehova, waray kita niya paurani hin dugang nga mga detalye nga diri naton kinahanglan.—Basaha an Juan 21:25.

14. Ha ano pa nga paagi makikita ha Biblia an gugma han Dios?

¹⁴ Iginpakita liwat ni Jehova an iya gugma pinaagi ha pakigkomunikar ha aton ha paagi nga naghahatag ha aton hin dignidad. Ha Biblia, diri kita niya gintatagan hin hilaba nga lista han mga surundon nga nagsusumat ha aton kon ano an puydi o diri ta puydi buhaton ha ngatanan nga bahin han aton kinabuhi. Lugod, ginbubuligan kita niya nga gamiton an aton abilidad ha paghunahuna pinaagi han tinuod nga mga eksperyensya, eksayting nga mga tagna, ngan praktikal nga mga sagdon. Hini nga mga paagi, an Pulong han Dios nagpapagios ha aton nga kinasingkasing nga higugmaon ngan sundon hiya.

15. (a) Paonan-o iginpapakita ni Jehova nga interesado hiya hadton nagbabasa han iya Pulong? (b) Ha piktyur, hin-o nga mga karakter ha Biblia an ginpapamalandong han bata nga babaye, han batan-on nga brother, ngan han edaran nga sister? (Gen. 39:1, 10-12; 2 Hadi 5:1-3; Luc. 2:25-38)

¹⁵ Iginsusumat han Biblia nga interesado gud hi Jehova ha aton. Paonan-o? An iya Pulong puno hin mga eksperyensya nga nagpapakita han emosyon han tawo. Nasasabtan ta an  inaabat han mga karakter ha Biblia kay mga tawo hira nga “may mga pagbati nga pariho han aton.” (San. 5:17) Labaw ha ngatanan, pinaagi ha pag-obserbar han iya pagtratar ha mga tawo nga pariho ha aton, nagigin mas klaro ha aton nga “hi Jehova malumo hinduro magpalangga ngan maloloy-on.”—San. 5:11.

16. Ano an aton nahibabaroan mahitungod kan Jehova kon nababasa ta ha Biblia an mga indibiduwal nga nakahimo hin mga sayop? (Isaias 55:7)

¹⁶ May usa pa nga paagi nga iginpapakita han Biblia an gugma ni Jehova ha aton. An Kasuratan nagpapasarig ha aton nga diri kita babayaan han aton Dios kon nakakahimo kita hin mga sayop. An mga Israelita pauroutro nga nakasala kan Jehova; pero han sinsero hira nga nagbasol, ginpasaylo hira han Dios. (Basaha an Isaias 55:7.) An mga Kristiano ha siyahan nga siglo maaram liwat nga hinigugma hira han Dios. Iya gin-giyahan hi apostol Pablo nga aghaton an iya mga igkasi-tumuroo nga ‘pasayloon ngan liawon’ an usa nga lalaki nga nagbinuhat hin seryoso nga sala pero nagbasol na. (2 Cor. 2:6, 7; 1 Cor. 5:1-5) Urusahon gud nga waray isalikway ni Jehova an iya mga magsiringba tungod la kay nakasala hira! Lugod, mahigugmaon nga ginbuligan niya hira, gintadong, ngan gin-aghat nga bumalik ha iya. Nagsasaad hiya nga bubuhaton liwat niya ito yana ha ngatanan nga nakakasala nga nagbabasol.—San. 4:8-10.

17. Kay ano nga an Biblia maopay gud nga regalo?

¹⁷ Gintagan kita ni Jehova hin makaruruyag nga regalo. Kay ano nga maopay gud an iya Pulong? Sugad han aton nahibaroan, an Biblia nagsusumat han kinaadman, hustisya, ngan gugma han Dios. Ginpapamatud-an hini nga libro nga karuyag ni Jehova nga makilala naton hiya. Karuyag niya nga magin sangkay kita niya.

18. Paonan-o ta maipapakita nga iginpapasalamat naton an “maopay nga regalo” ni Jehova, an Biblia?

¹⁸ Diri naton karuyag ibalewaray an “maopay nga regalo” nga Pulong han Dios. (San. 1:17) Salit padayon ta nga ipakita nga iginpapasalamat naton ito. Mahihimo naton ini pinaagi ha pagbasa ngan pagpamalandong ha sagrado nga mga pulong hito. Ha pagbuhat hini, makakasiguro kita nga an harangdon nga Awtor hito magbibendisyon ha aton mga paningkamot ngan mahiaagian ta “an kahibaro mahitungod ha Dios.”—Prob. 2:5.