1. Kay ano nga mahimo kita magpahimulos ha paghisgot han Salmo 15:​1-5?

 HAN naglabay nga artikulo, nahibaroan naton nga an dedikado nga mga alagad ni Jehova mahimo magin mga bisita ha iya simboliko nga tolda, pinaagi ha pagkaada duok nga pakigsangkay ha iya. Pero ano an kinahanglan naton buhaton basi magin iya mga bisita? An Salmo 15 naghihisgot hini nga topiko. (Basaha an Salmo 15:​1-5.) Ini nga salmo naghahatag hin praktikal nga mga leksyon nga makakabulig ha aton nga magin mas duok ha Dios.

2. Ano an posible nga nagpagios ha salmista nga hi David nga unabihon an tolda ni Jehova?

² An Salmo 15 nagtitikang hini nga mga pakiana: “O Jehova, hin-o an puydi magin bisita ha imo tolda? Hin-o an puydi umukoy ha imo baraan nga bukid?” (Sal. 15:1) Kon gin-uunabi an “tolda” ni Jehova, bangin ginhihinunahuna han salmista nga hi David an tabernakulo, nga nakadto ha Gibeon hin pipira ka panahon. Gin-unabi liwat ni David an “baraan nga bukid” han Dios, nga posible nagtutudlok han Zion ha Jerusalem. Didto, mga pipira ka kilometro ha sur han Gibeon, hi David naghimo hin tolda basi butangan han arka han kasabotan tubtob nga matukod an templo.​—2 Sam. 6:17.

3. Kay ano nga dapat kita magin interesado ha Salmo 15? (Kitaa liwat an piktyur.)

³ Syempre, waray gud tuguti an kadam-an nga Israelita nga mag-alagad ha tabernakulo, ngan pipira la an makakasulod ha tolda diin an arka han kasabotan iginbutang. Pero an ngatanan nga matinumanon nga mga surugoon ni Jehova puydi magin mga bisita ha iya simboliko nga tolda kon magigin sangkay nira  hiya ngan magpapabilin nga iya mga sangkay. Ito gud an karuyag naton ngatanan. An Salmo 15 nag-uunabi hin pipira nga kalidad nga kinahanglan naton kultibaron ngan ipakita basi magpabilin nga mga sangkay ni Jehova.

MAGLAKAT NGA WARAY KASAYPANAN NGAN MAGBUHAT HAN HUSTO

4. Paonan-o kita nahibaro nga diri la bawtismo an iginpapabuhat ni Jehova ha aton? (Isaias 48:1)

⁴ Ha Salmo 15:​2, an sangkay han Dios iginhulagway sugad nga “an tawo nga naglalakat nga waray kasaypanan, an nagbubuhat han husto.” An mga pulong nga “naglalakat” ngan “nagbubuhat” pariho nagpapasabot hin pagin pirme nga nagpapadayon. Pero mahimo gud ba kita ‘makaglakat nga waray kasaypanan’? Oo. Bisan kon waray perpekto nga tawo, huhunahunaon kita ni Jehova sugad nga “naglalakat nga waray kasaypanan” kon ginbubuhat naton an aton pinakamaopay ha pagsugot ha iya. Kon igindidedikar naton an aton kalugaringon ha Dios ngan nagpapabawtismo, tinikangan pa la ini han aton paglakat kaupod han Dios. Pananglitan, ha panahon han Biblia, an pagin kaapi han nasud han Israel diri nagpapasabot nga an usa kwalipikado na nga magin bisita ni Jehova. An pipira nagtawag ha iya pero diri “ha kamatuoran ngan katadongan.” (Basaha an Isaias 48:1.) An sinsero nga mga Israelita kinahanglan mahibaro mahitungod ha mga ginkikinahanglan ni Jehova ngan sundon ito. Sugad man, basi mapahimulsan an pag-uyon han Dios yana, labaw pa kay ha pagpabawtismo ngan ha pakig-upod ha Kristiano nga kongregasyon an dapat naton buhaton. Dapat padayon kita nga “nagbubuhat han husto.” Paonan-o naton ito mahihimo?

5. Ano an iginpapasabot han pagin masinugtanon kan Jehova ha ngatanan nga butang?

⁵ Para kan Jehova, an ‘paglakat nga waray kasaypanan’ ngan ‘pagbuhat han husto’ nagpapasabot hin diri la basta regular nga pakigbahin ha pipira nga buruhaton ha lugar han  pagsingba. (1 Sam. 15:22) Kinahanglan kita maningkamot nga sugton an Dios ha tagsa nga bahin han aton kinabuhi bisan kon nag-uusahan la kita. (Prob. 3:6; Ecles. 12:​13, 14) Kinahanglan maningkamot kita nga sugton hi Jehova bisan ha mga butang nga baga hin diri gud importante. An pagbuhat hito nagpapakita nga hinigugma gud naton hiya, ngan tungod hito mas ginhihigugma kita niya.​—Juan 14:23; 1 Juan 5:3.

6. Sumala ha Hebreo 6:​10-12, ano an mas importante kay ha mag-opay nga butang nga ginhimo naton ha naglabay?

⁶ Gin-aapresyar gud ni Jehova an aton ginbuhat para ha iya ha naglabay. Pero diri nagpapasabot nga tungod la kay nagbuhat kita hin mag-opay nga butang ha naglabay magpapabilin na kita nga mga bisita ha tolda ni Jehova. Ginklaro ini ha Hebreo 6:​10-12. (Basaha.) Diri gud ginkakalimtan ni Jehova an aton mag-opay nga buhat ha naglabay. Pero karuyag niya nga padayon kita nga magsingba ha iya hin bug-os-kalag “tubtob ha kataposan.” Magigin sangkay naton hiya ha waray kataposan “kon diri kita manluya.”​—Gal. 6:9.

MAGYAKAN HAN KAMATUORAN HA IMO KASINGKASING

7. Ano an karuyag sidngon han pagyakan han kamatuoran ha aton kasingkasing?

⁷ An usa nga naruruyag nga magin bisita ha tolda ni Jehova kinahanglan “nagyayakan han kamatuoran ha iya kasingkasing.” (Sal. 15:2) An karuyag sidngon hini labaw pa kay ha diri pagbuwa. Karuyag ni Jehova nga magin tangkod kita ha ngatanan naton nga ginyayakan ngan ginbubuhat. (Heb. 13:18) Importante ito, “kay mangil-ad kan Jehova an malimbong nga tawo, pero duok Hiya nga sangkay han magtadong.”​—Prob. 3:32.

8. Ano nga panggawi an dapat naton likyan?

⁸ Adton ‘nagyayakan han kamatuoran ha ira kasingkasing’ diri nagpapakunokuno nga masinugtanon hira kon aada ha publiko pero sekreto nga gintatalapas an mga balaud han Dios. (Isa. 29:13) Ginlilikyan nira an panlimbong. An malimbong nga tawo bangin maghunahuna nga an mga balaud ni Jehova diri pirme an pinakamaopay. (San. 1:​5-8) Bangin diri niya sundon hi Jehova ha mga butang nga baga hin para ha iya diri gud importante. Katapos, kon  baga hin waray man la maraot nga nahitabo tungod han iya pagin diri masinugtanon, bangin magtikang hiya magbuhat hin mas maraot pa. Bisan kon naghuhunahuna hiya nga nag-aalagad hiya ha Dios, diri kakarawaton ni Jehova an iya pagsingba. (Ecles. 8:11) Pero karuyag naton nga magin tangkod ha ngatanan nga butang.

9. Ano an aton mahibabaroan tikang ha siyahan nga pagkita nira Jesus ngan Natanael? (Kitaa liwat an piktyur.)

⁹ May mahibabaroan kita ha pagkaimportante han pagkaada sinsero nga kasingkasing tikang ha siyahan nga pagkita nira Jesus ngan Natanael. Han gindara ni Felipe an iya sangkay nga hi Natanael basi makilala hi Jesus, may maopay gud nga nahitabo. Bisan kon siyahan pa gud la nga pagkita ni Jesus kan Natanael, hi Jesus nagsiring: “Kitaa, usa nga tinuod nga Israelita nga diri nanlilimbong.” (Juan 1:47) Maaram hi Jesus nga an iba niya nga disipulo mga tangkod, pero may nakita hi Jesus kan Natanael nga diri ordinaryo nga pagin sinsero. Pariho ha aton, hi Natanael diri perpekto. Pero diri hiya hipokrito, lugod tangkod hiya ha ngatanan nga butang. Naimpres hi Jesus ngan ginkumendasyonan niya hi Natanael tungod hito. Syempre, karuyag naton ngatanan nga ito liwat an abaton ni Jesus ha aton!

10. Kay ano nga dapat naton likyan an diri tama nga paggamit han regalo nga pagyakan? (Santiago 1:26)

¹⁰ An kadam-an han mga sugo nga nakalista ha Salmo 15 konektado ha kon paonan-o naton gintatratar an iba. An Salmo 15:3 nasiring nga an bisita ha tolda ni Jehova “diri . . . nagpapakaraot pinaagi han iya dila, diri hiya nagbubuhat hin maraot ha iya amyaw, ngan diri niya ginlilibak an iya kasangkayan.” Kon pakarauton naton an iba mahimo gud ito makadaot ha ira ngan diri na kita magigin bisita ha tolda ni Jehova.​—Basaha an Santiago 1:26.

11. Ano an pagpakaraot, ngan ano an bubuhaton ha diri mabinasulon nga mga parapakaraot?

¹¹ Espisipiko nga gin-unabi han salmista an pagpakaraot. Ano an pagpakaraot? Kaurogan na nga nagtutudlok ito ha buwa nga mga pulong nga makakadaot ha reputasyon han usa nga tawo. An diri mabinasulon nga mga  parapakaraot, ginpapaiwas ha Kristiano nga kongregasyon.​—Jer. 17:10.

12-13. Ano an pipira nga sitwasyon an posible nga diri tinuyo nga libakon naton an aton kasangkayan? (Kitaa liwat an piktyur.)

¹² Ginpapahinumdoman liwat kita han Salmo 15:3 nga an mga bisita ni Jehova diri nagbubuhat hin maraot ha ira amyaw ngan diri ginlilibak an ira kasangkayan. Ano an posible nga nahiuupod hito?

¹³ Posible nga diri tinuyo nga libakon naton an usa pinaagi ha pagpasarang hin negatibo nga impormasyon. Pananglitan: (1) sister nga inundang ha iya pagpayunir, (2) mag-asawa nga diri na nag-aalagad ha Bethel, o (3) brother nga diri na tigurang o ministeryal nga surugoon. Diri maopay kon isusumat naton ha iba nga ini nga kabugtoan bangin nakabuhat hin sayop, salit waray na hira hito nga mga pribilehiyo. Posible nga ito nga pagbag-o may mga rason nga diri kita maaram. Dugang pa, an bisita ha tolda ni Jehova “diri . . . nagbubuhat hin maraot ha iya amyaw ngan diri niya ginlilibak an iya kasangkayan.”

PASIDUNGGI ADTON MAY KAHADLOK KAN JEHOVA

14. Isaysay kon paonan-o iginsasalikway han mga bisita ni Jehova “an bisan hin-o nga angay kangalasan.”

¹⁴ An Salmo 15:4 nasiring nga an sangkay ni Jehova ‘nagsasalikway han bisan hin-o nga angay kangalasan.’ Paonan-o kita mahibabaro kon an usa angay kangalasan? Diri kita makakasiring kon an usa angay kangalasan o diri nga basado ha aton mga opinyon o karuyag. Kay ano? Diri kita perpekto, salit bangin maruyagan naton an mga tawo nga masayon pakibagayan, pero diri maruyagan an iba nga nakakapaaringit ha aton. Salit an dapat la naton isalikway adton para kan Jehova “angay kangalasan.” (1 Cor. 5:11) Nag-uupod ini hadton diri mabinasulon nga nagbubuhat han maraot, diri narespeto han aton pagtoo ngan mga gintotoohan, o naniningkamot nga paluyahon an aton espirituwalidad.​—Prob. 13:20.

15. Ano an usa nga paagi nga mapapasidunggan naton an mga “may kahadlok kan Jehova”?

¹⁵ Ha kabaliktaran, an Salmo 15:4 nasiring ha aton nga pasidunggan “an mga may kahadlok kan Jehova.” Salit namimiling kita hin mga paagi nga ipakita an pagkabuotan ngan pagrespeto ha kasangkayan ni Jehova. (Roma 12:10) Paonan-o? An usa nga paagi amo an gin-unabi ha Salmo 15:​4, nga an bisita ha tolda ni Jehova “diri . . . naatras ha iya saad, bisan kon nakakaraot ito ha iya.” An diri pagtuman han aton mga saad mahimo gud makasakit ha iba. (Mat. 5:37) Pananglitan, naglalaom hi Jehova ha mga bana ngan asawa nga padayon nira nga tutumanon an ira iginsaad han nagpakasal hira. Nalilipay liwat hiya kon an mga kag-anak naniningkamot gud nga tumanon an ira mga saad ha ira mga anak. Tungod han aton gugma ha Dios ngan ha igkasi-tawo bubuhaton naton an aton pinakamaopay basi tumanon an aton mga saad.

16. Ano an iba pa nga paagi basi mapasidunggan an kasangkayan ni Jehova?

¹⁶ An iba pa nga paagi nga mapapasidunggan naton an kasangkayan han Dios amo an pagin maabiabihon ngan mahinatagon. (Roma 12:13) An pagpahalibway kaupod an kabugtoan nakakabulig ha aton nga maparig-on an aton pakigsangkay ha ira ngan kan Jehova. Kon maabiabihon liwat kita ginsusubad naton hi Jehova.

MAGPABILIN NGA WARAY GUGMA HA KWARTA

17. Kay ano nga gin-unabi an kwarta ha Salmo 15?

¹⁷ Aton mababasa nga an bisita ni Jehova “diri . . . nagpapautang han iya kwarta nga may tubo, ngan diri hiya nakarawat hin hukip kontra ha inosente.” (Sal. 15:5) Kay ano nga gin-unabi an kwarta hini nga halipot nga salmo? Kay an diri balanse nga panhunahuna ha kwarta  mahimo makasakit ha iba ngan makadaot han aton pakigsangkay ha Dios. (1 Tim. 6:10) Ha panahon han Biblia, ginsalingabot han pipira an ira pobre nga kabugtoan pinaagi ha pagpautang ha ira hin kwarta nga may tubo. An pipira nga hukom kinarawat liwat hin mga hukip ngan ginhukman hin diri patas an inosente nga mga biktima. Nangangalas hi Jehova ha sugad nga mga buhat.​—Ezek. 22:12.

18. Ano nga mga pakiana an makakabulig ha aton basi mausisa an aton panhunahuna ha kwarta? (Hebreo 13:5)

¹⁸ Maopay nga usisahon naton an aton panhunahuna ha kwarta. Pakianhi an imo kalugaringon: ‘Agsob ba ako magpinanhunahuna hin kwarta ngan kon ano an mahimo paliton? Kon nangutang ako hin kwarta, maiha ko ba ito baydan, kay ginhuhunahuna ko nga diri pa man ito kinahanglan han nagpahuram ha akon? Inaabat ko ba nga importante ako kon may-ada ako kwarta pero nakukurian nga magin mahinatagon? Ginhuhunahuna ko ba nga materyalistiko an kabugtoan tungod la kay damu an ira kwarta? Nakikigsangkay la ba ako ha mga riko ngan diri ha mga pobre?’ Nakarawat naton an imbitasyon nga magin mga bisita ni Jehova. Mapuprotektaran naton ito nga pribilehiyo pinaagi ha pagsiguro nga diri kita nahigugma ha kwarta. Kon ito an aton bubuhaton, diri gud kita babayaan ni Jehova!—Basaha an Hebreo 13:5.

HINIGUGMA NI JEHOVA AN IYA KASANGKAYAN

19. Kay ano nga karuyag ni Jehova nga buhaton naton an tanan nga gin-unabi ha Salmo 15?

¹⁹ Natatapos an Salmo 15 pinaagi hini nga saad: “An bisan hin-o nga nagbubuhat hini nga mga butang diri gud mababay-og.” (Sal. 15:5) Dinhi, iginsasaysay han salmista kon kay ano nga karuyag ni Jehova nga buhaton naton an tanan nga gin-unabi hini nga salmo. Karuyag ni Jehova nga magin malipayon kita. Salit naghahatag hiya ha aton hin instruksyon basi makarawat naton an iya bendisyon ngan proteksyon.​—Isa. 48:17.

20. Ha ano makakalaom an mga bisita ni Jehova?

²⁰ An mga bisita ni Jehova makakalaom hin makalilipay nga tiarabot. An matinumanon nga mga dinihogan maukoy ha ‘damu nga urukyan’ nga igin-andam ni Jesus para ha ira ha langit. (Juan 14:2) Adton may tunan-on nga paglaom nagpapamulat han saad nga mababasa ha Pahayag 21:3. Sigurado, kita ngatanan naabat hin daku nga dungog ha pakakarawat han imbitasyon ni Jehova nga magin mga bisita ha iya tolda ha waray kataposan!