Matatapos na an gab-i han iginnigar ni Pedro hi Jesus ha ikatulo ka beses. Human na an hinimo-himo nga pagbista han mga membro han Sanhedrin ngan nagburublag na hira. Temprano ha aga han Biernes, nagkatirirok utro hira, posible nga basi pagawson nga legal an pagbista ha naglabay nga gab-i. Gindara hi Jesus ha ira atubangan.

Makausa pa, an korte nagsiring: “Kon ikaw an Kristo, sumati kami.” Binaton hi Jesus: “Bisan kon sumatan ko kamo, diri gud kamo matoo. Ngan kon pakianhan ko kamo, diri gud kamo mabaton.” Pero, maisugon nga iginsumat ni Jesus kon hin-o hiya sugad han igintagna ha Daniel 7:13. Nagsiring hiya: “Tikang yana, an Anak han tawo malingkod ha too han gamhanan nga Dios.”—Lucas 22:67-69; Mateo 26:63.

Nagpirit hira: “Kon sugad, ikaw ba an Anak han Dios?” Hi Jesus binaton: “Kamo mismo an nasiring nga ako.” Sugad hin igo na ini nga hinungdan basi patayon nira hi Jesus tungod han akusasyon nga pagpasipara. Hira nagpakiana: “Kay ano nga magkikinahanglan pa kita hin testigo?” (Lucas 22:70, 71; Marcos 14:64) Salit gin-gapos nira hi Jesus ngan gindara ngadto ha Romano nga Gobernador nga hi Ponsio Pilato.

Bangin nakita ni Judas Iscariote nga gindadara hi Jesus ngadto kan Pilato. Han hinbaroan niya nga ginsentensyahan hi Jesus hin kamatayon, nasubo gud hiya. Pero imbes nga ipakita ha Dios an tinuod nga pagbasol, iginbalik niya an 30 ka sinselyo nga silber. Nagsiring hiya ha punoan nga mga saserdote: “Nakasala ako han gintraydoran ko an dugo nga matadong.” Pero waray kalooy nga bumaton hira: “Ano an labot namon ha imo? Problema mo na ito!”—Mateo 27:4.

Iginlabog ni Judas ha templo an 30 ka silber nga sinselyo ngan gindugangan an iya sala pinaagi ha pag-unay. Pero han naghihikog hiya, nabari an sanga nga ginhigtan niya han pisi. Nahulog hiya ha mga bato, ngan naburit an iya tiyan.—Buhat 1:17, 18.

Temprano pa ha aga han gindara hi Jesus ha palasyo ni Ponsio Pilato. Pero waray sumulod an mga Judio nga nagdara ha iya. Natoo hira nga kon humirani hira ha mga Hentil mahuhugawan hira. Kon mahitabo ini, diri hira puydi kumaon ha panihapon han Nisan 15, an siyahan nga adlaw han Piyesta han Tinapay nga Waray Libadura, nga ginhuhunahuna nga bahin han selebrasyon han Paskua.

Ginawas hi Pilato ngan nagpakiana: “Ano an iyo akusasyon hini nga tawo?” Binaton hira: “Kon ini nga tawo waray makasala, diri unta namon hiya dadad-on nganhi ha imo.” Posible nga inabat ni Pilato nga ginpipirit nira hiya nga sentensyahan hi Jesus salit nagsiring hiya: “Dad-a niyo hiya ngan hukmi sumala ha iyo balaud.” Iginpahayag han mga Judio an ira intensyon ha pagpatay, salit nagsiring hira: “Supak ha balaud nga patayon namon an bisan hin-o.”—Juan 18:29-31.

Ha pagkamatuod, kon patayon nira hi Jesus durante han piyesta han Paskua, posible nga magsaramok an mga tawo. Pero kon makombinse nira an mga Romano nga patayon hiya tungod hin politikal nga akusasyon, may katungod an mga Romano nga buhaton ito salit diri babasulon han mga tawo ini nga mga Judio.

Waray sumati hi Pilato han mga lider han relihiyon nga gin-akusaran nira hi Jesus hin pagpasipara. Yana naghimo-himo hira hin iba pa nga mga akusasyon: “Nakita namon nga [1] ginsasamok hini nga tawo an aton nasud, [2] igindidiri an pagbayad hin buhis ha Cesar, ngan [3] nasiring nga hiya an Kristo nga hadi.”—Lucas 23:2.

Sugad nga representante han Roma, may rason hi Pilato nga mabaraka ha akusasyon nga nag-aangkon hi Jesus nga hadi hiya. Salit sinulod utro hiya ha palasyo, gintawag hi Jesus, ngan ginpakianhan: “Ikaw ba an hadi han mga Judio?” Karuyag niya sidngon, ‘Gintalapas mo ba an balaud han imperyo pinaagi ha pagsiring nga usa ka nga hadi nga nakontra ha Cesar?’ Posible nga karuyag ni Jesus hibaroan kon mationan-o na kadamu an nabatian ni Pilato mahitungod ha iya, salit nagpakiana hiya: “Ginsiring mo ba ito kay ito an imo kalugaringon nga mga ideya, o may nagsumat ha imo mahitungod ha akon?”—Juan 18:33, 34.

Basi ipakita nga diri niya kilala hi Jesus ngan karuyag niya hibaroan kon ano gud an tinuod, binaton hi Pilato: “Diri ako Judio, diri ba?” Nagdugang hiya: “Gindara ka nganhi han imo mismo mga kahimungto ngan han punoan nga mga saserdote. Ano an imo ginbuhat?”—Juan 18:35.

Waray gud likayi ni Jesus an importante nga isyu—an pagin hadi. Salit sigurado nga makakalasan gud hi Gobernador Pilato ha iya baton.