Durante han ultimo nga pagkadto ni Jesus ha templo, padayon nga iginbuhayhag niya an pagkahipokrito han mga eskriba ngan mga Pariseo, dayag nga gintawag hira nga mga hipokrito. Ginamit hiya hin ilustrasyon: “Kairo niyo, mga eskriba ngan mga Pariseo, mga hipokrito! Kay ginhuhugasan niyo an gawas han tasa ngan yahong, kondi an sulod hito puno hin kahakog ngan duro nga pagpatakas. Buta nga Pariseo, hugasi anay an sulod han tasa ngan han yahong basi magin limpyo liwat an gawas hito.” (Mateo 23:25, 26) An mga Pariseo istrikto may kalabotan ha kalimpyo ngan panggawas nga hitsura, pero ginbabalewaray nira an sulod nga pagkatawo ngan an paglimpyo ha simboliko nga kasingkasing.

An ira pagkahipokrito nakikita liwat ha ira pagin andam ha paghimo hin mga lubnganan para ha mga propeta ngan pagdekorasyon hito. Pero sugad han gin-unabi ni Jesus, ‘mga anak hira hadton nagpatay ha mga propeta.’ (Mateo 23:31) Napamatud-an ini ha ira pangalimbasog nga patayon hi Jesus.—Juan 5:18; 7:1, 25.

Katapos, iginpatin-aw ni Jesus an mahitatabo ha mga lider han relihiyon kon diri hira magbabasol: “Mga halas, katulinan han mga halas, paonan-o kamo makakalikay han sirot ha Gehenna?” (Mateo 23:33) An kahirani nga Walog han Hinom gin-gagamit ha pagsunog ha mga basura. Nagrirepresentar ini han dayon nga kabungkagan han magraot nga mga eskriba ngan mga Pariseo.

An mga disipulo ni Jesus magrirepresentar ha iya sugad nga “mga propeta, mga maaramon, ngan mga magturutdo.” Pero paonan-o hira tatrataron? Ginsidngan ni Jesus an mga lider han relihiyon: “An iba [han akon mga disipulo] iyo papatayon ngan igraraysang ha kahoy, ngan an iba iyo lalatiguhon ha mga sinagoga ngan pagtitimarauton ha tagsa nga syudad. Salit may baratunon kamo ha dugo han ngatanan nga magtadong nga ginpatay ha tuna, tikang ha dugo han matadong nga hi Abel tubtob kan Sakarias . . . nga iyo ginpatay.” Hiya nagpahamangno: “Ha pagkamatuod susumatan ko kamo: Ini ngatanan nga sirot mahitatabo hini nga henerasyon.” (Mateo 23:34-36) Ito gud an nahitabo han 70 C.E. han ginbungkag an Jerusalem han Romano nga kasundalohan ngan ginpatay an yinukot nga Judio.

An paghunahuna hinin makaharadlok nga mahitatabo nakapasubo gud kan Jesus. Hiya nagsiring: “Jerusalem, Jerusalem, an parapamatay han mga propeta ngan nagbabato han mga ginsugo ngada ha imo! Makadamu ako nangalimbasog nga tirukon an imo mga anak, sugad hin ugang nga nagtitirok han iya mga pisô ha ilarom han iya mga pako! Pero diri kamo naruruyag. Kitaa! Babayaan han Dios an iyo balay.” (Mateo 23:37, 38) An mga nakabati hini sigurado nga naghunahuna kon ano an iya karuyag sidngon han “balay.” Posible ba nga an gin-uunabi niya amo an makaruruyag gud nga templo ha Jerusalem, nga sugad hin ginpapanalipdan han Dios?

Hi Jesus nagdugang: “Susumatan ko kamo: Diri na gud ako niyo makikita tikang yana tubtob nga sumiring kamo, ‘Bendisyonan unta hiya nga napakanhi ha ngaran ni Jehova!’” (Mateo 23:39) Iya ginkotar an matagnaon nga mga pulong ha Salmo 118:26: “Mabulahan adton nga napasinganhi ha ngaran ni Jehova: Ginbulahan ka namon tikang ha balay ni Jehova.” Matin-aw, kon mabungkag na inin literal nga templo, waray na makadto ha ngaran han Dios.

Katapos kinadto hi Jesus ha lugar han templo diin nakabutang an mga kahon han kwarta nga sugad hin trumpeta an porma. An mga tawo naghuhulog hin donasyon ha gutiay nga buho ha bawbaw hito. Nakita ni Jesus nga ginhihimo ito han mga Judio, an mga riko “naghuhulog hin damu nga sinselyo” sugad nga donasyon. Katapos naobserbaran ni Jesus an pobre nga balo nga naghulog hin “duha nga sinselyo nga gutiay gud an kantidad.” (Marcos 12:41, 42) Sigurado nga maaram hi Jesus nga nalipay gud an Dios ha donasyon hito nga balo.

Gintawag ni Jesus an iya mga disipulo, ngan nagsiring: “Ha pagkamatuod, susumatan ko kamo nga ini nga pobre nga balo naghulog hin mas damu kay ha ngatanan nga naghulog ha mga kahon han kwarta.” Kay ano? Hiya nagsaysay: “Kay hira ngatanan naghulog han ira sobra, kondi ini nga balo, bisan kon nanginginahanglan hiya, naghulog han ngatanan nga iya kwarta, an iya bug-os nga ginpakabuhian.” (Marcos 12:43, 44) Iba gud an panhunahuna ngan panggios han balo kay han mga lider han relihiyon!

Samtang Nisan 11 pa, binaya hi Jesus ha templo ha ultimo nga higayon. Usa han iya mga disipulo an nagsiring: “Magturutdo, kitaa ini nga mga bato ngan mga istraktura!” (Marcos 13:1) Oo, an iba nga bato ha pader han templo dagku hinduro, marig-on ito pagkit-on ngan diri marurumpag. Salit baga hin diri gud katoohan an ginsiring ni Jesus: “Inin dagku nga istraktura ba an imo ginkikita? Waray gud usa nga bato nga magpapabilin ha bawbaw han usa nga bato nga diri marurumpag.”—Marcos 13:2.

Katapos isiring ini, hi Jesus ngan an iya mga apostol tinabok ha Walog han Kidron ngan sinagka ha Bukid han mga Olibo. Hini nga higayon kaupod niya hira Pedro, Andres, Santiago, ngan Juan. Didto nakikita nira ha ubos an makaruruyag gud nga templo.