An maopay nga sumat han Ginhadian han Dios iginsasangyaw ha bug-os nga tuna, sugad la han igintagna ni Jesus. (Mateo 24:14) An libro han Daniel nagsusumat nga ini nga Ginhadian usa nga gobyerno han Dios. Mababasa ha kapitulo 2 hito nga libro an usa nga tagna nga nagsusumat han pag-uswag han pipira nga dagku nga gobyerno, o ginhadian, han tawo tikang pa ha kadaan nga Babilonya tubtob yana nga panahon. Ha pagtagna han mahitatabo ha tidaraon, an bersikulo 44 nasiring:

“An Dios han langit mag-iestablisar hin ginhadian nga diri gud mabubungkag. Ngan ini nga ginhadian diri ipapasa ha iba nga katawohan. Dudugmukon ngan bubungkagon hini ito ngatanan nga ginhadian, ngan ini gud la an magpapadayon ha kadayonan.”

Ini ngan an iba nga tagna ha Biblia nagsusumat nga sasaliwnan han Ginhadian han Dios an tanan nga gobyerno han tawo, ngan magdadara ito hin kasigurohan ngan kahapsay ha tuna. Ano an magigin kahimtang ilarom hito nga Ginhadian? Ini an pipira han makalilipay nga saad nga hirani na matuman.

• WARAY NA GIRRA

  Salmo 46:9: “Ginpapaundang [han Dios] an mga girra ha bug-os nga tuna. Iya ginbabari an pana ngan gin-uutod-utod an bangkaw; iya ginsusunog ha kalayo an mga karomata han kasundalohan.”

  Handurawa an magigin kahimtang han kalibotan kon an tanan nga kwarta ngan kahibaro nga ginagamit yana ha paghimo hin hinganiban gagamiton ha mga butang nga mapulsanon ha tawo imbes nga makadaot ha ira! Ito nga saad matutuman kon umabot na an Ginhadian han Dios.

• WARAY NA MGA SAKIT

  Isaias 33:24: “Waray residente nga masiring: ‘May sakit ako.’”

  Handurawa an kalibotan diin waray nag-aantos hin sakit ha kasingkasing, kanser, malarya, o iba pa. Waray na hospital ngan medisina. Perpekto nga kahimsog an maieksperyensyahan han mga umurukoy ha tuna.

• WARAY NA KAKULANG HIN PAGKAON

  Salmo 72:16: “Magkakaada hin hura nga lugas ha tuna; ha pungkay han kabukiran magsasap-ay ito.”

  An tuna maghahatag hin hura nga pagkaon para ha tanan, ngan an tanan makakapahimulos hito. Waray na kagutom ngan malnutrisyon.

• WARAY NA KASAKIT, KASUBO, NGAN KAMATAYON

  Pahayag 21:4: “Papahiron [han Dios] an ngatanan nga luha ha ira mga mata, ngan mawawara na an kamatayon, pati an kabidoan, pagtangis, ngan kasakit. An daan nga mga butang naglabay na.”

   Nangangahulogan ito hin perpekto nga kinabuhi nga dayon ha paraiso nga tuna! Ito an saad ni Jehova nga Dios, an aton mahigugmaon nga Maglalarang.

Sobra ba ini kaopay nga baga hin imposible na ini matuman? Bisan kon kadam-an an nauyon nga an kinabuhi nga iginsaad ngan iginhulagway han Biblia makaruruyag gud, damu an nasiring nga imposible magkaada kinabuhi nga waray kataposan. Diri ito urusahon kay waray pa tawo nga nakaeksperyensya hito an makakagsumat ha aton.

An katawohan maiha na nga uripon han sala ngan kamatayon ngan nagkikinabuhi ilarom han kasakit, pag-antos, ngan kakurian, salit ginkakarawat na la ito han damu sugad nga normal o natural nga bahin han kinabuhi. Pero diri gud ito an katuyoan han aton Maglalarang nga hi Jehova nga Dios para ha katawohan.

Basi makasiguro han tanan niya nga iginsaad, an Dios marig-on nga nagsiring: “Diri ito mabalik ha akon nga waray mga resulta, kondi bubuhaton gud hito an bisan ano nga akon karuyag, ngan sigurado nga maglalampos ito ha anoman nga akon iginsusugo hito.”—Isaias 55:11.

Hi Jehova iginhuhulagway han Biblia sugad nga an Dios “nga diri makakagbuwa.” (Tito 1:2) Tungod kay iginsaad niya inin mag-opay nga butang ha tidaraon, maaramon ha aton bahin nga hunahunaon an masunod: Posible gud ba para ha tawo nga mabuhi hin waray kataposan ha iginsaad nga Paraiso nga tuna? Ano an aton sadang buhaton basi makapahimulos ha iginsaad han Dios? Ha masunod nga mga artikulo hini nga publikasyon, mababasa mo an mapulsanon nga mga baton hito nga mga pakiana.