1. Ano nga klase hin espirituwal nga mga tumong an puydi naton himoon?

 SUGAD nga tinuod nga mga Kristiano, hinigugma gud naton hi Jehova. Karuyag naton ihatag an aton pinakamaopay ha pag-alagad ha iya. Pero basi makab-ot an bug-os naton nga potensyal, kinahanglan ta maghimo hin espirituwal nga mga tumong, sugad han pagkultibar hin Kristiano nga mga kalidad, paghibaro hin mapulsanon nga mga skill, ngan pagpamiling hin mga paagi ha pagserbi ha iba. *

2. Kay ano nga angay kita maghimo hin espirituwal nga mga tumong ngan mangalimbasog nga makab-ot ito?

² Kay ano nga angay kita magin interesado nga mag-uswag ha espirituwal? An nangunguna nga rason, kay karuyag naton lipayon an aton mahigugmaon nga Amay ha langit. Nalilipay hi Jehova kon nakikita niya nga bug-os naton nga gin-gagamit an aton mga talento ngan abilidad ha pag-alagad ha iya. Dugang pa, karuyag naton mag-uswag ha espirituwal basi mas makabulig ha aton kabugtoan. (1 Tes. 4:9, 10) Anoman kita kaiha ha kamatuoran, kita ngatanan mahimo mag-uswag ha espirituwal. Kitaon ta kon paonan-o naton ito mahihimo.

3. Sugad han nakarekord ha 1 Timoteo 4:12-16, ano an igin-aghat ni apostol Pablo kan Timoteo nga buhaton?

³ Han ginhimo ni apostol Pablo an iya siyahan nga surat kan Timoteo, eksperyensyado na nga tigurang iton maopay nga batan-on. Pero gin-aghat hiya ni Pablo nga padayon nga mag-uswag ha espirituwal. (Basaha an 1 Timoteo 4:12-16.) Samtang ginhuhunahuna mo an ginsiring ni Pablo, mapapansin mo nga karuyag  niya nga mag-uswag hi Timoteo ha duha nga paagi: ha pagkultibar han Kristiano nga mga kalidad sugad han gugma, pagtoo, ngan kaputli, ngan ha pagpauswag han mga skill sugad han pagbasa ha publiko, sinsero nga pagsagdon, ngan pagtutdo. Hihisgotan naton an ehemplo ni Timoteo basi mahibaroan kon paonan-o an paghimo hin mga tumong nga makakab-ot makakabulig ha aton nga mag-uswag ha espirituwal. Hihisgotan liwat naton an pipira nga paagi nga mapapahaluag naton an aton ministeryo.

4. Sumala ha Filipos 2:19-22, kay ano nga gin-gamit ni Jehova an iya surugoon nga hi Timoteo?

⁴ Kay ano nga gin-gamit ni Jehova an Iya surugoon nga hi Timoteo? Tungod han iya mag-opay gud nga Kristiano nga kalidad. (Basaha an Filipos 2:19-22.) Ha paghulagway ni Pablo kan Timoteo, makikita naton nga mapainubsanon, maunungon, maduruto, ngan matataporan hiya. Mahigugmaon hiya, ngan nanginginano gud hiya ha kabugtoan. Salit hinigugma ni Pablo hi Timoteo ngan waray mag-alang ha pagtapod ha iya hin magkuri nga toka. (1 Cor. 4:17) Sugad man, hihigugmaon kita ni Jehova ngan mas makakabulig ha kongregasyon kon kukultibaron naton an mga kalidad nga iya naruruyagan.—​Sal. 25:9; 138:6.

5. (a) Paonan-o ka makakadesisyon kon ano nga Kristiano nga kalidad an karuyag mo pauswagon? (b) Sugad han makikita ha piktyur, paonan-o nangangalimbasog an burobata nga sister nga makab-ot an iya tumong nga mas makagpakita hin empatiya ha iba?

⁵ Pagpili hin espisipiko nga tumong. Ig-ampo ngan hunahunaa kon ano nga mga bahin han imo personalidad an kinahanglan mo pauswagon. Pagpili hin espisipiko nga kalidad nga karuyag mo pokusan. Pananglitan, mahimo mo ba pauswagon an pagpakita hin empatiya o an imo hingyap nga buligan an kabugtoan? Kinahanglan mo ba mag-uswag ha pakigmurayaw ngan pagpasaylo? Bangin makabulig ha imo an paghangyo ha usa nga tinaporan nga sangkay nga maghatag hin mga suhestyon kon paonan-o ka mag-uuswag.—​Prob. 27:6.

6. Paonan-o ka mangangalimbasog pagkab-ot han imo tumong nga mapauswag an usa nga kalidad?

⁶ Pangalimbasugi nga makab-ot an imo tumong. Paonan-o mo ito mahihimo? An usa nga paagi amo an pag-aram hin maopay han kalidad nga karuyag mo pauswagon. Sidngon ta nga karuyag mo pangalimbasogan nga magin mas mapinasayloon ha iba. Bangin tikangan mo ito pinaagi ha pagbasa ngan pagpamalandong han mga ehemplo ha Biblia hadton hura nga  nagpasaylo ngan hadton waray magpasaylo. Hunahunaa an ehemplo ni Jesus. Kinaburut-on nga ginpasaylo niya an iba. (Luc. 7:47, 48) Waray hiya magpokus ha ira mga sayop, lugod ginkita niya an ira potensyal. Pero an mga Pariseo ha panahon ni Jesus “naghuhunahuna nga waray pulos an iba.” (Luc. 18:9) Katapos pamalandungon ini nga mga ehemplo, pakianhi an imo kalugaringon: ‘Ano an akon nakikita ha iba? Hain ha ira mga kalidad an akon ginpupokusan?’ Kon nakukurian ka pagpasaylo ha usa nga tawo, testingi paglista han ngatanan niya nga mag-opay nga kalidad. Katapos, pakianhi an imo kalugaringon: ‘Ano an pagkita ha iya ni Jesus? Papasayloon ba niya hiya?’ An sugad hini nga proyekto han pag-aram makakabulig nga mabag-o an aton panhunahuna. Ha siyahan, bangin kinahanglan mangalimbasog gud kita nga pasayloon an usa nga nakasakit ha aton. Pero kon padayon kita nga maniningkamot, maabot an panahon nga magigin mas masayon na ha aton an pagpasaylo.

7. Uyon ha Proberbios 22:29, ha ano nga mga paagi gin-gagamit ni Jehova yana an mga boluntaryo nga may skill?

⁷ An usa pa nga tumong nga puydi mo himoon amo an paghibaro hin mapulsanon nga skill. Hunahunaa an damu nga boluntaryo nga ginkikinahanglan ha pagtukod hin mga pasilidad han Bethel, Assembly Hall, ngan Kingdom Hall. Damu ha ira an nahibaro han ira skill pinaagi han pagtrabaho kaupod han eksperyensyado nga kabugtoan. Sugad han makikita ha piktyur, an mga brother ngan sister pariho nahibabaro han mga skill nga ginkikinahanglan basi makabulig ha pagmintinar han mga Assembly Hall ngan Kingdom Hall. Hini ngan ha iba pa nga paagi, hi Jehova nga Dios, “an Hadi ha kadayonan,” ngan hi Kristo Jesus, “an Hadi han . . . mga hadi,” naghihimo hin urusahon nga mga butang pinaagi han mga boluntaryo nga may skill. (1 Tim. 1:17; 6:15; basaha an Proberbios 22:29.) Karuyag naton magin maduruto ngan gamiton an aton mga skill ha paghimaya kan Jehova, diri ha aton kalugaringon.—Juan 8:54.

8. Paonan-o ka makakadesisyon kon ano nga skill an karuyag mo hibaroan?

⁸ Pagpili hin espisipiko nga tumong. Ano nga skill an puydi mo pokusan? Pakianhi an iyo mga tigurang ngan bangin an iyo paramangno han sirkito kon ano an ira nahuhunahuna nga skill nga puydi mo hibaroan. Pananglitan, kon magsuhestyon hira nga pauswagon mo an imo abilidad ha pagyakan ngan pagtutdo, hangyoa hira nga buligan ka nga mahibaroan kon ano nga kalidad han pagyakan an kinahanglan mo pauswagon. Katapos, paghimo hin mga paagi basi mag-uswag. Paonan-o mo ini mahihimo?

9. Paonan-o ka mangangalimbasog ha pagkab-ot han imo tumong nga mahibaro hin skill?

⁹ Pangalimbasugi nga makab-ot an imo tumong. Sidngon ta nga karuyag mo pauswagon an imo abilidad ha pagtutdo. Puydi mo adman hin maopay an brosyur nga Magin Mas Epektibo ha Pagbasa Ngan Pagtutdo. Kon gintagan ka hin bahin ha katirok ha midweek, puydi ka maghangyo hin kwalipikado nga brother nga pamatian an imo bahin antes mo ito ipresenta ngan maghatag hin mga suhestyon kon paonan-o ka mag-uuswag. Pangalimbasugi nga diri la magkaada skill kondi magkaada gihap reputasyon ha pagin maduruto ngan matataporan.—​Prob. 21:5; 2 Cor. 8:22.

10. Paghatag hin ehemplo kon paonan-o mapapauswag an usa nga skill.

¹⁰ Ano man kon an skill nga karuyag mo hibaroan makuri para ha imo? Ayaw pag-undang! An brother nga hi Garry nakukurian pagbasa hadto. Nahinunumdoman niya nga naaawod gud hiya kon naniningkamot hiya pagbasa ha daku nga tingog ha mga katirok. Pero padayon  hiya nga nangalimbasog nga mag-uswag. Yana, siring niya nga tungod han training nga iya nakarawat, nakakagpahayag na hiya ha mga Kingdom Hall, sirkito nga asembleya, ngan kombensyon.

11. Pariho kan Timoteo, ano an mabulig ha aton ha pagkarawat hin dugang nga mga responsabilidad?

¹¹ Hi Timoteo ba nagin maopay gud nga mamumulong o magturutdo? Waray ginsisiring an Biblia. Pero sigurado nga nagin mas maopay hi Timoteo ha pagtuman han iya mga responsabilidad kay ginsunod niya an sagdon ni Pablo. (2 Tim. 3:10) Ha pariho nga paagi, kon aton pauuswagon an aton mga skill, magigin kwalipikado kita ha pagkarawat hin dugang nga mga responsabilidad.

12. Paonan-o ka nagpahimulos ha bulig han iba?

¹² Tanan kita nagpapahimulos ha bulig han iba. Kon naoospital kita, mapasalamaton kita ha pagbisita han mga tigurang nga membro han Hospital Liaison Committee o han Patient Visitation Group. Kon aada kita ha makuri nga sitwasyon, gin-aapresyar naton kon may mahigugmaon nga tigurang nga naghahatag hin panahon basi mamati ngan magliaw ha aton. Kon kinahanglan naton hin bulig ha usa nga Bible study, nalilipay kita kon may eksperyensyado nga payunir nga naupod ha aton ngan naghahatag hin mga suhestyon. Ini ngatanan nga kabugtoan nalilipay pagbulig ha aton. Magkakaada liwat kita hito nga kalipay kon magigin andam kita ha pagserbi ha aton kabugtoan. “Mas daku an kalipay ha paghatag kay ha pagkarawat,” siring ni Jesus. (Buh. 20:35) Kon karuyag mo pahaluagon an imo pag-alagad ha sugad hini o ha iba nga paagi, ano an mabulig ha imo nga makab-ot an imo mga tumong?

13. Kon maghihimo kita hin tumong, ano an angay naton hinumdoman?

¹³ Ayaw paghimo hin tumong nga diri espisipiko. Pananglitan, bangin maghunahuna ka, ‘Karuyag ko dugangan an akon nahihimo ha kongregasyon.’ Pero bangin makuri hibaroan kon paonan-o makakab-ot ito nga tumong, ngan bangin imposible mo mahibaroan kon nakab-ot mo na ito. Salit pagpili hin klaro ngan espisipiko nga tumong. Bangin isurat mo pa ngani ito ngan an plano mo himoon basi makab-ot ito.

14. Kay ano nga kinahanglan naton magin mapauyon-uyon kon naghihimo hin mga tumong?

¹⁴ Kinahanglan liwat naton magin mapauyon-uyon kon naghihimo hin mga tumong. Kay  ano? Kay diri naton bug-os nga kontrolado an aton kahimtang. Ha pag-ilustrar: Hi apostol Pablo nakabulig ha pag-establisar hin bag-o nga kongregasyon ha syudad han Tesalonica. Ngan sigurado nga tumong niya nga magpabilin didto ngan buligan adton bag-o nga mga Kristiano. Pero tungod han mga parakontra, napiritan hi Pablo nga bumaya hito nga syudad. (Buh. 17:1-5, 10) Kon nagpabilin hi Pablo, maibubutang niya ha peligro an kabugtoan. Pero waray hiya umundang. Lugod, nagpahiuyon hiya ha bag-o nga kahimtang. Ha urhi, ginpakadto niya ha Tesalonica hi Timoteo basi panginanoon an espirituwal nga panginahanglan han bag-o nga mga tumuroo didto. (1 Tes. 3:1-3) Sigurado nga nalipay gud an mga taga-Tesalonica nga hi Timoteo andam mag-alagad diin man hiya kinahanglan!

15. Paonan-o an aton mga tumong mahimo maapektohan han mga kahimtang nga diri naton kontrolado? Paghatag hin ehemplo.

¹⁵ May mahibabaroan kita ha eksperyensya ni Pablo ha Tesalonica. Bangin may ginkakab-ot kita nga pribilehiyo, pero tungod han mga kahimtang nga diri naton kontrolado, diri ta ito makakab-ot. (Ecles. 9:11) Kon ito an imo sitwasyon, magin andam ha pagpili hin iba nga tumong nga makakab-ot mo. Ini an ginbuhat han mag-asawa nga hira Ted ngan Hiedi. Tungod han problema ha panlawas, kinahanglan nira bumaya ha Bethel. Pero an ira gugma kan Jehova nagpagios ha ira nga mamiling hin iba nga mga paagi nga pahaluagon an ira ministeryo. Siyahan, nagregular payunir hira. Ha urhi, gintokahan hira nga magin mga espesyal payunir, ngan hi Ted gin-train nga magin kasaliwan nga paramangno han sirkito. Katapos, nagbag-o an igintutugot nga edad para ha mga paramangno han sirkito. Nahunahuna nira Ted ngan Hiedi nga diri na hira kwalipikado hito nga pribilehiyo. Bisan kon nasubo hira, maaram hira nga makakag-alagad hira kan Jehova ha iba nga mga paagi. Hi Ted nagsiring, “Nahibaroan namon nga diri magpokus ha usa la nga klase han pag-alagad.”

16. Ano nga leksyon an aton mahibabaroan ha Galacia 6:4?

¹⁶ Diri naton kontrolado an ngatanan nga nahitatabo ha aton kinabuhi. Salit diri naton angay hunahunaon nga an aton importansya nakabase ha aton mga pribilehiyo o ikompara an aton mga pribilehiyo ha mga pribilehiyo han iba. Hi Hiedi nagsiring, “Mawawara an imo kamurayawan kon ikukompara mo an imo kinabuhi ha kinabuhi han iba.” (Basaha an Galacia 6:4.) Importante nga mamiling kita hin mga paagi ha pagbulig ha iba ngan pag-alagad kan Jehova. *

17. Paonan-o ka mangangalimbasog nga magin kwalipikado para ha mga pribilehiyo?

 ¹⁷ Magigin posible para ha imo nga kumarawat hin mga pribilehiyo kon titipigan mo nga simple an imo kinabuhi ngan lilikyan an diri kinahanglanon nga utang. Paghimo hin gudti nga tumong nga mabulig ha imo nga makab-ot an imo dagku nga tumong. Pananglitan, kon an imo daku nga tumong amo an magin regular payunir, mahimo ka ba mag-auxiliary payunir kada bulan ha pagkayana? Kon tumong mo nga magin ministeryal nga surugoon, mahimo ka ba maggahin hin mas damu nga panahon ha ministeryo ngan ha pagbisita ha mga may sakit ngan lagas ha iyo kongregasyon? An imo makukuha nga eksperyensya yana mahimo mag-abri hin oportunidad para ha dugang nga mga pribilehiyo ha tiarabot. Magin determinado nga buhaton an imo pinakamaopay ha bisan ano nga toka nga ihatag ha imo.—​Roma 12:11.

18. Sugad han makikita ha piktyur, ano an imo mahibabaroan ha ehemplo ni Beverley?

¹⁸ Bisan kon lagas na kita, puydi pa gihapon kita maghimo ngan magkab-ot hin espirituwal nga mga tumong. Hunahunaa an ehemplo han 75 anyos nga sister nga hi Beverley. May-ada hiya grabe nga sakit nga tungod hito nakukurian hiya paglakat. Pero karuyag niya nga bug-os nga makigbahin ha kampanya para ha Memoryal. Salit naghimo hiya hin espisipiko nga mga tumong. Han nakab-ot ni Beverley an iya mga tumong para ha kampanya, nalipay gud hiya. An iya mga pangalimbasog nakaaghat ha iba nga magin maduruto ha ministeryo. Gin-aapresyar ni Jehova an ginbubuhat han aton lagas nga kabugtoan, bisan kon limitado na an ira nahihimo tungod han ira kahimtang.—​Sal. 71:17, 18.

19. Ano an pipira nga espirituwal nga tumong nga puydi naton himoon?

¹⁹ Paghimo hin mga tumong nga makakab-ot mo. Pagkultibar hin mga kalidad nga makakapalipay kan Jehova. Paghibaro hin mga skill nga maghahatag ha imo hin oportunidad nga mas magamit han aton Dios ngan han iya organisasyon. Pamiling hin mga paagi nga mas makaserbi ha kabugtoan. * Pariho kan Timoteo, pinaagi han bendisyon ni Jehova ‘klaro nga makikita han ngatanan nga tawo an imo pag-uswag.’​—1 Tim. 4:15.