Han Lunes, Nisan 10, nag-istorya hi Jesus didto ha templo mahitungod han iya tiarabot nga kamatayon. Tungod kay nababaraka han magigin epekto hito ha reputasyon han Dios, hi Jesus nagsiring: “Amay, himayaa an imo ngaran.” Katapos, may daku nga tingog tikang ha langit nga binaton: “Ginhimaya ko na ito ngan paghihimayaon ko utro.”—Juan 12:27, 28.

Nahipausa gud hini an mga nakadto. An iba naghunahuna nga nakabati hira hin dalugdog. Samtang an iba nagsiring: “May anghel nga nagyakan ha iya.” (Juan 12:29) Pero an tinuod, hi Jehova an ira hinbatian pa la nga nagyakan! Ngan diri ini an siyahan nga higayon nga hinbatian han mga tawo an tingog han Dios tikang han pagministeryo ni Jesus dinhi ha tuna.

Tulo ngan tunga ka tuig na an naglabay, han ginbawtismohan hi Jesus, hinbatian ni Juan nga Parabaptis nga an Dios nagsiring mahitungod kan Jesus: “Ini an akon Anak nga hinigugma, nga akon nalilipayan.” Ha urhi, katapos han Paskua han 32 C.E., nakita nira Santiago, Juan, ngan Pedro an pagbag-o han hitsura ni Jesus. Hinbatian nira an tingog han Dios nga nagsiring: “Ini an akon Anak nga hinigugma, nga akon nalilipayan. Pamati kamo ha iya.” (Mateo 3:17; 17:5) Pero hinin ikatulo nga higayon, damu an nakabati han nagyakan hi Jehova!

Hi Jesus nagsiring: “Hinbatian ini nga tingog, diri tungod ha akon, kondi tungod ha iyo.” (Juan 12:30) Pamatuod ito nga hiya gud an Anak han Dios, an igintagna nga Mesias.

Dugang pa, an pagin matinumanon ni Jesus ha bug-os niya nga kinabuhi naghahatag hin susbaranan kon paonan-o sadang magkinabuhi an mga tawo. Nagpapamatuod liwat ito nga hi Satanas nga Yawa, an magmarando han kalibotan, angay gud sirotan. Hi Jesus nagsiring: “Ginhuhukman yana ini nga kalibotan ngan paiiwason an magmarando hini nga kalibotan.” An tiarabot nga kamatayon ni Jesus diri kapirdihan lugod usa ito nga kadaogan. Kay ano? Hiya nagsaysay: “Pero kon bitayon na ako, papahiranion ko ha akon an ngatanan nga klase hin tawo.” (Juan 12:31, 32) Pinaagi han iya kamatay ha kahoy, papahiranion ni Jesus ha iya an iba, salit magkakaada hin paglaom nga kinabuhi nga waray kataposan.

Sugad nga baton ha gin-unabi ni Jesus nga ‘bibitayon’ hiya, an mga tawo nagsiring: “Hinbatian namon ha Balaud nga an Kristo magpapadayon ha waray kataposan. Kay ano nga nasiring ka nga an Anak han tawo kinahanglan bitayon? Hin-o ini nga Anak han tawo?” (Juan 12:34) Bisan pa han ngatanan nga ebidensya, pati na han pakabati ha tingog mismo han Dios, an kadam-an ha ira waray kumarawat kan Jesus sugad nga an tinuod nga Anak han tawo, an iginsaad nga Mesias.

Pariho han iya ginsiring hadto, iya gintawag an iya kalugaringon sugad nga “an kalamrag.” (Juan 8:12; 9:5) Ginsagda niya an mga tawo: “Halipot na la nga panahon nga makakaupod niyo an kalamrag. Lakat kamo samtang aada pa ha iyo an kalamrag basi diri kamo madaog han kasisidman. . . . Samtang aada ha iyo an kalamrag, magpakita kamo hin pagtoo ha kalamrag basi magin mga anak kamo han kalamrag.” (Juan 12:35, 36) Katapos, binaya hi Jesus kay diri Nisan 10 an adlaw nga mamamatay hiya. An Paskua han Nisan 14 amo an adlaw nga ‘bibitayon’ hiya—​iraraysang hiya ha kahoy.—Galacia 3:13.

Kon babalikon an ministeryo ni Jesus, matin-aw nga natuman an tagna han waray tumoo ha iya an mga Judio. Igintagna ni Isaias nga an mga mata han mga tawo mabubuta ngan an ira kasingkasing magtitig-a salit diri hira mabalik basi matambal. (Isaias 6:10; Juan 12:40) Oo, iginsalikway gud han kadam-an nga Judio an ebidensya nga hi Jesus an iginsaad nga ira Paratalwas, an dalan ngadto ha kinabuhi.

Hi Nicodemo, hi Jose nga taga-Arimatea, ngan an damu pa nga may awtoridad “tinoo” kan Jesus. Pero magios ba hira uyon han ira pagtoo, o diri hira magios tungod ha kahadlok nga paiwason ha sinagoga o tungod kay “karuyag nira nga uyonan han mga tawo”?—Juan 12:42, 43.

Iginsaysay mismo ni Jesus kon ano an nahiuupod ha pagtoo ha iya: “An natoo ha akon, natoo diri la ha akon kondi ha nagsugo liwat ha akon, ngan an nakakakita ha akon, nakakakita liwat ha nagsugo ha akon.” An mga kamatuoran nga karuyag han Dios nga itutdo ngan ipasamwak ni Jesus importante gud, salit nakasiring hi Jesus: “May maghuhukom ha nagsasalikway ha akon ngan diri nakarawat han akon ginsisiring. An pulong nga akon ginyakan amo an maghuhukom ha iya ha kataposan nga adlaw.”—Juan 12:44, 45, 48.

Ha pagtapos, hi Jesus nagsiring: “An akon ginyayakan diri akon kalugaringon nga mga ideya, kondi an Amay nga nagpakanhi ha akon an naghatag hin sugo kon ano an akon igyayakan ngan igtututdo. Maaram liwat ako nga an iya sugo nangangahulogan hin kinabuhi nga waray kataposan.” (Juan 12:49, 50) Maaram hi Jesus nga diri mag-iiha, iya igbububo an iya dugo sugad nga halad para ha mga tawo nga nagpapakita hin pagtoo ha iya.—Roma 5:8, 9.