MAY kilala ka ba nga kabataan nga lalaki o babaye nga nagsasari gumios sugad hin daku na ngan maraugdaog?— Karuyag mo ba makig-upod ha ira? O karuyag mo lugod makig-upod ha usa nga buotan ngan mamurayawon?— An bantogan nga Magturutdo nagsiring: ‘Malipayon an mga mamurayawon, kay hira tatawagon nga “mga anak han Dios.”’​—Mateo 5:9.

Kondi usahay an iba nga mga tawo may-ada ginbubuhat nga nakakapasina ha aton. Diri ba?— Salit bangin karuyag naton bumulos ha ira. Nahitabo ini hadto ha mga disipulo ni Jesus han nagbibiyahe hira upod ni Jesus pakadto ha Jerusalem. Iistoryahan ko ikaw mahitungod hito.

Han hiruhirayo na an ira nabiyahe, ginpauna ni Jesus an pipira han iya mga disipulo ngadto ha usa nga baryo han Samaria basi magbiling hin lugar nga papahuwayan. Kondi diri karuyag han mga tawo didto nga magpabilin hira didto, tungod kay iba an relihiyon han mga Samaritano. Ngan nadiri hira ha bisan hin-o nga nakadto ha siyudad han Jerusalem basi magsingba.

 Kon nahitabo ito ha imo, ano an imo bubuhaton? Masisina ka ba? Mabulos ka ba ha ira?— Ito an karuyag buhaton han mga disipulo nga hi Jakobo ngan Juan. Hira nagsiring kan Jesus: ‘Karuyag mo ba nga sugoon namon an kalayo nga lumusad tikang ha langit ngan sunugon hira?’ Salit diri urusahon nga gintawag hira ni Jesus nga mga Anak han Dalugdog! Kondi hi Jesus nagsiring ha ira nga diri husto nga tratuhon an iba nga mga tawo hito nga paagi.​—Lukas 9:51-56; Markos 3:17.

Totoo nga usahay bangin diri buotan ha aton an mga tawo. An iba nga kabataan bangin diri maruyag nga umapi kita ha ira mga uyag. Bangin sumiring pa ngani hira: “Diri namon karuyag makig-upod ha imo.” Kon mahitabo an sugad hito, mahimo kita masina, diri ba? Bangin karuyag naton bumulos pa ngani ha ira. Kondi sadang ba kita bumulos?—

Kay ano nga diri kuhaon an imo Biblia? Aton abrihan ha Proberbios kapitulo 24, bersikulo 29. Dida mababasa ito: “Ayaw siring: Bubuhaton ko man ha iya sugad han iya binuhat ha akon. Ako mahatag hini nga tawo sumala han iya binuhatan.”

Ano ha hunahuna mo an kahulogan hini nga bersikulo?— Nasiring ito nga diri kita sadang magsari ha pagbulos. Diri naton sadang tratuhon hin maraot an usa ka tawo tungod la kay maraot an iya pagtrato ha aton. Kondi ano man kon ayaton ka han usa nga makig-away? Bangin pasinahon ka niya pinaagi han pagtawag ha imo hin nakakaaringit nga mga ngaran. Bangin tamayon ka niya ngan sumiring hiya nga nahahadlok ka. Pananglitan tawagon ka niya nga matalaw. Ano an sadang mo buhaton? Sadang ka ba makig-away?—

Aton kitaon na liwat kon ano an ginsisiring han Biblia. Paklia ha Mateo kapitulo 5, bersikulo 39. Dida hi Jesus nasiring: “Diri kamo umato ha tawo nga maraot; kondi bisan hin-o an magtampalo han imo too nga bayhon, ibirik an luyo man ha iya.” Ano ha hunahuna mo an karuyag ipasabot hito ni Jesus? Iginpasabot ba niya nga kon suntukon ka han tawo ha usa han imo bayhon, sadang mo ba tugotan nga suntukon ka niya ha luyo nga bayhon?—

 Diri, diri gud ito an karuyag ipasabot ni Jesus. An pagtampalo diri pariho ha pagsuntok pinaagi han kamao. Mas pariho ito ha pagduso. An usa ka tawo bangin magtampalo ha aton basi mangayat hin away. Karuyag niya nga masina kita. Ngan kon masina kita ngan bumulos ha pagduso, ano an nahitatabo?— Posible nga igkaaway kita.

Kondi diri karuyag ni Jesus nga makig-away an iya mga sumurunod. Salit hiya nagsiring nga kon may-ada magtampalo ha aton, diri kita sadang bumulos ha pagtampalo liwat. Diri kita sadang masina ngan makig-away. Kon buhaton naton ito, ipinapakita naton nga pariho kita ha usa nga nagtikang han away.

Kon nagtitikang an samok, ha hunahuna mo, ano an gimaopayi nga angay buhaton?— Amo an pagbaya. Bangin igduso ka niya hin pipira pa ka beses. Kondi posible nga umundang hira katapos hito. Kon bumaya ka, diri  ito nangangahulogan nga maluya ka. Nangangahulogan ito nga marig-on ka ha pagbuhat han husto.

Kondi ano man kon tugotan mo nga mahidabi ka ha away ngan nagdaog ka? Ano an mahimo mahitabo katapos hito?— An imo ginsuntok mahimo bumalik upod an pipira nga sangkay. Bangin balbagon ka pa ngani han daku nga kahoy o bun-on han kutsilyo. Salit, nasasabtan mo na ba kon kay ano nga diri karuyag ni Jesus nga makig-away kita?—

Ano an sadang naton buhaton kon nakikita naton an iba nga mga tawo nga nag-aaway? Sadang ba kita umugop ha usa o ha kakontra?— An Biblia nagsusumat ha aton kon ano an husto. Paklia ha Proberbios kapitulo 26, bersikulo 17. Ito nasiring: “Hiya nga naagi, ngan nga mangisog ha pag-api han away nga diri nahitutungod ha iya, pariho hin usa nga nagdadara hin ayam nga kinakaptan an mga talinga.”

Ano an mahitatabo kon imo kaptan an mga talinga han ayam? Masusul-an an ayam, ngan hahangrabon ka hito, diri ba? Kon mas nangangalimbasog an ayam nga makabuhi, mas kukusgon mo an imo pagkapot ha mga talinga ngan mas mangingisog an ayam. Kon buhian mo hiya, posible nga kagton ka gud hito. Kondi matindog ka la ba dida ngan kaptan an mga talinga hito ha kadayonan?—

Aw, ito an klase hin kasamok nga bangin mahidabi kita kon maghilabot kita ha away han iba nga mga tawo. Bangin diri kita maaram kon hin-o an nagtikang han away o kon kay ano nga nag-aaway hira. Bangin ginkakastigo an usa ka tawo, kondi bangin may-ada hiya ginkawat tikang ha iba. Kon aton buligan hiya, binubuligan naton an usa nga kawatan. Diri ito husto, diri ba?

 Salit, ano an sadang mo buhaton kon may nakikita ka nga away?— Kon ha eskwelahan ito, mahimo ka dumalagan ngan isumat ito ha usa nga magturutdo. Ngan kon ha gawas ito han eskwelahan, mahimo mo tawagon an usa han imo mga ginikanan o an usa nga polis. Oo, bisan kon karuyag han iba nga mga tawo nga makig-away, sadang kita magin mamurayawon.

An totoo nga mga disipulo ni Jesus nangangalimbasog gud nga likyan an kahidabi ha away. Hini nga paagi ipinapakita naton nga marig-on kita para han husto. An Biblia nasiring nga an disipulo ni Jesus “diri kinahanglan makig-away, kondi kinahanglan matalunoy ha ngatanan.”​—2 Timoteo 2:24.