1. An kada tagsa ha aton may-ada ano nga natural nga hingyap, ngan ano an nahiuupod hito?

ANO an imo aabaton kon an usa mo nga kakilala ngan ginrirespeto nangalimot han imo ngaran, o diri na ngani nakilala ha imo? Makasurubo gud ito. Kay ano? Tungod kay an kada tagsa ha aton may natural nga hingyap nga karawaton kita han iba. Pero diri la naton karuyag nga makilala han iba an aton ngaran; karuyag liwat naton nga kilalahon kita nira kon hin-o kita ngan apresyaron kon ano an aton mga nahimo.​—Num. 11:16; Job 31:6.

2, 3. Paonan-o an aton hingyap nga apresyaron kita han iba mahimo magin sayop? (Kitaa an retrato hini nga pahina.)

² Pariho han aton iba pa nga natural nga hingyap, an aton hingyap nga apresyaron kita han iba mahimo magin diri timbang, o magin sayop tungod han aton pagkadiri-hingpit. Mahimo ini mag-aghat ha aton nga maghingyap hin diri angayan nga pagpasidungog. An kalibotan ni Satanas nag-aaghat ha aton nga maghingyap nga magin kilala ngan pasidunggan han iba, nga magigin hinungdan nga diri naton maihatag ha aton langitnon nga Amay, hi Jehova nga Dios, an pagkilala ngan pagsingba nga angayan para ha iya.​—Pah. 4:11.

 ³ Ha panahon ni Jesus, an pipira nga lider han relihiyon may-ada sayop nga panhunahuna may kalabotan ha pagpasidungog. Hi Jesus nagpahamangno ha iya mga sumurunod: “Pag-ikmat kamo ha mga eskriba nga naruruyag paglinakat-lakat nga nakabado hin hilaba ngan naruruyag tagan hin katalahoran ha mga merkado ngan paglingkod ha prente nga mga lingkoran ha mga sinagoga ngan ha pinakamaopay nga mga pwesto ha mga panihapon.” Hiya dugang nga nagsiring: “Mas mabug-at nga sirot an ira makakarawat.” (Luc. 20:46, 47) Ha kabaliktaran, ginkumendasyonan ni Jesus an usa nga pobre nga balo nga an gutiay nga donasyon posible nga waray pabilhi han iba. (Luc. 21:1-4) Matin-aw nga an panhunahuna ni Jesus may kalabotan ha pagpasidungog iba gud kay ha panhunahuna han iba. Ini nga artikulo mabulig ha aton nga matipigan an husto nga panhunahuna, an panhunahuna nga gin-uuyonan ni Jehova nga Dios.

4. Ano an pinakamaopay nga klase han pagkilala, ngan kay ano?

⁴ Ano an pinakamaopay nga klase han pagkilala nga mahimo naton pangalimbasogan nga makarawat? Diri ito an klase han atensyon nga ginpapangalimbasogan han damu nga makuha pinaagi han hitaas nga edukasyon, malampuson nga negosyo, ngan pagin sikat ha musika o isport. Lugod, ito an klase han atensyon nga gin-unabi ni Pablo han hiya nagsiring: “Yana nga kilala na niyo an Dios, o yana nga kinikilala na kamo han Dios, kay ano nga nabalik kamo ha maluya ngan waray pulos nga basihan nga mga prinsipyo han kalibotan ngan nagpapauripon na liwat hito?” (Gal. 4:9) Makalilipay gud nga pribilehiyo nga magin ‘kilala han Dios,’ an Supremo nga Magmarando ha Uniberso! Karuyag gud niya magkaada duok nga relasyon ha aton. Sugad han ginsiring han usa nga eskolar, “iya iginpapakita ha aton an iya mahigugmaon nga atensyon.” Kon ginkikilala kita ni Jehova sugad nga iya kasangkayan, nakakab-ot naton an tinuod nga katuyoan han aton pag-eksister.​—Ekles. 12:13, 14.

5. Ano an kinahanglan naton buhaton basi makilala kita han Dios?

⁵ Naeksperyensyahan ni Moises an sugad nga bendisyon. Han nanginyupo hiya kan Jehova nga tugotan hiya nga mas masabtan pa an Iya mga paagi, hi Jehova binaton: “Akon bubuhaton ini nga bagay liwat nga imo iginpamolong kay ikaw nakaagi hin kalooy ha akon mga mata, ngan ako nakilala ha imo ha ngaran.” (Eks. 33:12-17) Makakakarawat liwat kita hin mag-opay nga mga bendisyon kon kilala kita ni Jehova. Kondi ano an kinahanglan naton buhaton basi makilala kita ni Jehova? Kinahanglan higugmaon naton hiya ngan igdedikar an aton kinabuhi ha iya.​—Basaha an 1 Corinto 8:3.

6, 7. Ano an mahimo magin hinungdan nga madaot an aton relasyon kan Jehova?

⁶ Kondi, kinahanglan naton tipigan an aton presyoso nga relasyon ha aton langitnon nga Amay. Pariho han mga Kristiano ha Galacia nga ginsuratan ni Pablo, kinahanglan liwat naton likyan nga magin uripon “ha maluya ngan waray pulos nga basihan nga mga prinsipyo” hini nga kalibotan, nga nag-uupod han pangalimbasog nga makarawat an pagdayaw han kalibotan. (Gal. 4:9) Ito nga mga Kristiano han siyahan nga siglo nag-uswag na tubtob ha punto nga kilala na hira han Dios. Kondi hi Pablo nagsiring nga an amo gihapon nga kabugtoan “nabalik” ha waray pulos nga mga butang. Sugad hin ginsisidngan hira ni Pablo: “Katapos niyo mangalimbasog nga mag-uswag, kay ano nga nabalik kamo ha waray pulos nga mga butang nga iyo na ginbayaan?”

⁷ Mahimo ba liwat ito mahitabo ha aton yana? Oo. Han nakilala naton hi Jehova, bangin ginbayaan liwat naton an aton pagin prominente ha kalibotan ni Satanas pariho han ginbuhat ni Pablo. (Basaha an Filipos 3:7, 8.) Bangin ginbayaan naton an mga oportunidad nga magkaada hitaas nga edukasyon, o bangin waray naton karawata an mas hitaas nga posisyon ha trabaho o an posibilidad  nga magkaada damu nga kwarta ha negosyo. Puydi unta kita magin riko ngan sikat tungod han aton talento ha musika o abilidad ha isport, pero ginbayaan naton ini ngatanan. (Heb. 11:24-27) Diri gud maaramon nga pagbasolan naton an sugad nga mag-opay nga desisyon ngan hunahunaon nga mas maopay unta an aton kinabuhi kon ginsalingabot naton ito nga mga oportunidad! An sugad nga panhunahuna mahimo magpagios ha aton nga mangalimbasog nga magkaada han mga butang hini nga kalibotan nga aton na gintagad sugad nga “maluya ngan waray pulos.”

8. Ano an magpaparig-on han aton determinasyon nga makarawat an pagkilala ni Jehova?

⁸ Paonan-o naton mapaparig-on an aton determinasyon nga makarawat an pagkilala ni Jehova, diri han kalibotan? Basi mabuhat ito, kinahanglan hinumdoman naton an duha nga importante nga kamatuoran. Siyahan, pirme ginhihinumdom ngan gin-aapresyar ni Jehova adton matinumanon nga nag-aalagad ha iya. (Basaha an Hebreo 6:10; 11:6) Ginpapabilhan gud niya an kada tagsa han iya mga surugoon, ngan gintatagad niya nga “diri-matadong” an pagbalewaray hadton magtinumanon ha iya. “Kilala ni Jehova an iya mga gintatag-iya.” (2 Tim. 2:19) Maaram hiya han dalan han mga magtadong ngan kon paonan-o hira tatalwason tikang ha kasakitan.​—Sal. 1:6; 2 Ped. 2:9.

9. Pag-unabi hin mga ehemplo kon paonan-o iginpakita ni Jehova an iya pag-uyon ha iya katawohan.

⁹ Usahay, iginpapakita ni Jehova an iya pag-uyon ha iya katawohan ha urusahon nga mga paagi. (2 Kron. 20:20, 29) Pananglitan, hunahunaa an paagi han pagtalwas ni Jehova ha iya katawohan ha Dagat nga Pula han ginlalanat hira han magkusog nga kasundalohan ni Paraon. (Eks. 14:21-30; Sal. 106:9-11) Urusahon gud ito nga panhitabo kay bisan kon 40 ka tuig na an naglabay, iristoryahon pa gihapon ito han mga tawo didto hito nga mga lugar. (Jos. 2:9-11) Makaparig-on gud ha aton an paghinumdom hito nga paagi ni Jehova ha pagpakita han iya gugma ngan gahum kay hirani na naton maeksperyensyahan an maiha na nga igintagna nga pag-atake han Gog han Magog. (Esek. 38:8-12) Hito nga panahon, magigin mapasalamaton gud kita nga ginpangalimbasogan naton nga makilala kita han Dios imbes nga han kalibotan.

10. Ano an usa pa nga kamatuoran nga sadang naton hinumdoman may kalabotan ha pagpakita ni Jehova hin pagkilala ha iya katawohan?

¹⁰ Sadang liwat naton hinumdoman an ikaduha nga importante nga kamatuoran: Mahimo kita pasidunggan ni Jehova ha mga paagi nga bangin diri naton ginlalaoman. Adton mga nagbubuhat hin maopay basi la dayawon han mga tawo ginsidngan nga waray nira makakarawat nga balos tikang kan Jehova. Kay ano? Nakarawat na nira hin bug-os an ira balos han gindayaw hira han mga tawo. (Basaha an Mateo 6:1-5.) Kondi hi Jesus nagsiring nga an iya Amay “sekreto nga nagkikita” hadton diri nakakakarawat hin pagpasidungog tungod han ira mag-opay nga ginbubuhat para ha iba. Nakikita ni Jehova ito nga mga buhat ngan ginbabalosan an tagsa nga indibiduwal sumala hito. Kondi usahay, ginbabalosan kita ni Jehova ha diri ginlalaoman nga mga paagi. Hisgotan naton an pipira nga ehemplo.

11. Paonan-o gintagan ni Jehova hi Maria hin pasidungog?

¹¹ Han panahon na nga matawo an Anak han Dios, nagpili hi Jehova hin mapainubsanon nga babaye, hi Maria, nga magigin nanay hini nga espesyal nga bata. Naukoy hi Maria ha gutiay nga syudad han Nazaret, hirayo ha Jerusalem ngan han darayawon nga templo hito. (Basaha an Lucas 1:26-33.) Kay ano nga ginpili hi Maria para hini nga pribilehiyo? Ginsumatan hiya han anghel nga hi Gabriel nga ‘nalilipay gud ha iya an Dios.’ Ha urhi, han nakiistorya hiya ha iya patod nga hi Elizabeth, nakita naton an iya maopay nga  espirituwalidad pinaagi han iya mga ginsiring. (Luc. 1:46-55) Oo, gin-inobserbaran ni Jehova hi Maria, ngan iginhatag ha iya inin diri ginlalaoman nga pribilehiyo tungod han iya pagin matinumanon.

12, 13. Ha ano nga paagi iginhatag an angayan nga pagpasidungog kan Jesus han natawo hiya ngan han gindara hiya ha templo paglabay hin 40 ka adlaw?

¹² Han igin-anak na ni Maria hi Jesus, waray pasidunggi ni Jehova an bisan hin-o nga prominente nga opisyal o magmarando ha Jerusalem ngan Betlehem pinaagi ha pagpahibaro ha ira han nahitabo. An mga anghel nagpakita ha mapainubsanon nga mga paraataman hin karnero nga nagbabantay han ira panon ha kaumhan ha gawas han Betlehem. (Luc. 2:8-14) Katapos, ginbisita hini nga mga paraataman an katatawo pa la nga bata. (Luc. 2:15-17) Sigurado nga nahipausa ngan nalipay gud hira Maria ngan Jose han nakita nira nga ginpasidunggan hi Jesus ha sugad nga paagi! Tigamni an kaibahan han paagi ni Jehova ha pagbuhat han mga butang ngan han paagi han Yawa. Han nagpadara hi Satanas hin mga astrologo basi bumisita kan Jesus ngan ha iya mga kag-anak, an ngatanan nga tawo ha Jerusalem nasina han hinbaroan nira an sumat mahitungod han katawo ni Jesus. (Mat. 2:3) Tungod kay hinbaroan han publiko an mahitungod han katawo ni Jesus, nagresulta ito han kamatay han damu nga inosente nga kabataan.​—Mat. 2:16.

¹³ Paglabay hin 40 ka adlaw tikang han katawo ni Jesus, kinahanglan kumadto hi Maria ha templo ha Jerusalem, nga mga 9 ka kilometro tikang ha Bethlehem, basi maghalad kan Jehova. (Luc. 2:22-24) Samtang nagbibiyahe hi Maria kaupod hira Jose ngan Jesus, bangin nahunahuna niya kon tatagan ba han saserdote hin espesyal nga pagkilala an papel ni Jesus ha tidaraon. Ginpasidunggan hi Jesus pero diri ha paagi nga ginlalaoman ni Maria. Lugod, gin-gamit ni Jehova an ‘matadong ngan may kahadlok ha Dios’ nga hi Simeon ngan an 84 anyos nga balo nga hi propetisa Ana basi ipahibaro nga ini nga bata amo an magigin iginsaad nga Mesias, o Kristo.​—Luc. 2:25-38.

14. Ano nga mga bendisyon an nakarawat ni Maria tikang kan Jehova?

¹⁴ Kumusta man hi Maria? Padayon ba nga iginpakita ni Jehova kan Maria an angayan nga pagpasidungog tungod han iya sinsero nga pag-ataman ngan pagpadaku han Iya Anak? Oo. Iginparekord ni Jehova ha Biblia an mga ginbuhat ngan ginsiring ni Maria. Posible nga diri igintutugot han kahimtang ni Maria nga umupod kan Jesus ha iya mga pagbiyahe durante han iya tulo ngan tunga ka tuig nga pagministeryo. Bangin tungod kay balo hi Maria, kinahanglan niya magpabilin ha Nazaret. Pero bisan kon waray hiya makapahimulos ha damu nga pribilehiyo, nakadto hiya han namatay hi Jesus. (Juan 19:26) Ha urhi, nakadto hi Maria ha Jerusalem kaupod an mga disipulo antes igbubo ha ira an baraan nga espiritu han Pentekostes. (Buh. 1:13, 14) Posible gud nga gindihogan hiya kaupod han iba pa nga nakadto hito nga higayon. Kon amo, nagpapasabot ito nga gintagan hiya hin oportunidad nga makaupod hi Jesus ha langit ha kadayonan. Makalilipay gud ito nga balos han iya matinumanon nga pag-alagad!

15. Han nakanhi hi Jesus ha tuna, paonan-o iginpakita ni Jehova an iya pag-uyon ha iya Anak?

¹⁵ Waray maghingyap hi Jesus nga pasidunggan hiya han mga lider han relihiyon o politika ha iya panahon. Pero sigurado nga naparig-on gud hi Jesus han iginpakita ni Jehova an Iya pag-uyon ha iya ha tulo nga magkaiba nga higayon pinaagi ha direkta nga pagyakan tikang ha langit. Katapos gud la han bawtismo ni Jesus ha Salog Jordan, hi Jehova nagsiring: “Ini an akon Anak nga hinigugma, nga akon nalilipayan.” (Mat. 3:17) Labot kan Jesus, posible gud nga hi Juan nga Parabaptis la an nakabati hito. Katapos, mga usa ka tuig antes mamatay hi Jesus, tulo han iya mga apostol an nakabati han nagyakan hi Jehova mahitungod kan Jesus: “Ini an akon Anak nga hinigugma, nga  akon nalilipayan. Pamati kamo ha iya.” (Mat. 17:5) Ha urhi, mga pipira na la ka adlaw antes han kamatayon ni Jesus, nagyakan utro hi Jehova ha iya Anak tikang ha langit.​—Juan 12:28.

16, 17. Paonan-o ginpasidunggan ni Jehova hi Jesus ha diri ginlalaoman nga paagi?

¹⁶ Maaram hi Jesus nga aakusaran hiya sugad nga parapasipara ngan makakaeksperyensya hiya hin makaarawod nga kamatayon. Bisan pa hito, igin-ampo niya nga matuman an kaburut-on ni Jehova, diri an iya. (Mat. 26:39, 42) “Gin-ilob niya an pasakitan nga kahoy, ginbalewaray an pakaalo,” tungod kay karuyag niya makarawat an pag-uyon han iya Amay, diri han kalibotan. (Heb. 12:2) Paonan-o iginpakita ni Jehova ito nga pag-uyon?

¹⁷ Han nakanhi hi Jesus ha tuna, iginpahayag niya an iya hingyap nga makarawat utro an himaya nga may-ada hiya hadto ha langit han kaupod niya an iya Amay. (Juan 17:5) An Biblia waray magsiring nga naglaom hi Jesus hin labaw pa hito. Waray hiya maghingyap hin hitaas nga posisyon. Pero ano an ginbuhat ni Jehova? Ginpasidunggan niya hi Jesus ha paagi nga diri ginlalaoman pinaagi ha pagbanhawa ha iya ngadto ha “hitaas nga posisyon” ngan paghatag ha iya hin balos nga hiya pa la an nakakarawat tubtob hito nga panahon​—an imortal nga kinabuhi sugad nga espiritu! * (Fil. 2:9; 1 Tim. 6:16) Makalilipay gud ito nga pagpasidungog kan Jesus tungod han iya pagin matinumanon!

18. Ano an mabulig ha aton nga makarawat an pag-uyon ni Jehova imbes han kalibotan?

¹⁸ Ano an mabulig ha aton nga makarawat an pag-uyon ni Jehova imbes han kalibotan? Tigamni nga pirme naghahatag hi Jehova hin pasidungog ha iya matinumanon nga mga surugoon ngan kasagaran nga ginbabalosan niya hira ha diri ginlalaoman nga mga paagi. Nahuhunahuna mo ba kon ano nga diri ginlalaoman nga mga bendisyon an imo makakarawat ha tidaraon? Pero yana, samtang gin-iilob naton an mga kakurian ngan mga problema dinhi hinin maraot nga kalibotan, pirme naton hinumdoman nga mawawara ini nga kalibotan, upod na an anoman nga pasidungog nga igintatanyag hini. (1 Juan 2:17) An aton mahigugmaon nga Amay nga hi Jehova ‘diri kay diri-matadong nga kalimtan niya an aton mga buhat ngan an gugma nga aton iginpakita para ha iya ngaran.’ (Heb. 6:10) Oo, ipapakita niya an iya pag-uyon ha aton​—bangin ha paagi pa ngani nga diri naton nahahanduraw yana!