HA ORIHINAL nga mga yinaknan, ginagamit han Biblia an Hebreo nga pulong nga sheʼohlʹ ngan an katugbang hito ha Griego nga haiʹdes hin sobra 70 ka beses. Ito nga duha nga pulong may kalabotan ha kamatayon. Ha iba nga mga hubad han Biblia iginhubad ito sugad nga “lubnganan,” “impyerno,” o “buho.” Kondi, ha kadam-an nga mga yinaknan waray mga pulong nga nagpapasabot han eksakto nga kahulogan hinin Hebreo ngan Griego nga mga pulong. Salit ginagamit han New World Translation an mga pulong nga “Sheol” ngan “Hades.” Ano gud ba an iginpapasabot hini nga mga pulong? Aton tigamnan kon paonan-o ito ginagamit ha magkalainlain nga mga bersikulo han Biblia.

An Eklesiastes 9:10 nasiring: “Waray buruhaton, o paghunahuna, o hibaro, o kinaadman, didto ha Sheol, ngain ikaw kakadto.” Nangangahulogan ba ini nga an Sheol nagtutudlok ha usa ka espisipiko, o partikular nga lubnganan nga bangin ginlubngan naton han usa nga hinigugma? Diri. Kon ginagamit han Biblia an usa ka espisipiko nga lubnganan, ginagamit hito an iba nga Hebreo ngan Griego nga mga pulong, diri an sheʼohlʹ ngan haiʹdes. (Genesis 23:7-9; Mateo 28:1) Diri liwat ginagamit han Biblia an pulong nga “Sheol” para ha lubnganan diin tarampo nga iginlulubong an pipira nga mga indibiduwal, sugad han lubnganan han pamilya o lubnganan han kadam-an.—Genesis 49:30, 31.

Ano nga klase hin lugar, kon sugad, an iginpapasabot han “Sheol”? Ipinapakita han Pulong han Dios nga an “Sheol,” o “Hades,” nagpapasabot hin usa nga butang nga mas labaw gud kay ha daku nga lubnganan han kadam-an. Pananglitan, an Isaias 5:14 nasiring nga an Sheol ‘haluag ngan nginanga an iya baba hin waray sukol.’ Bisan kon ginlamoy na, siring pa, han Sheol an damu hinduro nga patay nga mga tawo, baga in naghihingyap ito pirme hin mas damu pa. (Proberbios 30:15, 16) Diri pariho ha bisan ano nga literal nga lubnganan, nga limitado la an kadamu han mga patay nga mahimo ilubong didto, an ‘Sheol diri gud natatagbaw.’ (Proberbios 27:20) Karuyag sidngon nga an Sheol diri gud napupuno. Waray ito tubtoban. Salit, an Sheol, o Hades, diri literal nga lugar ha espisipiko nga hinmumutangan. Lugod, amo ito an komon nga lubnganan, an simboliko nga lugar diin an kadam-an han katawohan nangangaturog ha kamatayon.

 An katutdoan han Biblia mahitungod han pagkabanhaw nabulig ha aton nga magkaada dugang nga pagsabot ha kahulogan han “Sheol” ngan “Hades.” Iginkakaw-ing han Pulong han Dios an Sheol ngan Hades ha klase han kamatayon nga tikang hito magkakaada pagkabanhaw. * (Job 14:13; Buhat 2:31, NW; Pahayag 20:13) Ipinapakita liwat han Pulong han Dios nga an mga aadto ha Sheol, o Hades, diri la amo adton nag-alagad kan Jehova kondi liwat an damu pa nga waray mag-alagad ha iya. (Genesis 37:35; Salmo 55:15, NW) Salit, an Biblia nagtututdo nga may “pagkabanhaw han mga minatay han mga magtadong ngan diri man magtadong.”—Buhat 24:15.