1, 2. (a) Ano nga importante nga mga pakiana an kinahanglan batunon han nagmamando nga lawas han Kristiano nga kongregasyon ha siyahan nga siglo? (b) Ano nga bulig an nakarawat hito nga kabugtoan basi makahimo hin tama nga desisyon?

 EKSAYTED an ngatanan. An mga apostol ngan mga tigurang nga aada ha usa nga kwarto ha Jerusalem nagsiplatay ha usa kag usa, kay nasantop nira nga importante gud nga desisyon an ira hihimoon. Tungod han isyu may kalabotan ha pagturi, binangon an importante nga mga pakiana. Kinahanglan ba sundon han mga Kristiano an Mosaiko nga Balaud? May-ada ba kaibahan an Judio ngan Hentil nga mga Kristiano?

² Ginhisgotan na han kalalakin-an nga nangunguna an damu nga ebidensya. Ginhunahuna nira an mga tagna ha Pulong han Dios pati na an makakombinse nga personal nga testimonya nga nagpapamatuod han bendisyon ni Jehova. Iginpahayag nira an ngatanan nga ira nahibabaroan may kalabotan hito. Damu gud an ira natirok nga ebidensya parte hito nga isyu. Klaro nga gin-gigiyahan hira han espiritu ni Jehova. Susundon ba nira ito nga paggiya?

3. Paonan-o kita mahimo magpahimulos ha pag-usisa han asoy ha Buhat kapitulo 15?

³ Kinahanglan an daku nga pagtoo ngan kaisog basi sundon an paggiya han espiritu hini nga kahimtang. Posible nga magtikaduro an kapungot han Judio nga mga lider han relihiyon. Ngan an desisyon han nagmamando nga lawas bangin diri karawaton han iba nga mga kaapi han kongregasyon nga determinado nga ipatuman la gihapon an Mosaiko nga Balaud ha katawohan han Dios. Ano an bubuhaton han nagmamando nga lawas? Kitaon naton. Samtang ginhihisgotan ito, mahibabaroan naton kon paonan-o ini nga kalalakin-an  nagpakita hin ehemplo nga ginsusunod han Nagmamando nga Lawas han mga Saksi ni Jehova yana. Ito gihapon an kinahanglan naton sundon kon naghihimo kita hin mga desisyon ngan naatubang hin mga problema ha aton kinabuhi sugad nga mga Kristiano.

4, 5. Ano nga mga tagna tikang ha Pulong han Dios an ginkotar ni Santiago?

⁴ An disipulo nga hi Santiago, nga bugto ni Jesus ha nanay, nagyakan. a Baga hin hini nga panahon hiya an tsirman han miting. An iya ginsiring baga hin sumaryo han desisyon nga ira nahimo sugad nga grupo. Hi Santiago nagsiring ha nagkakatirok nga kalalakin-an: “Iginsumat hin bug-os ni Symeon kon paonan-o an Dios naghatag hin atensyon ha mga nasud ha siyahan nga higayon basi magkuha ha ira hin katawohan nga magdadara han iya ngaran. Ngan nauyon hini an mga pulong han mga Propeta.”—Buh. 15:14, 15.

⁵ Tungod han pahayag ni Symeon, o Simon Pedro, ngan han ebidensya tikang kanda Bernabe ngan Pablo, posible nga nahinumdoman ni Santiago an aplikado nga mga teksto nga nakabulig ha kabugtoan nga masabtan an topiko nga ginhihisgotan. (Juan 14:26) Katapos magsiring nga ‘nauyon an mga pulong han mga Propeta,’ ginkotar ni Santiago an mga pulong ha Amos 9:11, 12. Ito nga libro aada ha bahin han Hebreo nga Kasuratan nga komon nga gintatawag nga “mga Propeta.” (Mat. 22:40; Buh. 15:16-18) Mapapansin mo nga an mga pulong nga ginkotar ni Santiago baga hin iba ha aton mababasa ha libro han Amos yana. Posible gud nga nagkotar hi Santiago tikang ha Septuagint, usa nga Griego nga hubad han Hebreo nga Kasuratan.

6. Paonan-o an Kasuratan nakabulig ha kabugtoan nga mahibaroan an kaburut-on han Dios?

⁶ Pinaagi kan propeta Amos, igintagna ni Jehova nga maabot an panahon nga titindugon Niya ‘an payag ni David,’ karuyag sidngon, an tulin han mga hadi nga pagtitikangan han Mesianiko nga Ginhadian. (Ezek. 21:26, 27) An nasud han Israel na la liwat ba an uuyonan ni Jehova? Diri. An tagna nagsiring nga an “mga tawo han ngatanan nga nasud” titirukon sugad nga ‘mga tawo nga gintatawag ha ngaran han Dios.’ Hinumdumi nga iginsaysay pa la ni Pedro nga an Dios “waray gud . . . magpakita hin pagpaurog ha butnga naton  [Judio nga mga Kristiano] ngan nira [Hentil nga mga tumuroo], lugod ginputli niya an ira kasingkasing tungod han ira pagtoo.” (Buh. 15:9) Ha iba nga pagkayakan, kaburut-on han Dios nga an mga Judio ngan mga Hentil pariho magin mga manurunod han Ginhadian. (Roma 8:17; Efe. 2:17-19) Waray gud isiring han sugad nga mga tagna nga an Hentil nga mga tumuroo kinahanglan anay turion o magin mga proselita.

7, 8. (a) Ano an iginsuhestyon ni Santiago? (b) Paonan-o ta dapat sabuton an mga pulong ni Santiago?

⁷ Hi Santiago, nga napagios tungod han sugad nga ebidensya ha Kasuratan ngan han marig-on nga testimonya nga iya nabatian, nagsuhestyon: “Salit an akon desisyon, diri pakurian adton tikang ha mga nasud nga nadaop ha Dios, kondi suratan hira nga maglikay ha mga butang nga nahugawan han mga idolo, ha seksuwal nga imoralidad, ha pagkaon hin hayop nga natilo, ngan ha dugo. Kay tikang pa ha kadaan nga mga panahon may mga nagsasangyaw han mga sinurat ni Moises ha tagsa nga syudad, kay ginbabasa ito ha daku nga tingog ha mga sinagoga ha kada sabbath.”—Buh. 15:19-21.

⁸ Han hi Santiago nagsiring nga “salit an akon desisyon,” ginagamit ba niya an iya awtoridad ha iba nga mga kabugtoan basi hiya an magdesisyon kon ano an dapat buhaton, bangin tungod kay hiya an tsirman han miting? Diri gud! An Griego nga termino nga iginhubad nga “an akon desisyon” mahimo liwat magpasabot hin “an akon hukom” o “an akon opinyon.” Hi Santiago diri naghihimo hin desisyon para ha bug-os nga grupo, lugod nahatag hiya hin suhestyon kon ano an puydi buhaton uyon ha ebidensya nga nabatian ngan ha ginsisiring han Kasuratan parte hito.

9. Ano an mga kapulsanan han suhestyon ni Santiago?

⁹ Maopay ba an suhestyon ni Santiago? Klaro nga maopay ito, kay ha urhi an mga apostol ngan mga tigurang inuyon hito. Ano an mga kapulsanan hito? An usa nga kapulsanan ha iginsuhestyon ni Santiago, diri ‘makukurian’ an Hentil nga mga Kristiano kay diri nira  kinahanglan sundon an Mosaiko nga Balaud. (Buh. 15:19) An usa pa, ini nga desisyon magpapakita hin pagtahod ha konsensya han Judio nga mga Kristiano, nga ha damu ka tuig nakabati han “mga sinurat ni Moises . . . kay ginbabasa ito ha daku nga tingog ha mga sinagoga ha kada sabbath.” b (Buh. 15:21) Ito nga suhestyon sigurado nga makakabulig nga magin duok ha usa kag usa an Judio ngan Hentil nga mga Kristiano. Labaw ha ngatanan, mapapalipay hito hi Jehova nga Dios kay uyon ito ha iya katuyoan. Maopay gud ito nga paagi ha pagsulbad han problema nga posible makagwara han pagkaurosa ngan kamurayawan han bug-os nga kongregasyon han katawohan han Dios! Ngan maopay gud ito nga ehemplo para ha Kristiano nga kongregasyon yana!

10. Paonan-o ginsusubad han Nagmamando nga Lawas yana an ehemplo nga iginpakita han nagmamando nga lawas ha siyahan nga siglo?

¹⁰ Sugad han gin-unabi ha nauna nga kapitulo, pariho ha nagmamando nga lawas ha siyahan nga siglo, an Nagmamando nga Lawas han mga Saksi ni Jehova yana nasarig kan Jehova, an Soberano han Uniberso, ngan kan Jesu-Kristo, an Ulo han kongregasyon, para hin giya ha ngatanan nga butang. c (1 Cor. 11:3) Paonan-o ini ginhihimo? Hi Albert D. Schroeder, nga membro han Nagmamando nga Lawas tikang han 1974 tubtob nga natapos an iya kinabuhi ha tuna han Marso 2006, nagsaysay: “An Nagmamando nga Lawas nagmimiting kon Mierkoles, nga gintitikangan an miting pinaagi hin pag-ampo ngan naghahangyo han giya han espiritu ni Jehova. Pinangangalimbasogan gud nira nga tagdon an tagsa nga butang ngan ipahiuyon an tagsa nga desisyon ha Pulong han Dios, an Biblia.” Sugad man, hi Milton G. Henschel, usa nga maiha nga membro han Nagmamando nga Lawas nga natapos an kinabuhi ha tuna han Marso 2003, nagbangon hin importante gud nga pakiana ha mga estudyante nga nagradwar han ika-101 nga klase han Watchtower Bible School of Gilead. Hiya nagpakiana, “May-ada ba iba nga organisasyon dinhi ha tuna nga an Nagmamando nga Lawas nakonsulta ha Pulong han Dios, an Biblia, antes maghimo hin importante nga mga desisyon?” Waray gud!

11. Paonan-o an desisyon han nagmamando nga lawas iginpaabot ha mga kongregasyon?

¹¹ An nagmamando nga lawas ha Jerusalem nagkaurosa ha ira desisyon ha isyu may kalabotan ha pagturi. Pero basi magkaurosa an mga kabugtoan ha mga kongregasyon, kinahanglan ipaabot ha ira ito nga desisyon ha klaro, positibo, ngan makapadasig nga paagi. Ano an pinakamaopay nga paagi ha pagbuhat hito? An asoy nagsaysay: “An mga apostol ngan an mga tigurang, upod an bug-os nga kongregasyon, nagdesisyon nga magpadara hin pinili nga mga lalaki tikang ha ira ngadto ha Antiokia, upod nira Pablo ngan Bernabe; iginpadara nira hi Judas nga gintatawag nga Barsabas ngan hi Silas, nga nangunguna nga mga lalaki ha butnga han kabugtoan.” Dugang pa, may igin-andam nga surat ngan iginpadara ito kaupod hini nga mga lalaki nga ginsugo basi mabasa ha ngatanan nga kongregasyon ha Antiokia, Syria, ngan Cilicia.—Buh. 15:22-26.

12, 13. Ano an kaopayan han pagpadara (a) kanda Judas ngan Silas? (b) hin surat tikang ha nagmamando nga lawas?

¹² Sugad nga “nangunguna nga mga lalaki ha butnga han kabugtoan,” hira Judas ngan Silas kwalipikado gud nga magin mga representante han nagmamando nga lawas. Ipapatin-aw hinin upat nga lalaki nga an mensahe nga ira dara diri la baton ha isyu may kalabotan ha pagturi, kondi usa liwat nga bag-o nga instruksyon tikang ha nagmamando nga lawas. An presensya hinin “pinili nga mga lalaki” mabulig nga magin duok an Judio nga mga Kristiano ha Jerusalem ngan an Hentil nga mga Kristiano ha mga kongregasyon. Maaramon ngan mahigugmaon gud ito nga kahikayan! Sigurado nga nakabulig ito nga magkaada kamurayawan ngan pagkaurosa an katawohan han Dios.

¹³ An surat naghatag hin klaro nga instruksyon ha Hentil nga mga Kristiano diri la ha isyu may kalabotan ha pagturi kondi pati liwat ha kon ano an dapat nira buhaton basi makarawat an pag-uyon ngan bendisyon ni Jehova. An pinakaimportante nga bahin han surat nagsiring: “An baraan nga espiritu ngan kami mismo nagdesisyon nga diri kamo dugangan hin pinas-an, labot la hini nga mga butang nga ginkikinahanglan: nga padayon nga maglikay ha mga butang nga iginhalad ha mga idolo, ha dugo, ha pagkaon hin hayop nga natilo, ngan ha seksuwal nga imoralidad. Kon maglikay gud kamo hini nga mga butang, maghihingaopay kamo. Maopay nga panlawas ha iyo!”—Buh. 15:28, 29.

14. Paonan-o nagin posible ha katawohan ni Jehova nga magbuhat nga nagkakaurosa dinhi hinin nagkakabahin-bahin nga kalibotan yana?

 ¹⁴ Yana, bisan kon sobra 8,000,000 an mga Saksi ni Jehova ha sobra 100,000 nga kongregasyon ha bug-os nga tuna, pariho an ira mga gintotoohan ngan buruhaton. Paonan-o nagin posible an sugad nga pagkaurosa nga komon man yana ha kalibotan an kasamok ngan pagkabahin-bahin? An nangunguna nga hinungdan han pagkaurosa amo an klaro ngan napapanahon nga instruksyon nga igintatagana ni Jesu-Kristo, an Ulo han kongregasyon, pinaagi han “matinumanon ngan maaramon nga uripon,” nga amo an Nagmamando nga Lawas. (Mat. 24:45-47) An pagkaurosa resulta liwat han kinaburut-on nga pagsugot han mga kabugtoan ha bug-os nga kalibotan ha instruksyon han Nagmamando nga Lawas.

15, 16. Ano an reaksyon han mga kongregasyon ha desisyon ha isyu may kalabotan ha pagturi, ngan kay ano nga ito an resulta?

¹⁵ Katapos, an asoy han Mga Buhat nagsusumat ha aton nga han nakaabot ha Antiokia an mga kabugtoan tikang ha Jerusalem, “gintirok nira an bug-os nga grupo ngan iginhatag ha ira an surat.” Ano an reaksyon han mga kabugtoan didto ha instruksyon tikang ha nagmamando nga lawas? “Katapos [an surat] basahon, nagkalipay hira tungod han pagdasig.” (Buh. 15:30, 31) Dugang pa, hira Judas ngan Silas “nagdasig ha kabugtoan pinaagi han damu nga pahayag ngan ginparig-on hira.” Hito nga paagi, an duha nga lalaki “mga propeta,” pariho kanda Bernabe, Pablo, ngan ha iba pa nga gintawag liwat nga mga propeta—usa nga termino nga nagtutudlok ha mga  nagpasamwak o nagpahibaro han kaburut-on han Dios.—Buh. 13:1; 15:32; Ex. 7:1, 2.

¹⁶ Klaro nga ginbendisyonan ni Jehova an bug-os nga kahikayan, amo nga nadasig an ngatanan nga kongregasyon. Kay ano nga sugad hito an resulta? Sigurado nga tungod ito han klaro ngan napapanahon nga instruksyon han nagmamando nga lawas, nga iginbase ha Pulong han Dios ngan ha paggiya han baraan nga espiritu. Labot pa hito, mahigugmaon ngan maloloy-on an paagi han pagsumat han mga desisyon ha mga kongregasyon.

17. Diin iginbase an pipira nga buruhaton ha panahon han mga pagbisita han mga paramangno han sirkito yana?

¹⁷ Ha pagsubad hito nga ehemplo, an Nagmamando nga Lawas han mga Saksi ni Jehova yana nagtatagana hin napapanahon nga instruksyon ha mga kabugtoan ha bug-os nga kalibotan. Kon may mga desisyon hira nga ginhihimo, iginpapahibaro ito ha mga kongregasyon ha klaro ngan direkta nga paagi. An usa nga paagi amo an mga pagbisita han mga paramangno han sirkito. Inin andam magsakripisyo nga kabugtoan nagbibiyahe ha iba-iba nga kongregasyon, nga naghahatag hin klaro nga instruksyon ngan mahigugmaon nga pagdasig. Pariho kanda Pablo ngan Bernabe, naggagahin hira hin daku nga panahon ha ministeryo, “nga nagtututdo ngan nagpapasamwak han maopay nga sumat han pulong ni Jehova, upod an damu nga iba pa.” (Buh. 15:35) Pariho kanda Judas ngan Silas, gindadasig nira an “kabugtoan pinaagi han damu nga pahayag” ngan ginpaparig-on hira.

18. Ano an kinahanglan buhaton han katawohan han Dios basi padayon nira nga makarawat an bendisyon ni Jehova?

¹⁸ Kumusta man an mga kongregasyon? Ano an kinahanglan buhaton han mga kongregasyon ha bug-os nga tuna basi padayon nira nga mapahimulosan an kamurayawan ngan pagkaurosa dinhi hinin nagkakabahin-bahin nga kalibotan yana? Hinumdumi nga an disipulo nga hi Santiago ha urhi nagsurat: “An kinaadman nga tikang ha kahitas-an, una ha ngatanan putli, katapos mamurayawon, makatadunganon, andam ha pagsugot . . . Dugang pa, an bunga han katadongan igintatanom ha murayaw nga mga kahimtang para ha mga nakikigmurayaw.” (San. 3:17, 18) Diri kita maaram kon an katirok ba ha Jerusalem an ginhunahuna ni Santiago han iginsurat niya ini nga mga pulong. Pero ha aton paghisgot ha mga panhitabo nga nakarekord ha Buhat kapitulo 15, sigurado nga bibendisyonan la kita ni Jehova kon nagkakaurosa kita ngan nasugot ha mga instruksyon.

19, 20. (a) Ano an nagpapakita nga may-ada kamurayawan ngan pagkaurosa ha kongregasyon ha Antiokia? (b) Ano na an puydi buhaton yana nira Pablo ngan Bernabe?

 ¹⁹ Klaro nga may-ada na yana kamurayawan ngan pagkaurosa ha kongregasyon ha Antiokia. Imbes nga kontrahon an mga kabugtoan nga tikang ha Jerusalem, gin-apresyar gud han kabugtoan ha Antiokia an pagbisita nira Judas ngan Silas. An asoy nasiring: “Katapos nira magpabilin didto hin pipira ka panahon, ginpalakat hira hin mamurayawon han kabugtoan tipabalik ha mga nagpadara ha ira,” karuyag sidngon, tipabalik ha Jerusalem. d (Buh. 15:33) Makakasiguro kita nga nalipay liwat an kabugtoan ha Jerusalem han nabatian nira an ginsiring han duha nga lalaki parte ha ira pagbiyahe. Tungod han diri matupngan nga pagkabuotan ni Jehova, naglampos an ira toka!

²⁰ Hira Pablo ngan Bernabe, nga nagpabilin ha Antiokia, makakapokus na yana ha pagpanguna ha pagsangyaw nga buruhaton, sugad han ginbubuhat yana han mga paramangno han sirkito kon nabisita hira ha mga kongregasyon nga nakatoka ha ira. (Buh. 13:2, 3) Daku gud ini nga bendisyon para ha katawohan ni Jehova! Pero paonan-o pa gin-gamit ngan ginbendisyonan ni Jehova inin duha nga madasigon nga ebanghelisador? Mahibabaroan ta ini ha sunod nga kapitulo.