May usa nga syudad hirani ha Babel nga gintatawag nga Ur, diin an mga umurukoy nagsisingba ha damu nga dios imbes kan Jehova. Pero may usa nga tawo didto nga hi Jehova la an ginsisingba. Hiya hi Abraham.

Hi Jehova nagsiring kan Abraham: ‘Bayai an imo balay ngan an imo mga paryente, ngan kadto ha lugar nga akon ipapakita ha imo.’ Tapos nagsaad an Dios: ‘Magigin usa ka nga daku nga nasud, ngan magbubuhat ako hin maopay para ha damu nga tawo ha bug-os nga tuna tungod ha imo.’

Diri maaram hi Abraham kon diin hiya pakakadtoon ni Jehova, pero sinarig hiya kan Jehova. Salit hi Abraham, kaupod an iya asawa nga hi Sarah, an iya tatay nga hi Tera, ngan an iya umangkon nga hi Lot,  nag-impake han ira mga gamit ngan nagtikang han ira hirayo nga biyahe sugad nga pagsugot.

Hi Abraham 75 anyos han umabot hiya ngan an iya pamilya ha lugar nga karuyag ni Jehova nga makita nira. Gintatawag ito nga Canaan. Didto, nakiistorya an Dios kan Abraham ngan nagsaad: ‘Ini ngatanan nga tuna nga imo nakikita ha imo palibot, ihahatag ko ha imo mga anak.’ Kondi hira Abraham ngan Sarah mga lagas na ngan waray anak. Salit paonan-o tutumanon ni Jehova an iya saad?