Ha Amon Hinigugma nga Kabugtoan:

Ha siyahan nga gowa han panpubliko nga edisyon han An Barantayan, Enero–Marso 2008, nagtikang an makapainteres nga serye han mga artikulo nga may ulohan, “Subara an Ira Pagtoo.” Tikang hadto, usa nga bag-o nga artikulo an iginpupublikar kada tulo ka bulan, ngan nalilipay gud kita hito!

Ano an reaksyon han mga nakabasa hito nga serye? Katapos mabasa han usa nga sister an artikulo mahitungod kan Marta, hiya nagsurat: “Nahingatawa ako han mabasa ko ito kay puropariho gud ako ha iya—karuyag maasikaso hin maopay an mga bisita ngan pirme okupado, salit usahay nangangalimtan ko na an pakig-upod ha ira.” Usa nga tin-edyer an nagsiring mahitungod ha istorya ni Ester: “Nasasabtan ko nga posible kita maghatag hin sobra nga atensyon ha aton pamado ngan ha mga uso yana. Kinahanglan magin maopay an aton hitsura; pero diri naton karuyag nga masobrahan liwat.” Hiya nagdugang: “An importante kan Jehova amo an aton sulod nga pagkatawo.” Ngan usa nga sister an may kadasig nga nagkomento ha usa nga artikulo mahitungod kan apostol Pedro: “Han ginbasa ko ito, inabat ko gud nga api ako ha asoy. Sugad hin aadto ako mismo! Gin-gamit ko an akon imahinasyon basi masabtan an ginsisiring han asoy.”

Ginpapamatud-an hini nga mga magbarasa—ngan han iba pa nga nagsurat basi ipahayag an ira apresasyon hini nga serye—an maiha na nga iginsurat ni apostol Pablo: “An ngatanan nga iginsurat hadto iginsurat ha pagtutdo ha aton.” (Roma 15:4) Oo, igin-upod ni Jehova ito nga mga asoy basi magtutdo ha aton hin importante nga mga leksyon. Kita ngatanan, mationan-o man kaiha ha kamatuoran, mahibabaro tikang hito.

Gin-aaghat namon kamo nga basahon dayon ini nga libro kon posible. Gamita ini ha iyo Pagsingba han Pamilya—sigurado nga maruruyagan ini han kabataan! Kon pag-adman ini durante han Pag-aram ha Biblia han Kongregasyon, ayaw gud pagpalya ha mga katirok! Ayaw pag-apura; basaha ini hin maopay. Gamita an iyo imahinasyon; handurawa nga aada mismo kamo ha eksena. Pangalimbasugi nga maabat an gin-abat han mga tawohan, ngan makita an ira nakita. Itanding an ira reaksyon ha partikular nga sitwasyon ha posible niyo magin reaksyon hito.

Nalilipay gud kami nga itagana ha iyo ini nga publikasyon. Hinaot makabulig ini ha iyo ngan ha iyo pamilya. Hinigugma gud namon kamo ngan hingyap namon an pinakamaopay para ha iyo,

Nagmamando nga Lawas han mga Saksi ni Jehova