Katapos makigkita ni Jesus kanda Marta ngan Maria hirani ha Betania, kinadto hira ha lubnganan ni Lasaro. Lungib ito nga ginsadhan hin bato an entrada. Hi Jesus nagsugo: “Kuhaa niyo an bato.” Tungod kay diri maaram han bubuhaton ni Jesus, nabaraka hi Marta ngan nagsiring: “Ginoo, mabaho na gud hiya kay ikaupat ka adlaw na yana.” Pero hi Jesus binaton: “Diri ba ginsidngan ko ikaw nga kon tumoo ka makikita mo an himaya han Dios?”—Juan 11:39, 40.

Salit ginkuha an bato. Katapos, hinangad hi Jesus ngan nag-ampo: “Amay, nagpapasalamat ako ha imo nga ginpapamatian mo ako. Maaram ako nga ginpapamatian mo ako pirme; pero nagyayakan ako tungod han mga tawo nga aanhi, basi tumoo hira nga ginsugo mo ako.” Tungod han iya dayag nga pag-ampo, nasantop han mga nakadto nga an iya bubuhaton pinaagi han gahum han Dios. Katapos hi Jesus ginuliat: “Lasaro, gawas ngadi!” Ngan ginawas hi Lasaro nga may nakasangbod pa nga mga bendahe ha mga tiil ngan kamot ngan putos pa hin tela an nawong. Nagsiring hi Jesus: “Badbari hiya ngan palakta.”—Juan 11:41-44.

Damu nga Judio nga kinadto basi liawon hira Maria ngan Marta an nakakita hini nga milagro salit tinoo hira kan Jesus. Pero an iba linakat ngan iginsumat ha mga Pariseo an ginbuhat ni Jesus. Nagmiting an mga Pariseo ngan an punoan nga mga saserdote upod an mga membro han hitaas nga korte han mga Judio, an Sanhedrin. Kaupod ha ira an hitaas nga saserdote nga hi Caifas. Nabaraka an iba ha ira: “Ano an aton bubuhaton, kay ini nga tawo nagbubuhat hin damu nga milagro? Kon pabay-an la naton hiya, hira ngatanan matoo ha iya, ngan makanhi an mga Romano ngan aagawon an aton lugar pati an aton nasud.” (Juan 11:47, 48) Bisan kon hinbatian nira an ginsiring han mga nakakita nga hi Jesus “nagbubuhat hin damu nga milagro,” ini nga kalalakin-an waray malipay ha ginbubuhat han Dios pinaagi ha iya. Interesado la hira ha ira posisyon ngan awtoridad.

An kabanhaw ni Lasaro daku nga kaarawdan para ha mga Saduseo kay diri hira natoo ha pagkabanhaw. Hi Caifas, nga usa nga Saduseo, nagsiring: “Waray gud kamo hinbabaroan, ngan diri kamo nakakasabot nga para ha iyo kaopayan nga mamatay an usa nga tawo para ha katawohan imbes nga mabungkag an bug-os nga nasud.”—Juan 11:49, 50; Buhat 5:17; 23:8.

Tungod ha sagrado nga katungdanan ni Caifas, ginpagios hiya han Dios nga isiring ito—waray niya ito buhata ha “iya kalugaringon nga mga ideya.” Karuyag sidngon ni Caifas nga kinahanglan patayon hi Jesus basi diri na niya mapaluya an awtoridad ngan impluwensya han Judio nga mga lider han relihiyon. Pero, an iya igintagna nagpapakita nga an kamatayon ni Jesus magtatagana hin lukat diri la para ha mga Judio, kondi para ha ngatanan nga “nagpapatlaag nga mga anak han Dios.”—Juan 11:51, 52.

Naimpluwensyahan gud ni Caifas an Sanhedrin basi magplano pagpatay kan Jesus. Iginsumat daw la kan Jesus ni Nicodemo, nga membro han Sanhedrin ngan makisangkayon kan Jesus, ito nga plano ha iya? Anoman an nahitabo, binaya hi Jesus ha lugar nga hirani ha Jerusalem, salit waray hiya mamatay antes han panahon nga igintanda han Dios.