AN NGATANAN nga mga ginikanan may-ada bahin ha importante nga hitabo nga diri masasabtan hin bug-os han tawo. An tagsa ha ira naghahatag hin usa ka bahin han ira mga lawas. Sugad nga resulta, an nagtutubo ha tiyan han iroy amo an naporma hin maopay nga buhi nga tawo. Diri urusahon, kon sugad, nga kon natatawo an usa nga minasus-an, tinatawag han mga tawo ito nga hitabo sugad nga “an milagro han katawo.”

Siyempre, an panganak tinikangan pa la han responsabilidad han mga ginikanan. Ha siyahan, an mga minasus-an haros bug-os nga nadepende ha ira mga ginikanan, kondi samtang nagtutubo hira, nagkikinahanglan hira hin labaw pa kay han pisikal nga atensyon. Kinahanglan buligan hira nga magtubo ha mental, emosyonal, moral, ngan ha espirituwal nga paagi.

Basi magtubo hin maopay, an kabataan labi na nga nagkikinahanglan han gugma han mga ginikanan. Bisan kon importante an mga pulong nga nagpapahayag hin gugma, an mga pulong kinahanglan pamatud-an han mga buhat. Oo, ginkikinahanglan han kabataan an maopay nga susbaranan han mga ginikanan. Nagkikinahanglan hira hin giya ha moral, mga prinsipyo nga sadang sundon ha pagkinabuhi. Ngan ginkikinahanglan nira ini tikang ha ira pagkabata padayon. Nahitatabo an nakakaguol nga mga butang kon an kabataan waray nakakarawat nga bulig tubtob nga waray na mahihimo.

An gimaopayi nga mga prinsipyo amo adton makikita ha Biblia. An instruksyon nga iginbasar ha Biblia may-ada diri-matupngan nga mga kapulsanan. Pinaagi han sugad nga instruksyon, an kabataan nagtitikang makasabot nga an iginsusumat ha ira, diri mga pulong la han usa ka tawo, kondi mga pulong han ira Maglalarang, han ira langitnon nga Amay. Tungod hini, nagigin marig-on an sagdon salit waray bisan ano nga makakatugbang hito.

An Biblia nag-aaghat ha mga ginikanan nga mangalimbasog ha pagpasilsil han husto nga mga prinsipyo ha hunahuna han ira kabataan. Kondi, samtang nagtutubo an kabataan, agsob nga nakukurian an mga ginikanan ha pakiistorya ha ira mahitungod  han mga butang nga pinakaimportante. Ini nga libro, Mahibaro Tikang ha Bantogan nga Magturutdo, dinisenyo ha pagbulig basi mapugngan nga mahitabo an sugad nga kahimtang. Maghahatag ito ha iyo ngan ha iyo kabataan hin espirituwal nga barasahon nga sadang basahon niyo nga magkaupod. Kondi labaw pa hito, sadang makaaghat ito hin pag-iristorya han mga bata ngan hadton nagbabasa hini nga libro ha ira.

Maoobserbahan niyo nga an libro nagdadasig ha kabataan nga bumaton. Damu nga angayan nga mga pakiana an iginbangon dinhi ha libro. Kon aada na kamo hini nga mga pakiana, makikita niyo an bagis (​—). Nagpapahinumdom ini hin paghunong ngan pag-aghat ha bata nga bumaton. Naruruyag an kabataan nga makigbahin. Kon diri tutugotan an bata nga bumaton, an bata madagmit mawad-an hin interes.

Kondi, mas importante, ini nga mga pakiana mabulig ha iyo nga mahibaroan kon ano an ginhuhunahuna han bata. Oo, an bata bangin maghatag hin sayop nga mga baton. Kondi an inimprinta nga materyal nga nasunod ha tagsa nga pakiana dinisenyo ha pagbulig ha bata nga mapatubo an maopay nga paagi han paghunahuna.

An usa ka espesyal nga bahin han libro amo an sobra 230 nga retrato hito. An kadam-an hini may-ada mga komento nga nagdadasig ha bata nga igpahayag an iya ginhuhunahuna, sumala ha iya nakikita ngan nababasa. Salit repasoha an mga retrato ha bata. Maopay nga bulig ito ha pagtutdo ngan ha pagpabug-at han mga leksyon nga igintututdo.

Kon maaram na magbasa an bata, dasiga hiya nga basahon an libro ha imo ngan ha iya kalugaringon ha daku nga tingog. Kon mas binabasa niya ito, mas maisisilsil an maopay nga sagdon hito ha iya hunahuna ngan kasingkasing. Kondi basi maparig-on an gugma ngan pagtahod nimo ngan han imo anak, sadang basahon niyo an libro nga magkaupod, ngan buhata ito hin regular.

Ha paagi nga baga in haros diri-mahuhunahuna ha diri pa la maiha nga naglabay, nakikita na han kabataan an sayop nga mga buhat ha sekso, espiritismo, ngan iba pa nga magraot nga mga buhat. Salit nagkikinahanglan hira hin panalipod, nga maibubulig hini nga libro ha dungganon kondi prangka nga paagi. Kondi, an kabataan kinahanglan giyahan labi na ngadto ha Surok han ngatanan nga kinaadman, an aton langitnon nga Amay, hi Jehova nga Dios. Ini pirme an ginbubuhat ni Jesus, an Bantogan nga Magturutdo. Sinsero nga naglalaom kami nga ini nga libro mabulig ha iyo ngan ha iyo pamilya nga mabansay an iyo mga kinabuhi basi makalipay kan Jehova, ngan bibendisyonan kamo ha kadayonan.