Hi Moises nag-ukoy ha Midian hin 40 ka tuig. Nag-asawa hiya ngan nagkaada mga anak. Usa ka adlaw samtang nagbabantay hiya han iya mga karnero hirani ha Bukid Sinai, may urusahon hiya nga nakita. Naglalaga an usa nga tunukon nga tanom, pero diri ito nasusunog! Han humirani hiya basi kitaon kon kay ano, nakabati hiya hin tingog tikang ha tanom: ‘Moises! Ayaw na pagdaop ngadi. Hukasa an imo sandalyas kay natukdaw ka ha baraan nga tuna.’ Hi Jehova an nakikiistorya pinaagi hin anghel.

Nahadlok hi Moises salit gintabonan niya an iya nawong. An tingog nagsiring: ‘Nakikita ko an pag-antos han mga Israelita. Tatalwason ko hira ha mga Ehiptohanon ngan dadad-on ha maopay nga lugar. Ikaw an mangunguna ha akon katawohan paggawas ha Ehipto.’ Sigurado nga nahipausa gud hito hi Moises!

Hi Moises nagpakiana: ‘Ano an akon isisiring kon magpakiana an mga tawo kon hin-o an nagsugo ha akon?’ An Dios binaton: ‘Sumati hira nga hi Jehova, an Dios ni Abraham, an Dios ni Isaac, ngan an Dios ni Jacob an nagsugo ha imo.’ Tapos hi Moises nagsiring: ‘Anoman kon diri hira mamati?’ Naghatag hi Jehova ha iya hin pamatuod nga mabulig gud Hiya. Iya iginpalabog ha tuna an tungkod ni Moises. Katapos an tungkod nagin halas! Han ginkaptan ni Moises an ikog han halas, nagin tungkod na liwat ito. Hi Jehova nagsiring: ‘Kon bubuhaton mo ini nga milagro, magpapamatuod ini nga ako an nagsugo ha imo.’

Hi Moises nagsiring: ‘Diri ako maopay magyakan.’ Hi Jehova nagsaad: ‘Tututdoan ko ikaw han imo iyayakan, ngan pauupdon ko an imo bugto nga hi Aaron basi buligan ka.’ Tungod kay maaram hi Moises nga bubuligan hiya ni Jehova, binalik hiya ha Ehipto upod an iya asawa ngan mga anak.