1, 2. (a) Ano an bangin imposible ha damu nga tawo, kondi an Biblia nagpapasarig ha aton han ano? (b) Hi Abraham gintagan hin ano nga duok nga relasyon, ngan kay ano?

 ANO an imo aabaton kon an Maglalarang han langit ngan han tuna nagsiring mahitungod ha imo, “Ini an akon sangkay”? Ha damu nga tawo, bangin imposible ito. Aw, paonan-o an usa la nga tawo magigin sangkay ni Jehova nga Dios? Kondi, an Biblia nagpapasarig ha aton nga mahimo gud kita magin duok ha Dios.

² Hi Abraham nga nabuhi ha kadaan nga mga panahon usa nga nagpahimulos hiton nga pagkaduok. Gintawag ni Jehova iton nga patriarka nga “akon sangkay.” (Isaias 41:8) Oo, gintagad ni Jehova hi Abraham nga iya duok nga sangkay. Hi Abraham gintagan hiton duok nga relasyon tungod kay hiya “tinoo kan Jehova.” (Santiago 2:23) Yana, liwat, hi Jehova nagbibiling hin mga higayon basi magin duok nga sangkay adton nag-aalagad ha iya ngan basi ‘igpahayag an iya gugma’ ha ira. (Deuteronomio 10:15) An iya Pulong nagsasagda: “Magin duok ha Dios, ngan magigin duok hiya ha iyo.” (Santiago 4:8) Hini nga mga pulong makikita naton an usa nga pagdapit ngan usa nga saad.

3. Ano nga pagdapit an iginhahatag ha aton ni Jehova, ngan ano nga saad an may kalabotan hito?

³ Gindadapit kita ni Jehova nga magin duok ha iya. Andam ngan disidido hiya ha pagkarawat ha aton sugad nga iya mga sangkay. Ngan, nagsasaad hiya nga kon gumios kita basi magin duok ha iya, bubuhaton niya an pariho. Hiya magigin duok ha aton. Salit hingangada kita ha presyoso gud nga kahimtang—“duok nga pakigsangkay kan Jehova.”  (Salmo 25:14) An “duok nga pakigsangkay” nagpapasabot han ideya han kompidensyal nga pakiistorya ha usa ka espesyal nga sangkay.

4. Paonan-o mo isasaysay an usa ka duok nga sangkay, ngan ha ano nga paagi pinamamatud-an ni Jehova nga sugad hiya hiton nga sangkay ngada hadton naduok ha iya?

⁴ May-ada ka ba duok nga sangkay nga masusumatan mo han imo mga sekreto? Iton nga sangkay usa nga napaid ha imo. Nasarig ka ha iya, kay pinamamatud-an niya nga maunungon hiya. Nagdudugang an imo kalipay kon iginsusumat mo ito ha iya. An iya mapinairon nga pagpamati nagpapagaan han imo mga kasub-anan. Bisan kon baga in waray iba nga nakakasabot ha imo, nasasabtan ka niya. Sugad man, kon nagigin duok ka ha Dios, nagkakaada ka usa ka espesyal nga Sangkay nga nagpapabili gud ha imo, nagtatagad gud ha imo, ngan bug-os nga nakakasabot ha imo. (Salmo 103:14; 1 Pedro 5:7) Igintatapod mo ha iya an imo gihilarumi nga mga pagbati, kay maaram ka nga hiya maunungon hadton maunungon ha iya. (Salmo 18:25) Kondi, inin espesyal nga pakigsangkay ha Dios madadangat naton tungod la kay hiya an naghimo hito nga posible.

5. Ano an ginbuhat ni Jehova basi mahimo kita magin duok ha iya?

⁵ Kon ha aton la kalugaringon, kita sugad nga magpakasasala diri gud magigin duok ha Dios. (Salmo 5:4) “Pero iginpapakita ha aton han Dios an iya mismo gugma kay, samtang mga makasasala pa kita, an Kristo namatay para ha aton,” nagsurat hi apostol Pablo. (Roma 5:8) Oo, naghikay hi Jehova para kan Jesus nga “maghatag han iya kinabuhi sugad nga lukat para ha damu.” (Mateo 20:28) An aton pagtoo hito nga halad lukat an paagi nga mahimo kita magin duok ha Dios. Tungod kay an Dios an ‘una nga naghigugma ha aton,’ iya iginbutang an basihanan para ha aton nga makigsangkay ha iya.—1 Juan 4:19.

6, 7. (a) Paonan-o naton hinbabaroan nga hi Jehova diri usa nga nakatago, diri-makikilala nga Dios? (b) Ha ano nga mga paagi iginpapakilala ni Jehova an iya kalugaringon?

 ⁶ Hi Jehova naghimo hin usa pa nga paagi: Iya iginpapakilala an iya kalugaringon ha aton. Ha bisan ano nga pakigsangkay, an pagkaduok iginbabasar ha totoo nga pagkilala ha usa nga tawo, pinabibilhan an iya mga kalidad ngan mga paagi. Salit kon hi Jehova usa nga nakatago, diri-makikilala nga Dios, diri gud kita magigin duok ha iya. Kondi, imbes nga itago an iya kalugaringon, karuyag niya nga makilala naton hiya. (Isaias 45:19) Dugang pa, mahimo hibaroan han ngatanan an iya iginsusumat mahitungod han iya kalugaringon, bisan hadton bangin tagdon nga minos sumala ha mga suruklan han kalibotan.—Mateo 11:25.

⁷ Paonan-o iginpapakilala ni Jehova an iya kalugaringon ha aton? An iya mga linarang nagsusumat han pipira nga mga bahin han iya personalidad—an pagkadaku han iya gahum, an pagkahilarom han iya kinaadman, an pagkahura han iya gugma. (Roma 1:20) Kondi an pagpahayag ni Jehova han iya kalugaringon diri pinaagi la han mga butang nga iya ginlarang. Sugad nga Gihitaasi nga Nagkukomunikar, nagtagana hiya hin sinurat nga kapahayagan han iya kalugaringon ha iya Pulong, an Biblia.

8. Kay ano nga masisiring nga an Biblia mismo usa nga ebidensya han gugma ni Jehova ha aton?

⁸ An Biblia mismo usa nga ebidensya han gugma ni Jehova ha aton. Ha iya Pulong, iya iginpapakilala an iya kalugaringon ha mga paagi nga masasabtan naton—proyba nga diri la kay nahigugma hiya ha aton kondi karuyag niya nga makilala ngan higugmaon naton hiya. An aton nababasa dida hinin presyoso nga libro nakakahimo ha aton  nga magin duok ha iya. (Salmo 1:1-3) Aton paghisgotan an pipira han makalilipay nga mga paagi nga iginpapakilala ni Jehova an iya kalugaringon ha iya Pulong.

9. Ano an pipira nga mga ehemplo han direkta nga mga pahayag ha Biblia nga nagsasaysay han mga kalidad han Dios?

⁹ An Kasuratan nagsusulod hin damu direkta nga mga pahayag nga nagsasaysay han mga kalidad han Dios. Tigamni an pipira nga mga ehemplo. “Hi Jehova nahigugma han hustisya.” (Salmo 37:28) An Dios ‘daku an gahum.’ (Job 37:23) “‘Maunungon ako,’ nasiring hi Jehova.” (Jeremias 3:12) “Maaramon an iya kasingkasing.” (Job 9:4) Hiya “usa nga Dios nga maloloy-on ngan mapinairon, diri madagmit masina ngan hura hin maunungon nga gugma ngan kamatuoran.” (Exodo 34:6) “Ikaw, O Jehova, maopay ngan andam magpasaylo.” (Salmo 86:5) Ngan, sugad han gin-unabi ha siyahan nga kapitulo, usa nga kalidad an nangunguna: “An Dios gugma.” (1 Juan 4:8) Samtang namamalandong ka hinin makaruruyag nga mga kalidad, diri ka ba nadadani hinin diri-matupngan nga Dios?

10, 11. (a) Basi mabuligan kita nga makita hin mas matin-aw an iya personalidad, ano an iginbutang ni Jehova ha iya Pulong? (b) Ano nga ehemplo ha Biblia an nabulig ha aton nga mahanduraw an nagios nga gahum han Dios?

¹⁰ Dugang pa ha pagsumat ha aton han iya mga kalidad, mahigugmaon nga iginbutang ni Jehova ha iya Pulong kon paonan-o ipinakita niya an espisipiko nga mga ehemplo hini nga mga kalidad ha iya pagtagad ha iba. Matin-aw  nga iginhuhulagway ha aton hunahuna hito nga mga asoy an pagladawan nga nabulig ha aton nga makita hin mas matin-aw an magkalainlain nga mga bahin han iya personalidad. Ito, ha baylo, nabulig ha aton nga magin duok ha iya. Tagda an usa nga ehemplo.

¹¹ Usa ka butang nga mabasa nga an Dios may “urusahon gud nga gahum.” (Isaias 40:26) Lain nga butang an pagbasa kon paonan-o niya ginluwas an Israel ha Dagat nga Pula ngan katapos, sinuportahan an nasud ha kamingawan ha sulod hin 40 ka tuig. Mahahanduraw mo an dagku nga balud han katubigan nga nababahin. Mahahanduraw mo an katawohan—bangin 3,000,000 ngatanan—nga naglalakat ha mamara nga tuna han dagat, an binagtik nga katubigan natindog sugad hin madakmol nga mga pader ha paluyoluyo. (Exodo 14:21; 15:8) Makikita mo an ebidensya han nagpapanalipod nga pagmangno han Dios ha kamingawan. An tubig ginawas tikang ha bato. An pagkaon, nga sugad hin busag nga mga liso, nakita ha tuna. (Exodo 16:31; Numeros 20:11) Diri la iginpapakita dinhi ni Jehova nga may-ada hiya gahum kondi nga ginagamit niya ito para ha iya katawohan. Diri ba makapadasig an paghibaro nga an aton mga pag-ampo nakakaabot ha gamhanan nga Dios nga “aton arayopan ngan kusog, andam pirme bumulig ha mga panahon han kasakitan”?—Salmo 46:1.

12. Paonan-o nabulig hi Jehova ha aton basi “makita” hiya ha mga termino nga masasabtan naton?

¹² Hi Jehova, nga usa nga Espiritu, nagbubuhat hin damu pa ha pagbulig ha aton nga makilala hiya. Sugad nga mga tawo limitado an nakikita han aton mga mata ngan salit diri naton makikita an lugar han mga espiritu. An pagsaysay han Dios han iya kalugaringon ha aton ha espiritu nga mga termino magigin pariho han imo pagsaysay han mga detalye han imo hitsura, sugad han kolor han imo mata o mga tagiptip, ha usa nga natawo nga buta. Lugod, maloloy-on  nga binubuligan kita ni Jehova nga “makita” hiya ha mga termino nga aton masasabtan. Usahay, ginagamit niya an simboliko nga mga pulong ngan mga ilustrasyon, iginpapariho an iya kalugaringon ha mga butang nga hinbabaroan naton. Iya iginsasaysay pa ngani an iya kalugaringon sugad nga may-ada pagkapariho ha tawhanon nga hitsura. a

13. Ano nga paghulagway ha hunahuna an iginsasaysay han Isaias 40:11, ngan ano an epekto hito ha imo?

¹³ Tigamni an paghulagway kan Jehova ha Isaias 40:11: “Pariho hin paraataman hin panon iya mamangnoan an iya panon. Pinaagi han iya butkon titirukon niya an nati nga mga karnero, ngan iya ito kukuguson dida ha iya dughan.” Hi Jehova iginpapariho dinhi ha usa nga paraataman han mga karnero nga nagkukugos han mga nati nga karnero pinaagi han “iya butkon.” Iginpapasabot hini an abilidad han Dios ha pagpanalipod ngan pagsuporta ha iya katawohan, bisan ha mga mas magluya. Makakaabat kita nga talwas ha iya makusog nga mga butkon, kay kon maunungon kita ha iya, diri gud kita niya babayaan. (Roma 8:38, 39) An Harangdon nga Paraataman nagkukugos han mga nati nga karnero “ha iya dughan”—usa nga ekspresyon para ha haluag nga mga pilo han uroigbaw nga panapton, nga dida hito gindadara usahay han paraataman an natatawo pa la nga karnero. Salit makakasarig kita nga hi Jehova nahigugma ngan maloloy-on nga nagtatagad ha aton. Natural la nga maruyag kita nga magin duok ha iya.

14. Kay ano nga masisiring nga hi Jehova naghahatag hin pinakamatin-aw nga kapahayagan han iya kalugaringon pinaagi kan Jesus?

¹⁴ Ha iya Pulong, hi Jehova naghahatag han pinakamatin-aw nga kapahayagan han iya kalugaringon pinaagi han iya hinigugma nga Anak, hi Jesus. Waray usa nga makakapakita han panhunahuna ngan mga pagbati han Dios hin mas duok o makakagsaysay mahitungod ha Iya hin mas matin-aw kay ha ginbuhat ni Jesus. Aw, iton nga suhag nga Anak kaupod na han iya Amay antes larangon an iba nga espiritu nga mga linarang ngan an pisikal nga uniberso. (Colosas 1:15) Kilala gud ni Jesus hi Jehova. Salit hiya makakasiring: “Waray bisan hin-o nga nakilala kon hin-o an Anak kondi an Amay la, ngan waray bisan hin-o nga nakilala kon hin-o an Amay kondi an Anak la ngan an bisan hin-o nga karuyag sumatan han Anak mahitungod ha iya.” (Lucas 10:22) Han nakanhi ha tuna sugad nga tawo, iginsumat ni Jesus an iya Amay ha duha importante nga paagi.

15, 16. Ha ano duha nga paagi iginsumat ni Jesus an iya Amay?

¹⁵ Siyahan, an mga katutdoan ni Jesus nabulig ha aton nga makilala an iya Amay. Iginsaysay ni Jesus hi Jehova ha mga termino nga nakakabantad han aton kasingkasing. Pananglitan, ha pagsaysay han maloloy-on nga Dios nga nakarawat han pagbalik han mabinasulon nga magpakasasala, iginpariho ni Jesus hi Jehova ha usa nga mapinasayloon nga amay nga nalooy gud ha pakakita ha iya binalik nga anak nga makaragon salit dinalagan hiya ha pagtapo ha iya ngan paghangkop ha iya anak ngan mahigugmaon nga ginharokan hiya. (Lucas 15:11-24) Iginsaysay liwat ni Jesus hi Jehova sugad nga Dios nga ‘nagpapahirani’ han mga tawo nga matadong an kasingkasing tungod kay nahigugma hiya ha ira sugad nga mga indibiduwal. (Juan 6:44) Hinbabaroan pa ngani niya kon an gutiay nga  maya nahuhulog ha tuna. “Ayaw kahadlok,” siring ni Jesus, “mas birilhon kamo kay ha damu nga maya.” (Mateo 10:29, 31) Sigurado nga nagigin hirani kita ha sugad mahigugmaon nga Dios.

¹⁶ Ikaduha, ipinapakita ha aton han susbaranan ni Jesus kon ano hi Jehova. Hingpit gud nga ipinakita ni Jesus an mga kalidad han iya Amay salit hiya makakasiring: “An bisan hin-o nga nakakita ha akon nakakita liwat ha Amay.” (Juan 14:9) Salit, kon nababasa naton ha mga Ebanghelyo an mahitungod kan Jesus—an mga pagbati nga iya ipinakita ngan an paagi han iya pakig-upod ha iba—sugad hin nakikita naton an buhi nga paghulagway han iya Amay. Diri gud maihahatag ha aton ni Jehova an mas matin-aw pa hito nga kapahayagan han iya mga kalidad. Kay ano?

17. Iilustrar an ginbubuhat ni Jehova ha pagbulig ha aton nga masabtan kon ano hiya.

¹⁷ Ha pag-ilustrar: Hunahunaa an pagsaysay kon ano an pagkabuotan. Bangin ihatag mo  an kahulogan hito pinaagi han mga pulong. Kondi kon makakatudlok ka hin usa nga aktuwal nga nagbubuhat hin pagkabuotan ngan sumiring, “Usa ito nga susbaranan han pagkabuotan,” an pulong nga “pagkabuotan” nagkakaada dugang nga kahulogan ngan mas masayon masabtan. Pariho hito an ginbubuhat ni Jehova ha pagbulig ha aton nga masabtan kon ano hiya. Dugang pa ha pagsaysay han iya kalugaringon ha mga pulong, iginhahatag niya ha aton an buhi nga susbaranan han iya Anak. Kan Jesus, nakikita an mga kalidad han Dios nga nagios. Pinaagi han mga asoy han Ebanghelyo nga nagsasaysay mahitungod kan Jesus, hi Jehova, baga hin nasiring: “Sugad hito ako.” Paonan-o iginsasaysay han inspirado nga rekord hi Jesus han nakanhi ha tuna?

18. Paonan-o ipinakita ni Jesus an mga kalidad nga gahum, hustisya, ngan kinaadman?

¹⁸ An upat nangunguna nga mga kalidad han Dios matahom nga ipinakita ni Jesus. May-ada hiya gahum ha sakit, gutom, bisan ha kamatayon. Kondi, diri sugad han hakog nga mga tawo nga sayop an paggamit han ira gahum, waray gud niya gamita an iya milagroso nga gahum para ha iya kalugaringon o ha pagdaot ha iba. (Mateo 4:2-4) Hiya nahigugma han hustisya. An iya kasingkasing napuno hin matadong nga kasina han makita an malimbong nga mga magbaraligya nga naglilimbong ha mga tawo. (Mateo 21:12, 13) Gintratar niya hin patas an pobre ngan an tinalumpigos, binuligan hira nga ‘marepreskohan.’ (Mateo 11:4, 5, 28-30) Diri-matupngan an kinaadman ha mga katutdoan ni Jesus, nga “labaw pa kan Solomon.” (Mateo 12:42) Kondi waray gud ighambog ni Jesus an iya kinaadman. An iya mga pulong nakaabot ha mga kasingkasing han ordinaryo nga mga tawo, kay an iya mga katutdoan matin-aw, simple, ngan praktikal.

19, 20. (a) Paonan-o bantogan nga susbaranan han gugma hi Jesus? (b) Samtang binabasa ngan pinamamalandong naton an susbaranan ni Jesus, ano an sadang hinumdoman naton pirme?

 ¹⁹ Hi Jesus bantogan gud nga susbaranan han gugma. Ha kabug-osan han iya ministeryo, ipinakita niya an gugma ha damu nga mga bahin hito, upod na an empatiya ngan pagpaid. Nalooy hiya ha pakakita han pag-antos han iba. Iton mapinairon nga pagtagad ha iba pauroutro nga nagpagios ha iya ha pagbuhat. (Mateo 14:14) Bisan kon gintambal niya an masakit ngan ginpakaon an nagugutom, ipinakita ni Jesus an pagpaid ha mas importante gud nga paagi. Binuligan niya an iba nga hibaroan, karawaton, ngan higugmaon an kamatuoran mahitungod han Ginhadian han Dios, nga magdadara hin permanente nga mga bendisyon ha katawohan. (Marcos 6:34; Lucas 4:43) Labaw ha ngatanan, ipinakita ni Jesus an nagsasakripisyo-ha-kalugaringon nga gugma pinaagi han kinaburut-on nga paghatag han iya kinabuhi sugad nga tawo para ha iba.—Juan 15:13.

²⁰ Salit, diri urusahon nga an mga tawo ha ngatanan nga pangidaron ngan gintikangan nadani hini nga tawo nga may-ada maloloy-on ngan hilarom nga mga pagbati. (Marcos 10:13-16) Kondi, samtang binabasa ngan pinamamalandong naton an buhi nga susbaranan ni Jesus, hinumdoman naton pirme nga hini nga Anak matin-aw nga nakikita naton an mga kalidad han iya Amay.—Hebreo 1:3.

21, 22. Ano an nahiuupod ha pamiling kan Jehova, ngan ano an iginsasaysay hini nga bulig ha pag-aram nga mabulig ha aton para hini nga tumong?

²¹ Pinaagi han matin-aw gud nga pagpakilala han iya kalugaringon ha iya Pulong, matin-aw nga iginpapahibaro ni Jehova nga karuyag niya nga magin duok kita ha iya. Kondi, diri kita ginpipirit niya nga magkaada inuyonan  nga relasyon ha iya. Aada ha aton an pagbiling kan Jehova ‘samtang mahiaagian pa hiya.’ (Isaias 55:6) An pamiling kan Jehova nag-uupod han paghibaro han iya mga kalidad ngan mga paagi sugad han iginsusumat ha Biblia. An bulig ha pag-aram nga binabasa mo yana gindisenyo ha pagbulig ha imo para hini nga tumong.

²² Imo maoobserbahan nga ini nga libro ginbahin sumala ha upat nangunguna nga mga kalidad ni Jehova: gahum, hustisya, kinaadman, ngan gugma. An tagsa nga bahin nagtitikang pinaagi han kabug-osan nga sumaryo han kalidad. An sunod pipira nga mga kapitulo naghihisgot kon paonan-o ipinapakita ni Jehova iton nga kalidad ha magkalain-lain nga mga bahin hito. An tagsa nga bahin may-ada liwat usa nga kapitulo nga nagsasaysay kon paonan-o ipinakita ni Jesus an kalidad, ngan usa pa nga kapitulo nga nag-uusisa kon paonan-o naton maipapakita ito ha aton kinabuhi.

23, 24. (a) Isaysay an espesyal nga bahin nga “Mga Pakiana nga Angay Pamalandungon.” (b) Paonan-o an pamalandong nabulig ha aton nga magin duok pa gud ha Dios?

²³ Tikang hini nga kapitulo, may-ada espesyal nga bahin  nga may ulohan “Mga Pakiana nga Angay Pamalandungon.” Pananglitan, kitaa an  kahon ha pahina 28. An mga teksto ngan mga pakiana diri para ha pagrepaso han kapitulo. Lugod, an katuyoan hito amo an pagbulig ha imo nga hunahunaon an iba importante nga mga bahin han tema. Paonan-o mo magagamit hin maopay ini nga bahin? Kitaa an tagsa nga teksto nga gin-unabi, ngan basaha hin maopay an mga bersikulo. Katapos, tagda an pakiana nga kaupod han tagsa nga teksto. Hunahunaa an mga baton. Mahimo ka magsaliksik. Pakianhi an imo kalugaringon hin dugang nga mga pakiana: ‘Ano an iginsusumat ha akon hini nga impormasyon mahitungod kan Jehova? Paonan-o ito nakakaapekto ha akon kinabuhi? Paonan-o ko magagamit ito ha pagbulig ha iba?’

²⁴ An sugad nga pamalandong makakabulig ha aton nga magin duok pa gud kan Jehova. Kay ano? Iginkakaw-ing han Biblia an pamalandong ha kasingkasing. (Salmo 19:14) Kon aton pinamamalandong nga may kinasingkasing nga apresasyon an aton hinbabaroan mahitungod ha Dios, an impormasyon nahisusulod ha aton simboliko nga kasingkasing, diin nakakaapekto ito han aton panhunahuna, nagbabantad han aton mga pagbati, ngan ha kataposan nagpapagios ha aton. An aton gugma ha Dios naghihilarom, ngan ito nga gugma, ha baylo, nagpapagios ha aton nga maruyag nga lipayon hiya sugad nga aton hinigugma gud nga Sangkay. (1 Juan 5:3) Basi hingada hito nga relasyon, kinahanglan hibaroan naton an mga kalidad ngan mga paagi ni Jehova. Kondi, siyahan, aton paghisgotan an usa nga bahin han personalidad han Dios nga naghahatag hin marig-on nga hinungdan nga magin duok ha iya—an iya pagkabaraan.