1, 2. Kay ano nga padayon nga magkakaada mga pobre hini nga sistema?

MAKURI ngan diri patas an sistema han ekonomiya yana. An mga batan-on nakukurian pamiling hin trabaho. Damu an nabalhin ha mas riko nga mga nasud bisan kon mahimo mameligro an ira kinabuhi. An kapobrehan komon bisan ha riko nga mga nasud. Ha bug-os nga kalibotan, an mga riko mas nagtitikariko samtang an mga pobre mas nagtitikapobre. Sumala ha bag-o la nga pagbanabana, an karikohan han 1 ka porsyento han pinakariko nga mga tawo ha bug-os nga kalibotan katugbang han gintarampo nga karikohan han 99 porsyento han iba pa nga umurukoy ha tuna. Bisan kon bangin diri katoohan ito nga report, diri naton maninigaran nga binilyon nga tawo an pobre hinduro, samtang an iba may damu nga karikohan nga kaya magsuporta han ira mga tulin ha masunod nga damu nga katuigan. Maaram hi Jesus hini nga kamatuoran. Hiya nagsiring: “An mga pobre pirme niyo kaupod.” (Mar. 14:7) Kay ano nga nahitatabo inin diri patas nga kahimtang?

² Maaram hi Jesus nga diri mababag-o inin presente nga sistema han ekonomiya tubtob nga umabot an Ginhadian han Dios. An hakog nga sistema han komersyo nga ginrirepresentaran han “mga negosyante” ha Pahayag 18:3, pati na an politika ngan relihiyon, bahin han kalibotan ni Satanas. Bisan kon natitipigan han katawohan han Dios an bug-os nga pagin  bulag ha politika ngan buwa nga relihiyon, kadam-an an diri bug-os nga nakakabulag ha komersyo.

3. Ano nga mga pakiana an aton hihisgotan?

³ Sugad nga mga Kristiano, maopay nga usisahon naton an aton panhunahuna may kalabotan ha sistema han komersyo yana. Mahimo naton pakianhan an aton kalugaringon: ‘Paonan-o ko magagamit an akon materyal nga mga panag-iya basi ipakita nga matinumanon ako ha Dios? Paonan-o ko malilimitahan an pakigbahin ha mga buruhaton may kalabotan ha komersyo hini nga kalibotan? Ano nga mga ehemplo an nagpapakita nga an katawohan han Dios bug-os nga nasarig ha iya bisan pa han magkuri nga kahimtang?’

4, 5. (a) Ha ilustrasyon ni Jesus, ano nga sitwasyon an gin-atubang han tinaporan? (b) Ano an iginsagdon ni Jesus ha iya mga sumurunod?

⁴ Basaha an Lucas 16:1-9. An ilustrasyon ni Jesus mahitungod han diri-matadong nga tinaporan nag-aaghat ha aton nga maghunahuna. Katapos igsumbong an tinaporan nga ginkaragan niya an panag-iya han iya agaron, ginios hiya nga may “praktikal nga kinaadman” pinaagi ha “pakigsangkay” ha mga tawo nga makakabulig ha iya kon paiwason hiya ha iya trabaho. * Syempre, diri gin-aaghat ni Jesus an iya mga disipulo nga magbuhat hin diri matadong basi mabuhi hini nga kalibotan. Iya iginsaysay nga an sugad nga disposisyon kanan “mga anak hini nga sistema,” pero gin-gamit niya ito nga ilustrasyon basi magtutdo hin leksyon.

⁵ Maaram hi Jesus nga pariho han tinaporan nga inatubang hin makuri nga kahimtang, kadam-an han iya mga sumurunod kinahanglan magpakabuhi dinhi hini nga kalibotan nga kalyap an diri matadong nga komersyo. Salit gin-aghat niya hira: “Pakigsangkay kamo pinaagi han karikohan hinin diri-matadong nga kalibotan basi kon maubos ito, karawaton kamo nira [ni Jehova ngan ni Jesus] ha permanente nga mga urukyan.” Ano an aton mahibabaroan ha sagdon ni Jesus?

6. Paonan-o kita nahibaro nga an sistema han komersyo yana diri bahin han katuyoan han Dios?

⁶ Matin-aw nga igintututdo han Biblia nga an komersyo diri bahin han katuyoan han Dios. Hura nga gintaganahan ni Jehova hira Adan ngan Eva han ira mga ginkikinahanglan ha Eden. (Gen. 2:15, 16) Ha urhi, han ginios an baraan nga espiritu ha dinihogan nga mga Kristiano han siyahan nga siglo, “waray bisan usa nga nagsiring nga iya gud la an mga butang nga iya gintatag-iya, lugod gintagad nira nga para ito ha ngatanan.” (Buh. 4:32) Igintagna ni propeta Isaias nga maabot an panahon nga libre nga mapapahimulosan han ngatanan nga tawo an mga bahandi han tuna. (Isa. 25:6-9; 65:21, 22) Pero ha pagkayana, an mga sumurunod ni Jesus nagkikinahanglan hin “praktikal nga kinaadman” basi magkaada pakabuhi gamit an “karikohan hinin diri-matadong nga kalibotan” samtang padayon nga nangangalimbasog nga mapalipay an Dios.

7. Ano nga sagdon an mababasa ha Lucas 16:10-13?

⁷ Basaha an Lucas 16:10-13. Ha ilustrasyon ni Jesus, nakigsangkay an tinaporan para ha iya personal nga bentaha. Pero gin-aghat ni Jesus an iya mga sumurunod nga makigsangkay ha iya ngan kan Jehova diri tungod han hakugnon nga mga katuyoan. An nasunod nga mga bersikulo hito nga ilustrasyon nagpapakita nga an paggamit han “karikohan hinin diri-matadong nga kalibotan” may koneksyon ha pagin matinumanon ha Dios. Karuyag ni Jesus nga masabtan naton nga maipapakita naton an pagin matinumanon ha paagi han aton paggamit hito nga karikohan kon magkaada kita hito. Paonan-o naton ito mahihimo?

8, 9. Paghatag hin ehemplo kon paonan-o iginpapakita han pipira an ira pagin matinumanon ha ira paggamit han “karikohan hinin diri-matadong nga kalibotan.”

⁸ An usa nga paagi nga maipapakita naton an pagin matinumanon ha paagi han aton paggamit ha materyal nga mga butang amo an paghatag hin pinansyal  nga kontribusyon para ha bug-os-kalibotan nga pagsangyaw nga buruhaton nga igintagna ni Jesus. (Mat. 24:14) Usa nga daragita ha India an may alkansiya ngan ginhuhulogan niya ito hin sinselyo; ngani, waray na hiya pumalit hin mga uyagan para may maihulog hiya hito. Han napuno an alkansiya, iya igindonar an iya natirok para magamit ha pagsangyaw nga buruhaton. Usa nga bugto ha India nga may kalubian an nagdonar hin damu nga lubi ha Malayalam remote translation office kay naghunahuna hiya nga napalit an opisina hin lubi salit mas maopay kon lubi na la an iya igdudonar imbes nga kwarta. Pagpakita ito hin praktikal nga kinaadman. Sugad man, an kabugtoan ha Gresya regular liwat nga nagdudonar hin lana han olibo, keso, ngan iba pa nga pagkaon para ha pamilya han Bethel.

⁹ Iginpapagamit han usa nga bugto nga taga-Sri Lanka, nga naukoy na ha iba nga nasud, an iya tuna ngan balay ha Sri Lanka para ha mga katirok ngan asembleya ngan sugad nga akomodasyon han mga nag-aalagad hin bug-os-panahon. Sakripisyo ito para ha bugto kay makakakwarta unta hiya tikang hini nga propyedad, pero daku ito nga bulig para ha pobre nga kabugtoan hito nga lugar. Ha mga nasud nga igindidiri an pagsangyaw nga buruhaton, iginpapagamit han kabugtoan an ira balay sugad nga Kingdom Hall salit damu nga payunir ngan iba pa nga pobre nga kabugtoan an nagkakaada katirokan nga diri nabubug-atan ha pinansyal.

10. Ano an pipira nga bendisyon nga aton nakakarawat kon mahinatagon kita?

¹⁰ An gin-unabi nga mga ehemplo nagpapakita kon paonan-o an katawohan han Dios “matinumanon ha gutiay nga butang,” karuyag sidngon, ha ira paggamit han ira materyal nga karikohan, nga guroguti an bili kay ha espirituwal nga karikohan. (Luc. 16:10) Ano an inaabat hini nga kasangkayan ni Jehova ha ira mga pagsakripisyo? Nalilipay gud hira kay maaram hira nga an pagin mahinatagon usa nga paagi basi magkaada “totoo nga karikohan.” (Luc. 16:11) Usa nga bugto nga regular nga nagdudonar para ha buruhaton han Ginhadian an nag-unabi hin bendisyon nga iya nakakarawat: “An akon pagin mahinatagon ha materyal nagkaada naiiba nga epekto ha akon paglabay han panahon. Naobserbaran ko nga samtang nagigin mas mahinatagon ako ha materyal, nagkakaada ako mas mahinatagon nga disposisyon ha akon pakig-upod ha iba. Nagigin mas mapinasayloon na ako, pasensyoso, ngan masayon ko na karawaton an akon mga sayop ngan mga sagdon ha akon.” Hinbaroan han damu nga an pagin mahinatagon may maopay gud nga epekto ha espirituwalidad han usa.​—Sal. 112:5; Prob. 22:9.

11. (a) Paonan-o an aton pagin mahinatagon nagpapakita hin “praktikal nga kinaadman”? (b) Ano an ginbubuhat han katawohan han Dios ha mga donasyon basi magkaada pagkasarahid? (Kitaa an retrato ha tinikangan hini nga artikulo.)

¹¹ Iginpapakita liwat naton an “praktikal nga kinaadman” kon ginagamit naton an materyal nga mga panag-iya ha pagsuporta ha mga buruhaton han Ginhadian. An pagkaada materyal nga mga panag-iya naghahatag ha aton hin higayon nga buligan an iba. Adton mga riko ha materyal nga diri makakag-alagad hin bug-os-panahon o makakagboluntaryo ha lugar nga may daku nga panginahanglan nalilipay ha paghibaro nga an ira mga donasyon ginagamit ha pagsuporta ha ministeryo han iba. (Prob. 19:17) An iginhahatag nga mga donasyon nabulig nga magkaada suplay hin mga literatura ngan masuportaran an pagsangyaw nga buruhaton ha pobre nga mga lugar pero malaksi an espirituwal nga pag-uswag. Ha sulod hin mga katuigan, an  kabugtoan ha mga nasud sugad han Congo, Madagascar, ngan Rwanda, kasagaran na nga kinahanglan magpili kon hain an ira uunahon—​an pagkaon para ha ira pamilya o an pagkaada Biblia, nga usahay nagkakantidad hin kanan usa ka semana o usa ka bulan nga sweldo. Yana, pinaagi han mga donasyon han iba ngan ‘pagpuno han kakulangan han pipira pinaagi han sobra han iba,’ nahihimo han organisasyon ni Jehova an paghubad han Biblia ngan libre nga naipapanaltag ito ha tagsa nga membro han pamilya pati na ha mga estudyante ha Biblia nga gutom ha espirituwal. (Basaha an 2 Corinto 8:13-15.) Salit nagigin sangkay ni Jehova an mga naghahatag ngan mga nakarawat.

12. Paonan-o iginpakita ni Abraham nga nasarig hiya ha Dios?

¹² Usa pa nga paagi basi magin sangkay ni Jehova amo an paglimita han aton pakigbahin ha mga buruhaton ha komersyo ngan pagsalingabot han aton kahimtang basi mamiling han “totoo nga karikohan.” Ito an ginbuhat ni Abraham, usa nga tawo ha kadaan nga panahon nga may daku nga pagtoo. Sinugot hiya ha sugo ni Jehova nga bumaya ha riko nga syudad han Ur basi umukoy ha mga tolda ngan nangalimbasog hiya nga patuboon an iya pakigsangkay kan Jehova. (Heb. 11:8-10) Pirme hiya nasarig ha Dios sugad nga an Surok han totoo nga karikohan; waray gud hiya mangalimbasog nga mamiling hin materyal nga mga butang nga magpapakita hin kawaray-pagsarig ha Dios. (Gen. 14:22, 23) Ini nga klase hin pagtoo an igin-aghat ni Jesus nga subaron han iba. Ginsidngan niya an usa nga riko nga batan-on: “Kon karuyag mo mag-alagad hin bug-os ha Dios, ibaligya an imo mga panag-iya ngan ihatag ha mga pobre, ngan magkakaada ka bahandi ha langit, ngan kadi, sunod ha akon.” (Mat. 19:21) Ito nga batan-on waray pagtoo nga pariho han kan Abraham, pero may mga tawo nga nagpakita hin bug-os nga pagsarig ha Dios.

13. (a) Ano an iginsagdon ni Pablo kan Timoteo? (b) Paonan-o naton maiaaplikar yana an sagdon ni Pablo?

¹³ Hi Timoteo may daku nga pagtoo. Katapos hiya tawagon ni Pablo nga “maopay nga sundalo ni Kristo Jesus,” ginsidngan hiya ni Pablo: “Waray nagsusundalo nga nagninegosyo, basi mapalipay niya an nagpalista ha iya sugad nga sundalo.” (2 Tim. 2:3, 4) Sugad nga mga sundalo nga sumurunod ni Jesus yana, upod na an sobra usa ka milyon nga bug-os-panahon nga ministro, igin-aaplikar naton an sagdon ni Pablo tubtob ha aton bug-os nga mahihimo. Iginsasalikway naton an nakakadani nga mga adbertisment hini nga kalibotan. Nahinunumdoman naton an prinsipyo: “An parautang usa nga sorogoon han urutangan.” (Prob. 22:7) Karuyag gud ni Satanas nga gamiton naton an ngatanan naton nga panahon ngan kusog sugad nga mga uripon han komersyo han iya kalibotan. May mga desisyon nga mahimo magin hinungdan nga magin uripon kita ha utang ha sulod hin damu ka tuig. An pipira nangungutang hin daku basi magkaada balay, makaeskwela hin hitaas nga edukasyon, magkaada marahalon nga awto, o engrande nga kasal. Iginpapakita naton an praktikal nga kinaadman kon ginpapasimple naton an aton kinabuhi ngan ginlilikyan an pangutang ngan sobra nga paggasto. Hito nga paagi nagigin andam kita nga magpauripon ha Dios imbes nga ha sistema han komersyo yana.​—1 Tim. 6:10.

14. Ano an sadang naton magin determinasyon? Paghatag hin mga ehemplo.

¹⁴ Basi matipigan an simple nga pagkinabuhi, kinahanglan naton maghimo hin mga prayoridad. Usa nga mag-asawa an may daku ngan nag-uuswag nga negosyo. Pero karuyag nira mag-alagad utro hin bug-os-panahon. Salit iginbaligya nira an ira negosyo, motorboat, ngan iba pa nga panag-iya. Katapos, nagboluntaryo hira pagbulig ha pagtukod han headquarters ha Warwick, New York. Para ha ira, bendisyon gud an ira pag-alagad ha Bethel kaupod an ira anak ngan umagad, ngan ha pipira ka semana, kaupod an mga kag-anak han bana, nga nagboluntaryo liwat ha proyekto ha Warwick. Usa nga payunir nga sister ha Colorado, E.U.A. an nagtatrabaho hin part-time ha usa nga bangko. Nalipay gud an iya agaron ha iya trabaho salit gintanyagan hiya hin full-time nga trabaho nga mas hitaas hin tulo ka pilo an sweldo. Pero tungod kay makakagwara ito  han iya pokus ha ministeryo, waray niya karawata iton nakakadani nga tanyag. Pipira la ini nga ehemplo han damu nga sakripisyo han mga surugoon ni Jehova. Kon determinado liwat kita nga unahon an Ginhadian, iginpapakita naton nga mas ginpapabilhan naton an pakigsangkay ha Dios ngan an totoo nga karikohan kay ha materyal nga mga butang nga igintatanyag han komersyo hini nga kalibotan.

15. Ano nga karikohan an naghahatag hin daku gud nga kalipay?

¹⁵ An pagkaada materyal nga karikohan diri pirme nagpapasabot nga ginbibendisyonan kita han Dios. Ginbibendisyonan ni Jehova adton “hura ha mag-opay nga buhat.” (Basaha an 1 Timoteo 6:17-19.) Pananglitan, han hinbaroan ni Lucia * nga taga-Italya nga nagkikinahanglan hin mga magwarali ha Albania, binalhin hiya ngadto han 1993. Ngan bisan kon waray hiya pansuporta ha pinansyal, binalhin hiya nga may bug-os nga pagsarig kan Jehova. Ginkabisado niya an Albanian nga linggwahe ngan sobra 60 nga indibiduwal an iya nabuligan nga magpabawtismo. Bisan kon an kadam-an han katawohan han Dios diri sugad kamabungahon an ginsasangyawan nga mga teritoryo, anoman nga aton ginbubuhat ha pagbulig ha iba nga mahibaro han dalan han kinabuhi ngan magpabilin dida hito diri gud naton mahingangalimtan pati han aton mga nabuligan.​—Mat. 6:20.

16. (a) Ano an mahitatabo ha sistema han komersyo hini nga kalibotan? (b) Tungod kay maaram kita han mahitatabo ha komersyo, ano an sadang naton magin panhunahuna ha materyal nga mga butang?

¹⁶ Han nagsiring hi Jesus nga “kon maubos [an karikohan hinin diri-matadong nga kalibotan],” iginpapakita niya nga ini nga mga karikohan sigurado nga mauubos o mawawara. (Luc. 16:9) An kalugi han pipira nga bangko ngan an krisis ha ekonomiya nga nahitatabo hinin kataposan nga mga adlaw gutiay gud la kon itatanding ha maraot nga mahitatabo ha bug-os nga kalibotan ha diri na maiha. An bug-os nga sistema ni Satanas​—an politika, relihiyon, ngan komersyo—​sigurado nga mawawara. Igintagna nira propeta Esekiel ngan Sepania nga an bulawan ngan silber, nga importante nga bahin han komersyo ha kalibotan ha sulod hin mga siglo na, magigin waray pulos. (Esek. 7:19; Sep. 1:18) Ano an aton aabaton kon lagas na kita ngan nasantop naton nga iginsakripisyo naton an totoo nga karikohan basi makatirok hin damu nga “karikohan hinin diri-matadong nga kalibotan”? Bangin abaton naton nga pariho kita hin usa nga tawo nga nagtrinabaho ha iya bug-os nga kinabuhi para makatirok hin damu hinduro nga kwarta, pero ha urhi hinbaroan niya nga peke ngay-an ito. (Prob. 18:11) Oo, an materyal nga karikohan sigurado nga mawawara, salit ayaw karagi an higayon nga gamiton ito basi ‘makigsangkay’ kan Jehova ngan kan Jesus. Anoman an aton ginbubuhat ha pagsuporta ha mga buruhaton han Ginhadian ni Jehova nagpapariko ha aton ha espirituwal.

17, 18. Ano nga mga balos an makakarawat han mga sangkay ni Jehova ngan ni Jesus?

¹⁷ Kon umabot na an Ginhadian han Dios, waray na magpiplete o mangungutang, damu na an pagkaon ngan diri na ito papaliton, ngan diri na magkikinahanglan hin mga doktor o medisina. Mapapahimulosan han katawohan ni Jehova an pinakamag-opay nga produkto han tuna. An bulawan, silber, ngan marahalon nga mga bato gagamiton nga pan-adorno, diri para ignegosyo. An de-kalidad nga mga kahoy, bato, ngan puthaw libre nga magagamit ha pagtukod hin mag-opay nga balay. An aton kasangkayan mabulig ha aton ha pagtrabaho diri para magpasuhol, kondi tungod kay nalilipay hira nga buhaton ito. Magkakaada bag-o nga sistema han pagbahin-bahin han mga produkto han tuna basi magpahimulos an ngatanan.

¹⁸ Pipira la ini han presyoso nga balos para ha mga nakikigsangkay kan Jehova ngan kan Jesus. Maglilipay gud an mga magsiringba ni Jehova ha tuna kon mabatian nira nga magsiring hi Jesus: “Kadi kamo nga binendisyonan han akon Amay, panunda niyo an Ginhadian nga igin-andam ha iyo tikang pa ha tinikangan han kalibotan.”​—Mat. 25:34.