An mga apostol ni Jesus may kagawasan nga nagsasangyaw ha Galilea, pero waray sugad hito nga kagawasan an usa nga nagpakilala kan Jesus. Haros duha ka tuig na nga priso hi Juan nga Parabaptis.

Ginbuhayhag hadto ni Juan ha publiko nga sayop an pag-asawa ni Hadi Herodes Antipas kan Herodias, an asawa ni Felipe nga bugto ni Herodes ha tatay. Nakigdiborsyo hi Herodes ha iya asawa basi magin asawa hi Herodias. Ha Mosaiko nga Balaud, nga siring ni Herodes iya ginsusunod, ini nga pag-asawa adulteroso ngan ilegal. Tungod kay ginsaway hiya ni Juan, iginpapriso ni Herodes hi Juan, bangin ha pagsulsol ni Herodias.

Diri maaram hi Herodes kon ano an iya bubuhaton kan Juan, “kay gintatagad [han mga tawo] hi Juan sugad nga propeta.” (Mateo 14:5) Pero, hi Herodias maaram kon ano an iya bubuhaton kan Juan. ‘Nagdinumot hiya kan Juan,’ ha pagkamatuod, nagpinamiling hiya hin higayon ha pagpatay ha iya. (Marcos 6:19) Yana, nagkaada hiya hin higayon nga buhaton hito.

Han hirani na an Paskua han 32 C.E., naghikay hi Herodes hin daku nga selebrasyon para han iya natawhan nga adlaw. Nakadto an ngatanan niya nga opisyal nga hitaas an ranggo, mga kumander han militar, ngan an mga prominente ha Galilea. Durante han selebrasyon, hi Salome, an daraga nga anak ni Herodias ha iya bana hadto nga hi Felipe, ginpasayaw para ha mga bisita. Naruyagan gud han kalalakin-an an iya pagsayaw.

Tungod kay nalipay gud hi Herodes ha iya hinablosan, hiya nagsiring: “Aroa ha akon an bisan ano nga imo karuyag, ngan ihahatag ko ito ha imo.” Nagsaad pa ngani hiya: “Bisan ano nga aroon mo ha akon, ihahatag ko ha imo, bisan an katunga han akon ginhadian.” Antes bumaton hi Salome, gumawas anay hiya ngan nagpakiana ha iya nanay: “Ano an akon aaroon?”—Marcos 6:22-24.

Ini na an higayon nga ginhinulat ni Herodias! Salit binaton hiya dayon: “An ulo ni Juan nga Parabaptis.” Waray pag-iha, binalik hi Salome kan Herodes basi isumat an iya hangyo: “Karuyag ko nga ihatag mo dayon ha akon ha bandihado an ulo ni Juan nga Parabaptis.”—Marcos 6:24, 25.

Nasubo gud hito hi Herodes, pero hinbatian han iya mga bisita an iya iginsaad kan Salome. Naawod hiya nga diri ito tumanon, bisan kon nangangahulogan ito ha pagpatay hin inosente nga tawo. Salit, gintagan ni Herodes hin makangingirhat nga sugo an usa nga gwardya ngan ginpakadto ha prisohan. Waray pag-iha, binalik an gwardya dara an ulo ni Juan nga nakabutang ha bandihado. Iya ito iginhatag kan Salome, ngan gindara ito ni Salome ha iya nanay.

Han hinbatian han mga disipulo ni Juan an nahitabo, ginkuha nira an lawas ni Juan ngan iginlubong ito. Katapos, ira iginsumat kan Jesus an nahitabo.

Ha urhi, han hinbatian ni Herodes nga hi Jesus nananambal ngan nagpapagawas hin mga demonyo, nahadlok hiya. Naghunahuna hiya kon hi Jesus, nga nagbubuhat hini nga mga butang, amo hi Juan nga Parabaptis nga “nabanhaw.” (Lucas 9:7) Salit karuyag gud makita ni Herodes Antipas hi Jesus. Sigurado nga diri basi mabatian an pagsangyaw ni Jesus. Lugod, karuyag niya makompirma kon may basihan an iya mga kabaraka o waray.