1, 2. (a) Ano an posible nga rason nga nagpapakiana kita: “Tubtob san-o”? (b) Kay ano nga mahimo kita maparig-on han mga ehemplo han magtinumanon nga surugoon hadto?

“NGADA san-o?” Ito an iginpakiana han magtinumanon nga propeta nga hira Isaias ngan Habakuk. (Isa. 6:11; Hab. 1:2) Han ginkomposo ni Hadi David an Salmos 13, upat ka beses liwat hiya nga nagpakiana: “Tubtob san-o?” (Sal. 13:1, 2) Bisan an aton Ginoo nga hi Jesu-Kristo nagpakiana hin sugad hito han nakita niya an kawaray-pagtoo han mga nakapalibot ha iya. (Mat. 17:17) Salit diri kita sadang mahipausa kon usahay nagpapakiana kita hin sugad hito.

² Ano an posible nga rason nga nagpapakiana kita: “Tubtob san-o?” Bangin tungod kay nakakaeksperyensya kita hin kawaray-hustisya. O bangin nag-iilob kita tungod han kalagas ngan sakit o han mga pagsari nga aton inaatubang hinin “peligroso gud nga mga panahon nga makuri pakiangayan.” (2 Tim. 3:1) O bangin nanluluya kita tungod han diri maopay nga panggawi hadton mga nakapalibot ha aton. Anoman an hinungdan, makaparig-on hibaroan nga an magtinumanon nga surugoon ni Jehova hadto waray mag-alang ha pagpahayag han sugad nga pakiana nga bangin ginhuhunahuna liwat  naton, ngan waray hira sawaya ha pagpakiana hito.

3. Ano an makakabulig ha aton kon nakakaeksperyensya kita hin magkuri nga kahimtang?

³ Ano an makakabulig ha aton kon kita mismo an nakakaeksperyensya hito nga magkuri nga kahimtang? An disipulo nga hi Santiago nga bugto ni Jesus ha nanay, gin-giyahan ha pagsurat: “Mga kabugtoan, magpailob kamo tubtob ha presensya han Ginoo.” (San. 5:7) Oo, kita ngatanan nagkikinahanglan hin pagpailob. Pero ano an nahiuupod ha pagkaada hinin maopay nga kalidad?

4, 5. (a) Ano an nahiuupod ha pagin mapailubon? (b) Paonan-o igin-ilustrar han disipulo nga hi Santiago an usa nga bahin han pagpailob? (Kitaa an retrato ha tinikangan hini nga artikulo.)

⁴ Sumala ha Biblia, an pagpailob bahin han bunga han baraan nga espiritu; kon waray an bulig han Dios, diri bug-os nga makakapailob an diri perpekto nga tawo. An pagpailob regalo han Dios, ngan kon mapailubon kita, iginpapakita naton nga hinigugma naton an Dios. Kapahayagan liwat ito han aton gugma ha iba. An pagin diri mapailubon nagpapaluya han bugkos han gugma, kondi an pagpailob nagpaparig-on hito. (1 Cor. 13:4, ftn.; Gal. 5:22) An pagpailob nag-uupod hin iba pa nga mag-opay nga kalidad nga nabulig ha aton nga makapailob ha magkuri nga kahimtang samtang gintitipigan an positibo nga disposisyon. (Col. 1:11; San. 1:3, 4) An pagpailob nabulig liwat ha aton nga makapabilin nga marig-on anoman nga problema an aton atubangon ngan diri bumulos kon ginbuhatan kita hin maraot. Dugang pa, an Biblia nag-aaghat ha aton nga magin andam ha pagkarawat nga kinahanglan kita maghulat. Ini nga bahin han pagpailob an ginpapabug-atan ha Santiago 5:7, 8. (Basaha.)

⁵ Kay ano nga importante nga magin andam kita ha pagkarawat nga kinahanglan kita maghulat nga gumios hi Jehova? Iginpariho ni Santiago an aton sitwasyon ha usa nga parauma. Bisan kon nangangalimbasog an usa nga parauma ha pagtanom, diri niya kontrolado an klima o an pagturok han tanom. Diri niya mapapadagmit an panahon. Ginkakarawat niya nga kinahanglan niya mapailubon nga maghulat ha “presyoso nga bunga han tuna.” Sugad man, damu nga butang an diri naton kontrolado samtang ginhuhulat naton an katumanan han mga saad ni Jehova. (Mar. 13:32, 33; Buh. 1:7) Pariho han parauma, kinahanglan kita mapailubon nga maghulat.

6. Ano an aton mahibabaroan ha ehemplo ni propeta Mika?

⁶ An aton kahimtang yana pariho ha kahimtang han panahon ni propeta Mika. Nabuhi hiya durante han pagmando han maraot nga hi Hadi Ahaz, ha panahon diin kalyap an ngatanan nga klase hin karaotan. Ngani, an mga tawo nagin eksperto ha pagbuhat hin maraot. (Basaha an Mika 7:1-3.) Nasantop ni Mika nga diri niya mababag-o ito nga kahimtang. Salit, ano an iya mahihimo? Ginsusumatan kita niya: “Mahatungud ha akon, ako matan-aw ngadto kan Jehova: ako maghuhulat para han Dios han akon kaluwasan: an akon Dios mamamati ha akon.” (Mika 7:7) Pariho kan Mika, kinahanglan liwat naton magkaada disposisyon nga andam maghulat.

7. Ano pa an ginkikinahanglan kay ha basta la nga paghulat kan Jehova ha pagtuman han iya mga saad?

⁷ Kon may-ada kita pagtoo nga pariho han kan Mika, magigin andam kita nga maghulat kan Jehova. Diri kita pariho han usa nga priso nga ada ha iya selda nga napipiritan ha paghulat han adlaw han iya sentensya nga kamatayon, pero diri niya ito ginpapamulat. Iba gud ini ha aton kahimtang! Andam kita maghulat kan Jehova kay nasarig kita nga tutumanon niya an iya saad nga tatagan kita niya hin kinabuhi nga waray kataposan ha husto gud nga panahon, ha pinakamaopay nga panahon! Salit ‘nakakaantos gud kita nga may pagpailob ngan kalipay.’ (Col. 1:11, 12) Kon kabaliktaran an aton bubuhaton—naghuhulat  pero nagrireklamo ngan nagngungurutob nga mahinay gumios hi Jehova—diri ito makakapalipay ha aton Dios.—Col. 3:12.

8. Ano an sadang naton tagdon samtang ginpapamalandong naton an mga ehemplo han magtinumanon nga katawohan hadto?

⁸ Magigin mas andam kita ha paghulat kon hihinumdumon naton an magtinumanon nga katawohan hadto nga mapailubon nga naghulat kan Jehova ha pagtuman han iya mga saad. (Roma 15:4) Samtang ginpapamalandong naton an ira mga ehemplo, maopay nga tagdon naton kon mationan-o kaiha an ira paghulat, kon kay ano nga andam hira maghulat, ngan kon ano nga mga bendisyon an ira nakarawat tungod han ira pagpailob.

9, 10. Mationan-o kaiha kinahanglan maghulat kan Jehova hira Abraham ngan Sarah?

⁹ Tagda an ehemplo nira Abraham ngan Sarah. Kaupod hira “ha mga nakakarawat han mga saad tungod han pagtoo ngan pagpailob.” An Kasuratan nagsusumat ha aton nga “katapos ni Abraham magpakita hin pagpailob,” nakarawat niya an saad nga bibendisyonan hiya ni Jehova ngan padadamuon an iya tulin. (Heb. 6:12, 15) Kay ano nga kinahanglan magin mapailubon hi Abraham? Tungod kay an katumanan han saad nagkikinahanglan hin panahon. An kasabotan ni Jehova kan Abraham naimplementar han Nisan 14, 1943 B.C.E., han tumabok hira Abraham ngan Sarah upod an mga membro han ira panimalay ha Salog Euprates ngan sinulod ha Tuna nga Iginsaad. Katapos hito, kinahanglan maghulat hi Abraham hin 25 ka tuig tubtob nga matawo an iya anak nga hi Isaac han 1918 B.C.E., ngan kinahanglan maghulat na liwat hiya hin 60 ka tuig tubtob nga matawo an iya mga apo nga hira Esau ngan Jacob han 1858 B.C.E.—Heb. 11:9.

 ¹⁰ Mationan-o kahaluag an tuna nga napanunod ni Abraham? Ini an ginsiring han Biblia: “Waray hiya [Abraham] hatagi dinhi hin panurundon, bisan la gutiay nga tuna nga matatamakan han iya tiil. Kondi nagsaad an Dios nga ini nga tuna ihahatag ha iya sugad nga panag-iya, ngan ha iya katulinan, bisan kon waray pa hiya anak hadto.” (Buh. 7:5) Natuman la ito paglabay hin 430 ka tuig katapos tumabok ni Abraham ha Euprates han naorganisar an iya tulin sugad nga nasud nga magtatag-iya han tuna.—Eks. 12:40-42; Gal. 3:17.

11. Kay ano nga andam hi Abraham nga maghulat kan Jehova, ngan ano nga mga bendisyon an iya makakarawat tungod han iya pagpailob?

¹¹ Hi Abraham andam maghulat, kay an iya pagpailob iginbasar ha iya pagtoo kan Jehova. (Basaha an Hebreo 11:8-12.) Malipayon hiya nga naghulat bisan kon waray niya makita ha iya panahon an bug-os nga katumanan hito nga saad. Pero handurawa la an kalipay ni Abraham kon banhawon na hiya ha paraiso nga tuna. Malilipay gud hiya ha paghibaro nga damu an asoy ha Biblia mahitungod han iya kinabuhi ngan han iya mga tulin. * Handurawa la an iya daku nga kalipay kon masabtan na niya kon mationan-o kaimportante an iya papel ha katumanan han katuyoan ni Jehova may kalabotan ha iginsaad nga tulin! Sigurado nga masisiring niya nga bawi gud an iya maiha nga paghulat.

12, 13. Kay ano nga kinahanglan ni Jose magpailob, ngan ano an iya maopay nga disposisyon?

¹² Hi Jose nga apo ha tuhod ni Abraham nagpakita liwat nga andam hiya nga magpailob. Biktima hiya hin duro nga kawaray-hustisya. Siyahan, iginbaligya hiya han iya kabugtoan ha pagkauripon han mga 17 anyos hiya. Katapos, sayop nga gin-akusaran hiya nga nagsari hiya ha paglugos ha asawa han iya agaron, ngan nagresulta ito han iya kapriso. (Gen. 39:11-20; Sal. 105:17, 18) Bisan kon nagbuhat hiya hin maopay, baga hin ginsirotan lugod hiya imbes nga bendisyonan. Pero paglabay hin 13 ka tuig, madagmit nga nagbag-o an ngatanan. Ginpagawas hiya ha prisohan ngan nagin ikaduha ha hadi han Ehipto.—Gen. 41:14, 37-43; Buh. 7:9, 10.

¹³ Nagdumot ba hi Jose tungod han iya naeksperyensyahan nga kawaray-hustisya? Nawara ba an iya pagsarig ha iya Dios nga hi Jehova? Waray. Ano an nakabulig kan Jose nga mapailubon nga maghulat? An iya pagtoo kan Jehova. Nasabtan niya nga an Dios an nagmaniobra han mga panhitabo. Ngan makikita ito ha iya iginyakan ha iya kabugtoan: “Ayaw kamo kahadluk. Kay aada ba ako han lugar han Dios? . . . Naghuhunahuna kamo hin maraut patok ha akon; kondi ginmamaopay han Dios ha paghimo, sugad han kinikita ta niyan nga adlaw, ha pagluwas nga buhi hin duro ka damu nga mga tawo.” (Gen. 50:19, 20) Ha urhi, nasantop ni Jose nga bawi gud an iya paghulat.

14, 15. (a) Kay ano nga makatirigamnan an pagin mapailubon ni David? (b) Ano an nakabulig kan David nga mapailubon nga maghulat?

¹⁴ Hi Hadi David nakaeksperyensya liwat hin damu nga kawaray-hustisya. Bisan kon bata pa hiya nga gindihogan ni Jehova para magin hadi han Israel, kinahanglan niya maghulat hin mga 15 ka tuig antes hiya magin hadi ha iya kalugaringon nga tribo. (2 Sam. 2:3, 4) Durante hito nga panahon, may mga higayon nga kinahanglan hiya pumalagiw kay karuyag hiya patayon han diri matinumanon nga hi Hadi Saul. * Salit kinahanglan magkinabuhi hi David sugad nga puga, usahay ha iba nga nasud o ha mga lungib ha kamingawan. Bisan kon ha urhi namatay hi Saul ha patag-awayan, naghulat pa hi David hin mga  pito ka tuig antes hiya magin hadi ha bug-os nga Israel.—2 Sam. 5:4, 5.

¹⁵ Kay ano nga andam hi David nga maghulat nga mapailubon? Ginbaton niya ini hito mismo nga salmos diin upat ka beses hiya nga nagpakiana: “Tubtob san-o?” Ini an iya ginsiring: “Kondi ako nasarig ha imo pagkalooy; an akon kasingkasing malilipay ha imo kaluwasan. Magaawit ako kan Jehova, kay kapin nga maloloyon hiya para ha akon.” (Sal. 13:5, 6) Sinarig hi David ha maunungon nga gugma ni Jehova. Malipayon nga ginpamulat gud niya an pagtalwas ha iya, ngan ginpamalandong kon paonan-o hiya ginbendisyonan ni Jehova. Oo, inabat ni David nga bawi gud an iya paghulat.

16, 17. Paonan-o iginpakita ni Jehova nga Dios ngan ni Jesu-Kristo an pinakamaopay nga susbaranan ha pagin andam nga maghulat?

¹⁶ May kalabotan ha pagpailob, hi Jehova diri naglalaom nga bubuhaton naton an usa nga butang nga hiya mismo diri andam magbuhat. Hiya an pinakamaopay nga susbaranan ha pagin andam nga maghulat. (Basaha an 2 Pedro 3:9.) Mapailubon nga naghuhulat hi Jehova hin yinukot na nga katuigan basi bug-os nga mabaton an isyu nga iginbangon ha hardin han Eden. Mapailubon ngan padayon hiya nga naghuhulat han panahon diin bug-os na nga mababaraan an iya ngaran. Magriresulta ini hin hura nga bendisyon para hadton mga “naghuhulat” gud kan Jehova.—Isa. 30:18.

¹⁷ Hi Jesus andam liwat maghulat. Bisan kon natipigan niya an iya integridad ilarom han mga pagsari han nakanhi hiya ha tuna ngan iginpresentar na niya an bili han iya halad-lukat han 33 C.E., kinahanglan pa niya maghulat tubtob han 1914 antes hiya magtikang ha pagmando. (Buh. 2:33-35; Heb. 10:12, 13) Ngan maghuhulat pa hiya nga matapos an iya Usa ka Yukot ka Tuig nga Pagmando tubtob nga bug-os nga mabungkag an iya mga kaaway. (1 Cor. 15:25) Maiha gud ito nga paghinulat, pero makakasiguro kita nga bawi gud ito.

18, 19. Ano an mabulig ha aton nga magin andam nga maghulat nga mapailubon?

¹⁸ Matin-aw, an tagsa ha aton kinahanglan magin andam nga maghulat, magin mapailubon. Pero ano an mabulig ha aton nga mahimo ito? Pag-ampo para han espiritu han Dios. Tigamni nga an pagpailob bahin han bunga han baraan nga espiritu. (Efe. 3:16; 6:18; 1 Tes. 5:17-19) Panginyupo kan Jehova nga buligan ka nga magin mapailubon ha paghulat.

¹⁹ Hinumdumi liwat kon ano an nakabulig kanda Abraham, Jose, ngan David nga mapailubon nga maghulat ha katumanan han mga saad ni Jehova. Nakabulig ha ira an ira pagtoo ngan pagsarig kan Jehova. Waray nira unaha an ira kalugaringon ngan an ira personal nga kaopayan. An pagpamalandong han mag-opay nga resulta han ira pagpailob, mag-aaghat liwat ha aton nga ipakita an disposisyon nga andam maghulat.

20. Ano an sadang naton magin determinasyon?

²⁰ Salit bisan kon naatubang kita hin mga pagsari ngan kakurian, determinado kita nga ipakita nga andam kita maghulat. Oo, usahay bangin magpakiana kita: “Ginoo, ngada san-o?” (Isa. 6:11) Pero pinaagi han bulig han baraan nga espiritu han Dios, magigin determinado kita pariho kan Jeremias nga nagsiring: “Hi Jehova amo an akon bahin . . . busa ako maglalaum [o, maghuhulat] ha iya.”—Pagta. 3:21, 24.