1, 2. Ano nga bisyon an nakarawat ni propeta Isaias, ngan ano an igintututdo hito ha aton mahitungod kan Jehova?

 HI Isaias nahipausa gud ha kiritaon ha iya atubangan—usa nga bisyon tikang ha Dios. Baga in totoo gud ito! Hi Isaias ha urhi nagsurat nga iya ‘nakita hi Jehova’ ha Iya hitaas nga trono. An hilaba nga bado ni Jehova nakalukop han daku nga templo ha Jerusalem.—Isaias 6:1, 2.

² Hi Isaias nahipausa liwat ha iya hinbatian—an makusog gud nga pagkanta nga nakabay-og ito ha templo, bisan ha mga pundasyon hito. An pagkanta nagtitikang ha mga serapin, mga espiritu nga linarang nga hitaas gud an ranggo. Ha ira makusog urosa nga pagkanta hinbatian an mga pulong han matin-aw nga pagkaharangdon: “Baraan, baraan, baraan hi Jehova han mga hugpo. An bug-os nga tuna puno han iya himaya.” (Isaias 6:3, 4) An pagkanta han pulong nga “baraan” hin tulo ka beses naghatag hito hin labi nga pagpabug-at, ngan angayan ito, kay hi Jehova baraan ha gihitaasi nga klase. (Pahayag 4:8) An pagkabaraan ni Jehova ginpapabug-atan ha bug-os nga Biblia. Ginatos nga mga bersikulo an nagkakaw-ing han iya ngaran ha mga pulong nga “baraan” ngan “pagkabaraan.”

3. Paonan-o an sayop nga mga panhunahuna ha pagkabaraan ni Jehova nagtutugway ha damu nga bumulag ha Dios imbes nga magin duok ha iya?

³ Matin-aw, kon sugad, usa han importante nga mga butang nga karuyag ni Jehova nga masabtan naton mahitungod ha iya amo nga hiya baraan. Kondi, damu yana an diri naruruyag han ideya mismo. Sayop nga iginkakaw-ing han iba an pagkabaraan ha pagpakamatadong-ha-kalugaringon  o palso nga pagkadiosnon. An mga tawo nga nangangalimbasog nga malamposan an negatibo nga panhunahuna ha ira kalugaringon bangin maghunahuna han pagkabaraan han Dios nga mas makaharadlok imbes nga makaruruyag. Bangin nahahadlok hira nga diri gud hira takos nga magin duok ngada hinin baraan nga Dios. Salit, damu an nabulag ha Dios tungod han iya pagkabaraan. Makasurubo ito, kay an pagkabaraan han Dios tinuod nga amo an usa ka marig-on nga hinungdan nga magin duok ha iya. Kay ano? Antes naton batunon ito nga pakiana, aton paghisgotan kon ano an totoo nga pagkabaraan.

4, 5. (a) Ano an kahulogan han “pagkabaraan,” ngan ano an diri kahulogan hito? (b) Ha ano duha nga importante nga paagi nga “bulag” hi Jehova?

⁴ An pagkabaraan han Dios diri nangangahulogan nga hiya hambog, mapahitas-on, o matamay ha iba. Ha kabaliktaran, napupungot hiya hito nga mga kalidad. (Proberbios 16:5; Santiago 4:6) Salit, ano gud an kahulogan han pulong nga “baraan”? Ha Hebreo nga Biblia, an pulong nagtitikang ha termino nga nangangahulogan nga “bulag.” Ha pagsingba, an “baraan” naaplikar ha iginbulag tikang ha ordinaryo nga paggamit, o gintatagad nga sagrado. An pagkabaraan marig-on nga nagpapasabot liwat han ideya han kalimpyo ngan kaputli. Paonan-o naaplikar kan Jehova ini nga pulong? Nangangahulogan ba ito nga “bulag” hiya tikang ha diri-hingpit nga mga tawo, hirayo gud ha aton?

⁵ Diri. Sugad nga “an Baraan nga Dios han Israel,” ginpasarig ni Jehova an iya katawohan nga nag-uukoy hiya ha butnga nira, bisan kon makasasala hira. (Isaias 12:6; Hosea 11:9) Salit an iya pagkabaraan diri naghihimo ha iya nga hirayo. Paonan-o, kon sugad, nga “bulag” hiya? Ha  duha importante nga paagi. Siyahan, bulag hiya tikang ha ngatanan nga linarang tungod kay hiya la an Gihitaasi. An iya kaputli, an iya kalimpyo, bug-os ngan waray kataposan. (Salmo 40:5; 83:18) Ikaduha, hi Jehova bug-os nga bulag tikang ha ngatanan nga pagkamakasasala, ngan naliliaw kita hito. Kay ano?

6. Kay ano nga naliliaw kita ha bug-os nga pagin bulag ni Jehova tikang ha pagkamakasasala?

⁶ Nag-uukoy kita ha kalibotan diin talagsa la an totoo nga pagkabaraan. An ngatanan mahitungod han sosiedad han tawo nga bulag tikang ha Dios mahugaw ha pipira nga paagi, nahugawan han sala ngan pagkadiri-hingpit. Kita ngatanan kinahanglan mangalimbasog nga malamposan an sala nga aada ha aton. Ngan kita ngatanan namimeligro nga madaog han sala kon diri kita magbantay. (Roma 7:15-25; 1 Corinto 10:12) Hi Jehova waray ha sugad nga peligro. Tungod kay bug-os nga bulag tikang ha pagkamakasasala, diri gud hiya mahuhugawan han gigutiayi nga tigaman han sala. Nagpaparig-on ini han aton pagkilala kan Jehova sugad nga hingpit nga Amay, kay nangangahulogan ito nga bug-os hiya nga masasarigan. Diri sugad ha damu nga makasasala tawhanon nga mga amay, hi Jehova diri gud magigin malimbong, maraot an moral, o abusado. Tungod han iya pagkabaraan imposible gud an sugad nga butang. Hi Jehova usahay nagsusumpa pa ngani ha iya pagkabaraan, kay waray iba nga mas masasarigan. (Amos 4:2) Diri ba ito nakakadasig ha aton?

7. Kay ano nga masisiring nga kinaiya gud ni Jehova an pagkabaraan?

⁷ Kinaiya gud ni Jehova an pagkabaraan. Ano an kahulogan hito? Ha pag-ilustrar: Tagda an mga pulong nga “tawo” ngan “diri-hingpit.” Diri mo maisasaysay an tawo nga diri ginhuhunahuna an pagkadiri-hingpit. An pagkadiri-hingpit aada ha aton ngan nakakaimpluwensya ha  ngatanan nga aton ginbubuhat. Yana tagda an duha naiiba gud nga mga pulong—“Jehova” ngan “baraan.” An pagkabaraan aada kan Jehova. An ngatanan mahitungod ha iya limpyo, putli, ngan matadong. Diri naton makikilala hi Jehova kon ano gud hiya kon diri masabtan inin hilarom nga pulong—“baraan.”

8, 9. Ano an nagpapakita nga hi Jehova nabulig ha diri-hingpit nga mga tawo nga magin baraan ha relatibo nga paagi?

⁸ Tungod kay hi Jehova nagrirepresentar han kalidad han pagkabaraan, husto nga masisiring nga hiya an surok han ngatanan nga pagkabaraan. Diri hakugnon nga gin-aangkon niya inin presyoso nga kalidad; iginhahatag niya ito ha iba, ngan hura nga iginhahatag niya. Aw, han nakiistorya an Dios kan Moises pinaagi han usa nga anghel ha naglalaga nga tanom, bisan an tuna ha palibot nagin baraan sugad nga resulta hito may kalabotan kan Jehova!—Exodo 3:5.

⁹ Mahimo ba magin baraan an diri-hingpit nga mga tawo pinaagi han bulig ni Jehova? Oo, ha relatibo nga paagi. An Dios naghatag ha iya katawohan nga Israel han paglaom nga magin “baraan nga nasud.” (Exodo 19:6) Iya ginbendisyonan ito nga nasud hin usa nga sistema han pagsingba nga baraan, limpyo, putli. Salit an pagkabaraan amo an tema pirme han Mosaiko nga Balaud. Ha pagkamatuod, an hitaas nga saserdote nagsul-ot hin bulawan nga plaka ha atubangan han iya turban, nga nakikita ito han ngatanan nga nagraranggat ha kalamrag. Igin-ukit dida hito an mga pulong: “An Pagkabaraan kan Jehova.” (Exodo 28:36) Salit an hitaas nga suruklan han kalimpyo ngan kaputli amo an pangirilal-an han ira pagsingba ngan, tinuod, amo an ira paagi han kinabuhi. Hi Jehova nagsiring ha ira: “Magin baraan kamo, kay ako, hi Jehova nga iyo Dios, baraan.” (Levitico 19:2) Tubtob nga an mga Israelita nagkikinabuhi sumala ha  sagdon han Dios ha paagi nga mahihimo han diri-hingpit nga mga tawo, baraan hira ha relatibo nga paagi.

10. Mahitungod han pagkabaraan, ano an pagkaiba han kadaan nga Israel ngan han nakapalibot nga mga nasud?

¹⁰ Ini nga pagpabug-at ha pagkabaraan amo an matin-aw nga kabaliktaran han pagsingba han mga nasud nga nakapalibot ha Israel. Adton pagano nga mga nasud nagsingba ha mga dios nga buwa ngan palso an pag-eksister, mga dios nga iginhulagway sugad nga madarahog, hakog, ngan malaw-ay. Diri baraan hira ha ngatanan nga bahin. An pagsingba ha sugad nga mga dios nakahimo ha katawohan nga diri baraan. Salit, hi Jehova nagpahamangno ha iya mga surugoon nga magpabilin nga bulag tikang ha pagano nga mga magsiringba ngan ha ira mahugaw relihiyoso nga mga buhat.—Levitico 18:24-28; 1 Hadi 11:1, 2.

11. Paonan-o an pagkabaraan han langitnon nga bahin han organisasyon ni Jehova nakikita (a) ha mga anghel? (b) ha mga serapin? (c) kan Jesus?

¹¹ Bisan ha gimaopayi nga mga kahimtang, an pinili ni Jehova nga nasud han kadaan nga Israel makakapakita hin gutiay la han pagkabaraan han langitnon nga bahin han organisasyon han Dios. An minilyon nga mga espiritu nga linarang nga maunungon nga nag-aalagad ha Dios tinatawag nga iya “baraan nga mga yinukot-yukot.” (Deuteronomio 33:2; Judas 14) Hingpit nga ipinapakita nira an malamrag, putli nga katahom han pagkabaraan han Dios. Ngan hinumdumi an mga serapin nga hinkit-an ni Isaias ha iya bisyon. An kahulogan han ira kanta nagpapasabot nga inin gamhanan nga mga espiritu nga linarang may-ada importante nga bahin ha pagpasamwak han pagkabaraan ni Jehova ha bug-os nga uniberso. Kondi, usa nga espiritu nga linarang an labaw hini ngatanan—an bugtong nga Anak han Dios. Hi Jesus amo an gihitaasi nga representasyon han pagkabaraan ni Jehova. Husto nga kinikilala hiya sugad nga “an Baraan han Dios.”—Juan 6:68, 69.

12, 13. (a) Kay ano nga an ngaran han Dios angayan nga iginsasaysay sugad nga baraan? (b) Kay ano nga kinahanglan bug-os nga limpyohan an ngaran han Dios tikang ha mga akusasyon?

¹² Kumusta man an ngaran han Dios? Sugad han nakita naton ha Kapitulo 1, iton nga ngaran diri kay titulo la o pangirilal-an. Nagrirepresentar ito kan Jehova nga Dios, upod na an ngatanan han iya mga kalidad. Salit, an Biblia nagsusumat ha aton nga an iya ‘ngaran baraan.’ (Isaias 57:15) Ha Mosaiko nga Balaud kamatayon an sirot ha pagpasipara ha ngaran han Dios. (Levitico 24:16) Ngan tigamni an siyahan nga gin-unabi ni Jesus ha pag-ampo: “Amay namon ha langit, baraanon unta an imo ngaran.” (Mateo 6:9) An pagbaraan ha usa nga butang nangangahulogan hin pagbulag hito sugad nga sagrado ngan pagpasidungog hito, pagpahitaas hito sugad nga baraan. Kondi kay ano nga an butang nga putli na sugad han ngaran han Dios kinahanglan pagbaraanon?

¹³ An baraan nga ngaran han Dios gintamay ngan ginpapasiparahan pinaagi han mga buwa ngan pakaraot. Ha Eden, hi Satanas nagbuwa mahitungod kan Jehova ngan nagpasabot nga Hiya diri-matadong nga Soberano. (Genesis 3:1-5) Tikang hadto, ginsiguro ni Satanas—an magmarando hinin diri baraan nga kalibotan—nga magdamu an mga buwa mahitungod han Dios. (Juan 8:44; 12:31; Pahayag 12:9) Iginhuhulagway han mga relihiyon an Dios sugad nga diri-makatadunganon, waray pagbati, o mabangis. Gin-aangkon nira nga nasuporta hiya ha ira uhaw-ha-dugo nga mga girra. An dungog para han urusahon nga mga linarang han Dios agsob nga iginhahatag ha diri-masabtan nga higayon, o ebolusyon. Oo, an ngaran han Dios ginpapasiparahan hin maraot gud. Kinahanglan pagbaraanon ito; kinahanglan ibalik an katungod hito ha himaya. Ginhihingyap naton an panahon nga bug-os na nga  limpyohan ni Jehova an iya ngaran tikang ha mga akusasyon ha iya. Bubuhaton niya ito pinaagi han Ginhadian nga ginmamandoan han iya Anak. Nalilipay kita nga makigbahin hiton daku nga katuyoan.

14. Kay ano nga an espiritu han Dios tinatawag nga baraan, ngan kay ano nga peligroso an pagpasipara ha baraan nga espiritu?

¹⁴ May-ada usa pa nga duok nga iginkakaw-ing kan Jehova nga haros tinatawag pirme nga baraan—an iya espiritu, o aktibo nga pwersa. (Genesis 1:2) Ginagamit ni Jehova inin gikusugi nga pwersa ha pagtuman han iya mga katuyoan. An ngatanan nga ginbubuhat han Dios, ginbubuhat niya ha baraan, putli, ngan limpyo nga paagi, salit an iya aktibo nga pwersa angayan nga tinatawag nga baraan nga espiritu, o espiritu han pagkabaraan. (Lucas 11:13; Roma 1:4) An pagpasipara ha baraan nga espiritu, nga nag-uupod han tinuyo nga pagkontra ha mga katuyoan ni Jehova, amo an diri mapapasaylo nga sala.—Marcos 3:29.

15. Kay ano nga an pagkaada diosnon nga kahadlok angayan nga paggios ha pagkabaraan ni Jehova, ngan ano an nahiuupod ha sugad nga kahadlok?

¹⁵ Diri makuri masabtan, kon sugad, kon kay ano nga iginkakaw-ing han Biblia an pagkabaraan han Dios ngan an diosnon nga kahadlok han tawo. Pananglitan, ha Salmo 99:3 mababasa: “Magdayaw hira han imo harangdon nga ngaran, kay urusahon gud ito ngan baraan.” Ini nga kahadlok resulta han hilarom nga pagpasidungog ngan gihitaasi nga pagtahod. Angayan an pag-abat hito nga paagi, tungod kay an pagkabaraan han Dios labaw gud ha aton. Nagraranggat ito ha kalimpyo, mahimayaon. Kondi, diri kita sadang magpahirayo hito. Ha kabaliktaran, an husto nga pagtagad ha pagkabaraan han Dios makakahimo ha aton nga magin mas duok ha iya. Kay ano?

16. (a) Paonan-o an pagkabaraan nakakaw-ing ha himaya, o katahom? Paghatag hin ehemplo. (b) Paonan-o an pagsaysay ha bisyon mahitungod kan Jehova nagpapabug-at han kalimpyo, kaputli, ngan kalamrag?

 ¹⁶ Ha usa ka bahin, iginkakaw-ing han Biblia an pagkabaraan ha katahom. Ha Isaias 63:15, iginsasaysay an langit sugad nga ‘hitaas nga urukyan han Dios nga baraan ngan mahimayaon [o, “matahom,” footnote].’ An himaya ngan katahom nakakadani ha aton. Pananglitan, kitaa an piktyur ha pahina 39. Diri ka ba nadadani hiton nga kahimtang? Ano an nakakahimo hito nga makaruruyag? Kitaa an katahom han matin-aw gud nga tubig. Bisan an hangin sigurado nga limpyo, kay asul an langit ngan an kalamrag baga in nagraranggat. Yana, kon bag-uhon iton nga kahimtang—an sapa tinambakan hin basura, an mga puno han kahoy ngan mga bato minarkahan hin mahugaw, an hangin mabaho tungod han madakmol nga itom nga aso—diri na gud kita madadani ngada hito; magpapahirayo kita. Iginkakaw-ing naton an katahom, o himaya, ha kalimpyo, kaputli, ngan kalamrag. Inin pariho nga mga pulong mahimo gamiton ha pagsaysay han pagkabaraan ni Jehova. Diri urusahon nga an pagsaysay mahitungod kan Jehova ha bisyon nakakadani ha aton! Masilaw tungod han kalamrag, nagraranggat sugad han presyoso nga mga bato, nag-iinggat sugad han kalayo o han pinakaputli ngan pinakamaranggat presyoso nga mga metal—sugad hito an himaya, o katahom, han aton baraan nga Dios.—Ezekiel 1:25-28; Pahayag 4:2, 3.

17, 18. (a) Paonan-o naapektohan hi Isaias ha tinikangan han iya bisyon? (b) Paonan-o ginamit ni Jehova an usa nga serapin ha pagliaw kan Isaias, ngan ano an kahulogan han ginbuhat han serapin?

¹⁷ Kondi, sadang ba kita umabat nga ubos kon itanding ha pagkabaraan han Dios? An baton, syempre, oo. Aw, ubos kita kan Jehova—ngan matin-aw ito nga pagpahayag tungod kay ubos gud kita kan Jehova. An paghibaro ba hito sadang magpahirayo ha aton tikang ha iya? Tagda an gios  ni Isaias ha pakabati han pagpasamwak han mga serapin han pagkabaraan ni Jehova. “Katapos nagsiring ako: ‘Kairo ko! Sugad ako hin patay, kay usa ako nga tawo nga mahugaw an mga im-im, ngan naukoy ako kaupod hin katawohan nga mahugaw an mga im-im; kay an akon mga mata nakakita ha Hadi, hi Jehova han mga hugpo mismo!’” (Isaias 6:5) Oo, an waray kataposan nga pagkabaraan ni Jehova nagpahinumdom kan Isaias nga makasasala ngan diri-hingpit gud hiya. Ha tinikangan, nanluya iton matinumanon nga lalaki. Kondi waray hiya bayai ni Jehova hiton nga kahimtang.

¹⁸ Usa nga serapin an nagliaw dayon ha propeta. Paonan-o? An gamhanan nga espiritu linupad ngadto ha halaran, nagkuha hin baga tikang hito, ngan iginduot an baga ha mga im-im ni Isaias. Bangin mas masakit ito imbes nga makaliaw. Kondi, hinumdumi nga usa ini nga bisyon, puno hin simboliko nga kahulogan. Hi Isaias, usa nga matinumanon nga Judio, maaram gud nga an mga halad iginhahalad kada adlaw ha halaran han templo ha pagtubos han mga sala. Ngan an serapin mahigugmaon nga nagpahinumdom ha propeta nga bisan kon hiya tinuod nga diri-hingpit, “mahugaw an mga im-im,” mahimo pa gihapon hiya magkaada limpyo nga relasyon ha Dios. a Disidido hi Jehova nga tagdon an diri-hingpit, makasasala nga tawo sugad nga baraan—bisan ha relatibo nga paagi.—Isaias 6:6, 7.

19. Paonan-o nga posible kita magin baraan ha relatibo nga paagi, bisan kon kita diri-hingpit?

¹⁹ Totoo liwat ito yana. An ngatanan hadton iginhalad ha  halaran ha Jerusalem mga padagaw la han usa nga durodaku—an usa nga hingpit nga halad, nga iginhalad ni Jesu-Kristo han 33 C.E. (Hebreo 9:11-14) Kon tinuod nga nagbabasol kita ha aton mga sala, gintatadong an aton sayop nga buhat, ngan nagbubuhat hin pagtoo hiton nga halad, papasayloon kita. (1 Juan 2:2) Kita liwat mahimo magpahimulos hin limpyo nga relasyon ha Dios. Salit, hi apostol Pedro nagpapahinumdom ha aton: “Nahisurat na: ‘Kinahanglan magin baraan kamo; kay ako baraan.’” (1 Pedro 1:16) Tigamni nga hi Jehova diri nasiring nga kita kinahanglan magin baraan sugad han iya pagin baraan. Diri gud hiya naglalaom han imposible tikang ha aton. (Salmo 103:13, 14) Lugod, hi Jehova nagsusumat ha aton nga magin baraan tungod kay hiya baraan. “Sugad nga hinigugma nga mga anak,” nangangalimbasog kita ha pagsubad ha iya ha gimaopayi nga mahihimo naton sugad nga diri-hingpit nga mga tawo. (Efeso 5:1) Salit an pakadangat ha pagkabaraan usa nga nagpapadayon nga proseso. Samtang nagtutubo kita ha espirituwal, nangangalimbasog kita nga “magin mas baraan” kada adlaw.—2 Corinto 7:1.

20. (a) Kay ano nga importante nga masabtan nga mahimo kita magin limpyo ha paniplatan han aton baraan nga Dios? (b) Paonan-o naapektohan hi Isaias han hinbaroan niya nga an iya mga sala natubos na?

 ²⁰ Hi Jehova nahigugma ha matadong ngan putli. Napupungot hiya ha sala. (Habakuk 1:13) Kondi diri hiya napupungot ha aton. Tubtob nga gintatagad naton an sala sugad han iya pagtagad—napupungot ha maraot, nahigugma ha maopay—ngan nangangalimbasog ha pagsunod ha hingpit nga susbaranan ni Kristo Jesus, ginpapasaylo ni Jehova an aton mga sala. (Amos 5:15; 1 Pedro 2:21) Kon nasasabtan naton nga mahimo kita magin limpyo ha paniplatan han aton baraan nga Dios, hilarom an mga epekto hito. Hinumdumi, an pagkabaraan ni Jehova ha siyahan nagpahinumdom kan Isaias han iya kahugaw. Hiya nagsinggit: “Kairo ko!” Kondi han masabtan niya nga an iya mga sala gintubos na, nabag-o an iya panlantaw. Han naghangyo hi Jehova hin boluntaryo ha pagbuhat han toka, hi Isaias binaton dayon, bisan kon diri ngani hiya maaram kon ano an mahiuupod hito. Hiya nagsinggit: “Aadi ako! Sugoa ako!”—Isaias 6:5-8.

21. Ano an aton basihanan ha pagsarig nga mahimo naton mapatubo an kalidad han pagkabaraan?

²¹ Ginlarang kita ha dagway han baraan nga Dios, ngan gintagan hin mga kalidad ha moral ngan abilidad ha pagsabot han espirituwal nga mga butang mahitungod ha Dios. (Genesis 1:26) May posibilidad nga magin baraan kita ngatanan. Samtang nagpapadayon kita ha pagpatubo han pagkabaraan, nalilipay hi Jehova ha pagbulig. Samtang ginbubuhat ito, magigin mas duok kita ha aton baraan nga Dios. Dugang pa, samtang gintatagad naton an mga kalidad ni Jehova ha masunod nga mga kapitulo, makikita naton nga may-ada damu gamhanan nga mga hinungdan nga magin duok ha iya!