LEKSYON 15
Hin-o hi Jesus?
Hi Jesus usa han pinakakilala nga tawo ha kasaysayan. Damu an nakilala ha iya ha ngaran, pero gutiay la an ira nahibabaroan mahitungod ha iya. Ngan iba-iba an pagkakilala ha iya han damu nga tawo. Ano an iginsusumat han Biblia mahitungod ha iya?
1. Hin-o hi Jesus?
Hi Jesus usa nga gamhanan nga espiritu nga naukoy ha langit. Hiya an pinakasiyahan nga ginlarang ni Jehova nga Dios. Tungod hito, gintatawag hiya nga “suhag han ngatanan nga linarang.” (Colosas 1:15) Gintatawag han Biblia hi Jesus sugad nga “bugtong nga Anak” han Dios kay hi Jesus la an direkta nga ginlarang ni Jehova. (Juan 3:16) Hi Jesus nagbuhat kaupod han iya Amay, hi Jehova, ngan ginbuligan niya Hiya ha paglarang ha ngatanan nga iba pa nga butang. (Basaha an Proberbios 8:30.) Hi Jesus may-ada duok nga relasyon kan Jehova. Maunungon nga nag-aalagad hiya sugad nga tagapagyakan han Dios, “an Pulong,” nga nagsusumat han Iya mga mensahe ngan instruksyon.—Juan 1:14.
2. Kay ano nga kinanhi hi Jesus ha tuna?
Mga 2,000 ka tuig na an naglabay, milagroso nga gin-gamit ni Jehova an iya baraan nga espiritu basi ibalhin an kinabuhi ni Jesus tikang ha langit ngadto ha tagoangkan han usa nga batan-on nga birhen nga hi Maria. Hini nga paagi, igin-anak hi Jesus sugad nga tawo. (Basaha an Lucas 1:34, 35.) Kinanhi hi Jesus ha tuna basi magin an iginsaad nga Mesias, o Kristo, ngan basi talwason an mga tawo. a An ngatanan nga tagna ha Biblia mahitungod ha Mesias natuman ha iya, salit nakabulig ini ha mga tawo nga makilala hi Jesus sugad nga “an Kristo, an Anak han buhi nga Dios.”—Mateo 16:16.
3. Hain hi Jesus yana?
Katapos mamatay ni Jesus sugad nga tawo, ginbanhaw hiya han Dios sugad nga espiritu ngan binalik hiya ha langit. Didto, “iginbutang hiya han Dios ha mas hitaas nga posisyon.” (Filipos 2:9) Yana, hi Jesus may-ada hitaas hinduro nga awtoridad—ikaduha hiya kan Jehova.
DUGANG NGA USISAHA
Hibaroi hin dugang kon hin-o gud hi Jesus ngan kon kay ano nga importante gud an paghibaro mahitungod ha iya.
4. Hi Jesus diri an Dios nga Makagarahum-ha-ngatanan
Igintututdo han Biblia nga bisan kon hi Jesus gamhanan nga espiritu ha langit, nagpapasakop hiya ha iya Dios ngan Amay, hi Jehova. Kay ano nga nakasiring kita hito? I-play an VIDEO basi mahibaroan kon ano an igintututdo han Biblia mahitungod ha kaibahan ni Jesus ngan han Dios nga makagarahum ha ngatanan.
An masunod nga mga teksto nabulig ha aton nga masabtan an relasyon ni Jehova ngan ni Jesus. Basaha an tagsa nga teksto, katapos, hisguti niyo an masunod nga mga pakiana.
Basaha an Lucas 1:30-32.
-
Ano an ginsiring han anghel mahitungod ha relasyon ni Jesus ngan ni Jehova nga Dios, an “Gihitaasi”?
Basaha an Mateo 3:16, 17.
-
Han ginbawtismohan hi Jesus, ano an ginsiring han tingog nga tikang ha langit?
-
Ha imo hunahuna, kan kanay adto tingog?
Basaha an Juan 14:28.
-
Hin-o an mas may edad ngan mas may awtoridad? An tatay o an anak?
-
Ano an karuyag sidngon ni Jesus han gintawag niya hi Jehova nga iya Amay?
Basaha an Juan 12:49.
-
Naghunahuna ba hi Jesus nga usa la hira nga persona han iya Amay? Ano ha imo paghunahuna?
5. Napamatud-an nga hi Jesus an Mesias
An Biblia nagsusumat hin damu nga tagna nga mabulig ha mga tawo nga makilala an Mesias—an ginpili han Dios nga magtatalwas ha mga tawo. I-play an VIDEO basi mahibaroan an pipira nga tagna nga natuman kan Jesus han nakanhi hiya ha tuna.
Basaha ini nga mga tagna ha Biblia, katapos, hisguti niyo an masunod nga mga pakiana.
Basaha an Micas 5:2 basi mahibaroan kon diin matatawo an Mesias. b
-
Ini ba nga tagna natuman han natawo hi Jesus?—Mateo 2:1.
Basaha an Salmo 34:20 ngan Zacarias 12:10 basi mahibaroan an mga tagna ha Biblia mahitungod ha kamatayon han Mesias.
-
Natuman ba ini nga mga tagna?—Juan 19:33-37.
-
Ha imo hunahuna, posible ba nga hi Jesus an nagmaniobra basi matuman ini nga mga tagna?
-
Para ha imo, ano an ginpapamatud-an hini mahitungod kan Jesus?
6. Nagpapahimulos kita ha paghibaro mahitungod kan Jesus
Ginpapabug-atan han Biblia nga importante gud an paghibaro mahitungod kan Jesus ngan ha iya papel. Basaha an Juan 14:6 ngan 17:3, katapos, hisguti niyo ini nga pakiana:
-
Kay ano nga importante an paghibaro mahitungod kan Jesus?
Gin-abrihan ni Jesus an dalan basi magin sangkay kita han Dios. Iya igintutdo an kamatuoran mahitungod kan Jehova, ngan pinaagi ha iya, puydi kita magkaada kinabuhi nga waray kataposan
AN IBA NASIRING: “An mga Saksi ni Jehova diri natoo kan Jesus.”
-
Ano an imo ibabaton?
SUMARYO
Hi Jesus usa nga gamhanan nga espiritu. Anak hiya han Dios ngan hiya an Mesias.
Repaso
-
Kay ano nga hi Jesus gintatawag nga “suhag han ngatanan nga linarang”?
-
Ano an ginbuhat ni Jesus antes hiya kumanhi ha tuna?
-
Paonan-o kita nahibaro nga hi Jesus an Mesias?
DUGANG NGA IMPORMASYON
Hibaroi hin dugang an papel ni Jesus sugad nga Mesias.
“An mga Tagna ba Mahitungod ha Mesias Nagpapamatuod nga hi Jesus an Mesias?” (Web article)
Hibaroi kon igintututdo ba han Biblia nga hi Jesus literal nga nagin anak han Dios pariho han pagkaada anak han mga tawo.
“Kay Ano nga hi Jesus Gintatawag nga Anak han Dios?” (Web article)
Usisaha kon kay ano nga diri igintututdo han Biblia an Trinidad.
Hibaroi kon paonan-o nabag-o an kinabuhi han usa nga babaye katapos niya usisahon an ginsisiring han Biblia mahitungod kan Jesus.
“Kon Kay Ano nga Ginbag-o han Usa nga Judio nga Babaye an Iya Gintotoohan” (Pagpamata!, Mayo 2013)
a Hihisgotan han Leksyon 26 ngan 27 kon kay ano nga kinahanglan talwason an mga tawo ngan kon paonan-o kita gintalwas ni Jesus.
Bangin Maruyagan Mo Liwat
KOMON NGA MGA PAKIANA
Ano an Pag-aram ha Biblia nga Igintatanyag han mga Saksi ni Jehova?
Ha libre nga interactive nga programa nga igintatanyag han mga Saksi ni Jehova, puydi mo gamiton an bisan ano nga bersyon han Biblia. Ayaw pag-alang nga paupdon an imo bug-os nga pamilya o an imo kasangkayan.
