Nabasa mo ba hin maopay an mga isyu han An Barantayan hini nga tuig? Kitaa kon mababaton mo an masunod nga mga pakiana:

Ano an iginpapasarig ha aton han Santiago 5:11 han nagsiring ito nga hi Jehova “malumo hinduro magpalangga” ngan “maloloy-on”?

Maaram kita nga tungod ha kalooy, napapagios hi Jehova nga pasayloon an aton mga sala. An Santiago 5:11 nagpapasarig ha aton nga karuyag liwat kita buligan ni Jehova tungod han iya pagpalangga ha aton. Maopay gud nga subaron naton hiya.—w21.01, p. 21.

Kay ano nga ginhimo ni Jehova an kahikayan ha pagkaulo?

Ginhimo niya ito tungod han gugma. Ini nga kahikayan nabulig ha iya maunungon nga pamilya nga magin murayaw ngan organisado. An tagsa nga membro han pamilya nga nasunod hini nga kahikayan maaram kon hin-o an responsable ha paghimo hin pinal nga mga desisyon ngan kon hin-o an dapat manguna ha pagtuman hito.—w21.02, p. 3.

Kay ano nga kinahanglan maghirot an mga Kristiano ha paggamit hin electronic messaging application?

Kon nagdidesisyon an usa ha paggamit hito nga mga application, kinahanglan magin maaramon hiya ha pagpili hin mga kaupod. Makuri ito buhaton ha dagku nga mga group chat. (1 Tim. 5:13) Aada liwat an peligro may kalabotan ha pagpasarang hin diri kompirmado nga mga balita ngan ha pagsalingabot han aton pagminagburugto para ha komersyal nga katuyoan.—w21.03, p. 31.

Ano an pipira nga rason kon kay ano nga gintugotan han Dios nga mag-antos ngan mamatay hi Jesus?

An usa nga rason, tungod han pagbitaya kan Jesus ha usa nga kahoy, nagin posible ha mga Judio nga magkaada kagawasan tikang ha usa nga panhimaraot. (Gal. 3:10, 13) An ikaduha nga rason, tungod kay ginbabansay ni Jehova hi Jesus para ha iya papel sugad nga Hitaas nga Saserdote. Ngan an ikatulo, an pagin maunungon ni Jesus tubtob ha kamatayon nagpamatuod nga mahimo magin matinumanon an mga tawo bisan pa han makuri gud nga mga pagsari. (Job 1:9-11)—w21.04, p. 16-17.

Ano an mahimo mo buhaton kon makuri mabilngan an mga tawo ha ministeryo?

Mahimo ka magsangyaw ha oras nga mas posible nga aada hira ha ira balay. Mahimo mo liwat testingan nga magsangyaw ha iba nga lokasyon. Ngan mahimo ka gumamit hin iba nga pamaagi, sugad han paghimo hin surat.—w21.05, p. 15-16.

Ano an iginpapasabot ni apostol Pablo han nagsiring hiya: “Pinaagi han balaud namatay ako ha balaud”?​ (Gal. 2:19)

Tungod han Mosaiko nga Balaud, klaro nga nakita an pagin diri perpekto han tawo ngan nagiyahan an Israel ngadto ha Kristo. (Gal. 3:19, 24) Ito an naggiya kan Pablo nga karawaton an Kristo. Pinaagi ha pagbuhat hito, hi Pablo “namatay . . . ha balaud”; waray na ito awtoridad ha iya.—w21.06, p. 31.

Paonan-o nagpapakita ha aton hi Jehova hin ehemplo ha pagpailob?

Gin-iilob ni Jehova an pasipara ha iya ngaran, an pagkontra ha iya pagkasoberano, an pagrebelde han pipira niya nga anak, an mga kabuwaan ni Satanas, an pag-antos han iya mga surugoon, an kahibulag han iya kasangkayan nga nagkamatay na, an pagraugdaog ha mga tawo, ngan an pagbungkag ha iya mga linarang.—w21.07, p. 9-12.

Ano nga maopay nga ehemplo han pagpailob an iginpakita ni Jose?

Gin-ilob niya an maraot gud nga pagtratar ha iya han iya kabugtoan. Nagresulta ito nga sayop nga gin-akusaran hiya ngan ginpriso ha Ehipto ha sulod hin mga tuig.—w21.08, p. 12.

Ano nga simboliko nga pagbay-og an igintagna han Hagai 2:6-9, 20-22?

Negatibo an reaksyon han mga nasud ha pagsangyaw mahitungod han Ginhadian, pero damu nga tawo an nainteres ha kamatuoran. Diri na mag-iiha, an mga nasud babay-ugon ha ultimo nga higayon kon bungkagon na hira.—w21.09, p. 15-19.

Kay ano nga diri kita angay umundang ha pagtuman han aton ministeryo?

Nakikita ni Jehova an aton mga pangalimbasog, ngan nalilipay hiya hito. Kon diri kita manluluya o maundang, magkakaada kita kinabuhi nga waray kataposan.—w21.10, p. 25-26.

Paonan-o makakabulig ha aton an Levitico kapitulo 19 nga maiaplikar ini nga sagdon: “Magin baraan kamo ha ngatanan niyo nga panggawi”? (1 Ped. 1:15)

Ito nga bersikulo posible nga ginkotar ha Levitico 19:2. An kapitulo 19 naghahatag hin damu nga ehemplo kon paonan-o naton maiaaplikar an 1 Pedro 1:15 ha aton adlaw-adlaw nga pagkinabuhi.—w21.12, p. 3-4.