Hi Mabel nga taga-Argentina makasikasi ngan nagtatrabaho sugad nga physical-rehabilitation therapist. Han 2007, nagtikang hiya umabat hin diri natural nga kakapoy ngan duro nga sakit han ulo kada adlaw. “Nagpakonsulta ako ha pipira nga doktor ngan nagsari hin iba-iba nga klase hin pagtambal,” hiya siniring, “kondi waray mag-opay an akon kahimtang.” Ha urhi, nagpa-MRI hi Mabel, ngan hinbaroan nga may tumor hiya ha utok. Hiya nagsiring: “Na-shock ako! Diri ako makatoo nga nag-aataman na ngay-an ako hin kaaway ha sulod han akon lawas.

“Ha gihapon, waray ko hisabti kon mationan-o kagrabe an akon kahimtang tubtob han maoperahan ako. Han magmata ako ha intensive care, diri ako makakiwa. Nagsiniplaton la ako ha alkuba. Antes han operasyon, aktibo ako ngan independente. Tapos tigda na la nga waray na ako nahihimo. Nagupong ako ngan waray iba nga hinbabatian kondi an aringasa tikang ha mga aparato, emergency alarm, ngan pag-agumod han iba nga pasyente. Pag-abat ko napapalibotan ako hin kasakit ngan pag-antos.

“Medyo okey na ako yana. Nakakalakat na ako hin waray natugway ngan usahay nakakagawas ha balay nga nag-uusahan. Kondi doble la gihapon an akon pangitaan ngan diri pa marig-on an akon kaunoran.”

Magin positibo pirme. Ha Proberbios 17:22 mababasa: “An malipayon nga kasingkasing maopay nga tambal; kondi an masurub-on nga espiritu nakakapamara han mga tul-an.” Hi Mabel nahinumdom: “Samtang nagtitikaopay ako, naeksperyensyahan ko an mga gin-atubang han akon mga pasyente hadto. Maul-ol hinduro an mga ehersisyo, ngan usahay karuyag ko na umundang. Salit pinipirit ko an akon kalugaringon nga likyan an sugad nga negatibo nga panhunahuna kay maaram ako nga an akon pangalimbasog magkakaada maopay nga resulta.”

Magpokus ha kon ano an makakahatag hin paglaom. Hi Mabel nagsiring: “Hinbaroan ko tikang ha Biblia kon kay ano nga may-ada trahedya. Kondi maaram liwat ako nga ha kada paglabay han adlaw, nagtitikahirani kita ha panahon diin mawawara na an kasakit ha kadayonan.” a

Ayaw hingalimti an pagtagad han Dios ha imo sugad nga indibiduwal. (1 Pedro 5:7) Nahinunumdoman pa ni Mabel kon paonan-o ini nakabulig ha iya: “Han dad-on ako ha operating room, napamatud-an ko an pagkatinuod han Isaias 41:10, diin an Dios nasiring: ‘Diri ka mahadlok, kay ako upod ha imo.’ Inabat ko an diri maisaysay nga kamurayawan tungod kay maaram ako nga napaid hi Jehova nga Dios ha mga nahitatabo ha akon.”

Maaram ka ba? An Biblia nasiring nga maabot an panahon diin an mga tawo diri na magkakasakit.—Isaias 33:24; 35:5, 6.