“HA TINIKANGAN an Dios naghimo han mga langit ngan han tuna.” (Genesis 1:1) Ito an ginsisiring nga pinakapopular nga siyahan nga mga pulong nga naisurat. Pinaagi hiton simple ngan makatirigamnan nga mga pulong, iginpapakilala han Biblia an pinakaimportante nga Persona ha Baraan nga Kasuratan​—an makagarahum-ha-ngatanan nga Dios, hi Jehova. Ipinapakita han siyahan nga bersikulo han Biblia nga an Dios an Maglalarang han haluag hinduro nga uniberso, upod na an planeta nga aton gin-uukyan. Iginsasaysay han sunod nga mga bersikulo nga ha sulod hin sunod-sunod nga hilawig nga peryodo hin panahon, nga simboliko nga tinatawag nga mga adlaw, gin-andam han Dios an tuna basi aton ukyan, ginpahinabo an pag-eksister han tanan nga urusahon nga butang ha tuna.

An tawo an pinakaimportante nga linarang han Dios ha tuna. Ginlarang ito ha dagway han Dios​—mahimo magpakita han mga kalidad ni Jehova, sugad han gugma ngan kinaadman. Iya ginhimo an tawo tikang ha tapotapo ngan ginngaranan hin Adan, ngan iginbutang ito ha paraiso​—an hardin han Eden. An Dios mismo an naghimo hito nga hardin, ginpuno ito hin magpakaruruyag ngan mabungahon nga mga puno.

Maaram an Dios nga mapulsanon para ha lalaki nga magkaada padis. Salit ginhimo niya an babaye tikang ha usa han gusok ni Adan, ngan gindara ito ha lalaki sugad nga asawa, nga ha urhi ginngaranan hin Eva. Nalipay gud hi Adan, ngan ha usa nga siday hiya nakagsiring: “Ini yana tul-an han akon mga tul-an, ngan unod han akon unod.” An Dios nagsaysay: “Salit an tawo mabaya han iya amay ngan han iya iroy, ngan [matampo] ha iya asawa: ngan hira magigin usa nga unod.”​—Genesis 2:22-24; 3:20.

An Dios naghatag kanda Adan ngan Eva hin duha nga sugo. Siyahan, ginsugo Niya hira nga kultibaron ngan atamanon an ira urukyan nga tuna ngan ha urhi pun-on ito hin mga anak. Ikaduha, ginsidngan Niya hira nga puydi hira kumaon han bunga han ngatanan nga puno ha hardin labot la han bunga han usa, an “kahoy han kinaadman han kaopayan ngan han karaotan.” (Genesis 2:17) Kon ira ito talapason, mamamatay hira. Pinaagi hito nga mga sugo, gintagan hira han Dios hin higayon nga maipakita nga ira kinakarawat Hiya sugad nga ira Magmarando. An ira pagkamasinugtanon magpapakita liwat han ira gugma ngan pagkamapasalamaton. May-ada gud hira hinungdan nga magpasakop ha Iya mahigugmaon nga pagmando. Waray depekto iton hingpit nga mga tawo. An Biblia nasiring: “An Dios nakakita han ngatanan nga iya ginhimo, ngan iini, ito duro hin kaopay.”​—Genesis 1:31.

​—Iginbasar ha Genesis kapitulo 1 ngan 2.