1-3. (a) Ano an magigin resulta han “duro nga kapungot” ni Jehova? (Kitaa an retrato hini nga pahina.) (b) Ano an aton hihisgotan?

 AN MGA lalaki, mga babaye, ngan kabataan urosa nga natindog ngan nagkakanta hin kanta han Ginhadian. Katima, usa nga tigurang an kinasingkasing nga nag-ampo kan Jehova basi manginyupo para han Iya proteksyon. An ngatanan ha kongregasyon natapod nga mamangnoan hira ni Jehova, pero kinahanglan la gihap nira an pagliaw ngan pasarig. Ha gawas, nababatian an aringasa han girra. Nagtikang na an Armagedon!​—Pah. 16:14, 16.

² Ha Armagedon, an pamatay ni Jehova ha mga tawo diri kay waray emosyon, kondi may “duro nga kapungot.” (Basaha an Ezekiel 38:18.) Ipupuntirya niya an iya naglalaga nga kasina, diri ha usa la nga grupo hin kasundalohan o usa nga nasud, kondi ha damu gud nga tawo ha bug-os nga kalibotan. Hito nga adlaw, an pamamatayon ni Jehova “magigin tikang ha usa nga sidsid han tuna tubtob ha luyo nga sidsid han tuna.”​—Jer. 25:29, 33.

³ Kay ano nga hi Jehova, an Dios han gugma, nga iginhuhulagway nga “maloloy-on ngan mapinairon” ngan “diri madagmit masina,” magbubuhat hito nga may “duro nga kapungot”? (Ex. 34:6;  1 Juan 4:16) An baton hini makakaliaw gud ha aton, makakahatag ha aton hin kaisog, ngan makakadasig ha aton ha pagsangyaw nga buruhaton yana.

4, 5. Ano an kaibahan han kasina han Dios ha kasina han diri perpekto nga tawo?

⁴ Hinumdoman anay naton nga an kasina ni Jehova iba ha kasina han diri perpekto nga tawo. Kon an kasina han tawo nagigin kapungot ngan may nabubuhat na hiya, an resulta agsob nga diri nakukontrol ngan diri maopay. Pananglitan, hi Cain nga suhag ni Adan “nasina gud” kay waray karawata ni Jehova an iya halad pero an kan Abel gin-uyonan. Ano an resulta? Ginpatay ni Cain an iya matadong nga bugto. (Gen. 4:3-8; Heb. 11:4) Hunahunaa liwat hi David, nga usa nga tawo nga nakakapalipay ha kasingkasing ni Jehova. (Buh. 13:22) Bisan inin maopay nga tawo hapit na makabuhat hin grabe nga krimen han ginsumatan hiya nga gin-insulto hiya ngan an iya mga tawo han riko nga tag-iya hin tuna nga hi Nabal. Tungod ha kapungot, “igintaklos [ni David ngan han iya mga sundalo] an ira mga espada” basi patayon an bungalos nga hi Nabal pati an ngatanan nga lalaki ha iya panimalay. Maopay na la kay nakombinse hira ni Abigail nga asawa ni Nabal nga diri bumulos. (1 Sam. 25:9-14, 32, 33) Angayan la nga gin-giyahan ni Jehova hi Santiago nga magsurat: “An kasina han tawo diri nagriresulta hin katadongan han Dios.”​—San. 1:20.

⁵ Diri pariho ha kasina han tawo, an kasina ni Jehova pirme kontrolado ngan may klaro nga rason. Bisan pa han duro nga kapungot, nagios hiya ha matadong nga paagi. Kon nakikig-away hiya, diri niya ginpupoo “an magtadong kaupod han magraot.” (Gen. 18:22-25) Dugang pa, may matadong nga mga rason an kasina ni Jehova. Hisgotan naton an duha hito ngan an mga leksyon nga aton hibabaroan tikang hito.

6. Ano an reaksyon ni Jehova kon ginpapasiparahan an iya ngaran?

⁶ Rason: Ginpapasiparahan an ngaran ni Jehova. An mga nag-aangkon nga nagsisingba kan Jehova pero nagbubuhat hin maraot nakakadaot ha iya reputasyon salit husto la nga masina hiya. (Ezek. 36:23) Ginhisgotan ha nauna nga mga kapitulo nga napasiparahan gud han nasud han Israel an ngaran ni Jehova. Diri urusahon nga nasina hiya tungod han ira disposisyon ngan buhat. Pero kontrolado niya an iya kapungot​—ginsirotan niya an iya katawohan ha husto la nga sukol ngan waray gud sumobra. (Jer. 30:11) Ngan han natuman na an katuyoan han kasina ni Jehova, waray na hiya masina ngan ginkalimtan na ito.​—Sal. 103:9.

7, 8. Ano nga mga leksyon an aton hibabaroan ha pagtratar ni Jehova ha Israel?

⁷ Leksyon: An pagtratar ni Jehova ha mga Israelita hadto seryoso nga pahamangno ha aton. Pariho ha ira, may pribilehiyo kita nga magdara han ngaran ni Jehova. Mga Saksi ni Jehova kita. (Isa. 43:10) An aton mga pulong ngan buhat nagsusumat mahitungod ha  Dios nga aton ginsisingba. Diri gud naton karuyag magbinuhat hin maraot ngan pasiparahan an ngaran ni Jehova. Iton hipokrito nga pagkinabuhi makakapasina ha iya, ngan magios gud hiya basi proteksyonan an iya reputasyon.​—Heb. 3:13, 15; 2 Ped. 2:1, 2.

⁸ An pahamangno ba nga hi Jehova makakapakita hin “duro nga kapungot” magpupugong ha aton nga magin duok ha iya? Diri. Maaram kita nga pasensyoso hiya ngan mapinasayloon. (Isa. 55:7; Roma 2:4) Pero maaram liwat kita nga nagdidisiplina hiya kon kinahanglan. Ngani, naghihilarom an aton respeto ha iya, kay maaram kita nga an iya kasina maglalarab ha mga nahiara na pagbinuhat hin sala ngan diri niya hira tutugotan nga magpabilin nga kaupod han iya katawohan. (1 Cor. 5:11-13) Klaro nga iginsumat ni Jehova kon ano an nakakapasina ha iya. Nakadepende na ha aton an paglikay ha mga disposisyon ngan buhat nga nakakapasina ha iya.​—Juan 3:36; Roma 1:26-32; San. 4:8.

9, 10. Ano an reaksyon ni Jehova kon namimeligro an iya matinumanon nga katawohan? Paghatag hin mga ehemplo.

⁹ Rason: Namimeligro an matinumanon nga katawohan ni Jehova. Nasisina hi Jehova kon gin-aatake han mga kaaway adton maunungon nga naayop ha iya para hin proteksyon. Pananglitan, pagbaya han mga Israelita ha Ehipto, gin-atake han Paraon ngan han iya makusog nga pwersa militar an baga hin waray depensa nga katawohan nga nakadto ha baybayon han Dagat nga Pula. Pero han ginlanat nira an mga Israelita ha mamara nga salad han dagat, ginpanangtang ni Jehova an mga kaliding han pan-girra nga mga karuwahe ngan iginlabog an mga Ehiptohanon ha butnga han dagat. “Waray bisan usa ha ira an ginpabay-an nga makatalwas.” (Ex. 14:25-28) An kasina ni Jehova naglarab ha mga Ehiptohanon tungod han iya “maunungon nga gugma” ha iya katawohan.​—Basaha an Exodo 15:9-13.

¹⁰ Tungod liwat han gugma ni Jehova ha iya katawohan, ginbuligan niya hira ha panahon ni Hadi Hezekias. An mga Asiryano, nga pinakamakusog ngan pinakabrutal nga pwersa militar hito nga panahon, maatake na ha Jerusalem. An maunungon nga mga alagad ni Jehova nameligro ha paglikos nga magriresulta hin hinay-hinay ngan makangingirhat nga kamatayon. (2 Hadi 18:27) Salit nagsugo hi Jehova hin usa la nga anghel, nga nagpatay hin 185,000 nga kaaway nga mga sundalo ha usa la ka gab-i! (2 Hadi 19:34, 35) Imadyina an eksena ha kampo han mga Asiryano pagkaaga. Waray kagamiti an mga bangkaw, taming, ngan espada. Waray trumpeta nga nagpukaw. Waray nagmamandar ha mga sundalo. Mamingaw gud ha kampo ngan nagpatsarang an patay nga mga lawas.

11. Kay ano nga nakakaliaw ngan nakakahatag hin kaisog an mga ehemplo ha Kasuratan mahitungod han reaksyon ni Jehova kon namimeligro an iya katawohan?

¹¹ Leksyon: Ito nga mga ginbuhat ni Jehova han nameligro an iya katawohan mapwersa nga pahamangno ha aton mga kaaway: “Makaharadlok nga mahulog ha mga kamot han buhi nga Dios” kon mapungot hiya. (Heb. 10:31) Pero para ha aton, nakakaliaw ito ngan  nakakahatag hin kaisog. Nakakaliaw hibaroan nga an aton nangunguna nga kaaway, hi Satanas, diri maglalampos. Hirani na matapos an iya ‘halipot nga panahon’ han pagmando! (Pah. 12:12) Samtang ginpapamulat ito, maisugon nga makakag-alagad kita kan Jehova, kay maaram kita nga waray tawo, organisasyon, o gobyerno nga makakapugong ha aton ha pagbuhat han Iya kaburut-on. (Basaha an Salmo 118:6-9.) Iginpahayag ni apostol Pablo an aton marig-on nga pagsarig pinaagi hini nga mga pulong: “Kon an Dios dapig ha aton, hin-o an makontra ha aton?”​—Roma 8:31.

12. Ha daku nga kasakitan, kay ano nga maglalarab an kapungot ni Jehova?

¹² Ha daku nga kasakitan, puproteksyonan kita ni Jehova, sugad han iya ginbuhat ha mga Israelita nga nakorner han mga Ehiptohanon ngan ha mga Judio ha Jerusalem nga ginlikosan han mga Asiryano. Kon an aton mga kaaway magsari pagpoo ha aton, maglalarab an kapungot ni Jehova tungod han iya hilarom nga gugma ha aton. Adton mangangahas pag-atake ha aton sugad hin makamkam han nawotawo han iya mata. Magios hiya dayon. (Zac. 2:8, 9) Waray  gud kapariho an mahitatabo nga pamatay. Pero an mga kaaway ni Jehova waray rason nga mahipausa kon buhian na niya ngada ha ira an iya kapungot. Kay ano?

13. Ano nga mga pahamangno an iginhatag ni Jehova?

¹³ Hi Jehova “diri madagmit masina” ngan naghatag hiya hin damu nga pahamangno nga bubungkagon niya an mga nakontra ha iya ngan nagtatarhog ha iya katawohan. (Ex. 34:6, 7) Gin-gamit niya an mga propeta sugad kanda Jeremias, Ezekiel, Daniel, Kristo Jesus, ngan hira apostol Pedro, Pablo, ngan Juan basi magpahamangno parte ha daku ngan ultimo nga girra.​—Kitaa an kahon nga “Mga Pahamangno ni Jehova Parte ha Tiarabot nga Daku nga Girra.”

14, 15. Ano an ginbubuhat ni Jehova, ngan kay ano?

¹⁴ Iginparekord ni Jehova ha iya Pulong ini nga mga pahamangno. Iya liwat ginsiguro nga an Biblia an may pinakadamu nga hubad ngan distribusyon ha kasaysayan. Ha bug-os nga kalibotan, nag-organisar hiya hin damu nga boluntaryo nga nabulig ha iba nga  mahibaro ha pakigmurayaw ha Dios ngan nagpapahamangno parte ha tiarabot nga “daku nga adlaw ni Jehova.” (Zep. 1:14; Sal. 2:10-12; 110:3) Ginpapagios niya an iya katawohan nga ihubad ha ginatos nga yinaknan an mga publikasyon para ha pag-aram ha Biblia ngan gumamit hin ginatos ka milyon nga oras kada tuig ha pagsumat han mga saad ngan mga pahamangno nga mababasa ha iya Pulong.

¹⁵ Iginpapabuhat ni Jehova ini ngatanan kay “diri niya karuyag nga mabungkag an bisan hin-o, lugod karuyag niya nga magbasol an ngatanan.” (2 Ped. 3:9) Pribilehiyo gud nga magin representante han aton mahigugmaon ngan pasensyoso nga Dios ngan magkaada gutiay nga bahin ha pagpasamwak han iya mensahe! Pero hirani na maubos an panahon para hadton diri namamati ha mga pahamangno.

16, 17. May itinanda na ba nga adlaw hi Jehova para ha ultimo nga girra? Isaysay.

¹⁶ Hi Jehova may itinanda na nga adlaw para ha ultimo nga girra. Maaram hiya nga daan kon san-o aatakehon an iya katawohan.  (Mat. 24:36) Kay ano nga maaram hiya kon san-o maatake an iya mga kaaway?

¹⁷ Aton hinbaroan ha nahiuna nga kapitulo nga hi Jehova nagsiring kan Gog: “Bubutangan [ko] hin mga kaw-it an imo mga panga.” Tutugwayan niya an mga nasud ha pag-atake nga magriresulta ha Armagedon. (Ezek. 38:4) Diri ini nagpapasabot nga hi Jehova an magpapatikang hito nga girra o nga kukuhaon niya an kagawasan ha pagbuot han mga nakontra ha iya. Lugod, iginpapakita hini nga nababasa ni Jehova an kasingkasing ngan maaram hiya han bubuhaton han iya mga kaaway ha partikular nga mga sitwasyon.​—Sal. 94:11; Isa. 46:9, 10; Jer. 17:10.

18. Kay ano nga makikig-away an mga tawo ha Makagarahum-ha-ngatanan?

¹⁸ Kon diri hi Jehova an magpapatikang han away o diri niya pipiriton an iya mga kaaway nga makiggirra, kay ano nga makikig-away ini nga mga tawo ha Makagarahum-ha-ngatanan mismo? An usa nga rason kay hito nga panahon posible nga kombinsido na hira nga waray Dios o nga diri hiya manginginlabot ha buruhaton han mga tawo. Bangin mahunahuna nira ito kay napoo pa la nira an ngatanan nga organisasyon han buwa nga relihiyon ha kalibotan. Salit  bangin makasiring hira nga kon may Dios, sigurado nga didepensahan niya an mga institusyon nga nag-aangkon nga iya mga representante. Diri nira masasantop nga an Dios an nagbutang ha ira kasingkasing han ideya nga wad-on an mga relihiyon nga nagpapasipara gud ha iya.​—Pah. 17:16, 17.

19. Ano an posible mahitabo katapos mabungkag an buwa nga relihiyon?

¹⁹ Katapos mabungkag an buwa nga relihiyon, posible nga sugoon ni Jehova an iya katawohan nga magpasamwak hin masakit nga mensahe, nga ha libro han Pahayag iginpapariho ha uran nga yelo nga an tagsa hito mga 20 ka kilo an kabug-aton. (Pah. 16:21, ftn.) Ito nga mensahe​—posible usa nga deklarasyon nga matatapos na an sistema han politika ngan komersyo—​masakit gud para ha mga makakabati hito salit magpapasipara hira ha Dios. Posible nga ito an mag-aaghat ha mga nasud nga bug-os-pwersa nga atakehon an katawohan han Dios, basi mapahilom na gud kita. Huhunahunaon nira nga diri kita makakadepensa ngan masayon la bungkagon. Magsasayop gud hira!

20, 21. Hin-o hi Gog, ngan ano an mahitatabo ha iya?

²⁰ Aton hinbaroan ha Kapitulo 17 nga gintawag ni Ezekiel nga “Gog ha tuna han Magog” an alyansa han mga nasud nga maatake ha aton. (Ezek. 38:2) Pero an mga membro hini nga alyansa diri tinuod nga nagkakaurosa. Bisan kon baga hin nagkakauruyon hira, magpapabilin la gihap an pagkompetensyahay, pagpahitaas, ngan nasyonalistiko nga ambisyon. Magigin masayon la kan Jehova nga pahinaboon nga gamiton nira an ira armas kontra ‘ha ira mismo bugto.’ (Ezek. 38:21) Pero an kabungkagan han mga nasud diri masisiring nga kanan tawo buhat.

²¹ Antes mabungkag an aton mga kaaway, makikita nira an tigaman han Anak han tawo​—posible nga milagroso nga pagpakita han gahum ni Jehova ngan ni Jesus. Makakakita hira hin mga butang nga makakapalisang ha ira. Sugad han igintagna ni Jesus, “an mga tawo haros madidismayo tungod han kahadlok ngan han pagpinamulat han mga butang nga mahitatabo ha inuukyan nga tuna.” (Luc. 21:25-27) Masasantop nira nga sayop gud nga gin-atake nira an katawohan ni Jehova, salit mahahadlok gud hira. Mapipiritan hira pagkilala ha Maglalarang sugad nga kumander han militar, hi Jehova han mga hugpo. (Sal. 46:6-11; Ezek. 38:23) Sigurado nga gagamiton ni Jehova an langitnon nga mga hugpo ngan an mga pwersa han palibot basi proteksyonan an iya maunungon nga mga alagad ngan poohon an iya mga kaaway.​—Basaha an 2 Pedro 2:9.

22, 23. Hin-o an magpuproteksyon ha katawohan han Dios, ngan ano an sigurado nga aabaton nira ha ira toka?

²² Hunahunaa an pagin disidido ni Jesus nga manguna ha pag-atake ha mga kaaway han Dios ngan proteksyonan an mga nahigugma ngan nag-aalagad ha iya Amay. Hunahunaa liwat an aabaton han mga dinihogan. Antes han Armagedon, an mga dinihogan nga nabibilin  pa ha tuna babanhawon ngadto ha langit basi an ngatanan nga 144,000 makaupod ni Jesus ha pakiggirra. (Pah. 17:12-14) Sigurado nga damu ha ira an nagin duok nga sangkay han mga kaapi han iba nga mga karnero samtang nag-aalagad nga magkaupod hinin kataposan nga mga adlaw. Hito nga panahon, an mga dinihogan may-ada na awtoridad ngan gahum ha pagdepensa hadton maunungon gud nga sinuporta ha ira ha mga panahon han pagsari.​—Mat. 25:31-40.

²³ Magigin kaapi liwat han langitnon nga hugpo ni Jesus an mga anghel. (2 Tes. 1:7; Pah. 19:14) Binulig na hira ha iya ha pagpaiwas kan Satanas ngan han mga demonyo tikang ha langit. (Pah. 12:7-9) Ngan nabulig liwat hira ha pagtirok han mga aanhi ha tuna nga naruruyag pagsingba kan Jehova. (Pah. 14:6, 7) Angayan la nga tugotan ni Jehova an mga anghel nga proteksyonan ini nga mga maunungon! Labaw ha ngatanan, kadungganan para ha bug-os nga hugpo ni Jehova an pagbaraan ngan pagbindikar han iya ngaran, o reputasyon, pinaagi ha pagbulig ha pagbungkag han iya mga kaaway.​—Mat. 6:9, 10.

24. Ano an magigin reaksyon han daku nga grupo han iba nga mga karnero?

²⁴ An daku nga grupo han iba nga mga karnero waray rason nga mangurog ha kahadlok, kay ito nga hugpo nga magpuproteksyon ha ira gamhanan ngan disidido gud. Ngani, ‘matindog hira hin tadong ngan mahangad, kay an ira katalwasan nagtitikahirani na.’ (Luc. 21:28) Importante gud nga antes umabot an adlaw ni Jehova, buligan naton an mas damu pa nga kilalahon ngan higugmaon an aton maloloy-on ngan nagpapanalipod nga Amay!​—Basaha an Zepanias 2:2, 3.

25. Ano an sunod naton nga hihisgotan?

²⁵ An mga girra han tawo nagriresulta hin kasamok ngan pag-antos. Ha kabaliktaran, an Armagedon magriresulta hin kahapsay ngan kalipay. Ano an magigin kahimtang kon matapos na an kapungot ni Jehova, maitakob na an mga espada han iya mga girriro, ngan mawara na an aringasa han daku nga girra? Ha sunod nga kapitulo, hihisgotan naton iton makalilipay nga kabubuwason.