SOBRA duha ka yukot ka tuig na an naglabay, natawo an usa ka naiiba hinduro nga bata nga nagtubo tubtob nga nagin pinakabantogan nga tawo nga nabuhi. Waray bisan usa nga nabuhi hiton maiha na nga panahon an may-ada mga eruplano o mga awto. Waray pa mga butang sugad han mga telebisyon, mga kompyuter, ngan Internet.

An bata ginngaranan hin Jesus. Hiya an nagin pinakamaaramon nga tawo nga nabuhi ha tuna. Hi Jesus liwat an nagin gimaopayi nga magturutdo. Iginsasaysay niya an makuri nga mga butang ha mga paagi nga masayon ito masabtan.

Hi Jesus nagtutdo ha mga tawo ha bisan diin nga iya hira igkita. Hiya nagtutdo ha ira ha baybayon ngan ha mga baluto. Hiya nagtutdo ha ira ha mga balay ngan kon naglalakat. Hi Jesus waray awto, waray man hiya magbiyahe pinaagi han bus o tren. Hi Jesus nagbaktas tikang ha usa nga lugar ngadto ha iba nga mga lugar, nagtututdo ha mga tawo.

Damu nga mga butang an nahibabaroan naton tikang ha iba nga mga tawo. Kondi mahibabaroan naton an pinakaimportante nga mga butang tikang ha Bantogan nga Magturutdo, hi Jesus. Ha Biblia makikita an mga pulong ni Jesus. Pinaagi han pagbasa o pagpamati hito nga mga pulong tikang ha Biblia, sugad la ito hin nakikiistorya hi Jesus ha aton.

Kay ano nga hi Jesus usa ka Bantogan nga Magturutdo? An usa nga hinungdan amo nga hi Jesus mismo may-ada magturutdo. Ngan maaram hiya nga importante gud an pagpamati. Kondi kan kanay namati hi Jesus? Hin-o an nagtutdo ha iya?— An iya Amay. Ngan an Dios an Amay ni Jesus.

Antes kumanhi ha tuna sugad nga tawo, hi Jesus nabuhi ha langit upod han Dios. Salit hi Jesus naiiba ha iba nga mga tawo tungod kay waray iba nga tawo nga nabuhi ha langit antes matawo dinhi ha tuna. Ha langit hi Jesus nagin masinugtanon nga Anak, usa nga namati ha iya Amay. Salit nakagtutdo  hi Jesus han iya hinbaroan tikang ha Dios. Pinaagi han pagpamati ha imo amay ngan iroy, masusubad mo hi Jesus.

Usa pa nga hinungdan kon kay ano nga hi Jesus usa ka Bantogan nga Magturutdo amo nga nahigugma hiya ha mga tawo. Karuyag niya buligan an mga tawo nga mahibaro mahitungod han Dios. Hi Jesus nahigugma ha mga adulto, kondi nahigugma liwat hiya ha kabataan. Ngan karuyag han kabataan nga makaupod hi Jesus tungod kay nakikiistorya hiya ha ira ngan namamati ha ira.

Usa ka adlaw an pipira nga mga ginikanan nagdara han ira kabataan ngadto kan Jesus. Kondi naghunahuna an mga sangkay ni Jesus nga damu hinduro an buruhaton han Bantogan nga Magturutdo salit waray panahon ha pakiistorya ha gudtiay nga kabataan. Salit ira ginsidngan hira nga bumaya. Kondi ano an ginsiring ni Jesus?— Hi Jesus nagsiring: “Tuguti an mga kabataan pagkadi ha akon, ngan ayaw hira pagdid-i.” Oo, karuyag ni Jesus nga dumaop ha iya an gudtiay nga kabataan. Salit bisan kon hiya usa ka maaramon ngan importante hinduro nga tawo, hi Jesus naghatag hin panahon ha pagtutdo ha gudtiay nga kabataan.​—Markos 10:​13, 14.

 Maaram ka ba kon kay ano nga gintutdoan ni Jesus an kabataan ngan namati ha ira? Usa nga hinungdan amo nga karuyag niya nga lipayon hira pinaagi han pagsumat ha ira han mga butang mahitungod ha Dios, an iya langitnon nga Amay. Paonan-o mo mapapalipay an mga tawo?— Pinaagi han pagsumat ha ira han mga butang nga imo hinbabaroan mahitungod ha Dios.

Ha usa nga okasyon, ginamit ni Jesus an usa ka gutiay nga bata ha pagtutdo ha Iya kasangkayan hin importante nga leksyon. Kinuha niya an bata ngan ginpatindog hiya ha butnga han Iya mga disipulo. Katapos, hi Jesus nagsiring nga ini nga adulto nga mga tawo kinahanglan magbag-o han ira mga paagi ngan magin pariho hinin gutiay nga bata.

Ano an karuyag sidngon ni Jesus han ginsiring niya ito? Maaram ka ba kon paonan-o an usa nga adulto, o bisan an darodaku na nga bata, sadang magin pariho han gutiay nga bata?— Aw, an gutiay nga bata diri maaram hin sugad kadamu han hinbabaroan han mas magurang nga tawo ngan disidido hiya mahibaro. Salit nagsiring hi Jesus nga an iya mga disipulo kinahanglan magin mapainubsanon, sugad han gudtiay nga kabataan nga mapainubsanon. Oo, mahibabaro kita ngatanan hin damu nga mga butang tikang ha iba nga mga tawo. Ngan sadang masabtan naton ngatanan nga an mga katutdoan ni Jesus mas importante kay han aton kalugaringon nga mga ideya.​—Mateo 18:1-5.

Usa pa nga hinungdan kon kay ano nga hi Jesus usa ka Bantogan nga Magturutdo amo nga maaram hiya kon paonan-o himoon an mga butang nga magin makaruruyag ha mga tawo. Iya iginsaysay an mga butang ha simple, matin-aw nga paagi. Nag-istorya hiya mahitungod han katamsihan ngan mga bukad ngan iba pa nga ordinaryo nga mga butang  basi buligan an mga tawo nga masabtan an pipira nga mga butang mahitungod ha Dios.

Usa ka adlaw han nakadto hi Jesus ha ligid han bukid, damu nga mga tawo an dinaop ha iya. Liningkod hi Jesus ngan naghatag hin diskurso, o sermon, ha ira, sugad han makikita mo dinhi ha retrato. Ini nga diskurso tinatawag nga Sermon ha Bukid. Hiya nagsiring: ‘Kitaa an katamsihan ha langit. Diri hira nagtatanom. Diri hira nagtitirok hin pagkaon ha mga bodega. Kondi an Dios ha langit nagpapakaon ha ira. Diri ba kamo maromahal pa ha ira?’

Hi Jesus nagsiring liwat: ‘Mahibaro kamo hin leksyon tikang ha mga liryo ha kapatagan. Nagtutubo hira nga diri nagtatrabaho. Ngan kitaa an ira kaanyag! Bisan an riko nga hi Hadi Salomon waray magsul-ot hin mas maanyag kay han mga liryo ha kapatagan. Salit kon an Dios nagmamangno ha mga bukad nga nagtutubo, diri ba hiya magmamangno liwat ha iyo?’​—Mateo 6:25-33.

Nasasabtan mo ba an leksyon nga igintutdo ni Jesus?— Diri niya karuyag nga mabaraka kita kon diin naton kukuhaon an pagkaon o an mga bado nga  igsusul-ot. Maaram an Dios nga ginkikinahanglan naton ito ngatanan nga mga butang. Waray magsiring hi Jesus nga diri kita sadang magtrabaho para han pagkaon ngan bado. Kondi nagsiring hiya nga sadang unahon naton an Dios. Kon buhaton naton ito, sisiguruhon han Dios nga may-ada kita makakaon ngan bado nga maisusul-ot. Natoo ka ba hito?—

Katapos ni Jesus magyakan, ano an ginhunahuna han mga tawo?— An Biblia nasiring nga nahipausa hira ha paagi han iya pagtutdo. Makaruruyag gud mamati ha iya. An iya ginsiring nakabulig ha mga tawo nga buhaton an husto.​—Mateo 7:28.

 Salit importante gud nga mahibaro kita tikang kan Jesus. Maaram ka ba kon paonan-o naton mahihimo ito?— May-ada kita han iya mga pulong nga nahisurat ha usa nga libro. Maaram ka ba kon ano iton nga libro?— Oo, an Baraan nga Biblia. Nangangahulogan ini nga makakapamati kita kan Jesus pinaagi han pagtagad ha mga mensahe nga aton binabasa ha Biblia. Oo, an Biblia may-ada mag-opay nga mga istorya kon paonan-o an Dios mismo nagsugo ha aton nga mamati kan Jesus. Kitaon naton kon ano an nahitabo.

Usa ka adlaw igin-upod ni Jesus an tulo han iya mga sangkay ngadto ha bawbaw han bukid. An ira mga ngaran amo hi Jakobo, Juan, ngan Pedro. Damu pa an mahibabaroan naton mahitungod hini nga kalalakin-an ha urhi, tungod kay hira nga tulo duok nga mga sangkay ni Jesus. Kondi hinin espesyal nga okasyon, an nawong ni Jesus nagtikang magsanag hin malamrag. Ngan an iya mga panapton nagranggat sugad hin kalamrag, sugad han makikita mo dinhi ha retrato.

Katapos, usa nga tingog tikang ha langit an hinbatian ni Jesus ngan han iya mga sangkay. Ito nagsiring: “Ini an akon Anak, an hinigugma, nga akon inuuyonan; pamati kamo ha iya.” (Mateo 17:1-5, NW) Maaram ka ba kon kanay tingog adto?— Tingog adto han Dios! Oo, an Dios an nagsiring nga sadang mamati hira ha iya Anak.

Kumusta man kita yana nga panahon? Susundon ba naton an Dios ngan mamamati ha iya Anak, an Bantogan nga Magturutdo?— Ito an kinahanglan buhaton naton ngatanan. Nahinunumdoman mo ba kon paonan-o naton ito mabubuhat?—

Oo, makakapamati kita ha Anak han Dios pinaagi han pagbasa han mga asoy han Biblia mahitungod han kinabuhi ni Jesus. Damu an urusahon nga mga butang nga igsusumat ha aton han Bantogan nga Magturutdo. Malilipay ka ha paghibaro hini nga mga butang nga iginsurat ha Biblia. Ngan makakapalipay liwat ito ha imo kon imo sumatan an imo kasangkayan han mag-opay nga mga butang nga imo hinbabaroan.