Hi Jehova nagsiring kan Moises: ‘Sagka ngadi ha bukid. Isusurat ko ha mga papan nga bato an akon mga balaud ngan ihahatag ko ito ha imo.’ Sinagka hi Moises ngan nagpabilin didto ha sulod hin 40 ka adlaw ngan 40 ka gab-i. Samtang nakadto hi Moises, iginsurat ni Jehova an Napulo nga Sugo ha duha nga papan nga bato ngan iginhatag ito ha iya.

Paglabay hin pipira ka adlaw, naghunahuna an mga Israelita nga ginbayaan na hira ni Moises. Nagsiring hira kan Aaron: ‘Karuyag namon hin mangunguna ha amon. Himoi kami hin dios!’ Hi Aaron nagsiring: ‘Ihatag ha akon an iyo mga bulawan.’ Iya gintunaw an mga bulawan ngan ginhimo nga rebulto hin nati nga baka. An katawohan nagsiring: ‘Ini nga baka amo an aton Dios nga nagpagawas ha aton ha Ehipto!’ Ginsingba nira ito, ngan nagkalipay hira. Sayop ba ito? Oo, kay nagsaad hira nga hi Jehova la an ira sisingbahon. Pero yana, diri nira gintutuman ito nga saad.

 Nakita ni Jehova an nahitatabo, salit nagsiring hiya kan Moises: ‘Lusad, pakadto ha katawohan. Waray nira ako sugta. Nagsisingba hira hin buwa nga dios.’ Linusad hi Moises ha bukid dara an duha nga papan.

Han nagtitikahirani hi Moises ha kampo, hinbatian niya an mga tawo nga nagkakaranta. Katapos, nakita niya hira nga nananayaw ngan nanyuyukbo ha baka. Nasina gud hiya. Iya iginpusdak an duha nga papan nga bato, ngan narumok ito. Tapos, ginbungkag dayon niya an rebulto. Kahuman, nagpakiana hiya kan Aaron: ‘Paonan-o ka nakombinse han katawohan nga himoon inin maraot gud nga butang?’ Hi Aaron nagsiring: ‘Ayaw kasina. Maaram ka man hini nga mga tawo. Karuyag nira hin dios, salit iginbutang ko ha kalayo an ira mga bulawan ngan nahimo ini nga baka!’ Waray unta ito buhata ni Aaron. Sinagka utro hi Moises ha bukid ngan nakimalooy kan Jehova nga pasayloon an katawohan.

Ginpasaylo ni Jehova an mga andam sumugot ha iya. Nasasabtan mo ba kon kay ano nga importante gud nga sundon han mga Israelita hi Moises sugad nga ira lider?