Inaabat mo ba ito nga mga ginsiring han mga indibiduwal nga nag-aantos tungod han problema ha mental nga kahimsog? Ikaw ba—o usa han imo hinigugma—naatubang hin pariho nga problema?

Makakasarig ka nga diri ka nag-uusahan. Damu yana an apektado hin mga problema ha mental nga kahimsog, hira mismo o an ira mga hinigugma.

Waray ruhaduha, nagkikinabuhi na kita ha “peligroso nga mga panahon nga makuri pakiangayan” nga hinungdan han damu nga klase hin kasakitan. (2 Timoteo 3:1) Ha usa nga pag-aram, ginbabanabana nga ha bug-os nga kalibotan, mga usa ha kada walo nga tawo an nag-aantos hin problema ha mental nga kahimsog. Han 2020, tungod han COVID-19 nga pandemya, mas damu hin mga 26 porsyento an nag-antos tungod han sobra nga kabaraka kay han 2019, ngan mas damu hin mga 28 porsyento an nag-antos tungod han grabe nga depresyon kay han 2019.

Importante nga hibaroan kon pira nga tawo an nag-aantos yana tungod ha sobra nga kabaraka ngan depresyon. Pero mas importante hibaroan kon paonan-o ka ngan an imo hinigugma magkakaada maopay nga pag-abat tubtob nga posible.

Kon maopay an imo mental nga kahimsog, kaurogan nga maopay an imo pag-abat ngan nagios an imo lawas hin maopay. Nakakaya mo an normal nga mga istres, nakakatrabaho ka hin maopay, ngan naabat ka hin kakontento ha kinabuhi.

• DIRI tungod kay maluya an usa o may nabuhat hiya nga sayop nga nagin hinungdan hito nga sakit.

• USA nga problema ha kahimsog nga nagriresulta hin duro nga kasakit ngan nagdadaot han panhunahuna, emosyon, ngan panggawi han usa nga tawo.

• Kasagaran nga nagpapakuri ha pakigsangkay ha iba ngan ha pag-atubang ha adlaw-adlaw nga mga problema ha kinabuhi.

• Mahimo makaapekto ha mga tawo anoman an edad, kultura, lahi, tribo, relihiyon, edukasyon, o estado ha kinabuhi.

Kon ikaw o an imo hinigugma nakakaeksperyensya hin halatado gud nga pagbag-o ha personalidad, nagkikinaturog hin sobra o nakukurian pagkaturog, nagkikinaon hin damu o gutiay la an ginkakaon, o naabat hin maiha nga kasakit, sobra nga kabaraka, o kasub-anan, bangin kinahanglan mo hin bulig hin doktor basi hibaroan ngan matambal an gintikangan hito nga problema. Pero diin ka makadto para hin bulig?

An pinakamaaramon nga tawo nga nabuhi, hi Jesu-Kristo, nagsiring: “An maghimsog nga mga tawo diri nanginginahanglan hin doktor, kondi an mga may sakit.” (Mateo 9:12) Adton mga nakukurian ha mga problema ha kahimsog nga nakakarawat hin tama nga terapi ngan mga medisina nabubuligan gud nga maibanan an mga sintomas ngan magkaada produktibo ngan malipayon nga kinabuhi. Maaramon para ha usa nga magpatambal dayon kon grabe an mga sintomas o maiha na. a

Bisan kon an Biblia diri libro han medisina, an sulod hito mahimo makahatag hin kaopayan ha aton mental nga kahimsog. Malipayon nga gin-aaghat ka namon nga basahon an masunod nga mga artikulo nga naghihisgot kon paonan-o an Biblia makakabulig ha aton nga maatubang an mga problema ha mental nga kahimsog.