1, 2. Paghatag hin mga ehemplo han mga tawo nga gintagad ni Jehova sugad nga iya duok nga mga sangkay.

 ANO nga klase hin tawo an pipilion mo nga magin sangkay? Posible gud nga maruruyag ka makig-upod ha usa nga pariho ha imo an panhunahuna, mga naruruyagan, ngan mga prinsipyo. Ngan madadani ka ha usa nga may maopay nga mga kalidad, sugad han pagkatangkod ngan pagkabuotan.

² Ha bug-os nga kasaysayan, an Dios nagpipili hin mga tawo nga magigin iya duok nga mga sangkay. Pananglitan, hi Abraham tinawag ni Jehova nga iya sangkay. (Isaias 41:8; Jakobo 2:23) Tinawag han Dios hi David sugad nga “tawo nga nauyon han akon kasingkasing” tungod kay hiya an klase hin tawo nga hinigugma ni Jehova. (Buhat 13:22) Ngan gintagad ni Jehova hi propeta Daniel sugad nga usa nga “hinigugma gud.”​—Daniel 9:23.

3. Kay ano nga nagpipili hi Jehova hin pipira nga mga tawo nga magin iya mga sangkay?

³ Kay ano nga gintagad ni Jehova hira Abraham, David, ngan Daniel nga iya mga sangkay? Bueno, hiya nagsiring kan Abraham: “Ikaw nagtuman han akon tingog.” (Genesis 22:18) Salit hi Jehova nagigin duok ha mga tawo nga mapainubsanon nga nagbubuhat han iya ginhahangyo ha ira. “Pamati han akon tingog,” ginsidngan niya an mga Israelita, “ngan ako maiiyo Dios, ngan kamo maaakon katawohan.” (Jeremias 7:23) Kon sugton mo hi Jehova, ikaw liwat magigin sangkay niya!

4, 5. Paonan-o ipinapakita ni Jehova an iya kusog para ha iya katawohan?

⁴ Hunahunaa kon ano an mga kapulsanan han pakigsangkay ha Dios. An Biblia nasiring nga hi Jehova namimiling hin mga higayon ‘ha pagpakita han iya kusog ha ira nga an kasingkasing hingpit ngadto ha iya.’ (2 Kronikas 16:9) Paonan-o maipapakita ni Jehova an iya kusog para ha imo? An usa nga paagi iginsasaysay ha Salmo 32:​8, diin aton mababasa: “Paglaladngan ko [Jehova] ikaw ngan igsusulsog ko ikaw ha dalan nga imo kakadtoan; sasagdonan ko ikaw ngan ha bawbaw nimo ibubutang ko an akon mata.”

⁵ Mahigugmaon gud ito nga kapahayagan han pagtagad ni Jehova! Ihahatag niya ha imo an ginkikinahanglan nga giya ngan babantayan ka samtang ginsusunod mo ito. An Dios naruruyag pagbulig ha imo nga mailob mo hin malampuson an mga kakurian ngan mga pagsari ha imo. (Salmo 55:22) Salit kon bug-os-kasingkasing nga nag-aalagad ka kan Jehova, makakasarig ka gud sugad han salmista nga nagsiring: “Hi Jehova iginbutang ko gihapon ha atubangan ko; tungod kay aadi hiya ha akon too nga kamot, diri ako mahitatalindas.” (Salmo 16:8; 63:8) Oo, bubuligan ka ni Jehova nga magkinabuhi ha paagi nga nakakalipay ha iya. Kondi, sugad han imo hinbabaroan, may-ada kaaway an Dios nga karuyag pugngan ka ha pagbuhat hini.

6. Ano an akusasyon ni Satanas may kalabotan ha mga tawo?

⁶ Ha Kapitulo 11 hini nga libro iginsaysay kon paonan-o gin-ayat ni Satanas nga Yawa an pagkasoberano han Dios. Gin-akusahan ni Satanas an Dios hin pagbuwa ngan iginpasabot niya nga hi Jehova diri makatadunganon tungod ha diri pagtugot kan Adan ngan Eva nga magdesisyon para ha ira kalugaringon kon ano an husto ngan kon ano an sayop. Katapos makasala hi Adan ngan hi Eva ngan samtang an tuna nagtitikang mapuno han ira mga anak, ginruhaduhaan ni Satanas an motibo han ngatanan nga mga tawo. “An mga tawo nag-aalagad ha Dios diri tungod kay nahigugma hira ha iya,” nag-akusar hi Satanas “Tagi ako hin higayon, ngan maitatalikod ko an bisan hin-o kontra ha Dios.” An asoy mahitungod han tawo nga hi Job nagpapakita nga ini an tinotoohan ni Satanas. Hin-o hi Job, ngan paonan-o hiya nahidabi ha ayat ni Satanas?

7, 8. (a) Kay ano nga talagsahon hi Job ha ngatanan nga mga tawo ha iya panahon? (b) Paonan-o ginruhaduhaan ni Satanas an motibo ni Job?

 ⁷ Hi Job nabuhi mga 3,600 ka tuig na an naglabay. Maopay hiya nga tawo, kay hi Jehova nagsiring: “Waray lain nga pariho ha iya dida ha tuna, usa nga hingpit ngan maligdong nga tawo, usa nga nahahadlok ha Dios, ngan natalikod ha karaotan.” (Job 1:8) Hi Job nakalipay ha Dios.

⁸ Ginruhaduhaan ni Satanas an motibo ni Job ha pag-alagad ha Dios. An Yawa nagsiring kan Jehova: “Waray ba nimo himoi [hi Job] ha palibot hin alad, ngan ha palibot han ngatanan nga iya, ha kada ligid? Imo ginbendisyonan an buhat han iya mga kamot, ngan an iya manggad ginpadamu dida ha tuna. Kondi bikyawa an imo kamot yana, ngan kamkama an ngatanan nga iya, ngan hiya magtatampalas ha imo ngada ha imo nawong.”​—Job 1:​10, 11.

9. Paonan-o ginbaton ni Jehova an ayat ni Satanas, ngan kay ano?

⁹ Hito nga paagi nangatadongan hi Satanas nga hi Job nag-alagad ha Dios tungod la ha iya nakakarawat nga balos. Nag-akusar liwat an Yawa nga kon sarihan hi Job, babayaan niya an Dios. Paonan-o ginbaton ni Jehova an ayat ni Satanas? Tungod kay nahidadabi ha isyu an motibo ni Job, gintugotan ni Jehova hi Satanas nga sarihan hi Job. Hini nga paagi, an gugma ni Job ha Dios​—o an kawaray gugma—​makikita hin matin-aw.

10. Ano nga mga kakurian an inabot kan Job, ngan ano an iya reaksyon?

¹⁰ Ginsarihan dayon ni Satanas hi Job ha magkalainlain nga mga paagi. Ginkawat an iba han mga hayop ni Job, ngan ginpatay an iba pa. Ginpamatay an kadam-an han iya mga surugoon. Nagresulta ini hin kakurian ha panginabuhi. Inabot pa an trahedya han an napulo nga anak ni Job nagkamatay ha usa nga bagyo. Kondi, bisan pa hinin makalilisang nga mga hitabo, “hi Job waray makasala, o waray pahamtangi an Dios ha linurong.”​—Job 1:22.

11. (a) Ano an ikaduha nga akusasyon ni Satanas mahitungod kan Job, ngan paonan-o binaton hi Jehova? (b) Ano an reaksyon ni Job ha iya maul-ol nga sakit?

¹¹ Hi Satanas waray umundang. Posible nga naghunahuna hiya nga bisan kon makakailob hi Job han kawara han iya mga panag-iya, mga surugoon, ngan mga anak, isasalikway niya an Dios kon  magkasakit hiya. Gintugotan ni Jehova hi Satanas nga paantuson hi Job hin mangil-ad, maul-ol nga sakit. Kondi bisan pa hini waray mawara an pagtoo ni Job ha Dios. Lugod, marig-on hiya nga nagsiring: “Ngada ha akon kamatay diri ko isasalikway . . . an akon pagkamaligdong [“integridad,” NW]”!​—Job 27:5.

12. Paonan-o ginbaton ni Job an ayat han Yawa?

¹² Diri maaram hi Job nga hi Satanas an nagpahinabo han iya mga kakurian. Tungod kay diri maaram han mga detalye mahitungod han ayat han Yawa ha pagkasoberano ni Jehova, nahadlok hi Job nga bangin tikang ha Dios an iya mga problema. (Job 6:4; 16:11-14) Bisan pa hito, gintipigan niya an iya integridad kan Jehova. Ngan an akusasyon ni Satanas nga nag-aalagad la hi Job ha Dios tungod han hakugnon nga mga hinungdan napamatud-an nga buwa tungod kay nagpabilin hi Job nga matinumanon!

13. Ano an nahitabo tungod kay hi Job matinumanon ha Dios?

¹³ An pagkamatinumanon ni Job naghatag kan Jehova hin marig-on nga baton ha nakakainsulto nga ayat ni Satanas. Sangkay gud ni Jehova hi Job, ngan ginbalosan hiya han Dios tungod han iya pagkamatinumanon.​—Job 42:12-17.

14, 15. Kay ano nga makakasiring kita nga an ayat ni Satanas may kalabotan kan Job naaplikar ha ngatanan nga mga tawo?

¹⁴ An isyu mahitungod han integridad ha Dios nga iginbangon ni Satanas diri kay kontra kan Job la. Nahidadabi ka liwat. Matin-aw nga ipinapakita ini ha Proberbios 27:​11, diin an Pulong ni Jehova nasiring: “Anak ko, pagmakinaadmananon, ngan himoa an akon kasingkasing nga malipayon, nga ako makabaton ha iya nga nagsasaway [“nagtatamay,” NW] ha akon.” Ini nga mga pulong, nga iginsurat ginatos ka tuig na tikang ha kamatay ni Job, nagpapakita nga hi Satanas nagtatamay pa gihapon ha Dios ngan nag-aakusar ha Iya mga surugoon. Kon nagkikinabuhi kita ha paagi nga nakakalipay kan Jehova, ha pagkamatuod nabulig kita ha pagbaton ha buwa nga mga akusasyon ni Satanas, ngan hito nga paagi napapalipay naton an kasingkasing han Dios. Ano an inaabat mo mahitungod hito? Diri ba makalilipay an pagkaada bahin ha pagbaton ha buwa nga mga akusasyon han Yawa, bisan kon mangahulogan ito hin paghimo hin pipira nga mga pagbag-o ha imo kinabuhi?

 ¹⁵ Tigamni nga hi Satanas nagsiring: “An ngatanan nga gintatag-iya han tawo iya ihahatag para han iya kinabuhi.” (Job 2:4) Ha pagsiring nga “tawo,” ginklaro ni Satanas nga an iya akusasyon naaplikar diri la kan Job kondi ha ngatanan nga mga tawo. Importante gud ito nga punto. Ginruruhaduhaan ni Satanas an imo integridad ha Dios. Karuyag han Yawa nga makita nga gintatalapas mo an Dios ngan binabayaan an matadong nga pagkinabuhi kon nabangon an mga kakurian. Paonan-o mahimo buhaton ini ni Satanas?

16. (a) Ano nga mga paagi an ginagamit ni Satanas basi ipahirayo an mga tawo tikang ha Dios? (b) Paonan-o mahimo gamiton han Yawa ini nga mga paagi kontra ha imo?

¹⁶ Sugad han ginhisgotan ha Kapitulo 10, ginagamit ni Satanas an magkalainlain nga mga paagi ha pagpatalikod han mga tawo tikang ha Dios. Ha usa nga bahin, hiya naatake “sugad hin maaringasa nga leon, naglilinakat-lakat pagpinamiling hin iya lalamyon.” (1 Pedro 5:8) Salit an impluwensya ni Satanas mahimo makita kon an mga kasangkayan, mga paryente, o iba pa nakontra ha imo mga pangalimbasog ha pag-aram ha Biblia ngan pag-aplikar han imo nahibabaroan. a (Juan 15:​19, 20) Ha luyo nga bahin, hi Satanas pirme nga “nagpapakaaro-anghel han kahayag.” (2 Korinto 11:14) Mahimo gamiton han Yawa an tuso nga mga paagi ha paglimbong ngan pagsulay ha imo nga bayaan an paagi han pagkinabuhi nga nakakalipay ha Dios. Mahimo liwat niya gamiton an panluya, bangin paabaton ka nga diri ka kwalipikado ha pagpalipay ha Dios. (Proberbios 24:10) Nagios man hi Satanas “sugad hin maaringasa nga leon” o “nagpapakaaro-anghel han kahayag,” an iya ayat pariho la gihapon: Nasiring hiya nga kon makaeksperyensya ka hin mga kakurian o mga pagsulay, maundang ka ha pag-alagad ha Dios. Paonan-o mo mababaton an iya ayat ngan mapapamatud-an an imo integridad ha Dios, sugad han ginbuhat ni Job?

17. Ano an siyahan nga hinungdan han pagsugot ha mga sugo ni Jehova?

¹⁷ Mahimo mo batunon an ayat ni Satanas pinaagi han pagkinabuhi ha paagi nga nakakalipay ha Dios. Ano an nahidadabi hini? An Biblia nabaton: “Higugmaon mo hi Jehova nga imo Dios ha bug-os mo nga kasingkasing, ngan ha bug-os mo nga kalag, ngan ha bug-os mo nga kusog.” (Deuteronomio 6:5) Samtang nagtutubo an imo gugma ha Dios, mapupuno ka hin hingyap ha pagbuhat han iya ginkikinahanglan ha imo. “Amo ini an gugma ha Dios,” nagsurat hi apostol Juan, “nga pagtumanon ta an iya mga sugo.” Kon nahigugma ka kan Jehova ha bug-os mo nga kasingkasing, makikita mo nga “an iya mga sugo diri magbug-at.”​—1 Juan 5:3.

18, 19. (a) Ano an pipira han mga sugo ni Jehova? (Kitaa an kahon ha pahina 122.) (b) Paonan-o kita nahibabaro nga an Dios diri naglalaom hin sobra kay ha mahihimo naton?

¹⁸ Ano an mga sugo ni Jehova? An pipira hito may kalabotan ha paggawi nga kinahanglan likyan naton. Pananglitan, kitaa an kahon ha pahina 122, nga may ulohan nga “ Likayi an Kinangangalasan ni Jehova.” Makikita mo dida nga iginlista an paggawi nga matin-aw nga ginkukondenar han Biblia. Ha siyahan nga pagkita, an pipira nga mga buhat nga iginlista bangin baga in diri gud maraot. Kondi katapos pamalandungon an iginhatag nga mga teksto, posible nga makita mo an kinaadman han mga balaud ni Jehova. An paghimo hin mga pagbag-o ha imo paggawi bangin amo an pinakamakuri nga imo maieksperyensyahan. Kondi, an pagkinabuhi ha paagi nga nakakalipay ha Dios nagriresulta hin daku nga katagbaw ngan kalipayan. (Isaias 48:​17, 18) Ngan mahihimo mo gud ito. Paonan-o kita nahibabaro hito?

¹⁹ Hi Jehova diri gud naglalaom hin sobra kay ha mahihimo naton. (Deuteronomio 30:11-14) Mas maaram hiya han aton mahihimo ngan han aton mga limitasyon kay ha aton. (Salmo 103:14) Dugang pa, mahimo kita pakusgon ni Jehova ha pagsugot ha iya. Hi apostol Pablo nagsurat: “An Dios matinumanon, ngan diri matugot nga pagsulayon kamo labaw ha iyo kasadangan; kondi upod ha pagsulay mahatag liwat hiya hin katigayonan ha paglikay, basi nga kamo makahimo ha pag-antos.” (1 Korinto 10:13) Basi buligan ka nga makailob, maihahatag pa ngani ni  Jehova ha imo an “kapin kaopay nga gahum.” (2 Korinto 4:7) Katapos makailob han damu nga mga kakurian, hi Pablo nakasiring: “Ngatanan mahihimo ko ha gahum han nagpaparig-on ha akon.”​—Filipos 4:13.

20. Ano nga mga kalidad nga nakakalipay ha Dios an sadang mo patuboon, ngan kay ano nga importante ini?

²⁰ Syempre, labaw pa an nahidadabi ha pagpalipay kan Jehova kay ha paglikay la ha mga butang nga iya kinangangalasan.  Kinahanglan higugmaon mo liwat an iya ginhihigugma. (Roma 12:9) Diri ka ba nadadani nga makigsangkay ha mga tawo nga pariho ha imo an mga panhunahuna, mga naruruyagan, ngan mga prinsipyo? Sugad liwat hito hi Jehova. Salit pangalimbasugi nga higugmaon an mga butang nga ginhihigugma ni Jehova. An pipira hini nga mga butang iginsasaysay ha Salmo 15:1-5, diin aton mababasa an mahitungod hadton gintatagad han Dios nga iya mga sangkay. An mga sangkay ni Jehova nagpapakita han tinatawag han Biblia nga mga “bunga han espiritu.” Kaupod hito an mga kalidad sugad han “gugma, kalipay, pakigdait, pagkamailob, pagkamalolooyon, pagkamaopay,  pagkamatinoohon, pagkaaghop, paggahum ha kalugaringon.”​—Galasia 5:​22, 23.

21. Ano an mabulig ha imo nga mapatubo an mga kalidad nga nakakalipay ha Dios?

²¹ An regular nga pagbasa ngan pag-aram ha Biblia mabulig ha imo nga mapatubo an mga kalidad nga nakakalipay ha Dios. Ngan an pakahibaro han ginkikinahanglan han Dios mabulig ha imo nga ipahiuyon an imo mga panhunahuna ha panhunahuna han Dios. (Isaias 30:​20, 21) Kon mas ginpaparig-on mo an imo gugma kan Jehova, mas magdudugang an imo hingyap nga magkinabuhi ha paagi nga nakakalipay ha Dios.

22. Ano an matutuman mo kon magkinabuhi ka ha paagi nga nakakalipay ha Dios?

²² Ginkikinahanglan an pangalimbasog ha pagkinabuhi ha paagi nga nakakalipay kan Jehova. Iginpapariho han Biblia an pagbag-o han imo kinabuhi ha paghukas han imo daan nga personalidad ngan pagsul-ot hin bag-o. (Kolosas 3:​9, 10) Kondi mahitungod han mga sugo ni Jehova, an salmista nagsurat: ‘Ha pagtuman hito may daku nga balos.’ (Salmo 19:11) Makikita mo liwat nga daku hinduro an balos han pagkinabuhi ha paagi nga nakakalipay ha Dios. Pinaagi han pagbuhat hito, mababaton mo an ayat ni Satanas ngan mapapalipay mo an kasingkasing ni Jehova!