1, 2. (a) Kay ano nga mapaparig-on kita han ehemplo nira Noe, Daniel, ngan Job? (b) Ha ano nga mga kahimtang iginsurat ni Esekiel an mga pulong ha Esekiel 14:14?

NAATUBANG ka ba hin mga pagsari, sugad han sakit, problema ha pinansyal, o pagtimaraot? Nakukurian ka ba usahay nga magpabilin nga malipayon ha pag-alagad kan Jehova? Kon oo, mapaparig-on ka han ehemplo nira Noe, Daniel, ngan Job. Diri hira mga perpekto, ngan inatubang hira hin damu han mga pagsari nga aton naieksperyensyahan; an pipira hini nagin hinungdan pa ngani nga mameligro an ira kinabuhi. Bisan pa hito, gintipigan nira an ira integridad, salit para ha Dios maopay hira nga susbaranan han pagtoo ngan pagkamasinugtanon.—Basaha an Esekiel 14:12-14.

² An mga pulong han aton tema nga teksto iginsurat ni Esekiel ha Babilonya han 612 B.C.E. * (Esek. 1:1; 8:1) Hito nga panahon, hirani na  matuman an igintagna nga kabungkagan may kalabotan ha apostata nga Jerusalem, nga nahitabo han 607 B.C.E. Pipira la nga indibiduwal an may-ada han mga kalidad nga pariho han kalidad nira Noe, Daniel, ngan Job, salit ito la nga mga indibiduwal an nakakarawat han tigaman para ha katalwasan. (Esek. 9:1-5) Kaupod hito hira Baruk, Ebed-melek, ngan an mga Rekabita.

3. Ano an aton hihisgotan hini nga artikulo?

³ Sugad man yana, adton mga matadong la ha mata ni Jehova—mga tawo nga pariho kanda Noe, Daniel, ngan Job—an titigamnan para ha katalwasan kon bungkagon na inin maraot nga sistema. (Pah. 7:9, 14) Salit usisahon naton kon kay ano nga gin-gamit ni Jehova ini nga kalalakin-an sugad nga ehemplo han pagkamatadong. Samtang ginhihisgotan naton an tagsa nga indibiduwal, magpupokus kita ha (1) kon ano nga mga pagsari an iya gin-atubang ngan (2) kon paonan-o naton masusubad an iya pagtoo ngan pagkamasinugtanon.

4, 5. Ano nga mga pagsari an gin-atubang ni Noe, ngan kay ano nga makatirigamnan an iya pagin mapailubon?

⁴ Mga pagsari nga gin-atubang ni Noe. Ha panahon han lolo ha tuhod ni Noe nga hi Enoc, an mga tawo nagin magraot hinduro. Nagyayakan pa ngani hira hin mga “makangingirhat nga butang” kontra kan Jehova. (Jud. 14, 15) Nagtitikaduro an kamadarahog. Ngani, ha panahon ni Noe, “an tuna napuno hin panraugdaug,” o kamadarahog. An magraot nga anghel nagpakatawo, nangasawa, ngan nagkaada higante ngan madarahog nga mga anak. (Gen. 6:2-4, 11, 12) Pero iba gud hi Noe ha ira. ‘Hi Noe nakaagi hin grasya ha mga mata ni Jehova. Matadong hiya nga tawo, ngan putli ha iya katulinan. Naglakat hiya upod han Dios.’—Gen. 6:8, 9.

⁵ Hunahunaa kon ano an iginpapakita hito nga mga pulong mahitungod hinin matadong nga tawo. Siyahan, tigamni nga ‘naglakat hi Noe kaupod han Dios’ hiton maraot nga kalibotan antes han Baha diri la ha sulod hin 70 o 80 ka tuig—an kahilawig han kinabuhi han damu han mga tawo yana—kondi ha sulod hin haros 600 ka tuig! (Gen. 7:11) Ikaduha, diri pariho ha aton yana, waray hiya kongregasyon han mga igkasi-magsiringba—bisan an iya kabugtoan ha unod—nga makakabulig ha iya ha espirituwal. *

6. Paonan-o iginpakita ni Noe an iya daku nga kaisog?

⁶ Waray makontento hi Noe nga basta la magin maopay nga tawo. Nagin madasigon liwat hiya nga “parasangyaw han katadongan,” maisugon nga iginpapahayag ha publiko an iya pagtoo kan Jehova. (2 Ped. 2:5) Hi apostol Pablo nagsurat: “Tungod hito nga pagtoo ginhukman [ni Noe] an kalibotan.” (Heb. 11:7) Salit sigurado nga inatubang hi Noe hin mga pagtamay ngan pagkontra, bangin gintarhog pa ngani hiya nga papasakitan hiya. Pero waray hiya ‘mahadlok ha tawo.’ (Prob. 29:25) Lugod, may-ada hiya han kaisog nga iginhahatag ni Jehova ha iya matinumanon nga mga surugoon.

7. Ano nga mga pagsari an gin-atubang ni Noe han nagtukod hiya han arka?

⁷ Katapos hin sobra 500 ka tuig nga paglakat ni Noe kaupod han Dios, ginsugo hiya ni Jehova nga magtukod han arka basi matalwas an mga tawo ngan mga hayop. (Gen. 5:32; 6:14) Posible gud nga makuri ito nga proyekto—diri la ha punto de bista han pagtukod. Maaram gud hi Noe nga mas tatamayon ngan kukontrahon hiya tungod hini. Bisan pa hito, iginpakita niya an pagtoo ngan pagkamasinugtanon. ‘Ginbuhat niya an ngatanan nga ginsugo ha iya han Dios.’—Gen. 6:22.

8. Paonan-o iginpakita ni Noe an iya pagsarig kan Jehova sugad nga iya Paratagana?

⁸ Usa liwat nga pagsari kan Noe an pagtagana han materyal nga panginahanglan han iya asawa ngan mga anak. Antes han Baha, an mga tawo kinahanglan magin maduruto ha pagtrabaho basi magkaada pagkaon, ngan sigurado nga ginbuhat liwat ito ni Noe. (Gen. 5:28, 29) Pero waray hiya magpokus ha materyal nga mga butang, kondi ha  Dios. Bisan han nagtutukod hiya han arka, nga posible nga inabot hin 40 o 50 ka tuig, nagpabilin hiya nga nakapokus ha espirituwal. Ngan padayon niya ito nga ginbuhat ha sumunod nga 350 ka tuig katapos han Baha. (Gen. 9:28) Maopay gud hiya nga ehemplo han pagtoo ngan pagkamasinugtanon!

9, 10. (a) Paonan-o naton masusubad an pagtoo ngan pagkamasinugtanon ni Noe? (b) Kon susundon mo an mga suruklan han Dios, makakasarig ka ha ano?

⁹ Kon paonan-o naton masusubad an pagtoo ngan pagkamasinugtanon ni Noe. Mahihimo naton ito pinaagi ha pagsuporta ha pagkamatadong han Dios, ha pagin diri bahin ha kalibotan ni Satanas, ngan ha padayon nga pag-una han mga buruhaton han Ginhadian. (Mat. 6:33; Juan 15:19) Tungod han aton paagi han pagkinabuhi, sigurado nga diri malilipay ha aton an kalibotan. Ngani, bisan yana, tungod han aton marig-on nga pagsunod ha mga balaud han Dios, sugad han mahitungod ha sekso ngan pag-asawa, may mga tawo ha pipira nga nasud nga nagyayakan hin negatibo mahitungod ha aton. (Basaha an Malakias 3:17, 18.) Pero pariho kan Noe, nahahadlok kita kan Jehova, diri ha mga tawo. Maaram kita nga hiya gud la an naghahatag hin kinabuhi nga waray kataposan.—Luc. 12:4, 5.

¹⁰ Pero kumusta ka man? Padayon ka ba nga ‘maglalakat kaupod han Dios,’ bisan kon pakarauton ka o tamayon o kon makaeksperyensya ka hin makuri nga panginabuhi nga magsasari han imo pagsarig kan Jehova sugad nga Paratagana? Kon susubaron mo an pagtoo ngan pagkamasinugtanon ni Noe, makakasarig ka nga mamangnoan ka ni Jehova.—Fil. 4:6, 7.

11. Ano nga makuri nga mga pagsari an gin-atubang ni Daniel ngan han iya tulo nga kaupod ha Babilonya? (Kitaa an retrato ha tinikangan hini nga artikulo.)

¹¹ Mga pagsari nga gin-atubang ni Daniel. Nagkinabuhi hi Daniel sugad nga bihag ha Babilonya, usa nga syudad nga puno hin idolatriya ngan espiritismo. Dugang pa, ginmiminos han mga Babilonyahanon an mga Judio, gintatamay hira ngan an ira Dios nga hi Jehova. (Sal. 137:1, 3) Sigurado nga nasakitan gud hini an matinumanon nga mga Judio pariho kan Daniel! Sugad man, nakasentro an atensyon han damu nga tawo kan Daniel ngan han iya tulo nga kaupod nga hira Hanania, Misael, ngan Asaria tungod kay tututdoan hira basi magserbi ha hadi. Bisan an ira pagkaon nakaandam na para ha ira. Ngani, waray pag-iha nagin pagsari kan Daniel an mahitungod han pagkaon ngan irimnon nga iginsiserbi ha ira tungod kay determinado hiya nga ‘diri maghugaw ha iya ngahaw han kanan hadi mga magrasa [nga pagkaon].’—Dan. 1:5-8, 14-17.

12. (a) Ano an mag-opay nga kalidad nga iginpakita ni Daniel? (b) Paonan-o gintagad ni Jehova hi Daniel?

¹² Posible nga usa liwat nga diri abat nga pagsari kan Daniel an iya talagsahon nga mga abilidad, nga nagresulta han iya pakakarawat hin espesyal nga mga pribilehiyo. (Dan. 1:19, 20) Pero imbes nga magin hambog ngan maghunahuna nga husto pirme an iya opinyon, nagpabilin hiya nga mapainubsanon, iginhahatag pirme kan Jehova an kadayawan. (Dan. 2:30) Ngani, batan-on pa hi Daniel han gin-unabi hiya ni Jehova sugad nga angayan nga ehemplo han pagkamatadong, kaupod nira Noe ngan Job. Husto ba an pagsarig han Dios kan Daniel? Oo! Hi Daniel padayon nga nagpakita hin pagtoo ngan pagkamasinugtanon tubtob ha iya kamatay. Ngani, posible nga hirani na hiya mag-100 anyos han ginsidngan hiya han anghel han Dios hinin makaruruyag nga mga pulong: “O Daniel, ikaw tawo nga hinigugma gud.”—Dan. 10:11.

13. Ha ano nga paagi nagin bendisyon hi Daniel ha iya mga igkasi-Judio?

¹³ Tungod kay nakarawat ni Daniel an pabor han Dios, nagin usa hiya han hitaas nga opisyal ilarom han pagmando han Babilonya ngan han Medo-Persia. (Dan. 1:21; 6:1, 2) Posible nga ginmaniobra ni Jehova an mga butang hini nga paagi basi magin bendisyon hi Daniel ha iya katawohan, pariho kan Jose ha Ehipto ngan kanda Ester ngan Mordekay ha Persia. * (Dan. 2:48) Sigurado nga naliaw gud an  bihag nga mga Judio, pati na hi Esekiel, nga makita kon paonan-o nagios an kamot ni Jehova ha pagbulig ha ira!

14, 15. (a) Ha ano nga mga paagi pariho an aton kahimtang ha kahimtang ni Daniel? (b) Ano an mahibabaroan han mga kag-anak yana ha ehemplo han mga kag-anak ni Daniel?

¹⁴ Kon paonan-o naton masusubad an pagtoo ngan pagkamasinugtanon ni Daniel. Yana, sugad kita hin mga estranghero hini nga kalibotan diin komon an karaotan ngan buwa nga pagsingba tungod han impluwensya han Babilonya nga Gamhanan, an imperyo han buwa nga relihiyon ha kalibotan, an “urukyan . . . han mga demonyo.” (Pah. 18:2) Tungod hito naiiba kita ha kadam-an, ngan mahimo pa ngani kita magin puntirya han mga pagtamay. (Mar. 13:13) Salit pariho kan Daniel, magin duok kita kan Jehova nga aton Dios. Kon mapainubsanon kita, masinugtanon, ngan masarig kan Jehova, magigin presyoso liwat kita ha iya.—Hag. 2:7.

¹⁵ An mga kag-anak yana may mahibabaroan ha ehemplo han mga kag-anak ni Daniel. Ano ito? Bisan pa han duro nga karaotan ha Juda han panahon nga nagtutubo hi Daniel, nagdaku hiya nga may gugma ha Dios. Syempre, diri ito kay basta la nga nahitabo. Iginpapakita hito nga ginbansay hin maopay hi Daniel han iya mga kag-anak. (Prob. 22:6) Bisan an iya ngaran nga Daniel, nga nangangahulogan hin “An Dios an Akon Hukom,” nagpapakita nga mahadlukon ha Dios an iya mga kag-anak. (Dan. 1:6) Salit mga kag-anak, ayaw pag-undang ha pagtutdo ha iyo mga anak, lugod magin mapailubon ha pagtutdo ha ira. (Efe. 6:4) Pag-ampo liwat kaupod nira ngan para ha ira. Kon nangangalimbasog kamo nga ipasilsil ha ira kasingkasing an kamatuoran ha Biblia, gintatagan niyo hi Jehova hin rason nga bendisyonan kamo.—Sal. 37:5.

16, 17. Ano nga mga pagsari an gin-atubang ni Job (a) han riko hiya ngan ginrirespeto? (b) han nag-aantos hiya?

¹⁶ Mga pagsari nga gin-atubang ni Job. Naeksperyensyahan ni Job an magkaiba gud nga kahimtang han kinabuhi. Antes han mga pagsari ha iya, hiya an “gidadakui [o, pinakaharangdon] han ngatanan nga anak ha sinirangan.” (Job 1:3) Riko hiya, kilala, ngan ginrirespeto. (Job 29:7-16) Bisan pa hito ngatanan, waray hi Job magin mapahitas-on o umabat nga diri na niya kinahanglan an Dios. Ngani, gintawag hiya ni Jehova nga “akon sorogoon,” ngan nagsiring mahitungod ha iya: ‘Hiya hingpit ngan maligdong nga tawo, nahahadlok ha Dios, ngan natalikod ha karaotan.’—Job 1:8.

¹⁷ Ha sulod hin halipot la nga panahon, tigda nga nagbag-o an kinabuhi ni Job. Nagin pobre hiya ngan nagin desperado. Maaram kita kon hin-o an hinungdan hito, an parapakaraot nga hi Satanas nga buwa nga nag-akusar nga nag-aalagad la hi Job ha Dios tungod han personal nga mga bentaha. (Basaha an Job 1:9, 10.) Waray ni Jehova igbalewaray iton maraot nga akusasyon kan Job. Lugod, gintagan niya hi Job hin higayon nga pamatud-an  an iya integridad ngan ipakita nga sinsero ngan kinasingkasing an iya pagsingba ha Dios.

18. (a) Kay ano nga napaparig-on ka ha iginpakita nga integridad ni Job? (b) Ano an aton mahibabaroan mahitungod kan Jehova ha iya paagi han pagtratar kan Job?

¹⁸ Nagpahinabo hi Satanas hin sunod-sunod nga madarahog nga pag-atake kontra kan Job ha paagi nga huhunahunaon ni Job nga an Dios an angay basulon hito. (Job 1:13-21) Katapos, inabot an tulo nga diri tinuod nga paraliaw ngan ginyaknan hi Job hin nakakasakit nga mga pulong. Nagsiring hira nga iginhahatag la han Dios kan Job an angay ha iya! (Job 2:11; 22:1, 5-10) Bisan pa hito, gintipigan ni Job an iya integridad. Oo, may mga panahon nga nakagyakan hiya hin waray anay niya hunahunaa, pero maaram hi Jehova han kasakit nga inaabat ni Job. (Job 6:1-3) Nakita han Dios inin masurub-on hinduro nga tawo nga waray gud bumaya ha Iya, bisan kon ginpakurian ngan duro nga gin-insulto ni Satanas hi Job. Kondi han natapos an mga pagsari kan Job, gintagan hiya ni Jehova hin doble han kadamu han iya mga gintatag-iya hadto ngan ginpahilawig pa hin 140 ka tuig an iya kinabuhi. (San. 5:11) Durante hito nga panahon, padayon nga iginhatag niya kan Jehova an eksklusibo nga debosyon. Kay ano nga makakasiguro kita hito? Tungod kay ginatos ka tuig na nga patay hi Job han iginsurat ni Esekiel an mga pulong han aton tema nga teksto.

19, 20. (a) Paonan-o naton masusubad an pagtoo ngan pagkamasinugtanon ni Job? (b) Paonan-o naton maipapakita an pagpaid han Dios ha paagi han aton pagtratar ha iba?

¹⁹ Kon paonan-o naton masusubad an pagtoo ngan pagkamasinugtanon ni Job. Anoman an aton kahimtang, padayon naton nga unahon hi Jehova ha aton kinabuhi ngan bug-os-kasingkasing nga sumarig ngan sumugot ha iya. Oo, mas damu gud an aton rason nga buhaton ito kon itanding kan Job! Hunahunaa ini: Damu an aton nahibabaroan mahitungod kan Satanas ngan han iya mga taktika. (2 Cor. 2:11) Mapasalamaton kita nga tungod han Biblia, labi na han libro han Job, nahibabaro kita kon kay ano nga gintutugotan han Dios an pag-antos. Basado ha tagna ni Daniel, nasasabtan naton nga an Ginhadian han Dios usa nga gobyerno nga magmamando ha bug-os nga kalibotan nga an hadi hito amo hi Kristo Jesus. (Dan. 7:13, 14) Ngan maaram kita nga diri na mag-iiha, tatapuson hito nga Ginhadian an ngatanan nga pag-antos.

²⁰ An eksperyensya ni Job nagtututdo liwat ha aton nga kinahanglan kita magpakita hin pagpaid ha aton mga igkasi-Kristiano nga bangin nag-aantos hin mga kakurian. Pariho kan Job, may mga panahon nga an pipira bangin makagyakan pa ngani nga waray anay hunahunaa. (Ekles. 7:7) Pero imbes nga hukman hira, ipakita naton an hilarom nga pagsabot ngan pagpaid. Hini nga paagi, ginsusubad naton an aton mahigugmaon ngan maloloy-on nga Amay, hi Jehova.—Sal. 103:8.

21. Ano an iginpapahinumdom ha aton han mga pulong ha 1 Pedro 5:10 mahitungod han mga eksperyensya nira Noe, Daniel, ngan Job?

²¹ Bisan kon hira Noe, Daniel, ngan Job nabuhi ha magkaiba nga mga panahon ngan ha magkaiba gud nga mga kahimtang, nagpailob hira ha mga pagsari nga ira gin-atubang. An istorya han ira kinabuhi nagpapahinumdom ha aton han ginsiring ni apostol Pedro: “Katapos niyo mag-antos hin madaliay, an Dios nga puno han diri-matupngan nga pagkabuotan, . . . amo an magtatapos han pagbansay ha iyo, magpaparig-on ha iyo, ngan magpapakusog ha iyo.”—1 Ped. 5:10.

22. Ano an aton hihisgotan ha sunod nga artikulo?

²² Pinaagi han giniyahan nga mga pulong ni Pedro, ginpapasarig kita ni Jehova nga paparig-unon ngan papakusgon niya an iya mga surugoon. Ito nga mga pulong aplikado liwat ha katawohan han Dios yana. Hingyap gud naton ngatanan nga pakusgon kita ni Jehova ngan magpabilin nga marig-on ha aton pag-alagad. Salit karuyag gud naton nga subaron an pagtoo ngan pagkamasinugtanon nira Noe, Daniel, ngan Job! Sugad han aton mahibabaroan ha sunod nga artikulo, natipigan nira an ira integridad tungod kay kilala gud nira hi Jehova. Ngani, ‘nasabtan nira an ngatanan’ nga iya ginkikinahanglan ha ira. (Prob. 28:5) Mahimo liwat ito mahitabo ha aton.