1-3. (a) Kakan-o posible nga iginsurat an Salmos 147? (b) Ano an aton mahibabaroan ha pag-aram ha Salmos 147?

KASAGARAN na nga gindadayaw naton an usa kon malampuson nga natutuman niya an iya toka o kon nagpapakita hiya hin maopay gud nga kalidad. Kon ginbubuhat naton ito ha tawo, mas damu an aton rason nga dayawon hi Jehova nga Dios! Gindadayaw naton hiya tungod han iya daku nga gahum nga aton nakikita ha iya urusahon nga mga linarang, o tungod han iya mahigugmaon nga pagtratar ha katawohan nga iya iginpakita pinaagi ha pagtagana han halad-lukat han iya mismo Anak.

² An nagsurat han Salmos 147 napagios nga dayawon hi Jehova. Ngan gin-aghat niya an iba nga dayawon liwat an Dios.​—Basaha an Salmos 147:1, 7, 12.

³ Diri kita maaram kon hin-o an nagsurat hini nga salmos, pero posible nga nabuhi hiya han panahon nga iginbalik ni Jehova an mga Israelita ha Jerusalem tikang ha pagin distyero ha Babilonya. (Sal. 147:2) An kahibalik han katawohan han Dios ha ira lugar han tinuod nga pagsingba sigurado nga nagpagios ha salmista nga dayawon hi Jehova. Pero may iba pa hiya nga mga rason ha pagbuhat hito. Ano ito? Ano an imo mga rason nga ‘dayawon hi Jehova’?​—Sal. 147:1.

4. Han gintagan hin kagawasan ni Hadi Ciro an nadistyero nga mga Israelita, ano an sigurado nga ira inabat, ngan kay ano?

⁴ Handurawa an sigurado nga inabat han mga Israelita nga nadistyero ha Babilonya. An mga nagbihag ha ira nag-insulto ha ira: ‘Pagkanta ha amon hin usa han mga kanta ha Sion.’ Hito nga panahon, guba an Jerusalem, nga amo an ira pinakadaku nga rason nga malipay kan Jehova. (Sal. 137:1-3, 6) An mga Judio waray gana pagkanta. Nasusubo gud hira salit kinahanglan nira hin pagliaw ngan pagparig-on. Pero sugad han igintagna han pulong han Dios, gintalwas ni Jehova an iya katawohan pinaagi kan Ciro, an hadi han Persia. Ginsakop ni Ciro an Babilonya ngan nagsiring: “[Hi Jehova] nagsogo ha akon papagtukud para ha iya hin balay didto ha Jerusalem . . . Bisan hin-o nga aada ha iyo han iya ngatanan nga tawo, hi Jehova an iya Dios maupud ha iya, ngan pakadtoa hiya.” (2 Kron. 36:23) Sigurado nga naliaw gud hito an mga Israelita nga naukoy ha Babilonya!

5. Ano an naobserbaran han salmista mahitungod han gahum ni Jehova ha pagtambal?

⁵ Ginliaw ni Jehova diri la an nasud han Israel sugad nga grupo kondi pati liwat an tagsa nga indibiduwal. Ito liwat an ginbubuhat ni Jehova yana. An salmista nagsurat mahitungod ha Dios: “Gintatambal niya an may mga ruba nga kasingkasing, ngan ginpuputos niya an ira mga samad.” (Sal. 147:3) Oo, ginmamangnoan ni Jehova adton may mga problema​—ha pisikal man o ha emosyonal. Yana, karuyag gud ni Jehova nga liawon kita ngan tambalon an aton ruba nga kasingkasing, siring pa. (Sal. 34:18; Isa. 57:15) Gintatagan kita niya hin kinaadman ngan kusog basi malamposan an anoman nga kakurian nga bangin aton naieksperyensyahan.​—San. 1:5.

6. Ano an kapulsanan ha aton han baga hin pag-iba han topiko ha Salmos 147:4? (Kitaa an retrato ha tinikangan hini nga artikulo.)

⁶ Katapos hito, iginpokus han salmista an iya atensyon ha kalangitan ngan nagsiring nga ‘gin-iihap ni Jehova an kadamo han mga bitoon’ ngan “tinatawag niya ha ira mga ngaran.” (Sal. 147:4) Kay ano nga baga hin nag-iba an topiko ngadto ha mga butang ha kalangitan? Tagda ini: Nakikita han salmista an mga bitoon, pero diri hiya maaram kon pira gud an kadamu hito. Ha sulod hin mga katuigan, nagtitikadamu gud an bitoon nga nadidiskobrehan. Ginbabanabana han pipira nga ha aton pa la Milky Way nga galaksi, binilyon na an mga bitoon. Ngan bangin trinilyon an mga galaksi ha uniberso! Diri gud maiihap han mga tawo an mga bitoon! Pero kaya ito han Maglalarang. Gintagan pa ngani niya hin ngaran o katawagan an ngatanan nga bitoon. Nagpapasabot ito nga an tagsa nga bitoon gintatagad ni Jehova nga waray kapariho. (1 Cor. 15:41) Kumusta man an iya linarang ha tuna—an mga tawo? Sugad la nga an Dios maaram kon hain an tagsa nga bitoon ha partikular nga panahon, maaram liwat hiya han ngatanan nga detalye mahitungod ha imo sugad nga indibiduwal—kon hain ka, kon ano gud an imo inaabat, ngan kon ano gud an imo ginkikinahanglan ha partikular nga takna!

7, 8. (a) Kon ginbubuligan ni Jehova an iya katawohan nga malamposan an ira mga pagsari, ano an iya ginkukonsiderar? (b) Paghatag hin ehemplo kon paonan-o mapinairon nga ginbubuligan ni Jehova an diri perpekto nga mga tawo.

⁷ Labot la nga interesado ha aton hi Jehova sugad nga indibiduwal, may-ada liwat hiya gahum ngan hingyap nga buligan kita ha aton mga problema. (Basaha an Salmos 147:5.) Bangin inaabat mo nga makuri hinduro an imo kahimtang ngan mabug-at hinduro an imo pinas-an. Nasasabtan han Dios an aton mga limitasyon, “nahinunumdum hiya nga mga tapotapo kita.” (Sal. 103:14) Tungod kay diri kita perpekto, pauroutro naton nga nabubuhat an pariho nga sayop. Nasusubo gud kita kon nakakayakan kita hin diri maopay, kon nagbibinalik-balik ha aton hunahuna an sayop nga mga hingyap, o kon naaawa kita ha iba! Waray gud ito maeksperyensyahi ni Jehova, pero bug-os niya nga nasasabtan an aton inaabat tungod  kay diri matugkad an iya sarabotan!—Isa. 40:28.

⁸ Bangin naeksperyensyahan mo na kon paonan-o ka ginbuligan ni Jehova pinaagi han iya gamhanan nga kamot nga malamposan an mga pagsari. (Isa. 41:10, 13) Pananglitan, tagda an payunir nga sister nga hi Kyoko. Nanluya gud hiya han binalhin hiya ha iya bag-o nga toka. Paonan-o iginpakita ni Jehova nga nasasabtan niya an problema ni Kyoko? Ha bag-o nga kahimtang ni Kyoko, nakita niya nga damu nga tawo an nakakasabot han iya inaabat. Inabat niya nga ginsisidngan hiya ni Jehova: “Hinigugma ko ikaw, diri la tungod kay payunir ka, pero tungod kay anak ko ikaw ngan nagdedikar ka ha akon. Karuyag ko nga magin malipayon ka sugad nga usa han akon mga Saksi!” Ha imo kahimtang, paonan-o iginpapakita han Makagarahum-ha-ngatanan an iya ‘waray tubtoban nga kinaadman’?

9, 10. Kon ginbubuligan kita ni Jehova, ano an iya siyahan nga igintatagana? Paghatag hin ehemplo.

⁹ Usahay bangin materyal nga mga butang an imo ginkikinahanglan. Pananglitan, bangin nababaraka ka nga waray ka na makakaon. Pero tigamni nga hi Jehova an naglarang han natural nga sikolo han tuna nga ginkikinahanglan basi magkaada pagkaon, bisan adton mga piso han uwak nga nanginginahanglan hito! (Basaha an Salmos 147:8, 9.) Kon padayon niya nga ginpapakaon an mga uwak, makakasarig ka nga hi Jehova padayon liwat nga magtatagana han imo materyal nga mga panginahanglan.—Sal. 37:25.

¹⁰ Labaw ha ngatanan, hi Jehova nagtatagana han aton espirituwal nga panginahanglan, ngan gintatagan kita niya han “kamurayawan han Dios nga labaw ha ngatanan nga pagsabot.” (Fil. 4:6, 7) Pananglitan, tagda hi Mutsuo ngan an iya asawa. Naeksperyensyahan nira kon paonan-o hira ginbuligan ni Jehova han nagkaada tsunami ha Japan han 2011. Kon waray hira makasaka ha atop han ira balay, posible gud nga namatay hira. Pero hito nga adlaw, nawara an haros ngatanan nira nga panag-iya. Bug-os nga gab-i nga nakadto la hira ha masirom ngan mahagkot nga kwarto ha ikaduha nga andana han ira guba nga balay. Pagkaaga, namiling hira hin makakaparig-on ha ira ha espirituwal. An ira la nabilngan amo an 2006 Taunang Aklat ng mga Saksi ni Jehova. Nainteres dayon hi Mutsuo han nabasa niya an ulohan nga “Mga Tsunami na Pinakamaraming Pinatay.” Mahitungod ito han linog ha Sumatra han 2004 nga nagin hinungdan han mga tsunami nga may pinakadaku nga danyos nga nairekord ha kasaysayan. Nakatangis hi Mutsuo ngan an iya asawa samtang ginbabasa nira an mga eksperyensya. Inabat nira an mahigugmaon nga pagmangno han Dios pinaagi ha pagtagana ha ira hin angayan nga espirituwal nga pagparig-on ha panahon nga ginkikinahanglan gud nira ito. Mahigugmaon nga nagtagana liwat hi Jehova han ira materyal nga panginahanglan. Pinaagi han ira mga igkasi-tumuroo, nakakarawat hira hin suplay nga pagkaon ngan bado. Pero an mas nakaparig-on ha ira amo an pagbisita ha kongregasyon han mga representante han organisasyon han Dios. Hi Mutsuo nagsiring: “Inabat ko nga hirani gud la hi Jehova ha kada tagsa ha amon ngan gin-aataman niya kami. Nakakaliaw gud ito!” Siyahan nga igintatagana han Dios an espirituwal nga mga panginahanglan, ngan katapos iya gintatagbaw an aton materyal nga mga panginahanglan.

11. Ano an kinahanglan buhaton hadton mga naruruyag magpahimulos han gahum han Dios ha pagtalwas?

¹¹ Hi Jehova andam pirme ha pagbulig ngan ‘pagpatindog hadton mapainubsanon,’ o maaghop. (Sal. 147:6a) Pero paonan-o kita magpapahimulos han iya pagin andam ha pagbulig ha aton? Kinahanglan magkaada kita duok nga relasyon ha iya. Basi magkaada hito, kinahanglan naton kultibaron an pagin maaghop. (Sep. 2:3) An maaghop nga mga tawo naghuhulat ha Dios ha pagtadong  han anoman nga sayop ngan pagwara han ira mga pag-antos. An sugad nga mga indibiduwal makakakarawat han pag-uyon ni Jehova.

12, 13. (a) Basi mapahimulosan an bulig han Dios, ano an sadang naton likyan? (b) Hin-o an nalilipayan ni Jehova?

¹² Ha luyo nga bahin, “adton mga magraut ha tuna ilinalabog” han Dios. (Sal. 147:6b, Baraan nga Biblia) Mapwersa gud ini nga mga pulong! Basi magpahimulos ha maunungon nga gugma ni Jehova ngan malikyan an iya kasina, kinahanglan naton kangalasan an iya ginkakangalasan. (Sal. 97:10) Pananglitan, kinahanglan naton kangalasan an seksuwal nga imoralidad. Nagpapasabot ini nga kinahanglan kita maglikay ha bisan ano nga mahimo magtugway ha aton ha pagbuhat hito, upod na an pornograpiya. (Sal. 119:37; Mat. 5:28) Bangin makuri ini daugon, pero an pakakarawat han bendisyon ni Jehova takos gud han bisan ano nga pangalimbasog.

¹³ Basi magdaog hini nga pakig-away, kinahanglan naton sumarig kan Jehova, diri ha aton kalugaringon. Malilipay ba hiya kon mangangalimbasog kita nga talwason an aton kalugaringon pinaagi han ‘kusog han kabayo,’ karuyag sidngon, han mga ginsasarigan han mga tawo nga mabulig ha ira? Diri! Sugad man, diri liwat kita masarig ha ‘mga bitiis han tawo,’ karuyag sidngon, diri kita nagios nga baga hin kaya naton o han iba nga makaghatag hin katalwasan. (Sal. 147:10) Lugod, kinahanglan naton dumaop kan Jehova ngan mangamuyo para han iya bulig. Diri pariho han mga tawo nga magsaragdon, diri gud hiya kinakapoy ha pagpamati han aton mga pangamuyo, bisan kon pauroutro kita nga nangangaro hin bulig ha iya. “Hi Jehova nagmamalipay dida ha ira nga nahadluk ha iya, ha ira nga naglalaum ha iya mahigugmaon nga kalooy.” (Sal. 147:11) Makakasarig kita nga pinaagi han iya maunungon nga gugma, diri hiya mabaya ha aton ngan bubuligan kita niya nga madaog an aton sayop nga mga hingyap.

14. Ano nga pasarig an nagparig-on han salmista?

¹⁴ Hi Jehova naghahatag ha aton hin marig-on nga mga pamatuod nga bubuligan niya an iya katawohan kon kinahanglan nira ito. Han nakabalik an mga Israelita ha Jerusalem, an salmista namalandong kon paonan-o hira ginbuligan ni Jehova. Hiya nagkanta: “Ginparig-on niya an . . . imo mga ganghaan; ginbulahan niya an imo mga anak ha kabutngaan nimo. Iginbubutang niya an kamurayawan dida han imo mga pagultan.” (Sal. 147:13, 14) Sigurado nga nagkaada daku nga pagsarig an salmista ha paghibaro nga paparig-unon ni Jehova an mga ganghaan han syudad basi mapanalipdan an Iya mga magsiringba!

15-17. (a) Ano an bangin inaabat naton usahay mahitungod ha aton mga problema, pero paonan-o ni Jehova ginagamit an iya Pulong ha pagbulig ha aton? (b) Paghatag hin ehemplo kon paonan-o an “[kanan Dios] polong nagdadalagan hin madagmit.”

¹⁵ Bangin umatubang ka hin mga problema nga mahimo makapabaraka ha imo. Hi Jehova makakahatag ha imo hin kinaadman basi malamposan mo ito. An salmista nagsiring mahitungod han iya Dios: “Iya iginpapadara an iya sogo ngadto ha tuna; an iya polong nagdadalagan hin madagmit.” Katapos niya unabihon nga hi Jehova ‘naghahatag hin niebe, nagpapasarang hin tun-og, ngan naglalabog hin yelo,’ an salmista nagpakiana: “Hin-o ba an makakatukdaw ha atubangan han iya kahagkut?” Hiya dugang nga nagsiring nga “ginsosogo [ni Jehova] an iya polong, ngan gintutunaw ito.” (Sal. 147:15-18) An aton maaramon ngan makagarahum-ha-ngatanan nga Dios, an nagkukontrol han yelo ngan han niebe, makakabulig ha imo nga malamposan an bisan ano nga problema nga imo naieksperyensyahan.

¹⁶ Yana, gin-gigiyahan kita ni Jehova pinaagi han iya Pulong, an Biblia. Ngan “an iya polong nagdadalagan hin madagmit,” karuyag sidngon, iginhahatag dayon niya an espirituwal nga giya kon kinahanglan naton ito. Hunahunaa la kon paonan-o ka nagpapahimulos ha pagbasa han Biblia, pag-aram ha mga publikasyon han “matinumanon ngan maaramon nga uripon,” pagkita han JW Broadcasting, paggamit han jw.org, pakiistorya ha mga tigurang, ngan pakig-upod ha kabugtoan.  (Mat. 24:45) Naieksperyensyahan mo ba nga madagmit hi Jehova ha paggiya ha imo?

¹⁷ Naeksperyensyahan han sister nga hi Simone an gahum han Pulong han Dios. Inabat niya nga waray hiya pulos ngan nagruhaduha pa ngani hiya kon gin-uuyonan ba ni Jehova an sugad ha iya. Pero ha mga panahon nga nahuhulop hiya, padayon hiya nga nag-ampo kan Jehova ngan naghangyo han Iya bulig. Padayon liwat niya nga gin-adman an Biblia. Hi Simone nagsiring nga ha ngatanan nga kahimtang, inabat gud niya an kusog nga tikang kan Jehova ngan an Iya paggiya. Nakabulig ini ha iya nga makapabilin nga positibo tubtob nga posible.

18. Kay ano nga inaabat mo nga inuuyonan ka han Dios, ngan ano an imo mga rason nga ‘dayawon hi Jehova’?

¹⁸ Maaram an salmista nga inuuyonan gud han Dios an kadaan nga nasud han Israel. Hira la an nasud nga gintagan han Dios han iya “polong” ngan han “iya mga kasogoanan.” (Basaha an Salmos 147:19, 20.) Yana, daku gud an aton pribilehiyo kay kita la an katawohan nga gintatawag ha ngaran han Dios. Tungod kay nakilala naton hi Jehova ngan nagkikinabuhi kita uyon ha iya Pulong, napapahimulosan naton an duok nga relasyon ha iya. Pariho han nagsurat han Salmos 147, diri ba may-ada ka liwat damu nga rason nga ‘dayawon hi Jehova’ ngan aghaton an iba nga buhaton ito?