An mga kaaway ni Jesus nasisina ha iya. Nag-unabi pa la hiya hin mga ilustrasyon nga nagbuhayhag han ira karaotan. Yana, an mga Pariseo nagsarabot pagbitik ha iya. Namiling hira hin paagi para may maisiring hi Jesus nga magigin hinungdan basi madara hiya ha gobernador han Roma, ngan ginsuholan nira an pipira han ira mga sumurunod basi bitikon hiya.—Lucas 6:7.

An mga sumurunod nagsiring: “Magturutdo, maaram kami nga nagyayakan ka ngan nagtututdo han tama ngan waray ka ginpapaurog, ngan igintututdo mo an dalan han Dios uyon ha kamatuoran: Uyon ba ha balaud nga magbayad kami hin buhis ha Cesar o diri?” (Lucas 20:21, 22) Waray magpadara hi Jesus ha ira mag-opay nga pulong, kay an tinuod hipokrito ito ngan panlimbong. Kon sumiring hiya, ‘Diri husto nga magbayad hin buhis,’ maaakusaran hiya hin sedisyon kontra ha Roma. Pero kon sumiring hiya, ‘Oo, pagbayad kamo hin buhis,’ an mga tawo nga nangangalas ha pagmando han Roma bangin magkaada sayop nga pagsabot ngan atakehon nira hiya. Salit ano an iya iginbaton?

Hi Jesus nagsiring: “Kay ano nga ginsasarihan niyo ako, mga hipokrito? Ipakita ha akon an sinselyo nga iginbabayad ha buhis.” Han gintagan nira hiya hin denaryo, nagpakiana hiya: “Kan kanay ini ladawan ngan titulo?” Binaton hira: “Kan Cesar.” Katapos naghatag hiya hin maaramon nga instruksyon: “Kon sugad, ihatag ha Cesar an mga butang han Cesar, pero ihatag ha Dios an mga butang han Dios.”—Mateo 22:18-21.

Nahipausa hira ha ginsiring ni Jesus. Tungod kay napahilom, binaya hira. Pero may nahitabo pa hito nga adlaw, ngan padayon pa gihapon an pangalimbasog ha pagbitik ha iya. Katapos mapakyas an mga Pariseo, an mga lider han iba nga relihiyon dinaop kan Jesus.

An mga Saduseo, nga diri natoo ha pagkabanhaw, nagpakiana may kalabotan ha pagkabanhaw ngan han pag-asawa ha bayaw. Hira nagsiring: “Magturutdo, hi Moises nagsiring: ‘Kon an usa nga tawo mamatay nga waray mga anak ha iya asawa, kinahanglan pangasaw-on han iya bugto an iya asawa basi magkaada mga anak para ha iya.’ May pito nga magburugto dinhi ha amon. An suhag nag-asawa ngan namatay, pero tungod kay waray hiya mga anak, an iya asawa ginpangasawa han iya bugto. Sugad liwat hito an nahitabo ha ikaduha, ikatulo, tubtob ha ikapito. Paglabay han panahon, namatay an babaye. Kon sugad, ha pagkabanhaw, hin-o ha pito an iya magigin bana, kay nagin asawa hiya nira ngatanan?”—Mateo 22:24-28.

Gamit an mga sinurat ni Moises nga ginkakarawat han mga Saduseo, hi Jesus binaton: “Diri ba tungod hini nagsasayop kamo, kay diri kamo maaram han Kasuratan ngan han gahum han Dios? Kay kon banhawon hira, an kalalakin-an diri na mag-aasawa ngan an kababayin-an diri na pangangasaw-on, kondi magigin sugad na hira hin mga anghel ha langit. Pero mahitungod han mga patay nga mababanhaw, waray ba niyo mabasa an iginsurat ni Moises mahitungod han tunukon nga tanom, nga didto nagsiring ha iya an Dios: ‘Ako an Dios ni Abraham ngan Dios ni Isaac ngan Dios ni Jacob’? Hiya an Dios, diri han mga patay, kondi han mga buhi. Nagsasayop gud kamo.” (Marcos 12:24-27; Eksodo 3:1-6) Nahipausa gud an mga tawo hito nga baton.

Napahilom an mga Pariseo ngan mga Saduseo ha ginsiring ni Jesus salit nagkunsabo inin nakontra nga mga lider han relihiyon nga bitikon pa hiya. May eskriba nga nagpakiana: “Magturutdo, ano an pinakaimportante nga sugo ha Balaud?”—Mateo 22:36.

Hi Jesus binaton: “An siyahan, ‘Pamati, O Israel, hi Jehova an aton Dios, ngan uusa la hi Jehova. Higugmaa hi Jehova nga imo Dios ha bug-os mo nga kasingkasing, ha bug-os mo nga kalag, ha bug-os mo nga hunahuna, ngan ha bug-os mo nga kusog.’ An ikaduha amo ini, ‘Higugmaa an imo igkasi-tawo sugad ha imo kalugaringon.’ Waray iba nga sugo nga mas importante hini.”—Marcos 12:29-31.

Pakabati hini, nagsiring an eskriba: “Magturutdo, uyon gud ha kamatuoran an imo ginyakan, ‘Uusa la an Dios, ngan labot ha Iya waray na iba,’ ngan an paghigugma ha iya ha bug-os nga kasingkasing, ha bug-os nga pagsabot, ngan ha bug-os nga kusog, ngan an paghigugma ha igkasi-tawo sugad ha kalugaringon, mas maopay gud kay ha ngatanan nga bug-os nga mga halad nga sinunog ngan mga halad nga hayop.” Tungod kay husto gud an baton han eskriba, nagsiring hi Jesus: “Diri ka hirayo ha Ginhadian han Dios.”—Marcos 12:32-34.

Ha sulod hin tulo ka adlaw (Nisan 9, 10, ngan 11) nagtutdo hi Jesus ha templo. An pipira nalipay ha pagpamati ha iya sugad hito nga eskriba. Pero diri pariho hito an inabat han mga lider han relihiyon, nga ‘waray na magsari pagpakiana ha iya.’