Minahal nga mga Nahigugma kan Jehova:

Han 1971, an mga tinambong ha “Divine Name” Distrito nga Asembleya nalipay nga makakarawat hin bag-o nga mga publikasyon. An mga publikasyon iginhulagway nga “diri gud ginlalaoman han bisan hin-o.” Mahitungod ha usa hito nga relis, usa nga brother an nagsiring: “Ha ngatanan namon nga nakarawat, ini an pinakaeksayting nga pagpakita han mga butang nga mahitatabo!” Ano an iya gin-uunabi? An libro nga may ulohan nga “The Nations Shall Know That I Am Jehovah”​—How? Pero kay ano nga nalipay gud hira hito nga libro? Kay may-ada ito bag-o nga pagsaysay han mga tagna ha libro han Biblia nga Ezekiel—mga tagna nga nakakaapekto ha kabubuwason han katawohan.

Ha mga tuig tikang han narelis an ‘Know Jehovah’ nga libro, an katawohan han Dios madagmit nga nagdamu​—tikang ha mga 1.5 ka milyon ngadto ha sobra 8 ka milyon. (Isa. 60:22) Ha kabug-osan, inin minilyon nga surugoon ni Jehova nagyayakan hin sobra 900 nga yinaknan. (Zac. 8:23) Damu an waray pa gud makag-aram hin libro nga detalyado nga nagsasaysay han giniyahan nga mga tagna nga iginrekord ni propeta Ezekiel.

Dugang pa, ha mga dekada tikang han 1971, an aton pagsabot ha damu nga kamatuoran ha Biblia nagin mas klaro samtang an kahayag padayon nga nagtitikalamrag. (Prob. 4:18) Han 1985 nagin klaro ha aton kon paonan-o an “iba nga mga karnero” iginpapahayag nga matadong sugad nga mga sangkay han Dios. (Juan 10:16; Roma 5:18; San. 2:23) Ngan han 1995 nasabtan naton nga an ultimo nga paghukom ha “mga karnero” ngan “mga kanding” mahitatabo ha tiarabot nga “daku nga kasakitan.” (Mat. 24:21; 25:31, 32) Ini ngatanan nga pagbag-o nakaapekto ha aton pagsabot ha libro han Ezekiel.

Hinin bag-o la nga mga tuig, an kahayag padayon pa gud nga nagtitikalamrag. Tagda an mga leksyon ha mga ilustrasyon ni Jesus. Damu hito nga leksyon an klaro na gud yana ha aton hunahuna ngan kasingkasing. An pipira hito nga mga ilustrasyon nagtutudlok ha mga mahitatabo ha nagtitikahirani na gud nga daku nga kasakitan. Ha pariho nga paagi, ginbag-o an aton pagsabot ha pipira nga tagna ha libro han Ezekiel. Upod hini an mga tagna mahitungod kan Gog han Magog (kapitulo 38 ngan 39), han buruhaton han lalaki nga may surudlan hin tinta han sekretaryo (kapitulo 9), ngan han kapatagan han uga nga mga tul-an ngan han simboliko nga pagtampoha han duha nga istik (kapitulo 37). Tungod hini nga mga pagbag-o, nagkaada liwat pagbag-o han mga iginsaysay hadto ha ‘Know Jehovah’ nga libro.

Salit damu han katawohan ni Jehova an nagpapakiana, “San-o kita magkakaada hin libro nga may bag-o nga pagsaysay han mga tagna ni Ezekiel?” An baton hito amo an libro nga Putli nga Pagsingba kan Jehova​—Iginpahiuli Na! Samtang ginbabasa mo an 22 nga kapitulo hini ngan ginpapamalandong an makaruruyag nga mga retrato dinhi, mabilib ka ha maopay gud nga pagsaliksik samtang gin-aandam ini. Damu nga pag-ampo ngan paghunahuna an ginhimo basi hibaroan kon kay ano nga igintagana ni Jehova an makapainteres nga libro han Biblia nga Ezekiel. Ginkonsiderar hin maopay an mga pakiana sugad han: Ano an mga leksyon han libro han Ezekiel para ha mga tawo ha panahon ni Ezekiel ngan ha aton yana? Ano nga mga tagna an matutuman ha maabot pa nga panahon? Angay ba kita mamiling hin simboliko nga mga kahulogan ha mga tagna ni Ezekiel? An baton hini naghahatag han pinakaklaro nga  pagsabot hini nga libro han Biblia nga maiha na nga ginpapabilhan.

Samtang ginbabasa mo an libro han Ezekiel tikang ha tinikangan ngadto ha kataposan, mahipapausa ka gud ha langitnon nga bahin han organisasyon ni Jehova. Sigurado nga maiimpres ka liwat ha higtaas nga suruklan nga iya gin-establisar para ha mga aadto ha langit ngan aanhi ha tuna nga karuyag magsingba ha iya ha paagi nga iya kinakarawat. An libro nga Putli nga Pagsingba mabulig ha imo nga mas maapresyar an ginbuhat na ni Jehova para ha iya katawohan ngan an iya bubuhaton para ha ira ha diri na maiha. Maoobserbaran mo nga duha nga tema an pauroutro nga ginpapabug-atan hini nga libro. Siyahan, basi mapalipay hi Jehova, kinahanglan kilalahon ngan karawaton naton nga hiya an Soberano han Uniberso. Ikaduha, kinahanglan singbahon naton hi Jehova ha paagi nga iya kinakarawat ngan ipahiuyon an aton pagkinabuhi ha iya higtaas nga suruklan.

Hingyap gud namon nga maparig-on hini nga publikasyon an imo determinasyon nga singbahon hi Jehova ha paagi nga nagpapasidungog ha iya harangdon ngan baraan nga ngaran. Ngan hinaot maaghat ka hini nga padayon nga pamulaton an panahon nga makikilala gud han ngatanan nga nasud nga hiya hi Jehova.​—Ezek. 36:23; 38:23.

Hinaot hura nga bendisyonan han aton mahigugmaon nga Amay nga hi Jehova an imo mga paningkamot nga masabtan an libro nga iya iginpasurat kan propeta Ezekiel.