Maiha na nga mag-asawa hira Abraham ngan Sarah. Ginbayaan nira an ira komportable nga balay ha Ur ngan nag-ukoy ha tolda. Pero waray magreklamo hi Sarah kay nasarig hiya kan Jehova.

Karuyag gud ni Sarah magkaanak, salit nagsiring hiya kan Abraham: ‘Kon magkakaanak an akon surugoon nga hi Hagar, an iya anak magigin sugad hin anak ko liwat.’ Ha urhi, nagkaanak hi Hagar. Ismael an ngaran hito.

Paglabay hin damu ka tuig, han 99 anyos hi Abraham ngan 89 anyos hi Sarah, nagkaada hira tulo nga bisita. Gin-abiabi hira ni Abraham, ngan ginpapahuway ha ilarom han usa nga puno ngan ginpakaon. Maaram ka ba kon hin-o an iya mga bisita? Mga anghel! Nagsiring hira kan Abraham: ‘Ha sunod nga tuig ha amo gihap nga panahon, ikaw ngan an imo asawa magkakaada anak nga lalaki.’ Hi Sarah namamati ha sulod han tolda. Nakatawa hiya ngan naghunahuna: ‘Magkakaanak pa gud ba ako bisan kon lagas na ako?’

Han sunod nga tuig, nanganak hi Sarah sugad han iginsaad han anghel ni Jehova. Isaac an iginngaran ni Abraham ha iya, nga nangangahulogan hin “Tawa.”

 Han mga singko anyos hi Isaac, nakita ni Sarah nga gintitinuyaw ni Ismael hi Isaac. Karuyag niya proteksyonan an iya anak, salit kinadto hiya kan Abraham ngan naghangyo nga paiwason hira Hagar ngan Ismael. Ha siyahan, nadiri hi Abraham. Pero ginsidngan hiya ni Jehova: ‘Pamati kan Sarah. Aatamanon ko hi Ismael. Pero pinaagi kan Isaac matutuman an akon mga saad.’