An hitaas nga saserdote nga hi Eli may duha nga anak nga saserdote ha tabernakulo, hi Hopni ngan hi Pinehas. Diri nira ginsusunod an mga balaud ni Jehova, ngan maraot gud an ira pagtratar ha mga tawo. Kon naghahalad an mga Israelita kan Jehova, ginkukuha nira an pinakamaopay nga karne. Hinbaroan ni Eli an ginbibinuhat han iya mga anak, pero waray hiya ginhimo mahitungod hito. Papabay-an la ba ni Jehova nga magpadayon ito?

Bisan kon mas bata gud hi Samuel kanda Hopni ngan Pinehas, waray hiya magsubad ha ira. Nalipay hi Jehova kan Samuel. Usa ka gab-i, samtang nakaturog hi Samuel, may hinbatian hiya nga nagtatawag ha iya. Bumuhat hiya, dumalagan ngadto kan Eli, ngan nagsiring: ‘Aadi ako!’ Pero hi Eli nagsiring: ‘Waray ko ikaw tawaga. Katurog utro.’ Bumalik hi Samuel ha iya higdaan. Katapos, nahitabo ito utro. Han hinbatian ni Samuel an tingog ha ikatulo ka beses, nasabtan ni Eli nga hi Jehova an nagtitinawag kan Samuel. Ginsidngan niya hi Samuel nga kon mabatian niya utro an tingog, sadang hiya magsiring: ‘Pagyakan, Jehova. Namamati an imo surugoon.’

Binalik hi Samuel ha iya higdaan. Katapos, may nabatian hiya: ‘Samuel! Samuel!’ Hiya binaton: ‘Pagyakan, kay namamati an imo surugoon.’ Hi Jehova nagsiring ha iya: ‘Sumati hi Eli nga sisirotan ko hiya ngan an iya  pamilya. Maaram hiya nga an iya mga anak nagbibinuhat hin maraot ha sulod han akon tabernakulo, pero waray hiya ginhihimo mahitungod hito.’ Pagkaaga, gin-abrihan ni Samuel an mga purtahan han tabernakulo sugad han iya pirme ginhihimo. Nahadlok hiya pagsumat ha hitaas nga saserdote han ginsiring ni Jehova. Pero gintawag hiya ni Eli ngan nagpakiana: ‘Anak ko, ano an ginsiring ha imo ni Jehova? Isumat ha akon an ngatanan.’ Salit iginsumat ni Samuel an ngatanan.

Samtang nagtutubo hi Samuel, padayon nga inupod ha iya hi Jehova. An ngatanan nga Israelita ha bug-os nga nasud maaram nga ginpili hiya ni Jehova basi magin propeta ngan hukom.