Basi matuman an ira toka, kinahanglan magin maisugon an mga Estudyante han Biblia. Kinahanglan nira ipasamwak an “maopay nga sumat” ha mga maaghop pati an “adlaw han pagbulos” ha mga magraot.

Hi Brother J. H. Hoskin, nga taga-Canada, maisugon nga nagsangyaw bisan pa han pagkontra. Han katsaringsing han 1921, may nakaistorya hiya nga ministro han Methodist. Nagtikang makiistorya hi Brother Hoskin pinaagi ha pagsiring: “Kinahanglan magin maopay an aton pag-istorya mahitungod ha Kasuratan, ngan bisan kon diri kita nagkakauyon ha pipira nga butang, mahimo la gihapon kita magbulag nga mamurayawon ngan magpabilin nga magsangkay.” Pero diri ito an nahitabo. Hi Brother Hoskin nagsiring: “Pipira ka minuto la kami nga nagkaistorya kay makusog nga iginsara [han ministro] an purtahan, salit kahuna ko mabubuong an daku nga salamin han purtahan.”

“Didto pakiistorya ha mga diri Kristiano!” ginuliat an ministro. Ginpugngan ni Brother Hoskin an iya dila, pero samtang nabaya hiya, naghunahuna hiya, ‘Pagkita ko, diri Kristiano an akon nakaistorya!’

Han naghatag hin sermon an ministro kinabuwasan, padayon nga ginpakaraot niya hi Brother Hoskin. “Iya ginpahamangnoan an iya mga membro mahitungod ha akon. Ginsidngan niya hira nga ako an pinakabuwaon nga tawo nga kinadto ha ira bungto salit kinahanglan ako patayon,” siring ni Brother Hoskin. Pero waray hiya mahadlok, lugod padayon hiya nga nagsangyaw ngan nagkaada ito mag-opay nga resulta. Hiya nagsiring: “Nalipay gud ako pagsinangyaw didto. An iba nga tawo nagsiring pa ngani, ‘Maaram ako nga tawo ka han Dios!’ ngan ginpakianhan nira ako kon ano an ira maibubulig basi magkaada ako han akon mga panginahanglan.”

Basi mabuligan an mga interesado nga mag-uswag, nagpublikar an mga Estudyante han Biblia hin mga programa ha pag-aram han Biblia ha The Golden Age. * An programa ha pag-aram han Biblia para ha kabataan may-ada mga pakiana nga mahimo hisgotan han mga kag-anak ha ira mga anak. Ipapakiana han mga kag-anak “ito nga mga pakiana ha ira mga anak, ngan bubuligan hira nga makita ha Biblia an mga baton hito.” An iba nga pakiana, sugad han “Pira kadamu an libro han Biblia?,” nagtutdo hin simple nga mga kamatuoran. An iba naman, sugad han “Angay ba maglaom an tagsa nga tinuod nga Kristiano nga pagtitimarauton hiya?,” nag-andam ha kabataan nga magin maisugon nga mga parasangyaw.

 An programa han pag-aram para hadton damu na an nahibabaroan ha Biblia may-ada mga pakiana ngan baton tikang ha Biblia. An mga baton hito mahimo makita ha siyahan nga volume han Studies in the Scriptures. Yinukot nga mga parabasa an nagpahimulos tikang hini nga mga programa, pero iginpahibaro han Disyembre 21, 1921 nga The Golden Age nga diri na igpapadayon ini nga mga programa. Kay ano nga tigda nga nagbag-o?

Nasantop han mga nangunguna nga an mga bag-o nga nag-aaram han Biblia kinahanglan mahibaro han nangunguna nga mga kamatuoran ha sistematiko nga paagi. Tungod hito, iginrelis an libro nga The Harp of God han Nobyembre 1921. An mga interesado nga nakarawat han libro igin-ienrol liwat ha usa nga kurso ha pag-aram han Biblia nga mahimo nira buhaton nga hira la. Ini nga kurso nakabulig ha mga magbarasa nga masabtan an “kaburut-on han Dios nga bendisyonan an katawohan hin kinabuhi nga waray kataposan.” Paonan-o ginhihimo ini nga kurso han pag-aram?

Kon an usa nga tawo nakarawat hin kopya han libro, may nakakarawat liwat hiya nga gutiay nga kard diin nakasurat dida hito an mga pahina nga iya babasahon ha libro. Pagkasunod nga semana, may nakakarawat hiya nga kard nga may mga pakiana mahitungod ha iya ginbasa. Ha kataposan han kard, nakasurat kon ano nga mga pahina an iya babasahon para ha sunod nga semana.

Kada semana ha sulod hin 12 ka semana, may nakakarawat an estudyante nga bag-o nga kard nga iginpapadara ha iya han lokal nga kongregasyon. An mga kard kasagaran na nga iginpapadara han mga kabugtoan ha kongregasyon nga mga lagas na o hadton limitado na an nahihimo tungod han ira kahimtang. Pananglitan, hi Anna K. Gardner, nga taga-Millvale, Pennsylvania, U.S.A., nagsiring: “Han iginrelis an The Harp of God, naghatag ito hin higayon ha akon bugto nga hi Thayle, nga nakukurian na paglakat, nga magkaada mas damu nga mahihimo pinaagi ha pagpadara kada semana hin mga kard nga may mga pakiana.” Kon natatapos an kurso, personal nga ginbibisita an estudyante basi buligan hiya nga mas madugangan pa an iya nahibabaroan ha Biblia.

Ha kataposan han tuig, nagpadara hi Brother J. F. Rutherford hin surat ha ngatanan nga kongregasyon. Nagsiring hiya nga “an pagsangyaw han Ginhadian nga ginhimo hini nga tuig nakaabot ngan nakabulig ha mas damu nga tawo kay ha naglabay nga mga tuig.” Katapos, nagsiring pa hiya: “Damu pa an nabibilin nga buruhaton. Aghata an iba nga umupod ha aton hinin makalilipay nga buruhaton.” Klaro nga ginsunod han mga Estudyante han Biblia ini nga sagdon. Han 1922, waray kahadlok nga mas iginpasamwak pa gud nira an mahitungod han Ginhadian.