Diin Mo Mabibilngan an Tinuod nga Paglaom?

WARAY na umandar an imo relo ngan baga hin ruba na ito. Han karuyag mo na ito ipaayad, may-ada ka iba-iba nga mapipilian. Damu an nagsasaad nga maaayad nira an imo relo, ngan an tagsa ha ira may-ada rekomendasyon, kondi an iba hito nagkakasumpaki. Pero ano man kon nahibaroan mo nga an imo amyaw amo an nagdisenyo hito nga relo, ngan andam hiya nga aydon ito hin libre la? Yana maaram ka na kon kan kanay ka mapaayad.

Iginpapakita hini nga ilustrasyon kon ano an imo puydi buhaton basi mabilngan an paglaom. Kon inaabat mo nga nawawad-an ka na hin paglaom​—sugad han naieksperyensyahan han damu hinin makuri nga mga panahon—​diin ka mangangaro hin bulig? Damu an nasiring nga mabubuligan ka nira nga masulbad an imo problema, pero nagkakasumpaki ngan nakakawurok an ira mga suhestyon. Salit, kay ano nga diri dumaop ha Maglalarang nga nagdisenyo ha aton nga may kapasidad ha pagkaada paglaom? An Biblia nasiring nga “diri hiya hirayo ha tagsa ha aton” ngan andam gud hiya nga bumulig.​—Buhat 17:27; 1 Pedro 5:7.

An Mas Hilarom nga Kahulogan han Paglaom

An kahulogan nga iginhahatag han Biblia ha pulong nga paglaom mas haluag ngan mas hilarom kon ikompara ha kahulogan nga iginhahatag han mga doktor, syentista, ngan psychologist. Ha Biblia, an orihinal nga mga pulong para ha “paglaom” nangangahulogan hin paghulat nga malipayon ngan pagpamulat hin kaopayan. An paglaom may duha nga bahin​—an hingyap nga mahitabo an usa nga maopay nga butang ngan an basihan ha pagtoo nga mahitatabo ito. An paglaom nga iginhahatag han Biblia diri kay inop la. Marig-on ito nga nakabase ha kamatuoran ngan ebidensya.

May kalabotan hini, an paglaom puropariho ha pagtoo, nga kinahanglan iginbase ha ebidensya. (Hebreo 11:1) Pero iginpapakita han Biblia nga may kaibahan an pagtoo ngan paglaom.​—1 Corinto 13:13.

Pananglitan, kon nangaro ka hin pabor ha usa nga duok nga sangkay, bangin naglalaom ka nga bubuligan ka niya. May marig-on nga basihan an imo paglaom kay natapod ka ha imo sangkay​—natoo ka nga bubuligan ka niya kay kilala mo gud hiya, ngan nakita mo an iya pagin buotan ngan mahinatagon han naglabay. An imo pagtoo ngan paglaom konektado gud ngan nadepende pa ngani ha usa kag usa, pero magkaiba la gihapon ito. Paonan-o ka magkakaada hin sugad hito nga paglaom ha Dios?

An Basihan ha Pagkaada Paglaom

An Dios an gintitikangan han tinuod nga paglaom. Ha panahon han Biblia, hi Jehova gintatawag nga “paglaom han Israel.” (Jeremias 14:8) An bisan ano nga masasarigan nga paglaom nga may-ada an iya katawohan nagtikang ha iya; salit hiya an ira paglaom. Ito nga paglaom diri kay basta paghingyap la. Gintagan hira han Dios hin marig-on nga basihan ha pagkaada paglaom. Ha damu ka siglo nga hira an iya katawohan, pirme niya gintutuman an iya mga saad. An ira lider nga hi Josue nagsiring ha Israel: “Maaram gud kamo . . . nga waray bisan usa nga pulong ha ngatanan nga mag-opay nga saad nga ginsiring ha iyo ni Jehova nga iyo Dios an napakyas.”​—Josue 23:14.

Yana, may marig-on la gihap kita nga basihan ha pagsarig ha mga saad han Dios. Mababasa ha Biblia an damu nga saad han Dios ngan kon paonan-o ito ngatanan natuman. Masasarigan gud an iya mga saad salit usahay iginsurat ito nga sugad hin natuman na ito.

Ito an rason nga masisiring naton nga an Biblia amo an libro han paglaom. Samtang gin-aadman mo an paagi han pagtratar han Dios ha mga tawo nga nahisurat dida hito, mas magigin marig-on an imo basihan ha pagkaada paglaom ha iya mga saad. Hi apostol Pablo nagsurat: “An ngatanan nga iginsurat hadto iginsurat ha pagtutdo ha aton, basi pinaagi han aton pagpailob ngan pinaagi han pagliaw tikang ha Kasuratan magkaada kita paglaom.”​—Roma 15:4.

Ano nga Paglaom an Iginhahatag han Dios ha Aton?

San-o naton inaabat nga kinahanglan gud naton hin paglaom? Diri ba kon namamatayan kita hin hinigugma? Pero ha sugad nga mga panahon, damu an naabat hin kawaray-paglaom. Kay ngani, may iba pa ba nga naghahatag hin duro nga kawaray-paglaom labaw ha kamatayon? Ginlalanat hito an kada usa ha aton. Diri ta ito malilikayan ngan diri ta liwat maibabalik an kinabuhi han aton mga hinigugma nga namatay. Angayan la nga gintatawag han Biblia an kamatayon nga “an kataposan nga kaaway.”​—1 Corinto 15:26.

Kon sugad, may mabibilngan ba kita nga paglaom kon mamatayan kita? An bersikulo ha Biblia nga nagtawag ha kamatayon nga kataposan nga kaaway nagsiring liwat nga ini nga kaaway “pagwawad-on.” Hi Jehova nga Dios mas gamhanan kay ha kamatayon. Damu ka beses na niya ito nga ginpamatud-an. Paonan-o? Pinaagi ha pagbanhaw ha mga patay. Mababasa ha Biblia an siyam nga higayon nga gin-gamit han Dios an iya gahum basi buhion an mga patay.

Ha usa nga talagsahon nga higayon, gintagan ni Jehova an iya Anak nga hi Jesus hin gahum basi banhawon an iya hinigugma nga sangkay nga hi Lazaro, nga upat ka adlaw na nga patay. Ginbuhat ini ni Jesus, diri ha tago, kondi ha atubangan han damu nga tawo.​—Juan 11:38-48, 53; 12:9, 10.

Bangin makapakiana ka, ‘Kay ano nga may mga patay nga ginbanhaw? Diri ba ha urhi nalagas la gihap hira ngan namatay?’ Oo. Pero tungod hinin masasarigan nga mga rekord han pagkabanhaw, diri la kay magkakaada kita hin hingyap nga mabuhi utro an aton mga hinigugma nga namatay, kondi may basihan liwat kita ha pagtoo nga mahitatabo ito. Ha iba nga pagkayakan, may-ada kita tinuod nga paglaom.

Hi Jesus nagsiring: “Ako an pagkabanhaw ngan an kinabuhi.” (Juan 11:25) Hiya an tatagan ni Jehova hin gahum basi banhawon an mga patay ha bug-os nga kalibotan. Hi Jesus nagsiring: “Maabot an oras nga an ngatanan nga aadto ha handumanan nga mga lubnganan makakabati han [kanan Kristo] tingog ngan magawas.” (Juan 5:28, 29) Oo, an ngatanan nga nangangaturog ha lubnganan may-ada paglaom nga mabanhaw ha paraiso nga tuna.

Ini an makaruruyag nga paghulagway ni propeta Isaias mahitungod han pagkabanhaw: “An imo mga patay mabubuhi, an ira mga lawas mabuhat utro. Hira nga nangangaturog ha tuna magkakamata ngan maguliat tungod ha kalipay; kay an imo tun-og amo an tun-og han nagraranggat nga kapawa, ngan an mag-iha na nga mga patay ig-aanak utro han tuna.”​—Isaias 26:19, The New English Bible.

Nakakaliaw ito, diri ba? An mga patay aada ha pinakatalwas nga kahimtang, pariho hin iginbuburod nga bata nga protektado ha sulod han tiyan han iya nanay. Oo, adto nangangaturog ha lubnganan nagpapabilin ha perpekto nga panumdoman han Makagarahum-ha-ngatanan nga Dios. (Lucas 20:37, 38) Ngan ha diri maiha, bubuhion hira ha bag-o nga kalibotan, diin tatapoon hira han mga nahigugma ha ira pariho hin igin-anak pa la nga bata nga malipayon nga ginkakarawat han mahigugmaon nga pamilya nga naghuhulat ha iya! Salit may-ada paglaom bisan adton mga nagkamatay na.

An Mahihimo han Paglaom Para ha Imo

Damu an igintutdo ni Pablo ha aton mahitungod han pagkaimportante han paglaom. Iginpariho niya an paglaom ha helmet, nga usa nga importante nga bahin han espirituwal nga mga gamit nga pan-girra. (1 Tesalonica 5:8) Kay ano nga iginkompara niya an paglaom ha helmet? Ha panahon han Biblia, an usa nga sundalo nagsusul-ot hin metal nga helmet ha girra; iginbabawbaw ito ha dugnit o anit nga kalo. Tungod han helmet, an kadam-an nga mga tigbas ha ulo diri makakadulot salit diri hiya mamamatay. Ano an punto ni Pablo? Sugad la nga an helmet nagpuprotektar ha ulo, an paglaom nagpuprotektar ha hunahuna. Kon may-ada ka marig-on nga paglaom ha mga saad han Dios, magpapabilin nga murayaw an imo hunahuna ngan diri ka malilisang o mahuhulop kon umatubang ka hin mga kakurian. May-ada ba ha aton diri nagkikinahanglan hin sugad hito nga helmet?

Naggamit hi Pablo hin usa pa nga ilustrasyon basi ipakita an pagkaimportante han paglaom. Hiya nagsurat: “May-ada kita hini nga paglaom nga sugad hin angkla para han kalag, nga sigurado ngan marig-on.” (Hebreo 6:19) Pipira ka beses na nga nakatalwas hi Pablo ha mga kalunod hin barko, salit maaram hiya han pagkaimportante han angkla. Kon an usa nga barko naaabtan hin subasko, iginhuhulog han mga marinero an angkla hito. An angkla makakabulig nga makatalwas an barko ha subasko ngan diri bumunggo ha kabatoan.

Ha pariho nga paagi, kon ginhuhunahuna naton nga an mga saad han Dios “sigurado ngan marig-on” nga paglaom, ito nga paglaom makakabulig ha aton nga makaya inin sugad-subasko nga mga panahon. Nagsasaad hi Jehova nga ha diri na maiha, an mga tawo diri na makakaeksperyensya hin girra, krimen, pag-antos, o kamatayon pa ngani. (Kitaa an kahon nga “Mga Basihan ha Pagkaada Paglaom.”) An pagkapot hin marig-on hito nga paglaom makakabulig ha aton nga malikyan an kadaot, kay maghahatag ito ha aton han kusog nga aton ginkikinahanglan basi sundon an mga suruklan han Dios imbes nga subaron an masamok ngan imoral nga disposisyon han mga tawo ha kalibotan yana.

Karuyag ni Jehova nga magkaada ka liwat hito nga paglaom. Karuyag niya nga maeksperyensyahan mo an kinabuhi uyon ha iya orihinal nga katuyoan. Kaburut-on niya nga “matalwas an ngatanan nga klase hin tawo.” Paonan-o? Siyahan, kinahanglan an kada tagsa “makadangat ha husto nga kahibaro han kamatuoran.” (1 Timoteo 2:4) Gin-aaghat ka namon nga adman an naghahatag hin kinabuhi nga kamatuoran han Pulong han Dios. An paglaom nga ihahatag ha imo han Dios mas labaw kay ha bisan ano nga paglaom nga imo mabibilngan dinhi hini nga kalibotan.

Tungod han paglaom nga iginhahatag han Dios, diri ka maabat hin kawaray-mahihimo, kay tatagan ka niya han kusog nga imo ginkikinahanglan basi makab-ot an bisan ano nga tumong nga uyon ha iya kaburut-on. (2 Corinto 4:7; Filipos 4:13) Ito gud an klase han paglaom nga imo ginkikinahanglan. Salit kon nagkikinahanglan ka hin paglaom ngan ginbibiniling mo ito, ayaw panluya. May-ada gud paglaom. Mabibilngan mo ito!

[Kahon/Retrato]

Mga Basihan ha Pagkaada Paglaom

Ini nga mga teksto ha Biblia makakabulig ha imo nga maparig-on an imo paglaom:

▪ An Dios nagsasaad hin makalilipay nga kabubuwason.

An iya Pulong nasiring nga an bug-os nga tuna magigin paraiso nga uukyan hin malipayon ngan nagkakaurosa nga mga tawo.​—Salmo 37:11, 29; Isaias 25:8; Pahayag 21:3, 4.

▪ An Dios diri makakagbuwa.

Nangangalas hiya ha ngatanan nga klase hin kabuwaan. Hi Jehova baraan gud ngan putli, salit imposible hiya magbuwa.​—Proberbios 6:16-19; Isaias 6:2, 3; Tito 1:2; Hebreo 6:18.

▪ Waray tubtoban an gahum han Dios.

Hi Jehova gud la an makagarahum-ha-ngatanan. Waray bisan ano ha uniberso nga makakaulang ha iya ha pagtuman han iya mga saad.—Exodo 15:11; Isaias 40:25, 26.

▪ Karuyag han Dios nga mabuhi ka ha waray kataposan.

—Juan 3:16; 1 Timoteo 2:3, 4.

▪ An Dios diri nawawad-an hin paglaom ha aton.

Nagpupokus hiya, diri ha aton mga sayop ngan kapakyasan, kondi ha aton mag-opay nga kalidad ngan mga pangalimbasog. (Salmo 103:12-14; 130:3; Hebreo 6:10) Naglalaom hiya nga bubuhaton naton an tama ngan nalilipay hiya kon ginbubuhat naton ito.​—Proberbios 27:11.

▪ An Dios nagsasaad nga bubuligan ka niya nga makab-ot an mga tumong nga uyon ha iya katuyoan.

Diri gud angay abaton han iya mga surugoon an kawaray-mahihimo. Hura nga iginhahatag han Dios an iya baraan nga espiritu, an pinakagamhanan nga pwersa, basi buligan kita.​—Filipos 4:13.

▪ Diri mo gud pagbabasolan an imo paglaom ha Dios.

Bug-os ka nga makakasarig ha iya. Diri ka gud niya papakyason.​—Salmo 25:3.

[Retrato]

Sugad la nga an helmet nagpuprotektar ha ulo, an paglaom nagpuprotektar ha hunahuna

[Retrato]

Pariho hin angkla, an paglaom nga may masasarigan nga basihan makakahatag hin karig-on

[Ginkuhaan han retrato]

Ha pagtugot han René Seindal/Su concessione del Museo Archeologico Regionale A. Salinas di Palermo