1, 2. (a) Ha nauna nga kapitulo, ano an aton hinbaroan may kalabotan ha bisyon ni Ezekiel mahitungod han templo? (b) Ano nga duha nga pakiana an aton hihisgotan hini nga kapitulo?

 AN NAKITA ni Ezekiel ha bisyon diri an daku nga espirituwal nga templo nga ginhisgotan ni apostol Pablo paglabay han mga siglo. Hinbaroan naton ito ha nauna nga kapitulo. Hinbaroan liwat naton nga katuyoan han bisyon nga itutdo ha katawohan han Dios an pagkaimportante han Iya mga suruklan ha putli nga pagsingba. Pinaagi la ha pagsunod hito nga mga suruklan maipapahiuli an ira relasyon kan Jehova. Salit nasasabtan naton kon kay ano nga duha ka beses nga ginpabug-atan niya inin importante nga punto ha usa la nga bersikulo: “Ini an balaud mahitungod han templo.”​—Basaha an Ezekiel 43:12.

² Yana tagdon naton an duha pa nga pakiana. Siyahan: Ano nga mga leksyon mahitungod ha mga suruklan ni Jehova ha putli nga pagsingba an bangin hinbaroan han mga Judio ha panahon ni Ezekiel ha bisyon mahitungod han templo? An baton mabulig ha aton nga mabaton an ikaduha nga pakiana: Ano an kahulogan han bisyon para ha aton hinin masamok nga kataposan nga mga adlaw?

3. Kay ano nga bangin naawod an mga tawo han ira nakita an templo ha hitaas nga bukid?

³ Basi mabaton an siyahan nga pakiana, magpokus kita ha pipira nga makapainteres nga detalye hini nga bisyon. An hitaas nga bukid. Posible nga iginkaw-ing han katawohan ini nga detalye ha bisyon ha makalilipay nga tagna ni Isaias mahitungod ha pagpahiuli. (Isa. 2:2) Pero ano an ira hinbaroan han nakita nira an balay ni Jehova ha sugad kahitaas nga bukid? Hinbaroan nira nga an putli nga pagsingba angay pahitas-on labaw ha ngatanan. Syempre, an putli nga pagsingba hitaas na nga daan, kay kahikayan ito han Dios nga ‘hitaas hinduro labaw han ngatanan nga iba pa nga dios.’ (Sal. 97:9) Pero waray buhata han katawohan an ira bahin. Damu ka siglo nga pauroutro nga gintugotan nira nga madaot, mapasibay-an, ngan mahugawan an putli nga pagsingba. Sigurado nga naawod an sinsero nga mga tawo han ira nakita nga an sagrado nga balay han Dios ginpahitaas ha mahimayaon ngan prominente nga kahimtang nga angay gud hito.

4, 5. Ano nga leksyon an bangin hinbaroan han mamarati ni Ezekiel ha higtaas nga ganghaan han templo?

⁴ An higtaas nga ganghaan. Ha tinikangan han bisyon, nagkinita hi Ezekiel samtang ginsusukol han anghel an mga ganghaan. Mga 30 metros an kahitaas hito! (Ezek. 40:14) May mga kwarto han gwardya ha sulod hito. Ano an posible nga iginpasabot hini ha mga nag-aram han plano? Hi Jehova nagsiring kan Ezekiel: “Paghatag gud hin atensyon ha entrada han templo.” Kay ano? Kay ginpapasulod han katawohan an mga “diri turi an kasingkasing ngan unod” ha sagrado nga balay han Dios para ha pagsingba. Ano an resulta? “Napapasiparahan nira an akon templo,” siring ni Jehova.​—Ezek. 44:5, 7.

⁵ An mga “diri turi an . . . unod” waray sumunod ha klaro nga sugo han Dios tikang pa ha panahon ni Abraham. (Gen. 17:9, 10; Lev. 12:1-3) Pero mas grabe an mga “diri turi an kasingkasing.” Rebelyoso gud hira ngan diri namamati ha instruksyon ngan giya ni Jehova. Waray unta hira tuguti nga makasulod ha iya sagrado nga balay para ha pagsingba! Nangangalas hi Jehova ha pagkahipokrito, pero gintugotan han iya katawohan nga magin kalyap ito ha iya balay. An mga ganghaan ngan mga kwarto han gwardya ha templo ha bisyon klaro nga nagtutdo hini nga leksyon: Husto na an sugad nga mga pag-abuso! An higtaas nga suruklan ha pagsulod ha balay ni Jehova kinahanglan ipatuman. Dida la niya bibendisyonan an pagsingba han katawohan.

6, 7. (a) Paonan-o gin-gamit ni Jehova an pader ha palibot han templo basi magsumat hin mensahe ha iya katawohan? (b) Ano an pagtratar hadto han katawohan ni Jehova ha iya balay? (Kitaa an footnote.)

⁶ An nakapalibot nga pader. Usa pa nga makapainteres nga detalye han templo amo an pader ha palibot hito. Nagsiring hi Ezekiel nga an kahilaba han pader ha tagsa nga ligid 500 ka tangbo, o 1,555 metros, sobra usa ka kilometro! (Ezek. 42:15-20) Pero an  kabug-osan han mga istraktura ngan mga bungsaran han templo kwadrado an porma nga an kahilaba han tagsa nga ligid 500 ka siko, o 259 metros la. Salit may haluag nga espasyo ha palibot han templo, nga napapalibotan hito nga pader. * Kay ano?

⁷ Hi Jehova nagsiring: “Yana iundang nira an ira pagin diri matinumanon ha akon ngan ipahirayo nira ha akon an patay nga mga lawas han ira mga hadi, ngan maukoy ako ha butnga nira ha kadayonan.” (Ezek. 43:9) “An patay nga mga lawas han ira mga hadi” posible nga nagtutudlok ha idolatriya. Salit pinaagi han haluag nga espasyo ha templo ha bisyon, sugad hin nasiring hi Jehova: “Ipahirayo ito ngatanan nga hugaw. Ayaw gud ito ipahirani.” Kon titipigan nira nga putli an ira pagsingba, bibendisyonan hira ni Jehova han iya presensya.

8, 9. Ano an bangin hinbaroan han katawohan ha marig-on nga sagdon ni Jehova ha kalalakin-an nga may responsabilidad?

⁸ Marig-on nga sagdon ha kalalakin-an nga may responsabilidad. Hi Jehova marig-on kondi mahigugmaon nga nagsagdon ha kalalakin-an nga may daku nga responsabilidad. Mapwersa nga gintadong niya an mga Levita nga nagpahirayo ha iya han nagbuhat an katawohan hin idolatriya, pero ginkumendasyonan niya an mga anak ni Zadok, “nga nanginano ha mga responsabilidad ha [iya] santuaryo han an mga Israelita binaya.” May hustisya ngan maloloy-on an iya pagtratar ha tagsa nga grupo, depende ha ira ginbuhat. (Ezek. 44:10, 12-16) An mga lider han Israel mapwersa liwat nga gintadong.​—Ezek. 45:9.

⁹ Salit klaro nga iginpakita ni Jehova nga an kalalakin-an nga may awtoridad ngan nangunguna may baratunon ha iya ha paagi han ira pagtuman han ira responsabilidad. Mahimo liwat hira sagdonan, tadungon, ngan disiplinahon. Ngani, kinahanglan manguna hira ha pagtuman han mga suruklan ni Jehova!

10, 11. Ano an mga ebidensya nga an pipira nga binalik nga distyero nahibaro han mga leksyon ha bisyon ni Ezekiel?

¹⁰ Gin-aplikar ba han binalik nga mga distyero an mga leksyon ha bisyon? Syempre, diri kita maaram kon ano gud an ginhunahuna han matinumanon nga kalalakin-an ngan kababayin-an hito nga panahon mahitungod hinin makatirigamnan nga bisyon. Pero damu an iginsusumat han Pulong han Dios mahitungod han ira ginbuhat ngan han ira nagin panhunahuna ha putli nga pagsingba kan Jehova. Gin-aplikar ba nira an mga prinsipyo ha bisyon? Oo, ha pipira nga paagi​—labi na kon itanding ha ira rebelyoso nga mga kaapoy-apoyan antes han pagkadistyero ha Babilonya.

¹¹ An matinumanon nga kalalakin-an sugad kanda propeta Hagai ngan Zacarias, kan Ezra nga saserdote ngan parakopya, ngan kan Nehemias nga gobernador naningkamot gud pagtutdo ha katawohan han mga prinsipyo nga pariho han igintututdo ha bisyon ni Ezekiel mahitungod han templo. (Ezra 5:1, 2) Igintutdo nira nga an putli nga pagsingba kinahanglan ipahitaas ngan magin prayoridad  kay ha materyal nga panginahanglan ngan kalugaringon nga mga hingyap. (Hag. 1:3, 4) Igin-obligar nira nga irespeto an mga suruklan ha pakigbahin ha putli nga pagsingba. Pananglitan, hira Ezra ngan Nehemias mapwersa nga nagsagdon ha katawohan nga pabayaon an ira mga asawa nga taga-iba nga nasud, nga nagpapaluya han ira espirituwalidad. (Basaha an Ezra 10:10, 11; Neh. 13:23-27, 30) Kumusta man an idolatriya? Katapos han pagkadistyero, an nasud baga hin nangalas na hito nga sala, nga agsob gud makabitik ha ira ha naglabay. Kumusta man an mga saserdote ngan mga lider, o prinsipe? Iginpapakita han bisyon nga upod hira han mga ginsagdonan ngan gintadong ni Jehova. (Neh. 13:22, 28) Damu an mapainubsanon nga sinugot.​—Ezra 10:7-9, 12-14; Neh. 9:1-3, 38.

12. Ha ano nga mga paagi ginbendisyonan ni Jehova an mga distyero pagbalik nira?

¹² Tungod hito, ginbendisyonan ni Jehova an iya katawohan. Nagkaada hira espirituwal nga kauswagan, kahimsog, ngan kahapsay nga maiha nga waray nira maeksperyensyahi. (Ezra 6:19-22; Neh. 8:9-12; 12:27-30, 43) Kay ano? Kay nagtikang na hira pagsunod ha magtadong nga suruklan ni Jehova ha putli nga pagsingba. An mga leksyon han templo ha bisyon nakaabot ha damu nga makinarawaton nga kasingkasing. Salit ha pagsumaryo, masisiring nga an mga distyero nagpahimulos ha bisyon ni Ezekiel ha duha nga importante nga paagi. (1) Nagtutdo ito hin mga leksyon mahitungod han mga suruklan ha putli nga pagsingba ngan kon paonan-o  nira ini tutumanon. (2) Naghatag ito hin pasarig. Igintagna hito nga ipapahiuli an putli nga pagsingba ngan bibendisyonan ni Jehova an iya katawohan kon padayon hira nga magbuhat han putli nga pagsingba. Pero ini an karuyag naton hibaroan: Ini ba nga bisyon may katumanan yana?

13, 14. (a) Kay ano nga nakasiring kita nga an bisyon ni Ezekiel mahitungod han templo may katumanan ha aton panahon? (b) Ano an duha nga paagi nga nagpapahimulos kita yana ha bisyon? (Kitaa liwat an kahon 13A, “Magkaiba nga Templo, Magkaiba nga Leksyon.”)

¹³ Aplikado gud ba yana an bisyon ni Ezekiel? Oo! Hinumdumi an kaparihoan han iya bisyon mahitungod han sagrado nga balay han Dios ha “hitaas gud nga bukid” ngan han tagna ni Isaias nga “an bukid han balay ni Jehova maiestablisar hin marig-on ha bawbaw han pungkay han kabukiran.” Hi Isaias nagsiring nga an iya tagna matutuman “ha ultimo nga bahin han mga adlaw,” o “ha kataposan nga mga adlaw.” (Ezek. 40:2; Isa. 2:2-4; ftn.; kitaa liwat an Micas 4:1-4.) Ini nga mga tagna aplikado ha panahon han kataposan nga mga adlaw tikang han 1919 han an putli nga pagsingba iginpahitaas, o iginpahiuli, sugad hin iginbutang ha hitaas nga bukid. *

¹⁴ Salit an bisyon ni Ezekiel aplikado gud ha putli nga pagsingba yana. Sugad la nga nagpahimulos hito an nadistyero nga mga Judio hadto, nagpapahimulos liwat kita hito yana ha duha nga paagi. (1) Naghahatag ito hin mga leksyon kon paonan-o naton matutuman an mga suruklan ni Jehova ha putli nga pagsingba. (2) Naghahatag ito hin mga pasarig nga ipapahiuli an putli nga pagsingba ngan bibendisyonan kita ni Jehova.

15. Ano an angay naton tigamnan samtang nakuha kita hin mga leksyon ha templo ha bisyon ni Ezekiel?

¹⁵ Tagdon naton yana an pipira nga detalye han bisyon ni Ezekiel. Imadyina nga upod kita niya ha paglibot hiton daku hinduro nga templo. Tigamni nga diri an daku nga espirituwal nga templo an aton nakikita; lugod, nakuha la kita hin mga leksyon nga aplikado ha aton pagsingba yana. Ano an pipira hito?

16. Ano an aton hibabaroan ha ngatanan nga pagsukol ha bisyon ni Ezekiel? (Kitaa an retrato ha tinikangan hini nga kapitulo.)

¹⁶ Kay ano nga gin-unabi an mga sukol? Samtang nagkikita hi Ezekiel, detalyado nga ginsukol han anghel nga sugad hin tumbaga pagkit-on an templo, upod na an mga pader, ganghaan, kwarto han gwardya, bungsaran, ngan an halaran. An kadamu han detalye mahimo makawurok ha magbarasa. (Ezek. 40:1–42:20; 43:13, 14) Pero hunahunaa an importante nga mga punto hito. Gin-gamit ito ni Jehova basi pabug-atan an pagkaimportante han iya mga suruklan. Hiya an naghihimo hito, diri an mga tawo. Sayop gud an mga nasiring nga diri importante kon paonan-o ginsisingba an Dios. Dugang pa, pinaagi ha detalyado nga pagsukol han templo, iginpapasarig ni Jehova nga ipapahiuli gud an putli nga pagsingba. An mga saad han Dios magkakaada eksakto nga katumanan sugad la nga  eksakto an mga sukol. Hito nga paagi, ginkompirma ni Ezekiel nga ipapahiuli an putli nga pagsingba ha kataposan nga mga adlaw!

17. Ano an bangin ipahinumdom ha aton han pader ha palibot han templo?

¹⁷ An nakapalibot nga pader. Sugad han ginhisgotan na, nakakita hi Ezekiel hin pader ha palibot han templo. Marig-on ito nga pahinumdom nga kinahanglan ipahirayo han katawohan han Dios an ngatanan nga kahugaw han relihiyon tikang ha putli nga pagsingba basi diri gud mahugawan an Iya balay. (Basaha an Ezekiel 43:7-9.) Kinahanglan naton ito nga sagdon yana! Pakagawas han katawohan han Dios ha damu ka siglo nga pagkabihag ha Babilonya nga Gamhanan, gintokahan han Kristo an iya matinumanon ngan maaramon nga uripon han 1919. Labi na tikang hito nga panahon, naningkamot gud an katawohan han Dios nga isalikway an buwa nga mga doktrina ngan buhat nga may salakot nga idolatriya ngan paganismo. Ginsisiguro naton nga magpabilin nga hirayo ha putli nga pagsingba an espirituwal nga kahugaw. Ngan diri ngani kita nagninegosyo ha Kingdom Hall basi matipigan nga bulag an sugad nga mga butang nga waray kalabotan ha aton pagsingba.​—Mar. 11:15, 16.

18, 19. (a) Ano an aton hibabaroan ha higtaas nga ganghaan han templo ha bisyon? (b) Ano an angay naton magin reaksyon ha mga nagsasari nga paubson an higtaas nga suruklan ni Jehova? Paghatag hin ehemplo.

¹⁸ An higtaas nga ganghaan. Kon ginpapamalandong naton an higtaas nga ganghaan nga nakita ni Ezekiel, ano an aton hibabaroan? Sigurado nga nagtutdo ito ha mga Judio nga distyero nga higtaas gud an suruklan ni Jehova ha moral. Kumusta man yana? Nagsisingba kita ha daku nga espirituwal nga templo ni Jehova. Diri ba mas importante yana an matadong nga panggawi nga diri hipokrito? (Roma 12:9; 1 Ped. 1:14, 15) Ha kataposan nga mga adlaw, hinay-hinay nga gin-giyahan ni Jehova an iya katawohan nga sundon gud an iya mga suruklan ha moral. * Pananglitan, ginpapaiwas ha kongregasyon an diri nagbabasol nga mga nakasala. (1 Cor. 5:11-13) Dugang pa, an mga kwarto han gwardya ha sulod han mga ganghaan mahimo magpahinumdom ha aton nga ha pagsingba kan Jehova, diri ginpapasulod an diri niya inuuyonan. Pananglitan, bisan kon sumulod ha Kingdom Hall an usa nga indibiduwal nga doble an pagkinabuhi, diri hiya uuyonan ni Jehova kon diri niya buhaton an Iya mga sugo. (San. 4:8) Proteksyon gud ito ha putli nga pagsingba hini nga panahon nga duro an kahugaw ngan imoralidad!

¹⁹ Igintagna han Biblia nga an kalibotan magigin mahugaw antes han kataposan. Ini an aton mababasa: “An magraot nga mga tawo ngan mga impostor mas magtitikaraot pa gud, nanlilimbong ngan nalilimbongan.” (2 Tim. 3:13) Yana, nagtitikadamu an nalilimbongan ha paghunahuna nga an higtaas nga suruklan ni Jehova sobra kaistrikto, daan na, o sayop. Malilimbongan ka ba? Pananglitan, kon may magkombinse ha imo nga sayop an mga suruklan han Dios may kalabotan ha homoseksuwalidad, mauyon ka ba ha iya? O mauyon  ka kan Jehova nga Dios, nga klaro nga nagyakan ha iya Pulong nga an nagawi hin sugad hito “nagbubuhat hin mangil-ad”? Ginpapahamangnoan kita han Dios nga diri uyonan an imoral nga panggawi. (Roma 1:24-27, 32) Kon umatubang kita hin sugad nga mga isyu, hunahunaon naton an templo ha bisyon ni Ezekiel nga higtaas an ganghaan ngan hinumdoman: Diri ginpapaubos ni Jehova an iya magtadong nga suruklan bisan pa han mga presyur hinin maraot nga kalibotan. Nauyon ba kita ha aton langitnon nga Amay ngan naninindogan ha kon ano an husto?

20. Ano nga makaparig-on nga mga pahinumdom an hibabaroan han “daku nga grupo” tikang ha bisyon ni Ezekiel?

²⁰ An mga bungsaran. Han nakita ni Ezekiel an haluag nga gawas nga bungsaran han templo, sigurado nga nalipay hiya nga damu nga malipayon nga magsiringba ni Jehova an makakagkatirok didto. Yana, an mga Kristiano nagsisingba ha mas sagrado gud nga lugar. An bisyon ni Ezekiel may makaparig-on nga mga pahinumdom ha “daku nga grupo” han mga magsiringba ha gawas nga bungsaran han espirituwal nga templo ni Jehova. (Pah. 7:9, 10, 14, 15) Nakita ni Ezekiel nga ha mga bungsaran may nakalinya nga mga kwarto nga pangaonan diin mahimo kaunon han mga magsiringba an ira dara nga mga halad nga ginsasarosaroan. (Ezek. 40:17) Sugad hin mangangaon hira upod ni Jehova nga Dios​—tigaman han mamurayawon nga pagkamagsangkay! Yana, diri kita naghahalad pariho han mga Judio nga sakop han Mosaiko nga Balaud. Lugod, naghahatag kita “hin halad han pagdayaw” kon nakikigbahin kita  ha putli nga pagsingba, pananglitan, pinaagi han pagkomento ngan pagpahayag han aton pagtoo ha mga katirok o ha ministeryo. (Heb. 13:15) Napaparig-on liwat kita han espirituwal nga pagkaon nga igintatagana ni Jehova. Salit an aton pag-abat pariho han mga anak ni Kora nga nagkanta kan Jehova: “An usa ka adlaw ha imo mga bungsaran mas maopay kay han usa ka yukot ha bisan diin!”​—Sal. 84:10.

21. Ano an bangin hibaroan han dinihogan nga mga Kristiano ha mga saserdote ha bisyon ni Ezekiel?

²¹ An mga saserdote. Nakita ni Ezekiel nga an mga ganghaan nga gin-aagian han mga saserdote ngan mga Levita ha pagsulod ha sulod nga bungsaran puropariho han gin-aagian han iba nga tribo ha pagkadto ha gawas nga bungsaran. Nagpapahinumdom gud ito ha ira nga kinahanglan liwat nira tumanon an mga suruklan ni Jehova ha putli nga pagsingba. Kumusta man yana? Waray alagad han Dios yana nga nakakapanunod hin pagkasaserdote, pero an dinihogan nga mga Kristiano ginsidngan: “Kamo ‘usa nga pinili nga lahi, usa nga hadianon nga pagkasaserdote.’” (1 Ped. 2:9) An mga saserdote ha kadaan nga Israel nasingba ha bulag nga bungsaran. Yana, an mga dinihogan diri literal nga nabubulag ha ira mga igkasi-magsiringba, pero may espesyal hira nga relasyon kan Jehova sugad nga iya inampon nga mga anak. (Gal. 4:4-6) May mapulsanon liwat nga mga pahinumdom ha ira an bisyon. Pananglitan, matitigamnan nira nga an mga saserdote mahimo sagdonan ngan disiplinahon. Angay hinumdoman han ngatanan nga Kristiano nga bahin kita han “usa nga panon” nga may “usa nga paraataman.”​—Basaha an Juan 10:16.

22, 23. (a) Ano nga leksyon an bangin hibaroan han mga tigurang yana ha lider nga iginhulagway ha bisyon ni Ezekiel? (b) Ano an posible mahitabo ha tiarabot?

²² An lider. Ha bisyon ni Ezekiel, prominente nga tawohan an lider. Diri hiya tikang ha tribo han mga saserdote, ngan ha templo naman, nagpapasakop hiya ha paggiya han mga saserdote. Pero, klaro nga paramangno hiya han katawohan ngan nabulig ha ira ha paghalad. (Ezek. 44:2, 3; 45:16, 17; 46:2) Salit ehemplo hiya ha Kristiano nga kalalakin-an yana nga may responsabilidad ha kongregasyon. Ngani, an mga tigurang, upod na an nagbibiyahe nga mga paramangno, kinahanglan padayon nga magpasakop ha dinihogan nga matinumanon nga uripon. (Heb. 13:17) An mga tigurang maduruto nga nabulig ha katawohan han Dios ha paghalad hin pagdayaw ha mga katirok ngan ha ministeryo. (Efe. 4:11, 12) Ngan mahimo liwat nira tigamnan an pagsaway ni Jehova ha mga lider han Israel tungod ha pag-abuso han ira awtoridad. (Ezek. 45:9) Diri liwat naghuhunahuna an mga tigurang nga diri hira nagkikinahanglan hin sagdon ngan pagtadong. Lugod, ginpapabilhan nira an higayon nga putlion ni Jehova basi magin mas epektibo hira nga paraataman ngan paramangno.​—Basaha an 1 Pedro 5:1-3.

²³ Hi Jehova padayon nga magtatagana hin may kapas ngan mahigugmaon nga mga paramangno ha maabot nga Paraiso nga tuna.  Masisiring nga damu nga tigurang yana an ginbabansay kon paonan-o magin mabinuligon ngan may kapas nga mga paraataman ha Paraiso. (Sal. 45:16) Diri ba makalilipay hunahunaon kon paonan-o hira magigin bendisyon ha bag-o nga kalibotan? An aton pagsabot ha bisyon ni Ezekiel, pariho han iba pa nga tagna mahitungod ha pagpahiuli, mahimo magin mas klaro pa ha husto nga panahon ni Jehova. An pipira nga bahin bangin magkaada eksayting nga katumanan ha tiarabot, nga diri pa naton nasasabtan yana. Panahon la an makakagsumat.

24, 25. Paonan-o iginhulagway han bisyon ni Ezekiel an mga bendisyon han Dios ha iya katawohan samtang nagpapabilin hira ha putli nga pagsingba?

²⁴ Ha pagtapos, hinumdoman naton an makatirigamnan nga nahitabo ha bisyon ni Ezekiel. Inabot hi Jehova ha templo, ngan nagsaad hiya ha iya katawohan nga magpapabilin hiya didto kon matinumanon nga susundon nira an iya mga suruklan ha putli nga pagsingba. (Ezek. 43:4-9) Ano an magigin epekto han iya presensya ha iya katawohan ngan ha ira tuna?

²⁵ Iginhulagway han bisyon an mga bendisyon han Dios pinaagi hin duha nga makaparig-on nga eksena: (1) May salog nga naagos tikang ha santuaryo han templo, nga nagdadara hin kinabuhi ngan pagkamabungahon ha tuna; ngan (2) an tuna ginbahin-bahin ha organisado nga paagi ngan may eksakto nga sukol, ngan aada ha butnga an templo ngan an espasyo ha palibot hito. Paonan-o naton ini sasabuton yana? Importante ini kay nagkikinabuhi kita ha panahon nga hi Jehova sinulod na ha daku nga espirituwal nga templo, an ginputli ngan gin-uuyonan nga mas sagrado nga paagi han pagsingba. (Mal. 3:1-4) Hihisgotan naton iton duha nga eksena ha Kapitulo 19 tubtob 21.