Karuyag han Dios nga magin sangkay ka niya. Nahunahuna mo na ba nga mahimo ka magin sangkay han pinakabantogan nga Persona ha uniberso? Hi Abraham, nga nabuhi ha maiha na nga naglabay, gintawag nga sangkay han Dios. (Jakobo 2:23) An iba nga gin-unabi ha Biblia nagpahimulos liwat han pakigsangkay han Dios ngan hura nga ginbendisyonan. Yana nga adlaw, an mga tawo tikang ha ngatanan nga bahin han kalibotan nagigin mga sangkay han Dios. Ikaw liwat mahimo magin sangkay han Dios.

An pagin sangkay han Dios maoroopay kay ha pagin sangkay han bisan hin-o nga tawo. Diri gud ginpapakyas han Dios an iya maunungon nga mga sangkay. (Salmo 18:25) An pagin sangkay han Dios maoroopay kay ha pagkaada hin mga bahandi. Kon namamatay an riko nga tawo, an iya salapi nahingangadto ha iba. Kondi, adton nagpapahimulos han pakigsangkay han Dios mayada bahandi nga diri makukuha han bisan hin-o.​—Mateo 6:⁠19.

An iba nga mga tawo bangin mangalimbasog ha pagpugong ha imo nga mahibaro mahitungod han Dios. Bangin buhaton ini bisan han iba han imo mga sangkay ngan pamilya. (Mateo 10:36, 37) Kon pagtaw-an ka han iba o magtarhog ha imo, pakianhi an imo kalugaringon, ‘Hin-o an karuyag ko lipayon​—an mga tawo ba o an Dios?’ Hunahunaa ini: Kon an usa magsiring ha imo nga humunong ha pagkaon, susundon mo ba hiya? Siyempre diri! Ginkikinahanglan mo an pagkaon basi mabuhi. Kondi mahihimo han Dios nga mabuhi ka ha waray kataposan! Salit ayaw gud tuguti an bisan hin-o nga magpugong ha imo ha paghibaro kon paonan-o ka magigin sangkay han Dios.​—Juan 17:⁠3.