Samtang priso hi apostol Juan ha isla han Patmos, sunod-sunod nga iginpakita ha iya ni Jesus an 16 nga bisyon, o kiritaon, may kalabotan ha tidaraon. Iginpakita hini nga mga bisyon kon paonan-o mababaraan an ngaran ni Jehova, maabot an iya Ginhadian, ngan matutuman an iya kaburut-on ha tuna sugad han ha langit.

Ha usa nga bisyon, nakita ni Juan hi Jehova nga nalingkod ha iya mahimayaon nga trono ha langit, nga napapalibotan han 24 nga tigurang nga nakasul-ot hin busag nga bado ngan bulawan nga korona. Tikang ha trono, may nagawas nga mga kidlat ngan tunog han mga dalugdog. An 24 nga tigurang nanyukbo ha atubangan ni Jehova ngan nagsingba ha iya. Ha usa pa nga bisyon, may nakita hi Juan nga daku nga grupo tikang ha tanan nga nasud, katawohan, ngan pinulongan nga nagsisingba kan Jehova. An Kordero nga hi Jesus an nag-aataman ngan naggigiya ha ira ngadto ha mga burabod han tubig han kinabuhi. Ha lain pa nga bisyon, hi Jesus nagtikang magmando sugad nga Hadi ha langit upod an 24 nga tigurang. Ha sumunod nga bisyon, nakita ni Juan nga nakikig-away hi Jesus ha dragon nga hi Satanas ngan ha iya mga demonyo. Tikang ha langit, iginlabog hira ni Jesus ngani ha tuna.

 Tapos, nakakita hi Juan hin maopay nga kiritaon diin an Kordero ngan an 144,000 natindog ha Bukid Sion. Nakakita liwat hiya hin anghel nga naglulupadlupad ha bug-os nga tuna, ngan ginsisidngan hito an mga tawo nga mahadlok ha Dios ngan himayaon Hiya.

Ha sumunod nga bisyon, nakita niya nga nahitatabo an girra han Armagedon. Hito nga girra, ginpirde ni Jesus ngan han iya kasundalohan an maraot nga sistema ni Satanas. Ha ultimo nga bisyon, nakita ni Juan nga may perpekto nga pagkauruyon ha langit ngan ha tuna. Bug-os nga ginbungkag hi Satanas ngan an iya tulin. An ngatanan nga linarang ha langit ngan ha tuna nagbabaraan ha ngaran ni Jehova ngan ha iya gud la nagsisingba.