Hi Jesus nakadto pa gihapon ha Jerusalem durante han Sabbath. Samtang naglalakat hiya ngan an iya mga disipulo ha syudad, nakakita hira hin makililimos nga buta tikang ha katawo. An mga disipulo nagpakiana kan Jesus: “Rabbi, hin-o an nakasala salit natawo hiya nga buta, hiya o an iya mga kag-anak?”—Juan 9:2.

An mga disipulo maaram nga an tawo waray diri nakikita nga kalag nga umiksister antes hiya ig-anak, pero bangin naghuhunahuna hira kon mahimo ba makasala an usa samtang iginbuburod hiya han iya nanay. Hi Jesus binaton: “Ini nga tawo waray makasala sugad man an iya mga kag-anak, kondi nahitabo ito basi maipakita an mga buhat han Dios pinaagi ha iya.” (Juan 9:3) Salit an kabuta han lalaki diri tungod han partikular nga sayop o sala nga nabuhat niya o han iya mga kag-anak. Lugod, tungod han sala ni Adan, an ngatanan igin-anak nga diri hingpit salit nagkakaada hin mga depekto, sugad han kabuta. Pero an kahimtang han lalaki naghatag hin higayon kan Jesus nga maipakita an mga buhat han Dios, sugad han iya na ginhimo han gintambal niya an mga tawo nga may sakit.

Ginpabug-atan ni Jesus an pagkaapurado hini nga buruhaton. Hiya nagsiring: “Kinahanglan buhaton naton an buruhaton han nagsugo ha akon samtang adlaw pa, kay waray tawo nga makakabuhat hito kon umabot na an kagab-ihon. Samtang aanhi ako ha kalibotan, ako an kalamrag han kalibotan.” (Juan 9:4, 5) Oo, diri mag-iiha, kamatay ni Jesus mahingangadto hiya ha kasisidman han lubnganan diin waray na gud hiya mahihimo. Pero samtang diri pa ito nahitatabo, hiya an gintitikangan han kalamrag han kalibotan.

Kondi tatambalon ba ni Jesus an lalaki? Kon oo, paonan-o? Lumura hi Jesus ha tuna ngan naghimo hin lapok pinaagi han iya laway. Iginpahid niya hito an mata han buta ngan nagsiring: “Kadto paghiram-os ha karigoan ha Siloam.” (Juan 9:7) Sumugot an lalaki. Han ginbuhat niya ito, nakakita na hiya! Hunahunaa la an iya kalipay han nakakita na hiya ha siyahan nga higayon!

Nahipausa an mga amyaw hini nga buta ngan an iba nga nakilala ha iya. Hira nagpakiana: “Diri ba ito an tawo nga nagliliningkod ngan nakikilimos hadto?” An iba binaton: “Amo ini hiya.” Pero an iba diri makatoo hito: “Diri ito hiya, pero kapariho la niya.” An lalaki mismo binaton: “Ako ini.”—Juan 9:8, 9.

Salit nagpakiana hira ha iya: “Paonan-o napukrat an imo mga mata?” Hiya binaton: “An tawo nga tinatawag nga Jesus naghimo hin lapok ngan iginpahid ito ha akon mga mata ngan ginsidngan ako, ‘Kadto ha Siloam ngan paghiram-os.’ Salit kinadto ako ngan pakahiram-os ko nakakita na ako.” Katapos, hira nagpakiana: “Hain na ito nga tawo?” An makililimos binaton: “Diri ako maaram.”—Juan 9:10-12.

Igin-upod han mga tawo an lalaki ngadto ha mga Pariseo, nga naruruyag liwat mahibaro kon paonan-o hiya nakakita. Iya hira ginsumatan: “Ginpahiran niya hin lapok an akon mga mata, ngan pakahiram-os ko nakakita na ako.” Natural la unta nga malipay liwat an mga Pariseo nga natambal an makililimos. Pero an iba ha ira nagpakaraot lugod kan Jesus. Hira nagsiring: “Ito nga tawo diri tikang ha Dios, kay diri niya gintutuman an Sabbath.” Pero an iba nagsiring: “Makakahimo ba hin sugad hito nga mga milagro an tawo nga makasasala?” (Juan 9:15, 16) Salit nagkabahin-bahin hira.

Tungod kay iba-iba an ira opinyon, ginpakianhan nira an lalaki nga nakakakita na: “Ano an masisiring mo mahitungod ha iya nga nagpukrat han imo mga mata?” An lalaki waray magruhaduha mahitungod kan Jesus ngan binaton hiya: “Usa hiya nga propeta.”—Juan 9:17.

Waray tumoo hini an mga Judio. Bangin naghunahuna hira nga nagkunsabo hi Jesus ngan ito nga lalaki basi limbongan an mga tawo. Nasantop nira nga basi ini masulbad, kinahanglan nira pakianhan an mga kag-anak han makililimos kon buta gud ba hiya.