1, 2. (a) Ano an reaksyon han pipira nga Kristiano nga kag-anak kon nasiring an ira anak nga karuyag na niya magpabawtismo? (b) Kay ano nga ginpapakianhan an mga kandidato ha bawtismo kon nagdedikar na hira kan Jehova? (Kitaa an retrato hini nga pahina.)

SAMTANG nagkikita ha iya an iya Kristiano nga mga kag-anak, an noybe anyos nga anak, nga aton tatawagon nga Maria, tinindog kaupod han iba pa nga kandidato ha bawtismo. Katapos, ginbaton niya ha daku ngan matin-aw nga tingog an duha nga pakiana han mamumulong. Waray pag-iha, ginbawtismohan hiya.

² Nalipay gud an mga kag-anak ni Maria ha iya desisyon nga bug-os-kasingkasing nga magdedikar kan Jehova ngan magpabawtismo. Pero antes hiya mabawtismohan, may pipira nga ginkakabarak-an an iya nanay. An iya nanay naghunahuna: ‘Angay na gud ba hi Maria magpabawtismo nga bata pa man hiya hinduro? Nasasabtan gud ba niya an pagkaseryoso han iya ginbubuhat? Mas makakaopay ba kon palabyon anay an panahon antes hiya magpabawtismo?’ Ini an pipira han iginpapakiana han mahigugmaon nga mga kag-anak ha ira kalugaringon kon an ira anak nasiring nga karuyag na niya magpabawtismo. (Ekles. 5:5)  Aw, an dedikasyon ngan bawtismo amo an pinakaimportante nga mga pitad ha kinabuhi han usa nga Kristiano.​—Kitaa an kahon nga “ Igindedikar Mo Na ba an Imo Kalugaringon kan Jehova?”

3, 4. (a) Paonan-o iginpakita ni apostol Pedro nga importante gud an bawtismo? (b) Kay ano nga an bawtismo maipapariho ha pagtukod han arka ha panahon ni Noe?

³ Iginpariho ni apostol Pedro an bawtismo ha pagtukod ni Noe han arka, hiya nagsiring: “An bawtismo, nga katugbang hito, nagtatalwas liwat ha iyo yana.” (Basaha an 1 Pedro 3:20, 21.) An arka usa nga nakikita nga istraktura nga naghahatag hin marig-on ngan klaro nga ebidensya han bug-os-kasingkasing nga hingyap ni Noe nga buhaton an kaburut-on han Dios. Gintuman gud ni Noe an buruhaton nga igintoka ha iya ni Jehova. Oo, tungod han nakikita nga mga kapahayagan han pagtoo ni Noe, natalwas hiya ngan an iya pamilya ha Baha. Ano an karuyag igtutdo ha aton ni Pedro?

⁴ Sugad la nga an arka usa nga nakikita nga ebidensya han pagtoo ni Noe, an bawtismo usa nga nakikita nga ebidensya para ha mga nagkikita. Nagpapasabot ito nga an usa nga Kristiano nga disipulo nagdedikar na han iya kalugaringon kan Jehova tungod han iya pagtoo ha ginbanhaw nga hi Kristo Jesus. Pariho kan Noe, gintutuman gud han dedikado nga mga disipulo an buruhaton nga igintoka ha ira han Dios. Sugad la nga natalwas hi Noe durante han Baha, matatalwas liwat an maunungon nga bawtismado nga mga indibiduwal kon bungkagon na inin maraot nga kalibotan. (Mar. 13:10; Pah. 7:9, 10) Iginpapakita hini nga importante gud an dedikasyon ngan bawtismo. Kon ginlalangan han usa an pagpabawtismo nga waray man makatadunganon nga rason, iginbubutang niya ha peligro an iya paglaom nga mabuhi ha waray kataposan.

5. Ano an aton hihisgotan hini nga artikulo?

⁵ Tungod kay hinbaroan naton kon mationan-o kaseryoso an bawtismo, kinahanglan naton hibaroan an baton hinin tulo nga pakiana: Ano an igintututdo han Biblia mahitungod ha bawtismo? Ano nga mga pitad an kinahanglan himoon han usa antes  magpabawtismo? Kay ano nga sadang hunahunaon han usa nga Kristiano nga magturutdo an pagkaimportante han bawtismo kon nagtututdo hiya ha iya anak o ha iba nga estudyante ha Biblia?

6, 7. (a) Isaysay kon ano an iginpapasabot han pagbawtismo ni Juan. (b) Ano nga naiiba gud nga pagbawtismo an ginbuhat hi Juan?

⁶ Mababasa naton ha Biblia nga an siyahan nga indibiduwal nga nagbawtismo ha iba amo hi Juan nga Parabaptis. (Mat. 3:1-6) Kay ano nga kinadto kan Juan an mga tawo basi magpabawtismo? Ginbuhat nira ito basi ipakita nga nagbabasol hira ha ira mga pagtalapas ha Mosaiko nga Balaud. Pero makapainteres nga an pinakaimportante nga pagbawtismo ni Juan waray kalabotan ha pagbasol. Nagkaada hiya talagsahon nga pribilehiyo nga bawtismohan hi Jesus, an perpekto nga tawo nga Anak han Dios. (Mat. 3:13-17) Waray sala hi Jesus, salit diri niya kinahanglan magbasol. (1 Ped. 2:22) An iya bawtismo nagsisimbolo ha iya pagpresenta han iya kalugaringon ha pagbuhat han kaburut-on han Dios.​—Heb. 10:7.

⁷ Durante han ministeryo ni Jesus dinhi ha tuna, an iya mga disipulo nanbawtismo liwat ha iba. (Juan 3:22; 4:1, 2) Pariho han pagbawtismo ni Juan, an ira pagbawtismo nagsisimbolo han pagbasol han usa nga indibiduwal ha iya mga pagtalapas ha Mosaiko nga Balaud. Pero katapos han kamatayon ngan pagkabanhaw ni Jesus, adton karuyag magin sumurunod ni Jesus magpapabawtismo tungod hin iba na nga rason.

8. (a) Katapos han pagkabanhaw ni Jesus, ano an iya iginsugo ha iya mga sumurunod? (b) Isaysay an importansya han Kristiano nga bawtismo.

⁸ Han 33 C.E., an ginbanhaw nga hi Jesus nagpakita ha grupo hin sobra 500 nga tawo—kalalakin-an, kababayin-an, ngan posible ha kabataan pa ngani. Posible nga hito nga higayon niya iginyakan ini nga mga pulong: “Kadto kamo ha mga tawo han ngatanan nga nasud ngan tutdui hira basi magin akon mga disipulo, bawtismuhi hira ha ngaran han Amay ngan han Anak ngan han baraan nga espiritu, tutdui hira ha pagtuman han ngatanan nga akon iginsugo ha iyo.” (Mat. 28:19, 20; 1 Cor. 15:6) Oo, posible nga ginatos han iya mga disipulo an presente han iginhatag ni Jesus an sugo nga maghimo hin mga disipulo. Salit iginpakita ni Jesus nga importante an bawtismo para hadton nakarawat han yugo han pagin disipulo han Kristo. (Mat. 11:29, 30) Basi makag-alagad ha Dios ha paagi nga iya inuuyonan, kinahanglan kilalahon ngan karawaton han usa an papel ni Jesus ha katumanan han katuyoan ni Jehova. Kon ginbuhat na ito han usa, puydi na hiya magpabawtismo. Ini la an pagbawtismo ha tubig nga ginkakarawat han Dios. An mga rekord ha Biblia naghahatag hin damu nga ebidensya nga han siyahan nga siglo, nasasabtan han bag-o nga mga disipulo han Kristo an pagkaimportante han bawtismo. Ngan waray hira maglangan ha pagpabawtismo.​—Buh. 2:41; 9:18; 16:14, 15, 32, 33.

9, 10. Ano an aton hibabaroan ha bawtismo han Etiopiahanon nga proselita ngan ha bawtismo ni apostol Pablo?

⁹ Basaha an Buhat 8:35, 36. Hunahunaa an ehemplo han Etiopiahanon nga proselita nga nagbibiyahe tipauli tikang ha iya pagsingba ha templo ha Jerusalem. Tungod han sugo han anghel ni Jehova, ginkaistorya ni Felipe an Etiopiahanon ngan “iginpahayag . . . ha iya an maopay nga sumat mahitungod kan Jesus.” Ano an reaksyon han Etiopiahanon? An iya sunod nga ginbuhat nagpapakita hin matin-aw nga ebidensya han iya kinasingkasing nga apresasyon ha mga kamatuoran nga iya hinbaroan. Karuyag niya buhaton kon ano an uyon ha kahikayan ni Jehova, salit waray hiya maglangan ha pagpabawtismo.

¹⁰ An ikaduha nga ehemplo amo an usa nga Judio nga nagtitimaraot ha mga Kristiano. Natawo hiya ha nasud nga dedikado ha Dios. Pero nawara han mga Judio an ira espesyal nga relasyon kan Jehova. Ini nga lalaki madasigon ha mga tradisyon han Judaismo, pero hinbaroan niya an husto nga paagi ha pag-alagad ha Dios. An ginbanhaw  ngan ginhimaya nga hi Jesu-Kristo mismo an nakiistorya ha iya. Ano an reaksyon hini nga lalaki? Iya ginkarawat an bulig han Kristiano nga disipulo nga hi Ananias. May kalabotan hini nga lalaki, an Biblia nasiring: “Binuhát hiya ngan ginbawtismohan.” (Buh. 9:17, 18; Gal. 1:14) Sigurado nga kilala mo ito nga Judio nga lalaki nga ha urhi gintawag nga hi apostol Pablo. Pero hinumdumi nga han nasabtan niya an kamatuoran mahitungod han papel ni Jesus ha katumanan han katuyoan han Dios, ginios dayon hiya. Waray hiya maglangan ha pagpabawtismo.​—Basaha an Buhat 22:12-16.

11. (a) Ano an nagpapagios ha mga estudyante ha Biblia yana nga magpabawtismo? (b) Ano an aton inaabat kon may nakikita kita nga nagpapabawtismo?

¹¹ Ito liwat an kahimtang han mga estudyante ha Biblia yana, batan-on man o lagas. Adton may-ada pagtoo ngan tinuod nga apresasyon ha mga kamatuoran naruruyag gud nga magdedikar kan Jehova ngan magpabawtismo. An pahayag nga iginpipresenta labi na para ha ira importante nga bahin ha kada asembleya ngan kombensyon. Nalilipay an mga Saksi ni Jehova kon ginkakarawat han usa nga estudyante ha Biblia an kamatuoran ngan nag-uuswag tubtob nga nagdesisyon hiya ha pagpabawtismo. Sigurado nga nalilipay gud an mga kag-anak kon nakikita nira nga kaupod an ira mga anak han bag-o nga mga disipulo nga ginbabawtismohan. Han 2017 nga tuig han pag-alagad, sobra 284,000 nga indibiduwal nga “may husto nga disposisyon” an nagpabawtismo sugad nga simbolo han ira dedikasyon kan Jehova. (Buh. 13:48) Matin-aw, nasasabtan hinin bag-o nga mga disipulo nga an bawtismo ginkikinahanglan para ha mga Kristiano. Ano nga mga pitad an ira ginhimo antes hira magpabawtismo?

12. Ano nga mga pitad an kinahanglan himoon han usa nga estudyante ha Biblia antes magpabawtismo?

¹² Antes mabawtismohan an usa nga estudyante, kinahanglan niya patuboon an pagtoo nga iginbasar ha husto nga kahibaro ha Dios, han Iya katuyoan, ngan han Iya kahikayan para ha katalwasan. (1 Tim. 2:3-6) Ito nga pagtoo nagpapagios ha estudyante nga isalikway an mga buhat nga diri nalilipayan han Dios ngan sundon an matadong nga mga suruklan ni Jehova. (Buh. 3:19) Importante ini, kay diri kakarawaton ni Jehova an dedikasyon han usa kon padayon hiya nga nagbubuhat hin mga butang nga ginkakangalasan han Dios. (1 Cor. 6:9, 10) Pero may dugang pa nga ginkikinahanglan kay ha pagsunod la ha higtaas nga suruklan ni Jehova ha moral. An usa nga nangangalimbasog ha pagbuhat han katadongan natambong liwat ha mga katirok ha kongregasyon ngan nakikigbahin ha nagtatalwas hin kinabuhi nga buruhaton, an pagsangyaw ngan paghimo hin disipulo. Hi Jesus nagsiring nga ini nga buruhaton hihimoon han iya tinuod nga mga disipulo. (Buh. 1:8) Kon mabuhat na ini nga mga pitad han usa nga estudyante ha Biblia, makakagdedikar na hiya kan Jehova pinaagi ha pribado nga pag-ampo, ngan katapos, sisimbolohan niya ito nga dedikasyon pinaagi ha pagpabawtismo ha atubangan han mga nag-oobserbar.

13. Kay ano nga kinahanglan hinumdoman han mga magturutdo ha Biblia nga an bawtismo ginkikinahanglan ha mga Kristiano?

¹³ Samtang ginbubuligan naton an aton mga anak ngan iba pa nga estudyante ha Biblia nga himoon an ginkikinahanglan nga mga pitad, sadang naton hinumdoman nga importante an pagpabawtismo basi magin tinuod nga disipulo. Kon matin-aw ito ha aton hunahuna, mas mapapabug-atan naton ito ha aton mga estudyante. Diri kita mag-aalang ha paghisgot ha iya ha angayan nga mga panahon kon mationan-o kaimportante an dedikasyon ngan bawtismo. Oo, karuyag naton nga an aton mga anak ngan iba pa nga estudyante ha Biblia mag-uswag tubtob nga magpabawtismo!

14. Kay ano nga diri naton ginpipirit an bisan hin-o nga magpabawtismo?

¹⁴ Diri sadang piriton han kag-anak, magturutdo ha Biblia, ngan bisan hin-o ha kongregasyon an usa nga indibiduwal nga magpabawtismo. Diri ito an paagi ni Jehova. (1 Juan 4:8) Lugod, samtang gintututdoan naton an sugad nga mga indibiduwal,  kinahanglan buligan naton hira nga masabtan an pagkaimportante han pagkaada personal nga relasyon ha Dios. An kinasingkasing nga apresasyon han estudyante ha kamatuoran ngan an iya hingyap nga pas-anon an yugo han pagin disipulo han Kristo amo an magpapagios ha iya nga magpabawtismo.​—2 Cor. 5:14, 15.

15, 16. (a) May espisipiko ba nga edad nga sadang magpabawtismo an usa? Isaysay. (b) Kay ano nga kinahanglan magpabawtismo an estudyante ha Biblia sugad nga usa han mga Saksi ni Jehova bisan kon nabawtismohan na hiya hadto ha iba nga relihiyon?

¹⁵ Waray espisipiko nga edad nga sadang magpabawtismo an usa. Iba-iba an kalaksihon han pag-uswag ngan pagtubo ha pagkahamtong han tagsa nga estudyante. Damu an bata pa nga nagpapabawtismo, ngan nagpapabilin hira nga matinumanon kan Jehova samtang nagtitikaadulto. An iba nahibaro han kamatuoran ha Biblia ngan nagpabawtismo han lagas na hira, sobra 100 anyos na ngani an pipira ha ira!

¹⁶ Usa nga lagas na nga estudyante ha Biblia an nagpakiana ha iya magturutdo kon importante gud ba an pagpabawtismo utro; nabawtismohan na hiya hadto ha iba-iba nga relihiyon. Ginhisgotan han magturutdo ha estudyante an mga teksto ha Biblia nga nagbabaton han iya pakiana. Nasabtan han estudyante an kinahanglan buhaton uyon ha Biblia ngan waray pag-iha, nagpabawtismo hiya. Bisan kon hirani na hiya mag-80 anyos, waray niya hunahunaa nga diri na niya kinahanglan magpabawtismo. Oo, kakarawaton la ni Jehova an aton bawtismo kon basado ito ha husto nga kahibaro han iya kaburut-on. Salit an bag-o nga mga disipulo kinahanglan magpabawtismo bisan kon nabawtismohan na hira hadto ha iba nga relihiyon.​—Basaha an Buhat 19:3-5.

17. Ano an angay pamalandungon ha adlaw han bawtismo han usa?

¹⁷ Makalilipay gud an adlaw han bawtismo han usa. Panahon liwat ito para ha seryoso nga pagpamalandong. Ginkikinahanglan an paningkamot basi matuman han usa an iya dedikasyon. Salit iginpariho ni Jesus an pagin disipulo ha usa nga yugo. An mga disipulo ni Jesus ‘diri na magkikinabuhi para ha ira kalugaringon, kondi para ha iya nga namatay para ha ira ngan ginbanhaw.’​—2 Cor. 5:15; Mat. 16:24.

18. Ano nga mga pakiana an aton hihisgotan ha sunod nga artikulo?

¹⁸ Ito an ginhihinunahuna han nanay ni Maria han iginpakiana niya ha iya kalugaringon an mga pakiana nga gin-unabi ha tinikangan hini nga artikulo. Kon usa ka nga kag-anak, bangin naipakiana mo na ini ha imo kalugaringon: ‘Andam na gud ba magpabawtismo an akon anak? Igo na gud ba an iya kahibaro basi idedikar an iya kalugaringon kan Jehova? Kinahanglan ba hiya mag-eskwela hin hitaas nga edukasyon ngan magkaada maopay nga trabaho antes hiya magpabawtismo? Ano man kon mabawtismohan an akon anak ngan katapos, makabuhat hin seryoso nga sala?’ Ha sunod nga artikulo, hihisgotan naton ini nga mga pakiana ngan mahibabaroan naton kon paonan-o matitipigan han Kristiano nga mga kag-anak an timbang nga panhunahuna may kalabotan ha bawtismo.