Nabasa mo ba hin maopay an mga isyu han An Barantayan hini nga tuig? Kitaa kon mababaton mo an masunod nga mga pakiana:

Ano nga ehemplo an iginpakita ni Jehova kon paonan-o tatrataron an kababayin-an?

Gintatratar niya hira hin patas, nga diri ginpapaboran an lalaki kay ha babaye. Ginpapamatian han Dios an kababayin-an, ngan interesado hiya ha ira mga inaabat ngan problema. Ngan gintataporan niya hira ha pagtuman han Iya buruhaton.​—w24.01, p. 15-16.

Paonan-o naton maiaaplikar an Efeso 5:​7, nga nasiring: “Ayaw kamo pakig-upod ha ira”?

Hi apostol Pablo nagpahamangno ha aton nga diri makig-upod ha mga tawo nga diri makakabulig ha aton ha pagsunod han mga suruklan han Dios. An sugad nga diri maopay nga pakig-upod naaplikar ha aton pakig-upod ha mga tawo ha personal ngan pati liwat ha social media.​—w24.03, p. 22-23.

Dapat kita magbantay kontra ha ano nga klase hin buwa nga mga istorya?

Dapat kita magbantay ha mga istorya nga waray usisaha nga tikang ha kabugtoan nga may maopay nga intensyon, gin-send la nga mga email tikang ha mga tawo nga diri naton kilala, ngan ha mga apostata nga nagpapakunokuno nga interesado ha kamatuoran.​—w24.04, p. 12.

Ano la an aton nahibabaroan ngan ano an aton diri nahibabaroan mahitungod ha kon paonan-o huhukman ni Jehova hi Hadi Solomon pati liwat adton mga nagkamatay ha Sodoma ngan Gomorra ngan ha Baha?

Sigurado nga diri kita maaram kon ginsentensyahan ba hira ni Jehova hin permanente nga kabungkagan. Pero maaram kita nga maaram hi Jehova han ngatanan mahitungod ha ira ngan may-ada hiya daku nga kalooy.​—w24.05, p. 3-4.

Ano an iginpapasarig ha aton nga an Dios “an Bato”? (Deut. 32:4)

Mahimo naton magin arayopan hi Jehova. Masasarigan hiya, nga pirme gintutuman an iya mga saad. Ngan marig-on o diri nagbabag-o an iya personalidad ngan mga katuyoan.​—w24.06, p. 26-28.

Ano an makakabulig ha imo nga maka-adjust ha bag-o nga kongregasyon?

Sarig kan Jehova, nga mabulig hiya ha imo pariho han iya pagbulig ha iya mga surugoon ha naglabay. Likayi nga ikompara an imo kongregasyon hadto. Pakigbahin ha mga buruhaton ha imo bag-o nga kongregasyon, ngan paningkamuti nga magkaada bag-o nga kasangkayan.​—w24.07, p. 26-28.

Ano nga mga leksyon an igintututdo han tulo nga parabola nga mababasa ha Mateo kapitulo 25?

An parabola mahitungod ha mga karnero ngan ha mga kanding nagpapabug-at han pagin matinumanon ngan maunungon. An parabola mahitungod ha maaramon ngan diri maaramon nga mga birhen nagpapabug-at han pagin andam ngan alerto. Ngan an parabola mahitungod ha mga talanton nagpapabug-at ha pagkaimportante han pagin maduruto.​—w24.09, p. 20-24.

Ano kahitaas an beranda ha templo ni Solomon?

Ha pipira nga kadaan nga manuskrito mababasa ha 2 Cronicas 3:4 an “120 ka siko,” karuyag sidngon 53 ka metro an kahitaas. Pero an mababasa ha iba nga masasarigan nga sinurat “20 ka siko,” karuyag sidngon noybe ka metro an kahitaas. Baga hin an ikaduha nga gin-unabi amo an nabagay ha kadakmulon han pader han templo.​—w24.10, p. 31.

Ano an karuyag sidngon han “bana hin usa nga babaye” an usa nga ministeryal nga surugoon? (1 Tim. 3:12)

Nagpapasabot ito nga usa la an iya asawa ngan diri gud hiya dapat magbuhat hin seksuwal nga imoralidad. Dugang pa, diri gud hiya dapat magpakita hin diri angayan nga atensyon ha iba nga babaye.​—w24.11, p. 19.

Kay ano nga makakasiring kita nga an Juan 6:53 diri surubdan para ha Panihapon han Ginoo?

Mababasa ha Juan 6:53 nga dapat kaunon an unod ni Jesus ngan inumon an iya dugo. Ginyakan ito ni Jesus ha Galilea han 32 C.E. ha mga Judio, nga kinahanglan la gihapon nga tumoo ha iya. Pero usa ka tuig katapos hito, gintikangan an Panihapon han Ginoo ha Jerusalem. Hito nga okasyon, an kaistorya ni Jesus amo an makakaupod niya ha pagmando ha langit.​—w24.12, p. 10-11.