Hin-o an Dios?
Damu an nasiring nga natoo hira ha Dios. Pero kon papakianhan mo hira kon hin-o an Dios o kon ano an ira pagkakilala ha iya, iba-iba an ira baton. May nasiring nga an Dios madarahog nga hukom, nga waray iba nga karuyag, kondi an pagsirot ha mga tawo tungod han ira mga sayop. Para ha iba liwat, mahigugmaon hiya ngan mapinasayloon anoman an ira buhaton. Ngan an iba natoo nga hirayo hiya ngan diri interesado ha aton. Tungod hiton nagkakasumpaki nga mga opinyon, damu an naghuhunahuna nga imposible nira mahibaroan kon hin-o an Dios.
Importante ba nga hibaroan kon hin-o an Dios? Oo, importante. Kon mas kikilalahon naton an Dios, magkakaada katuyoan ngan kapulsanan an aton kinabuhi. (Buhat 17:26-28) Kon magigin mas duok kita ha iya, mas hihigugmaon ngan bubuligan kita niya. (Santiago 4:8) Ngan an pagkaada husto nga kahibaro mahitungod ha Dios magtutugway ha kinabuhi nga waray kataposan.—Juan 17:3.
Paonan-o mo mahimo makilala an Dios? Paghunahuna hin usa nga kilala mo gud, sugad han usa nga duok nga sangkay. Paonan-o kamo nagin magsangkay? Posible nga hinbaroan mo an iya ngaran, personalidad, karuyag ngan diri karuyag, mga nabuhat, plano, ngan damu pa. Ito an nagpaduok ha imo hito nga indibiduwal—nahibaro ka mahitungod ha iya.
Ha pariho nga paagi, mahimo naton makilala an Dios pinaagi ha pagbaton han masunod:
Ini nga magasin gindisenyo basi maghatag hin baton tikang ha Biblia para hito nga mga pakiana. Ini nga mga artikulo mabulig ha imo nga hibaroan diri la kon hin-o an Dios kondi kon ano an imo mapapahimulsan kon magin duok ka ha iya.
Bangin Maruyagan Mo Liwat
AN BARANTAYAN
Ano an Ngaran han Dios?
Maaram ka ba nga an Dios may-ada ngaran nga amo gud la an nagpapakilala ha iya?
AN BARANTAYAN
Makikilala Gud ba Naton an Dios?
Ha pagkamatuod, an mga aspekto han Dios nga makuri masabtan makakabulig ha imo nga mas makilala hiya.
