1, 2. (a) Ano nga buruhaton an gin-una gud ni Jesus ha iya kinabuhi, ngan kay ano? (b) Ano an sadang naton buhaton basi magin malampuson sugad nga mga “igkasi-magburuhat han Dios”?

HI Jesu-Kristo usa nga panday ngan magturutdo. (Mar. 6:3; Juan 13:13) Nagin eksperto gud hiya hinin duha nga buruhaton. Sugad nga panday, nahibaro hiya paggamit han iya mga garamiton basi maghimo hin mapulsanon nga mga produkto tikang ha kahoy. Sugad nga magturutdo han maopay nga sumat, gin-gamit niya hin maopay an iya hilarom nga kahibaro ha Kasuratan basi buligan an ordinaryo nga mga tawo nga masabtan an mga kamatuoran ha Pulong han Dios. (Mat. 7:28; Luc. 24:32, 45) Han 30 anyos hi Jesus, ginbayaan niya an pagin panday kay maaram hiya nga an pagin magturutdo amo an pinakaimportante nga buruhaton. Nagsiring hiya nga an pagpasamwak han maopay nga sumat han Ginhadian han Dios amo an usa nga rason kon kay ano nga ginpakanhi hiya han Dios ha tuna. (Mat. 20:28; Luc. 3:23; 4:43) Gin-una gud ni Jesus ha iya kinabuhi an pagministeryo, ngan karuyag niya nga ito liwat an buhaton han iba.​—Mat. 9:35-38.

² Kadam-an ha aton diri mga panday, pero kita ngatanan mga ministro han maopay nga sumat. Importante gud ini nga buruhaton kay kaupod naton an Dios ha pagbuhat hini; gintatawag kita nga mga “igkasi-magburuhat han Dios.” (1 Cor. 3:9; 2 Cor. 6:4) Ginkakarawat naton nga “an kabug-osan han [kan Jehova] polong amo an kamatuuran.” (Sal. 119:159, 160) Salit karuyag naton siguruhon nga ha aton ministeryo aton  “igintututdo ngan iginsasaysay an pulong han kamatuoran ha husto nga paagi.” (Basaha an 2 Timoteo 2:15.) Tungod hito, padayon naton nga ginpapauswag an aton abilidad ha paggamit han Biblia, an aton nangunguna nga garamiton ha pagtutdo han kamatuoran mahitungod kan Jehova, kan Jesus, ngan han Ginhadian. Basi magin malampuson kita ha aton ministeryo, an organisasyon ni Jehova nagtatagana hin iba pa nga importante nga garamiton, ngan sadang kita magin pamilyar ha paggamit hito. Ito nga mga garamiton makikita ha aton Toolbox ha Pagpanutdo.

3. Durante hinin nabibilin nga panahon para ha pagsangyaw, ano an sadang naton magin pokus, ngan paonan-o an Buhat 13:48 nabulig ha aton ha pagtuman hito?

³ Bangin mahipausa ka kon kay ano nga gintatawag ito nga Toolbox ha Pagpanutdo diri Toolbox ha Pagsangyaw. An “pagsangyaw” nangangahulogan hin pagpasamwak hin mensahe; pero an “pagtutdo” nangangahulogan hin pagpasilsil hito nga mensahe ha hunahuna ngan kasingkasing han usa nga tawo, basi gumios hiya uyon ha iya nahibabaroan. Durante hinin nabibilin nga panahon para ha pagsangyaw, kinahanglan magpokus kita ha pagtikang hin mga pag-aram ha Biblia ngan pagtutdo ha mga tawo han kamatuoran. Nagpapasabot ito nga kinahanglan mangalimbasog kita ha pagpamiling hadton may “husto nga disposisyon basi magkaada kinabuhi nga waray kataposan” ngan pagbulig ha ira nga magin tumuroo.​—Basaha an Buhat 13:44-48.

4. Paonan-o naton mabibilngan an mga tawo nga may “husto nga disposisyon basi magkaada kinabuhi nga waray kataposan”?

⁴ Paonan-o naton mabibilngan an mga tawo nga may “husto nga disposisyon basi magkaada kinabuhi nga waray kataposan”? Sugad han ginhimo han mga Kristiano han siyahan nga siglo, mabibilngan la naton ini nga mga tawo kon magsasangyaw kita. Salit, kinahanglan naton sundon an ginsiring ni Jesus: “Bisan diin nga syudad o baryo kamo kumadto, bilnga kon hin-o an takos.” (Mat. 10:11) Diri kita naglalaom nga an mga tawo nga diri sinsero, mapahitas-on, o adton diri interesado ha espirituwal nga mga butang makarawat han maopay nga sumat. Ginbibiling naton an mga tawo nga tangkod, mapainubsanon, ngan adton karuyag gud mahibaro han kamatuoran. Maipapariho naton ini ha ginbubuhat hadto ni Jesus sugad nga panday; ginbibiling niya an angayan nga kahoy nga hihimoon niya nga muwebles, purtahan, yugo, o iba pa nga gamit. Kon makabiling na hiya hin angayan nga kahoy, mahimo na niya kuhaon an iya mga garamiton ha pagpanday, gamiton an iya abilidad, ngan himoon an usa nga produkto. Ito liwat an sadang naton buhaton samtang ginpapangalimbasogan naton nga buligan an sinsero nga mga tawo nga magin mga disipulo.​—Mat. 28:19, 20.

5. Ano an sadang naton hibaroan mahitungod ha mga garamiton ha aton Toolbox ha Pagpanutdo? Iilustrar. (Kitaa an retrato ha tinikangan hini nga artikulo.)

⁵ Ha literal nga toolbox, an tagsa nga garamiton may espisipiko nga katuyoan. Pananglitan, tagda an mga garamiton ni Jesus sugad nga panday. * May-ada hiya garamiton para ha pagsukol, pagmarka, pag-utod, pagbuho, pagporma, pagnibel, pagsumpay, ngan pagturugkop hin kahoy. Sugad man, an tagsa nga garamiton ha aton Toolbox ha Pagpanutdo may espisipiko nga katuyoan. Salit usisahon naton an sulod han aton toolbox ngan kitaon naton kon paonan-o magagamit inin importante nga mga garamiton nga igintagana ha aton.

6, 7. (a) Paonan-o mo ginagamit an contact card? (b) Ano an duha nga katuyoan han imbitasyon para ha mga katirok ha kongregasyon?

⁶ Contact Card. Gutiay ini nga garamiton pero epektibo nga magagamit naton ha pagpakilala ha mga tawo kon hin-o kita ngan paggiya ha ira ha aton website, diin mahimo hira mahibaro hin dugang mahitungod ha aton ngan mahimo pa ngani hira maghangyo hin pag-aram ha Biblia. Ha pagkayana, sobra 400,000 na an naghangyo pinaagi ha jw.org nga dumarahan hira hin pag-aram ha Biblia, ngan ginatos pa an naghahangyo kada adlaw! Puydi ka magdara hin mga contact card basi salingabuton an  mga higayon nga makagsangyaw samtang imo ginhihimo an imo adlaw-adlaw nga buruhaton.

⁷ Imbitasyon. An inimprinta nga imbitasyon para ha mga katirok ha kongregasyon may duha nga katuyoan. Ito nasiring: “Gin-iimbitar ka nga pag-adman an Biblia upod han mga Saksi ni Jehova.” Ngan naghahatag ini hin opsyon nga mahimo ito buhaton “ha amon mga katirok” “o pinaagi hin personal nga magturutdo.” Salit ini nga garamiton diri la nagpapakilala ha aton; nag-iimbitar liwat ini hadton “mahunahunaon han ira espirituwal nga panginahanglan” nga mag-aram ha Biblia kaupod naton. (Mat. 5:3) Syempre, puydi tumambong ha aton mga katirok an mga tawo, karawaton man nira an pag-aram ha Biblia o diri. Kon tumambong hira, makikita nira nga damu an ira mahimo mahibaroan mahitungod ha Biblia.

8. Kay ano nga importante nga tumambong an mga tawo bisan ha usa la han aton mga katirok? Paghatag hin ehemplo.

⁸ Importante nga padayon naton nga imbitaron an mga tawo nga tumambong ha aton mga katirok bisan makausa la. Kay ano? Makikita nira nga nagpapahimulos kita hin hura nga espirituwal nga pagkaon ha aton mga katirok samtang an mga sakop han Babilonya nga Gamhanan makalolooy an kahimtang ha espirituwal. (Isa. 65:13) Ini an naobserbaran han mag-asawa nga hira Ray ngan Linda nga taga-Estados Unidos mga pipira ka tuig na an naglabay. Natoo hira ha Dios ngan karuyag nira nga makilala hiya hin mas maopay. Salit nagdesisyon hira nga sumingba ha ngatanan nga singbahan ha ira syudad. Damu didto an relihiyon ngan iba-iba nga sekta. Ha tinikangan pa la, naghimo an mag-asawa hin duha nga kondisyon nga magigin basihan nira ha pagpamembro ha usa nga relihiyon. Siyahan, karuyag nira nga may mahibaroan hira ha ira pagsingba, ngan ikaduha, an pamado ngan pamostura han mga membro hito nga relihiyon kinahanglan nagpapakita nga nagrirepresentar hira ha Dios. Katapos hin pipira ka tuig, nakasingba na hira ha ngatanan nga singbahan ha ira syudad, pero nasubo gud hira kay waray nira makita an ira ginbibiling. Waray hira nahibaroan ha ira pagsingba, ngan an mga nasingba didto diri desente an pamado ngan pamostura. Paggawas nira ha kataposan nga singbahan nga nakada ha ira listahan, kinadto hi Linda ha iya trabaho ngan inuli hi Ray. Han nagbibiyahe hi Ray tipauli, may nakita hiya nga Kingdom Hall ngan naghunahuna hiya, ‘Ano daw la kon sumulod ako basi kitaon kon ano an ira ginbubuhat?’ Syempre, ito an iya pinakamaopay nga eksperyensya! An ngatanan nga nakadto ha Kingdom Hall buotan ngan makisangkayon ngan desente gud an pamado. Liningkod hi Ray ha prente ngan nalipay gud hiya ha iya mga hinbaroan! Inabat niya an pariho han ginsiring ni apostol Pablo mahitungod ha usa nga tawo nga tumambong ha Kristiano nga katirok ha siyahan nga higayon ngan nagsiring: “An Dios aada gud ha iyo.” (1 Cor. 14:23-25) Tikang hito, pirme na natambong hi Ray kada Domingo; katapos, nagtikang liwat hiya pagtambong hin regular ha midweek nga katirok. Hi Linda nagtikang liwat pagtambong, ngan bisan kon sobra 70 anyos na hira, nagpa-Bible study hira ngan nagpabawtismo.

9, 10. (a) Kay ano nga masayon itanyag an mga tract? (b) Isaysay kon paonan-o gagamiton an tract nga Ano an Ginhadian han Dios?

⁹ Mga Tract. May-ada kita walo nga masayon itanyag nga tract, ngan epektibo ini nga garamiton ha pagtikang hin pakiistorya. Tikang han iginpublikar ini nga mga tract han 2013, mga lima ka bilyon na an naimprinta hini! An kaopayan hini nga garamiton kay kon pamilyar ka na ha paggamit han usa hini, magagamit mo na ini ngatanan kay parapriho la an pormat hini. Paonan-o mo magagamit an usa nga tract basi makagtikang hin pakiistorya ha usa nga tawo?

¹⁰ Pananglitan, ginpili mo nga gamiton an tract nga Ano an Ginhadian han Dios? Ipakita ha imo kaistorya an pakiana ha prente ngan pakianhi hiya: “Para ha imo, ano an Ginhadian han Dios? Ito ba . . . ?” Katapos, pakianhi hiya kon hain an iya pipilion ha tulo nga baton. Husto man o sayop an iya napili nga baton, abrihi an tract ngan kitaa an “Kon Ano an Ginsisiring han Biblia,” ngan basaha an ginkotar nga mga teksto, an Daniel 2:44 ngan Isaias  9:6. Kon igintutugot han kahimtang, ipadayon an pakiistorya. Ha kataposan han iyo pag-istorya, unabiha an pakiana ha luyo han tract ilarom han ulohan nga “Alayon Hunahunaa Ini”: “Ano an magigin kahimtang han kinabuhi kon magmando na an Ginhadian han Dios?” Ini nga pakiana mahimo mo batunon ha imo sunod nga pagbisita hito nga tawo. Kon magkaistorya kamo utro, mahimo niyo hisgotan an leksyon 7 han brosyur nga Maopay nga Sumat Tikang ha Dios!, nga usa han aton garamiton ha pagtikang hin pag-aram ha Biblia.

11. Ano an pagkadisenyo han aton mga magasin, ngan ano an sadang naton hibaroan mahitungod hito?

¹¹ Mga Magasin. An Barantayan ngan Pagpamata! amo an pinakadamu nga naipublikar ngan naihubad nga mga magasin ha bug-os nga kalibotan! Tungod kay iginpupublikar ini ha bug-os nga kalibotan, an mga topiko ha kobre hini gindisenyo nga magin makapainteres ha mga tawo diin man hira naukoy. Sadang naton ini gamiton ha pagpukaw han interes han mga tawo ha mga butang nga importante gud ha kinabuhi. Kondi basi maitanyag naton ini nga mga magasin ha angayan nga mga tawo, kinahanglan naton hibaroan kon para kan kanay gindisenyo an tagsa hini.

12. (a) Para kan kanay gindisenyo an Pagpamata!, ngan ano an katuyoan hito? (b) Ano an imo maopay nga eksperyensya ha paggamit hini nga garamiton?

¹² An Pagpamata! gindisenyo para ha mga magbarasa nga bangin gutiay la o waray hinbabaroan mahitungod ha Biblia. Bangin waray hira ideya ha Kristiano nga mga katutdoan, bangin waray hira pagtapod ha relihiyon, o bangin diri hira maaram nga makakabulig ha ira an Biblia ha praktikal nga paagi. An nangunguna nga katuyoan han Pagpamata! amo an pagkombinse ha mga magbarasa nga may-ada Dios. (Roma 1:20; Heb. 11:6) Katuyoan liwat hito nga buligan an magbarasa nga tumoo nga an Biblia amo gud an “pulong han Dios.” (1 Tes. 2:13) An tulo nga topiko ha kobre hini nga magasin para ha 2018 amo an: “An Dalan han Kalipay,” “12 nga Sekreto han Malipayon nga Pamilya,” ngan “Bulig Para ha Namatayan hin Hinigugma.”

13. (a) Para kan kanay gindisenyo an panpubliko nga edisyon han An Barantayan? (b) Ano an imo maopay nga eksperyensya ha paggamit hini nga garamiton?

¹³ An panpubliko nga edisyon han An Barantayan naghihisgot hin espirituwal nga mga butang para hadton may pagtahod ha Dios ngan ha iya Pulong. Bisan kon may hinbabaroan na hira ha Biblia, diri husto an ira pagsabot ha mga katutdoan hito. (Roma 10:2; 1 Tim. 2:3, 4) An tulo nga topiko ha kobre hini nga magasin para ha 2018 nagbabaton hini nga mga pakiana: “Praktikal Pa ba Gamiton Yana an Biblia?,” “Ano an Mahitatabo ha Tidaraon?,” ngan “Nagtatagad ba an Dios ha Imo?”

14. (a) Ano an katuyoan han aton upat nga video ha aton Toolbox ha Pagpanutdo? (b) Ano an imo maopay nga eksperyensya ha paggamit hini nga mga video?

¹⁴ Mga Video. Ha panahon ni Jesus, mano-mano la an mga garamiton han mga panday. Pero yana, an mga panday may de koryente na nga garamiton para ha pag-utod, pagbuho, paghamis, pagraysang, ngan iba pa. Ha pariho nga paagi, labot la han inimprinta nga mga publikasyon, may-ada na kita yana mag-opay nga video nga maipapakita ha mga tawo​—an upat hito aada ha aton toolbox: Kay Ano nga Kinahanglan Pag-adman an Biblia?, Paonan-o Ginhihimo an Pag-aram ha Biblia?, Ano an Ginbubuhat ha Kingdom Hall?, ngan Mga Saksi ni Jehova​—Hin-o Kami? An mga video nga waray mag-dos minutos an kahilaba epektibo gamiton ha siyahan nga pagbisita. An hurohilaba nga mga video mahimo gamiton ha pagbalik-bisita ngan ha mga tawo nga may mas daku nga panahon. Ini nga mga garamiton makakaaghat ha mga tawo nga pag-adman an Biblia ngan tumambong ha aton mga katirok.

15. Isaysay kon ano an mahimo magin epekto ha mga tawo kon makikita nira an usa han aton mga video ha ira kalugaringon nga linggwahe.

¹⁵ Tagda ini nga ehemplo, an usa nga sister may nakaistorya nga babaye nga tikang ha Micronesia ngan Yapese an iya linggwahe. Iginpakita han sister an video nga Kay Ano nga Kinahanglan Pag-adman an Biblia? ha Yapese nga linggwahe. Han nagtikang na an video, an babaye siniring: “Ito an akon linggwahe.  Diri ako makatoo hini! Masisiring ko gud nga tikang hiya ha amon isla tungod han iya paagi ha pagyakan. Pariho an amon linggwahe!” Katapos hito, nagsiring hiya nga babasahon ngan kikitaon niya an ngatanan nga may-ada ha iya linggwahe ha jw.org. (Ikompara an Buhat 2:8, 11.) Tagda an usa pa nga ehemplo. Usa nga sister ha Estados Unidos an may umangkon ha iba nga nasud. Nagpadara hiya hin link han amo gihapon nga video ha linggwahe han iya umangkon. Ginkita ito han iya umangkon ngan nag-e-mail ha iya: “An bahin mahitungod han maraot nga espiritu nga nagkukontrol han kalibotan amo an nakapainteres ha akon. Naghangyo ako hin pag-aram ha Biblia.” Naukoy hiya ha lugar diin igindidiri an aton buruhaton!

16. Isaysay an katuyoan han tagsa hini nga brosyur: (a) Pamati ha Dios Ngan Mabuhi ha Waray Kataposan. (b) Maopay nga Sumat Tikang ha Dios! (c) Hin-o an Nagbubuhat han Kaburut-on ni Jehova Yana?

¹⁶ Mga Brosyur. Paonan-o mo maitututdo an kamatuoran ha usa nga diri nakakabasa hin maopay o ha usa nga waray publikasyon nga basado ha Biblia ha iya linggwahe? May-ada kita garamiton para ha iya​—an brosyur nga Pamati ha Dios Ngan Mabuhi ha Waray Kataposan. An brosyur nga Maopay nga Sumat Tikang ha Dios! epektibo liwat nga garamiton ha pagtikang hin pag-aram ha Biblia. Mahimo mo ipakita ha usa nga tawo an 14 nga topiko ha luyo han brosyur ngan papilion hiya kon hain hito an nakapainteres gud ha iya. Ngan tikangi an pag-aram ha leksyon nga iya ginpili. Nasarihan mo na ba ini nga pamaagi ha imo pagbalik-bisita? An usa pa nga brosyur nga aada ha aton toolbox amo an Hin-o an Nagbubuhat han Kaburut-on ni Jehova Yana? Gindisenyo ini basi tutdoan an mga estudyante ha Biblia mahitungod ha aton organisasyon. Basi hibaroan kon paonan-o ini gagamiton ha tagsa nga pag-aram ha Biblia, kitaa an Marso 2017 nga gowa han An Aton Kristiano nga Pagkinabuhi Ngan Ministeryo​—Workbook Para ha Katirok.

17. (a) Ano an katuyoan han tagsa nga aradman nga libro? (b) Ano an kinahanglan buhaton han usa bisan kon nabawtismohan na hiya, ngan kay ano?

¹⁷ Mga Libro. Kon matikangan na an pag-aram ha Biblia gamit an usa nga brosyur, ha bisan ano nga panahon puydi mo ibalhin an pag-aram ha libro nga Ano Gud ba an Igintututdo han Biblia? Ini nga garamiton mabulig ha estudyante nga mahibaro hin dugang pa mahitungod ha nangunguna nga mga katutdoan ha Biblia. Kon matapos na ito nga libro ngan an imo estudyante nag-uuswag ha espirituwal, ipadayon an pag-aram gamit an libro nga Magpabilin ha Gugma han Dios. * Ini nga garamiton magtututdo ha estudyante kon paonan-o iaaplikar an mga prinsipyo ha Biblia ha iya adlaw-adlaw nga pagkinabuhi. Tigamni nga bisan kon nabawtismohan na an usa, kinahanglan pa gihapon niya tapuson an pag-aram hinin duha nga libro. Makakabulig ini ha iya nga magkaada marig-on nga pundasyon ha kamatuoran.​—Basaha an Colosas 2:6, 7.

18. (a) Sugad nga magturutdo han kamatuoran, ano an igin-aaghat ha aton han 1 Timoteo 4:16, ngan ano an resulta hito? (b) Samtang ginagamit naton hin maopay an aton Toolbox ha Pagpanutdo, ano an sadang naton magin tumong?

¹⁸ Sugad nga mga Saksi ni Jehova, gintaporan kita nga magtutdo ha mga tawo han “mensahe han kamatuoran han maopay nga sumat” nga makakaghatag ha ira hin kinabuhi nga waray kataposan. (Col. 1:5; basaha an 1 Timoteo 4:16.) Basi maglampos kita ha pagbuhat hini, gintaganahan kita hin Toolbox ha Pagpanutdo nga puno hin mga garamiton nga aton ginkikinahanglan. (Kitaa an “ Toolbox ha Pagpanutdo.”) Hinaot gamiton naton ha pinakamaopay nga paagi ini nga mga garamiton. An tagsa nga magwarali mahimo magdesisyon kon ano nga literatura ha toolbox an iya gagamiton ha usa nga interesado ngan kon san-o niya ito gagamiton. Kondi diri la basta pagtanyag hin literatura an aton tumong; o paghatag hito ha usa nga diri interesado ha aton mensahe. An aton tumong amo an pagtutdo ha mga tawo nga tangkod, mapainubsanon, ngan gutom ha espirituwal basi hira magin mga disipulo​—mga tawo nga “may husto nga disposisyon basi magkaada kinabuhi nga waray kataposan.”​—Buh. 13:48; Mat. 28:19, 20.