1. (a) Ano an ginkaparihoan han hukom nga hi Jepte ngan ni Hana? (Kitaa an retrato hini nga pahina.) (b) Ano nga mga pakiana an hihisgotan hini nga artikulo?

MAISUGON hiya nga lider ngan girriro. Mapainubsanon ngan mapinasakupon hiya nga asawa. Labot la nga pariho magsiringba ni Jehova an hukom nga hi Jepte ngan an asawa ni Elkana nga hi Hana, ano pa an posible nga ira ginkaparihoan? Pariho hira nagsaad ha Dios, ngan gintuman gud nira an ira iginsaad. Maopay gud hira nga ehemplo ha kalalakin-an ngan kababayin-an yana nga naghihimo hin saad kan Jehova. Kondi may importante nga mga pakiana nga nabangon: Ano an iginpapasabot han saad? Mationan-o kaseryoso an pagsaad ha Dios? Ano nga mga leksyon an aton mahibabaroan kanda Jepte ngan Hana?

2, 3. (a) Ano an iginpapasabot han saad? (b) Ano an ginsisiring han Kasuratan mahitungod ha pagsaad ha Dios?

² Ha Biblia, an saad usa nga seryoso nga panumpa ha atubangan han Dios. Pananglitan, an usa nagsasaad nga bubuhaton niya an partikular nga butang, maghahatag hin regalo, masulod ha usa nga klase hin pag-alagad, o diri bubuhaton an partikular nga butang. An saad kinaburut-on nga ginhihimo han usa uyon ha iya kagawasan ha pagbuot. Pero para ha Dios, sagrado ito ngan kinahanglan gud tumanon kay sugad ito karig-on ha panumpa nga bubuhaton o diri bubuhaton han usa nga indibiduwal an partikular nga butang. (Gen. 14: 22, 23; Heb. 6:16, 17) Ano an ginsisiring han Kasuratan mahitungod han pagkaseryoso han pagsaad ha Dios?

³ An Mosaiko nga Balaud nagsiring: “Kon in usa nga lalaki magsaad hin usa nga saad kan Jehova, o manumpa hin usa nga panumpa . . . , diri niya pagtalapason an iya polong; iya buhaton sumala han ngatanan nga ginmawas ha iya baba.” (Num. 30:2) Ha urhi, hi Solomon gin-giyahan ha pagsurat: ‘Kon ikaw magsasaad hin usa nga saad ha Dios, ayaw pag-ihaa an pagbayad hini; kay waray hiya kalipay ha mga lurong: pagbayad hadton imo iginsaad.’ (Ekles. 5:4) Ginpabug-atan ni Jesus an pagkaseryoso han pagsaad ha Dios han hiya nagsiring: “Hinbatian niyo an ginsiring ha aton kaapoy-apoyan: ‘Diri ka magsumpa kon diri mo tutumanon, kondi kinahanglan tumanon mo an imo mga saad kan Jehova.’”—Mat. 5:33.

4. (a) Mationan-o kaseryoso an pagsaad ha Dios? (b) Ano an aton karuyag mahibaroan mahitungod kanda Jepte ngan Hana?

⁴ Matin-aw, seryoso gud nga butang an pagsaad ha Dios. An aton pagtuman o diri pagtuman han aton mga saad nakakaapekto ha aton relasyon kan Jehova. Hi David nagsiring: “Hin-o ba an masaka ngadto ha bukid ni Jehova? Ngan hin-o ba an matukdaw ha iya baraan nga kahimurutangan? An mayada mahamis nga mga kamot, ngan putli nga kasingkasing . . . ngan waray manumpa hin limbong.” (Sal. 24:3, 4) Ano an iginsaad ni Jepte ngan ni Hana, ngan masayon ba an pagtuman han ira iginsaad?

5. Ano an iginsaad ni Jepte, ngan ano an nahitabo?

⁵ Hi Jepte nagsaad kan Jehova antes hiya makiggirra ha mga Amonitanhon, nga nagtatalumpigos ha katawohan han Dios. (Huk. 10:7-9) Karuyag gud ni Jepte nga magdaog salit nagsaad hiya: “Kon ha pagkatinuud imo itubyan an mga anak ni Amon ha akon kamot, dida hito mahananabu, nga bisan ano nga gumawas tikang ha mga ganghaan han akon balay pagsugat [o, pagtapo] ha akon, kon umuli na ako ha malinawon tikang ha mga anak ni Amon, ini makakan Jehova.” Ano an nahitabo? Napirde an mga Amonitanhon, ngan an hinigugma nga anak ni Jepte an tumapo ha iya tikang ha iya kadaogan. An iya anak an ‘magigin kan Jehova.’ (Huk. 11:30-34) Ano an epekto hito nga saad ha anak ni Jepte?

6. (a) Kay ano nga diri masayon para kan Jepte ngan han iya anak nga tumanon an saad ni Jepte ha Dios? (b) Ano an igintututdo ha imo han Deuteronomio 23:21, 23 ngan Salmos 15:4 mahitungod ha pagsaad ha Dios?

⁶ Basi matuman han anak ni Jepte an saad han iya tatay, kinahanglan niya mag-alagad hin bug-os-panahon ha tabernakulo ni Jehova. Waray ba ni Jepte hunahunaa hin maopay an iya iginsaad? Diri man, kay posible nga nahunahuna niya nga bangin an iya anak an matapo ha iya. Bisan pa hito, sigurado nga masakit ito para ha mag-amay ngan daku gud ito nga sakripisyo para ha ira. Han nakita ni Jepte an iya anak, “gin-gisi niya an iya mga panapton” ngan nasubo hinduro. An iya anak ‘nagmabidoon han iya pagkauray.’ Kay ano? Hi Jepte waray iba nga anak, ngan an iya nag-uusahan nga anak diri na puydi mag-asawa ngan magkaanak. Waray na magdadara han iya ngaran ngan panurundon. Kondi diri ito an pinakaimportante. Hi Jepte nagsiring: “Binungat ko an akon baba ngadto kan Jehova, ngan diri ako makakabakwi.” Ngan an iya anak nagsiring: “Buhata ha akon sumala hadto nga ginmowa tikang ha imo baba.” (Huk. 11:35-39; Maupay nga Sumat) Inin maunungon nga mga indibiduwal waray gud maghunahuna nga diri tumanon an ira saad ha Gihitaasi nga Dios, bisan pa kon daku an kinahanglan nira igsakripisyo.—Basaha an Deuteronomio 23:21, 23; Salmos 15:4.

7. (a) Ano an iginsaad ni Hana, ngan kay ano, ngan ano an nahitabo? (b) Ano an epekto kan Samuel han saad ni Hana? (Kitaa an footnote.)

⁷ Hi Hana nagsaad liwat kan Jehova, ngan gintuman gud niya ito. Nagsaad hiya ha Dios han  nakaeksperyensya hiya hin duro nga kasubo ngan kasakit kay baog hiya ngan pirme gin-iinsulto. (1 Sam. 1:4-7, 10, 16) Iginsumat ni Hana ha Dios an ngatanan niya nga inaabat ngan nagsaad: “O Jehova han mga kasondalohan, kon ha pagkamatuud lingion mo an kasakitan hinin imo sorogoon nga babaye, ngan hinumduman mo ako, ngan diri mo hingalimtan an imo sorogoon nga babaye, kondi nga hatagan mo an imo sorogoon nga babaye hin bata nga lalaki, dida hito ihahatag ko hiya kan Jehova ha ngatanan nga adlaw han iya kinabuhi, ngan waray labaha nga madapat ha iya olo.” * (1 Sam. 1:11) Ginbaton han Dios an hangyo ni Hana, ngan igin-anak niya an iya suhag—usa nga lalaki. Sigurado nga nalipay gud hiya hito! Pero waray niya hingalimti an iya iginsaad ha Dios. Han igin-anak niya an iya suhag, hiya nagsiring: “Pinangaro ko hiya kan Jehova.”—1 Sam. 1:20.

8. (a) Kay ano nga diri masayon para kan Hana an pagtuman han iya saad? (b) Ano an iginpapahinumdom ha imo han Salmos 61 mahitungod han maopay nga ehemplo ni Hana?

⁸ Han nalutas hi Samuel han mga tres anyos hiya, gintuman gud ni Hana an iya iginsaad ha Dios. Waray gud hiya maghunahuna nga diri ito tumanon. Gindara niya hi Samuel ha hitaas nga saserdote nga hi Eli ha tabernakulo ha Silo ngan nagsiring: “Para hini nga bata nagampo ako; ngan hi Jehova naghatag ha akon han akon hangyo nga akon pinangaro ha iya: Busa akon man ihinatag hiya kan Jehova; ha ngatanan nga adlaw han iya kinabuhi hiya ihahatag kan Jehova.” (1 Sam. 1:24-28) Didto, “an bata nga hi Samuel tinmubo ha atubangan ni Jehova.” (1 Sam. 2:21) Pero ano an epekto hito kan Hana? Hinigugma gud niya inin iya gutiay pa nga anak, pero yana diri na niya makikita hi Samuel kada adlaw. Handurawa la an iya kamingaw nga mahangkopan, makauyag, ngan maataman an iya anak—makita an ngatanan nga makalilipay nga panhitabo nga ginhihingyap gud han usa nga mahigugmaon nga nanay samtang nagtutubo an iya anak. Bisan pa hito, waray gud hi Hana magbasol nga iya gintuman an iya saad ha Dios. Nalipay gud hiya ha pagtuman hito.—1 Sam. 2:1, 2; basaha an Salmos 61:1, 5, 8.

9. Ano pa nga mga pakiana an aton hihisgotan?

⁹ Yana nga nasabtan naton kon mationan-o kaseryoso an pagsaad ha Dios, tagdon naton ini nga mga pakiana: Ano nga mga saad an posible himoon naton sugad nga mga Kristiano? Ngan kay ano nga sadang kita magin determinado ha pagtuman hito?

10. Ano an pinakaimportante nga saad nga posible himoon han usa, ngan ano an nahiuupod hito?

¹⁰ An pinakaimportante nga saad nga posible himoon han usa amo an iya pagdedikar han iya kinabuhi kan Jehova. Kay ano? Kay ha iya pribado nga pag-ampo, sinsero hiya nga nagsasaad kan Jehova nga gagamiton niya an iya kinabuhi ha pag-alagad ha Dios ha waray kataposan, anoman an mahitabo. Sugad han ginsiring ni Jesus, an usa nga nagdedikar ‘nagsasalikway han iya kalugaringon,’ karuyag sidngon, nagsasaad hiya nga uunahon niya pirme ha iya kinabuhi an kaburut-on han Dios imbes nga an iya kalugaringon. (Mat. 16:24) Tikang hito nga adlaw, kan Jehova na hiya. (Roma 14:8) Sadang gud seryosohon han bisan hin-o an ira dedikasyon, pariho han ginbuhat han salmista nga nagsiring mahitungod han iya mga saad ha Dios: “Ano ba an akon ihahatag kan Jehova tungud han iya mga pakaopay ha akon? Magbabayad ako han akon mga saad ngadto kan Jehova, oo, ha atubangan han iya katawohan.”—Sal. 116:12, 14.

11. Ano an nahitabo ha adlaw han imo bawtismo?

¹¹ Nagdedikar ka na ba kan Jehova ngan ginsimbolohan ito pinaagi han pagpabawtismo?  Kon oo, maopay gud ito! Hinumdumi nga ha adlaw han imo bawtismo, ha atubangan han damu nga saksi, ginpakianhan ka kon igindedikar mo na ba an imo kalugaringon kan Jehova ngan kon nasasabtan mo ba nga “an imo dedikasyon ngan bawtismo nagpapakilala ha imo sugad nga usa han mga Saksi ni Jehova nga nakikig-upod ha organisasyon han Dios nga ginigiyahan pinaagi han iya espiritu.” An imo positibo nga baton dayag nga kapahayagan han imo bug-os-kasingkasing nga dedikasyon ngan nagpapakita nga kwalipikado ka nga mabawtismohan sugad nga ordinado nga ministro ni Jehova. Sigurado nga napalipay mo gud hi Jehova!

12. (a) Ano an maopay nga ipakiana naton ha aton kalugaringon? (b) Sumala kan Pedro, ano nga mga kalidad an sadang naton patuboon?

¹² Kondi an bawtismo tinikangan pa la han aton pag-alagad ha Dios. Katapos hito, karuyag naton nga padayon nga magkinabuhi uyon ha aton dedikasyon. Salit, mahimo naton pakianhan an aton kalugaringon: ‘Nag-uuswag ba an akon espirituwalidad tikang han nabawtismohan ako? Padayon ba ako nga nag-aalagad kan Jehova ha bug-os nga kasingkasing? (Col. 3:23) Nag-aampo ba ako, nagbabasa han Pulong han Dios, natambong ha mga katirok, ngan nakikigbahin ha ministeryo tubtob nga posible? O naibanan  na ba an akon kadasig hinin espirituwal nga mga buruhaton?’ Iginsaysay ni apostol Pedro nga mahimo naton malikyan an pagin diri aktibo ha pag-alagad kon padayon naton nga gindudugangan an aton pagtoo hin kahibaro, pagpailob, ngan debosyon ha Dios.—Basaha an 2 Pedro 1:5-8.

13. Ano an kinahanglan masantop han usa nga dedikado ngan bawtismado nga Kristiano?

¹³ Diri na naton puydi bawion an aton dedikasyon o an aton saad nga mag-alagad ha Dios. Salit kon an usa nadiri na pag-alagad kan Jehova o pagkinabuhi sugad nga Kristiano, diri hiya puydi magsiring nga waray hiya magdedikar ngan diri husto an iya bawtismo. * Anoman an iya rason o motibo, iginpresenta niya an iya kalugaringon sugad nga bug-os nga nagdedikar ha Dios. May baratunon hiya kan Jehova ngan ha kongregasyon kon makasala hiya hin seryoso. (Roma 14:12) Hinaot diri kita sidngan ni Jesus: “Ginbayaan mo an imo gugma ha tinikangan.” Lugod, karuyag naton nga sidngan kita niya: “Maaram ako han imo mga buhat, ngan han imo gugma, pagtoo, sagrado nga buruhaton, ngan pagpailob, ngan han imo mga buhat yana nga mas maopay kay han naglabay.” (Pah. 2:4, 19) Hinaot padayon kita nga magin madasigon ngan tumanon an aton iginsaad han nagdedikar kita kan Jehova basi mapalipay naton hiya.

14. Ano an ikaduha nga pinakaimportante nga saad nga posible himoon han usa, ngan kay ano?

¹⁴ An ikaduha nga pinakaimportante nga saad nga posible himoon han usa amo an iya saad durante han iya kasal. Kay ano? Tungod kay sagrado an pag-asawa. Ha atubangan han Dios ngan han mga saksi, an ginkakasal nga lalaki ngan babaye nagsasaad ha kada tagsa. Kasagaran na nga nagsasaad hira nga hihigugmaon, papaurahon, ngan tatahuron an kada tagsa ngan hihimoon nira ito “samtang [hira] magkaupod nga buhi dinhi ha tuna uyon ha kahikayan han Dios ha pag-asawa.” Bangin diri ito an eksakto nga mga pulong nga ginsisiring han iba; bisan pa hito, nagsaad hira ha Dios. Katapos, iginpapakilala hira sugad nga bana ngan asawa, ngan an ira pag-asawa magigin bug-os nga kinabuhi nga paghiusa. (Gen. 2:24; 1 Cor. 7:39) “Kon sugad,” uyon ha ginsiring ni Jesus, “an gintampo han Dios diri pagbulagon han tawo”—bisan han bana o asawa o han bisan hin-o. Salit sadang gud hunahunaon han mag-uyab nga nagpaplano magpakasal nga diri puydi an pagbulag.—Mar. 10:9.

15. Kay ano nga diri sadang subaron han mga Kristiano an disposisyon han kadam-an may kalabotan ha pag-asawa?

¹⁵ Syempre, waray gud perpekto nga pag-asawa. An pag-asawa amo an pagtampo hin duha nga diri perpekto nga indibiduwal. Salit an Biblia nasiring nga an mga inasaw-an usahay “magkakaada kasakitan.” (1 Cor. 7:28) Makasurubo nga diri gintatahod han damu yana an kahikayan han pag-asawa. Kon nagkakaproblema an ira pag-asawa, nasurender dayon hira ngan ginbabayaan an ira padis. Pero diri sugad hito an mga Kristiano. An diri pagtuman han usa han iya iginsaad han nagpakasal hiya pariho ha pagbuwa ha Dios, ngan nasisina an Dios ha mga buwaon! (Leb. 19:12; Prob. 6:16-19) Hi apostol Pablo nagsiring: “May asawa ka ba? Ayaw pakigbulag ha iya.” (1 Cor. 7:27) Nakasiring hito hi Pablo kay maaram hiya nga nasisina liwat hi Jehova ha malimbungon nga pakigdiborsyo.—Mal. 2:13-16.

16. Ano an ginsisiring han Biblia may kalabotan ha pakigdiborsyo ngan pakigbulag?

¹⁶ Hi Jesus nagtutdo nga kon nagdesisyon an inosente nga padis nga diri pasayloon an iya nag-adulteryo nga padis, ito la an Kasuratanhon nga rason ha pakigdiborsyo. (Mat. 19:9; Heb.  13:4) Kondi kumusta man an pakigbulag ha padis? Matin-aw liwat an ginsisiring han Biblia mahitungod hini. (Basaha an 1 Corinto 7:10, 11.) Waray maghatag an Biblia hin mga rason ha pakigbulag. Pero may pipira nga sitwasyon nga gintatagad han iba nga inasaw-an nga Kristiano sugad nga hinungdan ha pakigbulag, pananglitan an sobra nga pameligro han kinabuhi ngan espirituwalidad han usa tungod kay madarahog o apostata an iya padis. *

17. Ano an makakabulig ha Kristiano nga mag-asawa nga matipigan nga marig-on an ira pag-asawa?

¹⁷ Kon may nangangaro hin sagdon ha mga tigurang may kalabotan ha problema ha pag-asawa, maopay nga pakianhan nira an mag-asawa kon nagkita na ba hira han video nga Ano ang Tunay na Pag-ibig? ngan kon gin-adman na ba nira an brosyur nga Mahimo Magin Malipayon an Imo Pamilya. Kay ano? Tungod kay ginpapabug-atan hini nga mga garamiton an Kasuratanhon nga mga prinsipyo nga nakabulig ha damu nga maparig-on an ira pag-asawa. Usa nga mag-asawa an nagsiring: “Tikang han gin-adman namon ini nga brosyur, mas nagin malipayon an amon pag-asawa.” Usa nga sister nga 22 ka tuig na nga inasaw-an ngan hirani na magbulag han iya bana an nagsiring: “Pariho kami bawtismado, pero diri kami nagkakauyon ha damu nga butang. Tayming gud an pag-abot han video! Mas maopay na yana an amon pag-asawa.” Usa ka ba nga inasaw-an? Pangalimbasog nga iaplikar an mga prinsipyo ni Jehova ha iyo pag-asawa. Mabulig ito ha imo nga matuman an imo saad han nagpakasal ka ngan padayon nga magin malipayon!

18, 19. (a) Ano an ginbubuhat han damu nga Kristiano nga kag-anak? (b) Ano an kahimtang han mga aada ha espesyal nga bug-os-panahon nga pag-alagad?

¹⁸ May iba pa nga ginkaparihoan hira Jepte ngan Hana. Tungod han ira saad, pariho gin-gamit han anak ni Jepte ngan han anak ni Hana an tagsa nira nga kinabuhi para ha espesyal ngan sagrado nga pag-alagad ha tabernakulo. Makapatagbaw gud ito nga klase hin pagkinabuhi. Yana, damu nga Kristiano nga kag-anak an nag-aaghat ha ira mga anak nga sumulod ha bug-os-panahon nga pag-alagad ngan magpokus ha pag-alagad ha Dios. An mga kag-anak ngan mga anak nga nagbubuhat hito takos gud kumendasyonan.—Huk. 11:40; Sal. 110:3.

¹⁹ Yana, may-ada mga 67,000 nga membro han Worldwide Order of Special Full-Time Servants of Jehovah’s Witnesses. An iba ha ira nag-aalagad ha Bethel, ha mga konstruksyon han pagpanukod, o ha sirkito nga buruhaton. An pipira liwat mga instruktor ha Teokratiko nga mga eskwelahan, mga espesyal payunir, misyonero, o nag-aataman han Assembly Hall o pasilidad han Teokratiko nga mga eskwelahan. Hira ngatanan nagpirma han “Vow of Obedience and Poverty,” diin nauyon hira nga bubuhaton nira an bisan ano nga itutoka ha ira para ha pagpauswag ha mga buruhaton han Ginhadian, magkikinabuhi hira hin simple, ngan diri hira magtatrabaho ha sekular nga waray permiso. Diri an mga indibiduwal an gintatagad nga espesyal kondi an ira toka. Maaram hira nga importante gud an mapainubsanon nga pagtuman han ira seryoso nga saad samtang aada hira ha espesyal nga bug-os-panahon nga pag-alagad.

20. Ano an sadang naton buhaton ‘kada adlaw,’ ngan kay ano?

²⁰ Pira nga saad ha Dios nga aton ginhisgotan an imo na ginhimo—usa, duha, o ito nga tulo? Sigurado nga nasantop mo nga sadang mo gud tumanon an imo mga saad. (Prob. 20:25) An diri pagtuman han iginsaad kan Jehova may maraot gud nga mga resulta. (Ekles. 5:6) Salit malipayon kita nga ‘magkanta hin pagdayaw ha ngaran ni Jehova ha waray katapusan’ ngan ‘magtuman ha kada adlaw han aton mga saad.’—Sal. 61:8.