1, 2. Ano an pinakamakatirigamnan nga okasyon ha 2018 diin makikita gud an pagkaurosa, ngan kay ano? (Kitaa an retrato hini nga pahina.)

HA Marso 31, 2018, ha pagtunod han adlaw, an katawohan han Dios ngan an damu nga interesado magkakatirok para ha tinuig nga pagsaurog han Panihapon han Ginoo. Samtang natuyok an aton planeta ha aksis hito, minilyon an magkakatirok ha pagsaurog han Memoryal han kamatayon han Kristo. Kada tuig, ini nga pagsaurog amo an pinakamakatirigamnan nga okasyon ha bug-os nga tuna diin nakikita gud an pagkaurosa!

² Handurawa la an kalipay nga inaabat ni Jehova ngan ni Jesus samtang nakikita nira nga kada oras minilyon nga umurukoy han tuna an natambong hinin espesyal nga okasyon tubtob nga matapos ito nga adlaw. An Biblia nagtagna nga “an daku nga grupo, nga waray bisan hin-o an [makakaihap], tikang ha ngatanan nga nasud, tribo, katawohan, ngan pinulongan” masinggit: “An katalwasan utang naton ha aton Dios, nga nalingkod ha trono, ngan ha Kordero.” (Pah. 7:9, 10) Makalilipay gud nga napapasidunggan  hi Jehova ngan hi Jesus han damu hinduro nga tawo pinaagi hinin tinuig nga pagsaurog han Memoryal!

3. Ano nga mga pakiana an hihisgotan hini nga artikulo?

³ May pipira nga pakiana nga nabangon nga babatunon hini artikulo. (1) Paonan-o an kada tagsa ha aton makakapangandam ngan makakapahimulos ha pagtambong han Memoryal? (2) Paonan-o an Memoryal nakakaapekto ha pagkaurosa han katawohan han Dios? (3) Paonan-o an kada tagsa ha aton makakabulig ha pagtipig hito nga pagkaurosa? (4) Magkakaada ba ultimo nga Memoryal? Kon oo, san-o ito mahitatabo?

4. Kay ano nga importante para ha aton nga magin presente ha Memoryal tubtob nga posible?

⁴ Pamalandonga an pagkaimportante han pagtambong ha Memoryal. Hinumdumi nga an mga katirok ha kongregasyon bahin han aton pagsingba. Sigurado nga gintitigamnan ni Jehova ngan ni Jesus adton nangangalimbasog ha pagtambong hinin pinakaimportante nga katirok han tuig. Karuyag naton nga makita nira an aton pangalimbasog nga magin presente ha Memoryal, labot la kon imposible ito tungod han limitasyon han aton panlawas o tungod han aton kahimtang. Kon iginpapakita naton pinaagi ha aton mga buhat nga importante ha aton an mga katirok, gintatagan naton hi Jehova hin dugang nga rason nga tipigan an aton ngaran ha iya “basahon ha panumduman”—an “libro han kinabuhi”—diin nakasurat an ngaran hadton makakakarawat han kinabuhi nga waray kataposan.—Mal. 3:16; Pah. 20:15.

5. Ha mga adlaw antes han Memoryal, paonan-o naton mahimo ‘usisahon an aton kalugaringon kon marig-on an aton pagtoo’?

⁵ Ha mga adlaw antes han Memoryal, mahimo kita maggahin hin panahon ha pag-ampo ngan pag-usisa hin maopay mahitungod han aton personal nga relasyon kan Jehova. (Basaha an 2 Corinto 13:5.) Paonan-o naton ito mahihimo? Pinaagi ha ‘pag-usisa han aton kalugaringon kon marig-on an aton pagtoo.’ Basi mahimo ito, maopay nga pakianhan naton an aton kalugaringon: ‘Natoo gud ba ako nga bahin ako han amo la nga organisasyon nga ginpili ni Jehova ha pagtuman han iya kaburut-on? Ginhihimo ko ba an akon pinakamaopay ha pagsangyaw ngan pagtutdo han maopay nga sumat han Ginhadian? An akon ba mga buhat nagpapakita nga natoo gud ako nga nagkikinabuhi na kita ha kataposan nga mga adlaw ngan hirani na matapos an pagmando ni Satanas? An akon ba pagsarig kan Jehova ngan kan Jesus yana pariho pa gihapon han akon pagsarig han igindedikar ko an akon kinabuhi kan Jehova nga Dios?’ (Mat. 24:14; 2 Tim. 3:1; Heb. 3:14) An pagpamalandong ha baton hito nga mga pakiana mabulig ha aton nga padayon nga pamatud-an kon ano gud kita.

6. (a) Ano an amo la nga dalan tipakadto ha kinabuhi? (b) Paonan-o an usa nga tigurang nangangandam ha Memoryal kada tuig, ngan paonan-o mo hiya mahimo masubad?

⁶ Basaha ngan pamalandonga an mga artikulo nga naghihisgot han pagkaimportante han Memoryal. (Basaha an Juan 3:16; 17:3.) An amo la nga dalan tipakadto ha kinabuhi nga waray kataposan nag-uupod han “pagkilala” kan Jehova ngan ‘pagpakita hin pagtoo’ kan Jesus, an Iya bugtong nga Anak. Basi magin andam ha Memoryal, puydi ka maghimo hin mga proyekto ha pag-aram nga mabulig ha imo nga magin mas duok kan Jehova ngan kan Jesus. Tagda an ginbubuhat han usa nga maiha na nga tigurang. Ha sulod hin mga katuigan, nagtitipig hiya hin mga artikulo han Barantayan nga partikular nga naghihisgot mahitungod han Memoryal ngan han gugma nga iginpakita ha aton ni Jehova ngan ni Jesus. Ha mga semana antes han Memoryal, ginbabasa niya utro ito nga mga artikulo ngan ginpapamalandong an pagkaimportante hini nga pagsaurog. Ha panapanahon, gindudugangan niya hin usa o duha nga artikulo an iya koleksyon. Naobserbaran hini nga tigurang nga pinaagi ha pagbasa utro hini nga mga artikulo ngan ha pagbasa ngan pagpamalandong han nakaeskedyol nga pagbasa han Biblia ha Memoryal, may bag-o hiya nga nahibabaroan kada tuig. Labaw ha ngatanan, inaabat niya nga kada tuig mas naghihilarom an iya gugma kan Jehova ngan kan Jesus. An pagkaada sugad hito nga proyekto han pag-aram mahimo makabulig nga maghilarom an imo gugma  ngan apresasyon kan Jehova ngan kan Jesus, ngan pinaagi hito mahimo ka mabuligan nga mas magpahimulos ha Memoryal.

7. (a) Ano an igin-ampo ni Jesus ha gab-i han siyahan nga pagsaurog han Panihapon han Ginoo? (b) Ano an pamatuod nga ginbaton ni Jehova an pag-ampo ni Jesus?

⁷ Ha gab-i han siyahan nga pagsaurog han Panihapon han Ginoo, nag-ampo hi Jesus nga an ngatanan niya nga sumurunod magkaurosa pariho han pagkahiusa nga ginpapahimulosan niya ngan han iya Amay. (Basaha an Juan 17:20, 21.) Ginbaton gud ni Jehova ito nga pag-ampo han iya hinigugma nga Anak, ngan yana minilyon an natoo nga ginsugo ni Jehova an iya Anak. Diri pariho han iba nga katirok han katawohan han Dios, an Memoryal naghahatag hin marig-on nga pamatuod han pagkaurosa han mga Saksi ni Jehova. An mga tawo ha damu nga nasud ngan adton iba-iba an kolor han panit nagkakatirok ha bug-os nga tuna. Ha pipira nga lugar, diri komon nga magkatirok an iba-iba nga lahi ha usa nga relihiyoso nga katirok o ginhuhunahuna ito han iba nga diri angayan. Pero an sugad nga pagkaurosa maopay gud ha mga mata ni Jehova ngan ni Jesus!

8. Ano nga mensahe an iginhatag ni Jehova kan Esekiel mahitungod han pagkaurosa?

⁸ Sugad nga katawohan ni Jehova, diri kita nahipapausa han aton pagkaurosa. Kay ano? Tungod kay igintagna ito ni Jehova. Tagda an mensahe nga iya iginhatag kan propeta Esekiel mahitungod ha paghiusa han duha nga istik, an istik nga para kan Juda ngan an istik nga para kan Jose. (Basaha an Esekiel 37:15-17.) An “Mga Pakiana Tikang ha mga Magbarasa” nga makikita ha An Barantayan han Hulyo 2016 nagsaysay: “Pinaagi kan propeta Esekiel, igintagna ni Jehova nga magkakahiusa an mga Israelita sugad nga nasud kon bumalik na hira ha Tuna nga Iginsaad. Ito nga tagna nagsusumat liwat nga magkakahiusa an katawohan han Dios, nga nagtikang matuman durante han kataposan nga mga adlaw.”

9. Paonan-o an katumanan han tagna ni Esekiel matin-aw nga nakikita kada tuig durante han Memoryal?

⁹ Tikang han 1919, hinay-hinay nga gin-organisar anay ni Jehova an mga dinihogan ngan ginhiusa hira utro; ginsisimbolohan hira han istik nga para kan Juda. Katapos, samtang nagtitikadamu adton may tunan-on nga paglaom—an ginsisimbolohan han istik nga para kan Jose—nga naupod ha mga dinihogan, an duha nga grupo nagin “usa nga panon.” (Juan 10:16; Sak. 8:23) Hi Jehova nagsaad nga iya pagtatampuhon inin duha nga istik ngan magigin usa nga istik ha iya kamot. (Esek. 37:19) Yana, inin duha nga grupo urosa nga nag-aalagad ilarom han uusa nga Hadi—an ginhimaya nga hi Jesu-Kristo, nga gin-uunabi ha tagna sugad nga kanan Dios “surugoon nga hi David.” (Esek. 37:24, 25) An presyoso nga pagkaurosa nga ginhulagway ha Esekiel matin-aw nga nakikita kada tuig samtang nagkakatirok an nanhibilin nga mga dinihogan ngan an “iba nga mga karnero” ha pagsaurog han Memoryal han kamatayon han Kristo! Kon sugad, ano an mahimo buhaton han kada tagsa ha aton basi makabulig ha pagtipig hito nga pagkaurosa?

10. Paonan-o kita makakabulig ha pagtipig han pagkaurosa han katawohan han Dios?

¹⁰ An siyahan nga paagi nga makakabulig kita ha pagtipig han pagkaurosa han katawohan han Dios amo an pagkultibar han pagpaubos. Han nakanhi hi Jesus ha tuna, gin-aghat niya an iya mga disipulo nga magin mapainubsanon. (Mat. 23:12) Kon mapainubsanon kita, diri kita magpapaimpluwensya ha disposisyon han kalibotan nga nagpapakita hin pagpahitaas ha kalugaringon. Lugod, an aton pagkamapainubsanon mabulig ha aton nga magin mapinasakupon ha mga nangunguna, ngan an sugad nga pagkamasinugtanon importante gud ha pagkaurosa han kongregasyon. Labaw ha ngatanan, an aton pagkamapainubsanon magpapalipay ha Dios, kay hiya “nakontra ha mga mapahitas-on, pero nahatag hiya ha mga mapainubsanon hin diri-matupngan nga pagkabuotan.”—1 Ped. 5:5.

11. Paonan-o an pagpamalandong han kahulogan han mga emblema han Memoryal makakabulig ha aton ha pagtipig han pagkaurosa?

¹¹ An ikaduha nga paagi nga makakabulig kita ha pagtipig han pagkaurosa amo an pagpamalandong  han kahulogan han mga emblema nga ginagamit ha Memoryal. Antes hiton espesyal nga gab-i—ngan hito mismo nga gab-i—hunahunaa hin maopay an ginsisimbolohan han tinapay nga waray libadura ngan han pula nga bino. (1 Cor. 11:23-25) An tinapay nagrirepresentar ha waray sala nga lawas ni Jesus nga iginhatag sugad nga halad, ngan an bino nagrirepresentar han iya ginpaagay nga dugo. Pero labaw pa ha paghibaro la han kahulogan han mga emblema an nahiuupod. Hinumdumi nga an halad-lukat han Kristo nag-uupod han duha nga pinakadaku nga kapahayagan han gugma—an gugma nga iginpakita ni Jehova pinaagi ha paghatag han iya Anak para ha aton, ngan an gugma nga iginpakita ni Jesus pinaagi ha kinaburut-on nga paghalad han iya kinabuhi para ha aton. An pagpamalandong han ira iginpakita nga gugma sadang magpagios ha aton nga higugmaon liwat hira. An aton gugma kan Jehova ngan an gugma ha iya han aton mga igkasi-tumuroo pariho hin higot nga nagbubugkos ha aton ngan nagpaparig-on han aton pagkaurosa.

12. Ha ilustrasyon ni Jesus mahitungod han hadi nga nakigtuhay ha uripon nga may utang ha iya, paonan-o ginklaro ni Jesus nga ginlalaoman ni Jehova nga magigin mapinasayloon kita?

¹² An ikatulo nga paagi nga makakabulig kita ha pagtipig han pagkaurosa amo an pagin andam ha pagpasaylo ha iba. Kon ginpapasaylo naton adton nakasala ha aton, iginpapakita naton nga gin-aapresyar naton an kapasayloan han aton mga sala nga nagin posible tungod han halad-lukat han Kristo. Tagda an usa han mga ilustrasyon ni Jesus nga mababasa ha Mateo 18:23-34, ngan pakianhi an imo kalugaringon: ‘Napapagios ba ako nga iaplikar an igintutdo ni Jesus? Iginpapakita ko ba an pagin mapailubon ngan masinabuton ha akon mga igkasi-tumuroo? Andam ba ako magpasaylo ha nakakasala ha akon?’ Oo, iba-iba an kabug-aton han sala, ngan may mga sayop nga makuri gud mapasaylo han diri hingpit nga mga tawo. Kondi ini nga ilustrasyon nagtututdo ha aton kon ano an ginlalaoman ni Jehova. (Basaha an Mateo 18:35.) Ginklaro ni Jesus nga diri kita papasayloon ni Jehova kon diri naton ginpapasaylo an aton kabugtoan kon may-ada maopay nga basihan ha pagbuhat hito. Seryoso gud ini nga butang nga sadang naton hunahunaon. Napapanalipdan ngan natitipigan naton an aton presyoso nga pagkaurosa kon ginpapasaylo naton an iba sugad han igintutdo ni Jesus nga buhaton naton.

13. Paonan-o an aton pangalimbasog nga tipigan an kamurayawan nabulig ha pagtipig han pagkaurosa?

¹³ Kon ginpapasaylo naton an iba, iginpapakita naton nga karuyag naton tipigan an kamurayawan.  Hinumdumi an sagdon ni apostol Pablo nga sadang kita ‘mangalimbasog gud nga matipigan an pagkaurosa ha espiritu pinaagi han kamurayawan nga nagbubugkos ha aton.’ (Efe. 4:3) Hini nga panahon han Memoryal, labi na ha gab-i han Memoryal, hunahunaa hin maopay kon paonan-o mo gintatratar an iba. Pakianhi an imo kalugaringon: ‘Iginpapakita ko gud ba nga usa ako han mga diri nagtitipig hin pagdumot? Kilala ba ako nga nangangalimbasog ha pagtipig han kamurayawan ngan pagkaurosa?’ Importante gud ini nga mga pakiana nga sadang naton pamalandungon hini nga panahon han tuig.

14. Paonan-o naton maipapakita nga ‘mahigugmaon nga nagpapailob kita ha kada tagsa’?

¹⁴ An ikaupat nga paagi nga makakabulig kita ha pagtipig han pagkaurosa amo an pagpakita hin gugma sugad nga pagsubad kan Jehova, an Dios han gugma. (1 Juan 4:8) Diri gud naton karuyag magsiring mahitungod ha aton mga igkasi-magsiringba, “Kinahanglan ko hira higugmaon, pero diri kinahanglan nga maruyag ako ha ira”! An paghunahuna hin sugad hito kabaliktaran gud ha sagdon ni Pablo nga sadang kita magpakita hin ‘mahigugmaon nga pagpailob ha kada tagsa.’ (Efe. 4:2) Tigamni nga waray hiya basta la nga magsiring nga kinahanglan ‘magpailob kita ha kada tagsa.’ Lugod, hiya nagsiring nga kinahanglan kita ‘mahigugmaon nga magpailob ha kada tagsa.’ May kaibahan gud ito. Makikita ha aton mga kongregasyon an ngatanan nga klase hin tawo nga iginpahirani ni Jehova ha iya. (Juan 6:44) Tungod kay iginpahirani hira ni Jehova ha iya, sigurado nga may nakita hiya nga mag-opay nga rason nga higugmaon hira. Salit may-ada ba bisan hin-o ha aton nga makakaghukom ha usa nga igkasi-tumuroo nga diri hiya takos han aton gugma? Diri gud kita sadang mag-alang ha paghigugma ha aton kabugtoan sugad han iginpapabuhat ha aton ni Jehova!—1 Juan 4:20, 21.

15. Paonan-o kita nahibaro nga magkakaada ultimo nga pagsaurog han Memoryal?

¹⁵ Maabot an adlaw nga an Memoryal igsasaurog ha ultimo nga higayon. Paonan-o kita nahibaro hito? Ha siyahan nga giniyahan nga surat ni Pablo ha mga taga-Corinto, hiya nagsiring ha dinihogan nga mga Kristiano nga pinaagi ha paghinumdom han kamatayon ni Jesus kada tuig, ‘padayon nga iginpapasamwak nira an kamatayon han Ginoo, tubtob ha iya pag-abot.’ (1 Cor. 11:26) An pulong dinhi nga “pag-abot” nagtutudlok ha panhitabo nga pariho ha ‘pag-abot’ nga gin-unabi ni Jesus ha iya tagna mahitungod han panahon han kataposan. May kalabotan ha daku nga kasakitan nga hirani na mahitabo, hiya nagsiring: “Makikita ha langit an tigaman han Anak han tawo, ngan an ngatanan nga tribo ha tuna magpupukpok han ira dughan tungod ha kasubo, ngan makikita nira an Anak han tawo nga nalusad [‘naabot,’ Maupay nga Sumat] upod han mga dampog ha langit nga may gahum ngan daku nga himaya. Ngan susugoon [ni Jesus] an iya mga anghel ngan pinaagi hin daku nga tunog han trumpeta, ira titirukon an iya mga pinili tikang ha upat nga direksyon han hangin, tikang ha usa nga kataposan han langit tubtob ha usa nga kataposan.” (Mat. 24:29-31) Ini nga ‘pagtirok han mga pinili’ nagtutudlok ha panahon diin an ngatanan nga dinihogan nga Kristiano nga aanhi pa ha tuna makakakarawat han ira langitnon nga balos. Mahitatabo ini katapos han siyahan nga bahin han daku nga kasakitan pero antes han girra han Armagedon. Katapos, an ngatanan nga membro han 144,000 maupod kan Jesus ha pagpirde ha mga hadi ha tuna. (Pah. 17:12-14) An Memoryal nga isasaurog antes hini nga pagtirok han mga dinihogan ngadto ha langit amo an magigin ultimo nga pagsaurog, kay hini nga panahon han pagtirok ‘inabot’ na hi Jesus.

16. Kay ano nga determinado ka nga makatambong ha Memoryal hini nga tuig?

¹⁶ Hinaot magin determinado kita pagtambong ha Memoryal ha Marso 31, 2018 basi magpahimulos hito. Ngan hangyoon naton hi Jehova nga buligan kita nga padayon nga makabulig ha pagtipig han pagkaurosa han iya katawohan! (Basaha an Salmos 133:1.) Hinumdumi nga maabot an panahon nga an Memoryal nga aton isasaurog amo na an ultimo nga Memoryal. Samtang ginpapamulat naton ito, hinaot buhaton naton an ngatanan nga aton mahihimo basi makatambong, ngan pabilhan unta naton an makaruruyag nga pagkaurosa nga aton naieksperyensyahan durante han Memoryal.