1-2. Ano an angay naton buhaton basi karawaton ni Jehova an aton pagsingba?

 ANO an imo nahuhunahuna kon nababatian mo an pulong nga “pagsingba”? Bangin naiimadyin mo an usa nga mapainubsanon nga brother nga naluhod sapit ha iya higdaan samtang iginsusumat niya kan Jehova ha sinsero nga pag-ampo an tanan nga aada ha iya kasingkasing. O bangin nahuhunahuna mo an usa nga malipayon nga pamilya nga nag-i-enjoy ha ira pag-aram ha Biblia.

² Hiton duha nga kahimtang, an mga indibiduwal nagpapakita hin mga buhat han pagsingba. Kakarawaton ba ni Jehova an ira pagsingba? Oo, kon uyon ito ha iya katuyoan ngan ginbubuhat nga may gugma ngan respeto. Hinigugma gud naton hi Jehova. Maaram kita nga angay gud hiya singbahon, ngan karuyag naton nga pinakamaopay an kalidad han aton regalo nga pagsingba.

3. Ano an aton hihisgotan hini nga artikulo?

³ Hini nga artikulo, aton rirepasuhon an klase han pagsingba nga ginkarawat ni Jehova ha kadaan nga panahon, ngan hihisgotan naton an walo nga bahin han pagsingba nga ginkakarawat niya yana. Samtang ginbubuhat naton ito, mahimo naton hunahunaon kon paonan-o mapapauswag han tagsa ha aton an kalidad han aton pagsingba. Aton liwat rirepasuhon an mga rason kon kay ano nga nakakapalipay ha aton an tinuod nga pagsingba.

4. Antes han Kristiano nga panahon, paonan-o iginpakita han mga nagsisingba kan Jehova an ira respeto ngan gugma ha iya?

⁴ Antes han Kristiano nga panahon, iginpakita han matinumanon nga kalalakin-an sugad kanda Abel, Noe, Abraham, ngan Job an ira respeto ngan gugma kan Jehova. Paonan-o? Pinaagi han ira  pagsugot, pagtoo, ngan mga halad. Waray isumat han Biblia an tanan nga kinahanglan nira buhaton ha ira pagsingba. Pero klaro nga ginbuhat nira an gimaopayi ha pagpasidungog kan Jehova, ngan an ira pagsingba ginkarawat niya. Ha urhi, iginhatag ni Jehova ha mga tulin ni Abraham an Mosaiko nga Balaud. Ini nga mga balaud nag-uupod hin espisipiko nga mga instruksyon kon paonan-o sisingbahon hi Jehova ha paagi nga iya gin-uuyonan.

5. Ano nga pagbag-o an ginhimo may kalabotan ha tinuod nga pagsingba katapos mamatay ngan mabanhaw hi Jesus?

⁵ Katapos mamatay ngan mabanhaw hi Jesus, waray na ig-obligar ni Jehova nga sundon an Mosaiko nga Balaud. (Roma 10:4) Kinahanglan sugton han mga Kristiano an usa nga bag-o nga balaud, “an balaud han Kristo.” (Gal. 6:2) Masusugot nira ini nga “balaud,” diri pinaagi ha pagmemorya hito ngan pagsunod hin hilaba nga listahan han puydi ngan diri puydi buhaton, kondi pinaagi ha pagsubad han ehemplo ni Jesus ngan pagsunod han iya mga katutdoan. Yana, ginbubuhat liwat han mga Kristiano an ira gimaopayi nga masunod an Kristo basi mapalipay hi Jehova ngan ‘marepreskohan’ hira.​—Mat. 11:29.

6. Paonan-o kita makakapahimulos hini nga artikulo?

⁶ Samtang aton ginhihisgotan an tagsa nga bahin han aton pagsingba, pakianhi an imo kalugaringon, ‘Ano na nga pag-uswag an akon nahimo may kalabotan hini?’ Mahimo ka liwat magpakiana, ‘Mapapauswag ko pa ba an kalidad han akon pagsingba?’ Angay ka malipay ha pag-uswag nga imo na nahimo, pero angay mo liwat ig-ampo kan Jehova nga buligan ka nga makita kon ano pa an kinahanglan mo pauswagon.

7. Ano an panhunahuna ni Jehova ha aton kinasingkasing nga mga pag-ampo?

⁷ Ginsisingba naton hi Jehova kon nag-aampo kita ha iya. Iginpapariho han Kasuratan an aton mga pag-ampo ha igin-andam hin maopay nga insenso nga iginhahalad ha tabernakulo ngan ha urhi ha templo. (Sal. 141:2) Ito nga insenso nakakahatag hin hamot nga nakakapalipay ha Dios. Sugad man, an aton kinasingkasing nga mga pag-ampo “nakakapalipay” ha iya, bisan kon simple la nga mga pulong an aton ginagamit. (Prob. 15:8; Deut. 33:10) May maopay kita nga rason nga tumoo nga nalilipay hi Jehova ha pagpamati ha aton kon iginpapahayag naton an aton gugma ngan pagpasalamat ha iya. Karuyag niya nga isumat naton ha iya an aton mga ginkakabarak-an, ginlalaoman, ngan hingyap. Antes ka mag-ampo kan Jehova, mahimo mo hunahunaon hin maopay kon ano an imo isisiring. Kon bubuhaton mo ito, maihahalad mo an pinakamaopay nga “insenso” ha imo langitnon nga Amay.

8. Ano an aton maopay nga oportunidad ha pagdayaw ha Dios?

⁸ Ginsisingba naton hi Jehova kon gindadayaw naton hiya. (Sal. 34:1) Gindadayaw naton hi Jehova kon gin-iistorya naton ha iba an aton apresasyon ha iya makaruruyag nga mga kalidad ngan buhat. An pagdayaw nagtitikang ha mapasalamaton nga kasingkasing. Pinaagi ha paggahin hin panahon ha pagpamalandong han pagkamaopay ni Jehova​—ha tanan nga ginhihimo niya para ha aton​—magkakaada kita damu nga rason nga dayawon hiya. An pagsangyaw nga buruhaton naghahatag ha aton hin maopay gud nga oportunidad nga maghalad ha Dios hin “halad han pagdayaw, nga amo an bunga han aton mga im-im.” (Heb. 13:15) Sugad la nga kinahanglan naton hunahunaon hin maopay an aton isisiring antes kita mag-ampo kan Jehova, dapat liwat naton hunahunaon hin maopay an aton isisiring ha mga tawo nga aton nakakaistorya ha ministeryo. Karuyag naton nga an aton “halad han pagdayaw” magin pinakamaopay. Salit kinasingkasing nga nagyayakan kita kon iginsusumat naton ha iba an kamatuoran.

9. Pariho ha kadaan nga mga Israelita, paonan-o kita nagpapahimulos kon naatender kita ha mga katirok? Isumat an imo personal nga eksperyensya.

 ⁹ Ginsisingba naton hi Jehova kon naatender kita ha mga katirok. An kadaan nga mga Israelita ginsugo: “Tulo ka beses ha usa ka tuig, an ngatanan mo nga lalaki kinahanglan dumaop ha atubangan ni Jehova nga imo Dios ha lugar nga iya pilion.” (Deut. 16:16) Kinahanglan bayaan nira an ira balay ngan mga uma nga waray magbabantay. Pero hi Jehova nagsaad ha ira: “Waray bisan hin-o nga maghihingyap han imo tuna samtang nasagka ka basi dumaop ha atubangan ni Jehova nga imo Dios.” (Ex. 34:24) Tungod han bug-os nga pagtoo kan Jehova, ito nga mga Israelita nga may kahadlok ha Dios inatender ha tinuig nga mga piyesta. Tungod hito, nakakarawat hira hin hura nga balos; napahilarom nira an ira pagsabot ha Balaud han Dios, napamalandong an iya pagkamaopay, ngan nagpahimulos han makapadasig nga pakig-upod ha ira mga igkasi-tumuroo. (Deut. 16:15) Pariho liwat hito an mga kapulsanan nga aton nakakarawat kon naghihimo kita hin mga sakripisyo basi makaatender ha Kristiano nga mga katirok. Ngan hunahunaa la an kalipay ni Jehova kon naatender kita nga may igin-andam nga halipot ngan ginhunahuna hin maopay nga mga komento.

10. Kay ano nga an pagkanta importante nga bahin han aton pagsingba?

¹⁰ Ginsisingba naton hi Jehova kon naduyog kita ha pagkanta. (Sal. 28:7) Para ha mga Israelita, an pagkanta importante nga bahin han ira pagsingba. Hi Hadi David nagtoka hin 288 nga Levita basi magin parakanta ha templo. (1 Cron. 25:1, 6-8) Yana, mahimo naton maipahayag an aton gugma ha Dios kon nagkakanta kita hin mga kanta han pagdayaw. Diri an kalidad han aton tingog an pinakaimportante. Hunahunaa ini: Kon nagyayakan kita, “kita ngatanan nahipapakdol hin damu ka beses,” pero diri ito nakakapugong ha aton ha pagyakan ha kongregasyon ngan ha ministeryo. (San. 3:2) Sugad man, mahimo la gihapon kita magkanta hin mga pagdayaw kan Jehova bisan kon ginhuhunahuna naton nga diri kita maopay kumanta.

11. Sumala ha Salmo 48:13, kay ano nga kinahanglan kita mag-eskedyol hin panahon basi adman an Biblia sugad nga pamilya?

¹¹ Ginsisingba naton hi Jehova kon gin-aadman naton an iya Pulong ngan gintututdoan an aton mga anak mahitungod ha iya. Ha Sabbath, an mga Israelita diri nagtatrabaho ngan gin-gagamit nira ito nga adlaw basi parig-unon an ira relasyon kan Jehova. (Ex. 31:16, 17) Gintutdoan han magtinumanon nga Israelita an ira mga anak mahitungod kan Jehova ngan ha iya pagkamaopay. Yana liwat kinahanglan naton mag-eskedyol hin panahon ha pagbasa ngan pag-aram han Pulong han Dios. Bahin ini han aton pagsingba kan Jehova, ngan nabulig ini nga magin mas duok kita ha iya. (Sal. 73:28) Ngan kon urosa kita nga nag-aaram sugad nga pamilya, mabubuligan naton an usa nga bag-o nga henerasyon​—an aton mga anak​—nga magkaada duok nga pakigsangkay ha aton mahigugmaon nga langitnon nga Amay.​—Basaha an Salmo 48:13.

12. Ano an aton mahibabaroan ha panhunahuna ni Jehova ha buruhaton hadton naghimo han mga gamit ha tabernakulo?

¹² Ginsisingba naton hi Jehova kon nagtutukod kita ngan nagmimintinar han mga lugar han pagsingba. An Biblia nasiring nga an buruhaton ha paghimo han tabernakulo ngan han mga gamit hito “baraan nga buruhaton.” (Ex. 36:1, 4) Yana liwat, ginhuhunahuna ni Jehova nga sagrado nga pag-alagad an pagtukod hin mga Kingdom Hall ngan iba pa nga teokratiko nga pasilidad. An iba nga kabugtoan naggagahin hin daku nga panahon hini nga mga buruhaton. Gin-aapresyar gud naton inin importante nga naibubulig para ha buruhaton han Ginhadian. Syempre, nakikigbahin liwat hira ha pagsangyaw nga buruhaton. An iba ha ira bangin karuyag pa ngani magpayunir. Maipapakita han mga tigurang ha kongregasyon nga nasuporta hira ha  mga buruhaton han konstruksyon kon diri hira mag-aalang nga aprobaran inin maduruto nga kabugtoan nga magin payunir kon kwalipikado hira. May skill man kita ha konstruksyon o waray, kita tanan makakabulig nga matipigan nga limpyo ngan namimintinar ito nga mga bilding.

13. Ano an dapat naton magin panhunahuna ha mga donasyon nga aton iginhahatag basi suportaran an buruhaton han Ginhadian?

¹³ Ginsisingba naton hi Jehova kon ginsusuportaran naton an buruhaton han Ginhadian pinaagi han aton mga donasyon. An mga Israelita diri angay dumaop ha atubangan ni Jehova nga waray dara. (Deut. 16:16) Kinahanglan nira magdara hin materyal nga regalo uyon ha ira kahimtang. Pinaagi hito naipahayag nira an ira apresasyon ha tanan nga kahikayan nga ginhimo basi magpahimulos hira ha espirituwal. Paonan-o naton maipapahayag an aton gugma kan Jehova ngan an aton apresasyon ha espirituwal nga mga tagana nga aton nakakarawat? An usa nga paagi amo an paghatag hin pinansyal nga suporta para ha lokal nga kongregasyon ngan ha bug-os-kalibotan nga buruhaton uyon ha aton kahimtang. Hi apostol Pablo nagsiring: “Kon an pagin andam aada nga daan, ginkakarawat gud ito depende ha gintatag-iya han usa ka tawo, diri depende ha diri gintatag-iya han usa ka tawo.” (2 Cor. 8:4, 12) Gin-aapresyar gud ni Jehova an aton kinasingkasing nga donasyon bisan kon diri daku an kantidad hito.​—Mar. 12:42-44; 2 Cor. 9:7.

14. Sumala ha Proberbios 19:17, ano an panhunahuna ni Jehova ha bulig nga aton ginhahatag ha kabugtoan nga nanginginahanglan?

¹⁴ Ginsisingba naton hi Jehova kon ginbubuligan naton an aton mga igkasi-Kristiano nga nanginginahanglan. Nagsaad hi Jehova nga babalosan niya an mga Israelita nga nagin mahinatagon ha mga pobre. (Deut. 15:7, 10) Oo, ha kada panahon nga nabulig kita ha usa nga bugto nga nanginginahanglan, ginhuhunahuna ito ni Jehova sugad nga regalo ha Iya. (Basaha an Proberbios 19:17.) Pananglitan, han an mga Kristiano ha Filipos nagpadara hin regalo ha priso nga hi Pablo, gintawag niya ito nga “kinakarawat nga halad, ngan nakakapalipay gud ha Dios.” (Fil. 4:18) Hunahunaa an imo mga kakongregasyon ngan pakianhi an imo kalugaringon, ‘May bugto ba ako nga mabubuligan?’ Nalilipay hi Jehova kon nakikita niya nga ginagamit naton an aton panahon, kusog, mga skill, ngan materyal nga mga butang basi buligan an nanginginahanglan. Para ha iya, bahin ito han aton pagsingba.​—San. 1:27.

15. An tinuod nga pagsingba nagkikinahanglan hin panahon ngan pangalimbasog, pero kay ano nga diri ito nakakapabug-at?

¹⁵ An tinuod nga pagsingba nagkikinahanglan hin panahon ngan pangalimbasog. Pero diri ito nakakapabug-at. (1 Juan 5:3) Kay ano? Kay ginsisingba naton hi Jehova tungod han aton gugma ha iya. Imadyina an usa nga bata nga may karuyag ihatag ha iya tatay. Bangin magdrinowing hiya hin damu ka oras para ha iya tatay. Diri hiya nanganganugon han panahon nga iya gin-gamit para hito. Hinigugma niya an iya tatay ngan nalilipay paghatag ha iya hito nga regalo. Sugad man, tungod han aton gugma kan Jehova, nalilipay kita nga gamiton an aton panahon ngan kusog ha pagsingba ha iya.

16. Sumala ha Hebreo 6:10, ano an panhunahuna ni Jehova ha aton tagsa-tagsa nga pangalimbasog basi lipayon hiya?

¹⁶ An mahigugmaon nga mga kag-anak diri naglalaom nga makakarawat hin pariho nga regalo tikang ha ira tagsa nga anak. Maaram hira nga iba-iba an tagsa nga anak ngan diri parapriho an mga kahimtang. Sugad man, nasasabtan han aton langitnon nga Amay an aton tagsa-tagsa nga kahimtang. Bangin mas labaw an imo nahihimo kay han damu nga imo kakilala ngan hinigugma. O bangin mas gutiay an imo nahihimo  kay ha iba, bangin tungod han imo edad, kahimsog, o mga responsabilidad ha pamilya. Ayaw panluya. (Gal. 6:4) Diri hingangalimtan ni Jehova an imo mga buhat. Kon ginhahatag mo an imo pinakamaopay ngan may husto ka nga motibo, malilipay hiya. (Basaha an Hebreo 6:10.) Nakikita ni Jehova bisan an mga intensyon han imo kasingkasing. Karuyag niya nga magin malipayon ka ngan kontento ha kaya mo buhaton ha pagsingba ha iya.

17. (a) Kon nakukurian kita ha pipira nga bahin han aton pagsingba, ano an mahimo naton buhaton? (b) Paonan-o ka nabuligan han usa nga bahin han aton pagsingba nga makikita ha kahon nga “ Dugangi an Imo Kalipay”?

¹⁷ Kumusta man kon nakukurian kita pagbuhat han pipira nga bahin han aton pagsingba, sugad han personal nga pag-aram o pagministeryo? Posible nga makita naton nga kon mas agsob kita nga nakikigbahin hini nga mga buruhaton, mas mag-i-enjoy kita ngan mas makakabenepisyo kita tikang hito. Mahimo naton ikompara an aton pagsingba ha usa nga buruhaton, sugad han pagbuhat hin usa nga klase hin ehersisyo o pagpraktis hin usa nga instrumento ha musika. Kon panalagsa la naton ito buhaton, bangin gutiay la nga pag-uswag an aton mahimo. Pero ano daw la an mahitatabo kon bubuhaton naton ito kada adlaw? Ha siyahan, bangin buhaton naton ito hin madaliay la pero hinay-hinay nga paiihaon na naton ito. Kon nakikita naton an mag-opay nga resulta han aton mga pangalimbasog, posible nga magigin eksayted na kita ha sunod naton nga eskedyol ngan mag-i-enjoy gud kita hito. Nakikita mo ba kon paonan-o ini nga pamaagi maiaaplikar naton ha aton pagsingba?

18. Paonan-o naton gintutuman an katuyoan han aton pag-eksister, ngan ano an mga resulta hito?

¹⁸ Gintutuman naton an katuyoan han aton pag-eksister pinaagi ha aton bug-os-kasingkasing nga pagsingba kan Jehova. Sugad nga resulta, may-ada kita malipayon ngan may katuyoan nga kinabuhi ngan paglaom nga singbahon hi Jehova ha waray kataposan. (Prob. 10:22) May murayaw na kita nga hunahuna kay maaram kita nga hi Jehova nabulig ha iya mga magsiringba kon may mga problema hira. (Isa. 41:9, 10) May mag-opay gud kita nga rason nga magin malipayon samtang ginsisingba an aton mahigugmaon nga Amay, nga angayan “ha pagkarawat han himaya ngan han dungog” tikang ha ngatanan niya nga linarang!​—Pah. 4:11.