An dugo importante hinduro. Kon waray ito, diri kita mabubuhi. Sugad nga Maglalarang, an Dios an may katungod ha pagyakan kon paonan-o gagamiton an dugo. Ano an iya ginsiring mahitungod ha dugo? Puydi ba ito kaunon o ipaabuno? Ngan paonan-o ka makakahimo hin mag-opay nga desisyon mahitungod hito?

1. Ano an panhunahuna ni Jehova ha dugo?

Ha panahon han Biblia, ginsidngan ni Jehova an iya mga magsiringba: “An kinabuhi han tagsa nga klase han buhi nga linarang amo an dugo hito.” (Levitico 17:14) Para kan Jehova, an dugo nagrirepresentar han kinabuhi. Tungod kay an kinabuhi sagrado, o baraan, usa nga regalo tikang ha Dios, an dugo sagrado liwat.

2. Ano an igindidiri han Dios nga paggamit han dugo?

Ginsugo ni Jehova an iya mga magsiringba antes han panahon ni Jesus nga diri kaunon an dugo. (Basaha an Genesis 9:4 ngan Levitico 17:10.) Ginparig-on niya ini nga balaud han an nagmamando nga lawas nagsugo ha mga Kristiano nga “padayon nga maglikay . . . ha dugo.”​—Basaha an Buhat 15:​28, 29.

Ano an karuyag sidngon han paglikay ha dugo? Kon an doktor magyakan ha imo nga likyan mo an makahurubog nga irimnon, diri ka na mainom hito. Pero makaon ka ba hin mga pagkaon nga may-ada hito o magpapa-indyeksyon hito? Syempre diri. Ha pariho nga paagi, an sugo han Dios nga maglikay ha dugo nangangahulogan nga kinahanglan diri kita uminom han dugo o kumaon han karne nga waray paturoa an dugo. Kinahanglan diri liwat kita kumaon hin bisan ano nga may dugo.

Kumusta man an paggamit hin dugo ha pagtambal? An pipira nga proseso klaro nga nagtatalapas ha balaud han Dios. Nag-uupod ini han pagpaabuno hin dugo o han bisan ano han nangunguna nga parte hito​—pula nga mga selyula, busag nga mga selyula, mga platelet, ngan plasma. An iba nga proseso han pagtambal bangin diri klaro nga nagtatalapas ha balaud han Dios. Pananglitan, an pipira nga proseso nag-uupod ha paggamit han fraction han usa han nangunguna nga parte han dugo. An iba nga proseso nag-uupod ha paggamit han kalugaringon nga dugo han usa nga tawo. Samtang gintuturotimbang ini nga mga opsyon, an kada tagsa ha aton kinahanglan maghimo hin personal nga desisyon. a​—Galacia 6:5.

 DUGANG NGA USISAHA

3. Paghimo hin mga desisyon may kalabotan ha pagtambal nga nakakapalipay kan Jehova

Paonan-o ka makakahimo hin mga desisyon may kalabotan ha pagtambal nga uyon ha panhunahuna han Dios? I-play an VIDEO, katapos, hisguti niyo kon kay ano nga importante nga himoon an masunod nga mga pitad.

• Pag-ampo hin kinaadman.​—Santiago 1:5.

• Pamiling hin mga prinsipyo ha Biblia ngan kon paonan-o ito iaaplikar.​—Proberbios 13:16.

• Hibaroi kon ano nga klase hin mga pagtambal an may-ada ha iyo lugar.

• Usisaha kon hain hito an klaro nga diri mo kakarawaton.

• Siguroha nga an imo desisyon maghahatag ha imo hin limpyo nga konsensya.​—Buhat 24:16. b

• Hunahunaa nga waray bisan hin-o​—bisan an imo asawa, an mga tigurang, o an nagba-Bible study ha imo​—an magdidesisyon para ha imo ha mga butang nga nadepende ha tagsa nga konsensya.​—Roma 14:12.

• Paghimo hin kasuratan ha imo nahimo nga desisyon.

4. An mga Saksi ni Jehova namimiling hin pinakamaopay nga paagi han pagtambal

Posible an pagsunod ha balaud han Dios may kalabotan ha dugo ngan makakarawat hin maopay nga pagtambal nga diri nagamit hin dugo. I-play an VIDEO.

Basaha an Tito 3:​2, katapos, hisguti niyo ini nga pakiana:

• Kay ano nga kinahanglan nga pirme kita magin matinalahuron ngan buotan kon nakikiistorya ha mga doktor?

 5. Kon blood fraction an nahidadabi

An dugo may upat nga nangunguna nga parte​—an pula nga mga selyula, busag nga mga selyula, mga platelet, ngan plasma. Inin upat nga nangunguna nga parte han dugo may damu nga mas gudtiay nga bahin nga gintatawag nga mga blood fraction. c An pipira hini nga mga fraction gin-gagamit ha mga medisina nga nakakabulig pagtambal ha mga sakit o pagpaundang han pagdinugo.

May kalabotan ha mga fraction han dugo, an kada tagsa nga Kristiano kinahanglan maghimo hin kalugaringon nga desisyon basado ha iya nabansay ha Biblia nga konsensya. An pipira bangin magdesisyon nga diri karawaton an pagtambal o an proseso nga nag-uupod hin mga fraction han dugo. An iba bangin umabat nga gintutugot han ira konsensya nga karawaton an mga fraction.

Kon maghihimo ka hin mga desisyon, hunahunaa ini nga pakiana:

• Paonan-o ko isasaysay ha doktor kon kay ano nga nadiri o nakarawat ako han usa nga blood fraction?

 SUMARYO

Karuyag ni Jehova nga likyan naton an sayop nga paggamit han dugo.

Repaso

• Kay ano nga sagrado para kan Jehova an dugo?

• Paonan-o kita nahibaro nga an sugo han Dios nga maglikay ha dugo aplikado ha pagpaabuno hin dugo?

• Paonan-o ka makakahimo hin mag-opay nga desisyon mahitungod ha pagtambal nga nagamit hin dugo?